JUSUFU rĩu akĩremwo nĩ kwĩrigĩrĩria rĩngĩ. Akĩra ndungata ciake ciothe ciume nja. Rĩrĩa maatigirwo marĩ oiki na ariũ a ithe-rĩ, Jusufu akĩambĩrĩria kũrĩra. Twahota gwĩciria ũrĩa ariũ a ithe mamakire, tondũ matiamenyaga kĩrĩa kĩratũma arĩre. Thutha-inĩ akiuga ũũ: ‘Nĩ niĩ Jusufu. Ĩ baba akĩrĩ o muoyo?’

Ariũ a ithe makĩgega ũ atĩ makĩremwo nĩ kũaria. Magĩĩtigĩra. Ĩndĩ Jusufu akĩmera: ‘Ndamũthaitha, okokai harĩ niĩ.’ Mamũkuhĩhĩria-rĩ, akĩmera atĩrĩ: ‘Nĩ niĩ Jusufu, mũrũ wa ithe wanyu ũrĩa mwendirie Misiri.’

Jusufu agĩthiĩ na mbere kwaria o wega: ‘Tigaai kwĩrakarĩra tondũ nĩ mwanyendirie gũkũ. Ngai nĩwe wandekirie nĩ getha njũke gũkũ Misiri nĩ getha honokie mĩoyo ya andũ. Firauni nĩanduĩte mwathi wa bũrũri wothe. Na rĩu ũkĩrai mũhiũhe mũcoke kwĩ baba mũmwĩre ũhoro ũyũ. Mũmũĩre aikũrũke atũũre gũkũ.’

Rĩu Jusufu akĩmahĩmbĩria na moko, na akĩmamumunya othe. Rĩrĩa Firauni aiguire atĩ ariũ a ithe na Jusufu nĩ mokĩte-rĩ, akĩĩra Jusufu ũũ: ‘Reke moe makari mathiĩ magĩre ithe na famĩlĩ ciao macoke gũkũ. Nĩngamahee gĩcunjĩ kĩrĩa kĩega mũno thĩinĩ wa bũrũri wa Misiri yothe.’

Ũguo noguo mekire. Mbica-inĩ ĩno no wone Jusufu okĩte gũtũnga ithe, rĩrĩa okire Misiri ena famĩlĩ yake yothe.

Famĩlĩ ya Jakubu nĩ yakoretwo yongererekete mũno. Othe hamwe maarĩ 70 rĩrĩa maathamĩire Misiri, tũgĩtara Jakubu na ciana ciake na acũkũrũ. No ningĩ nĩ kwarĩ na atumia, ona hihi ndungata nyingĩ. Acio othe magĩgĩikara Misiri. Meetagwo Aisiraeli, tondũ Ngai nĩ aagarũrĩte rĩĩtwa rĩa Jakubu agetwo Isiraeli. Aisiraeli maatuĩkire andũ a mwanya mũno he Ngai, ta ũrĩa tũgũcoka kũona thutha-inĩ.