Andũ anana tu nĩo mahonokire Kĩguũ, no matukũ mathianga makĩongerereka magĩkinya makiri. Rĩu ningĩ, mĩaka 352 thutha wa Kĩguũ, Iburahimu agĩciarũo. Twĩrutaga ũrĩa Ngai aahingirie kĩĩranĩro gĩake na ũndũ wa kũhe Iburahimu mũriũ wetagwo Isaka. Rĩu ningĩ, harĩ ariũ erĩ a Isaka-rĩ, Ngai agĩthura Jakubu.

Jakubu aarĩ na famĩlĩ nene ya ariũ 12 na airĩtu gakundi. Aariũ 10 a Jakubu nĩ maathũire Jusufu mũrũ waithe ũrĩa mũnini na makĩmwendia ũkombo-inĩ Misiri. Thutha ũcio, Jusufu agĩtuĩka mwathani wĩ bata wa Misiri. Rĩrĩa kwagĩire ng’aragu nene, Jusufu akĩgeria ariũ a ithe one kana nĩ magarũrũkĩte ngoro. Thutha ũcio, famĩlĩ yothe ya Jakubu, Aisiraeli, magĩthamĩra Misiri. Ũũ kwahanire mĩaka 290 Iburahimu arĩkĩtie gũciarũo.

Mĩaka 215 ĩrĩa yarũmĩrĩire Aisiraeli matũũrire Misiri. Thutha wa Jusufu gũkua, magĩtuĩka ngombo kuo. Matuku mathianga, Musa agĩciarũo, na Ngai akĩmũtũmĩra gũkũũra Aisiraeli kuuma Misiri. Ũguo nĩ takuga, historia ya mĩaka 857, ĩ Gĩcunjĩ-inĩ gĩa KERĨ.