RŨGANO RWA 78
Mwandĩko wa Guoko Rũthingo-inĩ
KAĨ kũrekĩka atĩa? Andũ me na ndĩa nene. Mũthamaki wa Babuloni etĩte ageni a bata ngiri ĩmwe. Marahũthĩra ikombe cia thahabu na cia betha hamwe na mbakũri iria ciarutĩtwo Jerusalemu hekarũ-inĩ ya Jehova. Na rĩu, o ro rĩmwe-rĩ, ciara cia guoko kwa mũndũ ikĩonekana rĩera-inĩ na ikĩambĩrĩria kwandĩka rũthingo-inĩ. Andũ othe nĩamaku.
Belishazaru, mũcũkũrũwe wa Nebukadinezaru, nĩwe mũthamaki ihinda rĩrĩ. Akĩanĩrĩra akiuga andũ ake othe ogĩ marehwo. Akĩmera ũũ: ‘Mũndũ ũrĩa ũrĩhota gũthoma ndemwa ici na anyonie ũrĩa ingĩtaũrũo, nĩekũheo iheo nyingĩ na atuwo wa gatatũ ũthamaki-inĩ ũyũ.’ No gũtirĩ o na ũmwe wa andũ acio ogĩ wahotire gũthoma mwandĩko ũcio warĩ rũthingo-inĩ, o na kana ũrĩa ũngĩataũrirũo.
Nyina wa mũthamaki akĩigua inegene agĩtonya kũu kwarĩagĩrũo. Eerire mũthamaki atĩrĩ, ‘Tiga kũnyamarĩka. Tondũ gũkũ bũrũri waku ũrĩa waathaga-rĩ, kũrĩ mũndũ wĩ na roho wa ngai ĩrĩa theru thĩinĩ wake. Rĩrĩa gukaguo Nebukadinezaru aathamakaga-rĩ, aamũtuire mũnene wa andũ ake othe arĩa maarĩ ogĩ. Mũndũ ũcio nĩ Danieli. Mũtũmanĩre, nake nĩegũkwĩra ũtaũri wa maũndũ maya.’
O hĩndĩ ĩo Danieli agĩkĩrehwo thĩinĩ. Thutha wa kũrega kwamũkĩra iheo o ciothe, Danieli akĩambĩrĩria kũmwĩra kĩrĩa gĩatũmire hĩndĩ ĩmwe Jehova eherie Nebukadinezaru gukawe wa Belishazaru ũthamaki-inĩ. Danieli oigire atĩ, ‘Aarĩ mwĩtĩi mũno. Nake Jehova akĩmũherithia.’
Rĩu Danieli akĩĩra Belishazaru ũũ: ‘Wee-rĩ, nĩ ũũĩ ũrĩa gwatuĩkire, na wĩtĩĩte o ta ũrĩa Nebukadinezaru aatariĩ. Ũreheete ikombe na mbakũri kuuma hekarũ-inĩ ya Jehova na nĩcio ũranyuĩra. Nĩũkumĩtie ngai iria cia mĩtĩ na cia mahiga, na ndũigana kũgoocithia Mũũmbi Mũnene wa indo ciothe. Nĩkĩo gĩtũmi kĩa Ngai gũtũma guoko kwandĩke ciugo ici.’
Danieli oigire ũũ: ‘Kwandĩkĩtwo, MENE, MENE, TEKEL, UPHARSIN.’
‘MENE nĩ ta kuuga atĩ, Ngai nĩatarĩte mĩaka ya ũthamaki waku, na akaũnina. TEKEL nĩ ta kuuga atĩ, Wee-rĩ, nĩũthimĩtwo na ratiri, ũkonwo ũtarĩ mũkinyu. UPHARSIN nĩ kuuga, ũthamaki waku nĩũgayũkanĩtio, ũkaheo Amedia na Aperisia.’
O rĩrĩ Danieli araria ũguo-rĩ, Amedia na Aperisia nĩmaambĩrĩirie kũhũũra Babuloni. Megwatĩire itũũra rĩu na makĩũraga Belishazaru. Ũhoro wa ma nĩ atĩ mwandĩko wa guoko rũthingo-inĩ ũkĩhingio ũtukũ ũcio! Rĩu rĩ, gũgũtuĩka atĩa harĩ Aisiraeli? Nĩ tũkuona o kahinda gatarĩ coho, no ĩndĩ mbere reke tuone ũrĩa gwatuĩkire he Danieli.
