RŨGANO RWA 13
Iburahimu—Aarĩ Mũrata wa Ngai
MWENA ũmwe ũrĩa andũ maathire gũtũũra thutha wa Kĩguũ wetagwo Uru. Watuĩkire itũũra rĩ igweta rĩarĩ na nyũmba imwe thaka. No ĩndĩ andũ a kũu maathathayagia ngai itarĩ cia ma. Ũguo noguo kwarĩ thĩinĩ wa Babeli. Andũ a Uru na Babeli matiahanaga ta Nuhu na mũriũ wake Shemu, arĩa maathiaga na mbere gũtungatĩra Jehova.
Mĩaka 350 thutha wa kĩguũ-rĩ, Nuhu ũrĩa waarĩ mwĩhokeku agĩgĩkua. Mĩaka ĩĩrĩ tu yaahĩtũka-rĩ, mũndũ ũyũ ũrona mbica-inĩ agĩciarũo. Aarĩ mũndũ wa bata mũno he Ngai. Rĩĩtwa rĩake rĩarĩ Iburahimu. Atũũraga na famĩlĩ yake itũũra-inĩ rĩu rĩa Uru.
Mũthenya ũmwe Jehova akĩĩra Iburahimu: ‘Uma Uru na ũtige andũ anyu, ũthiĩ bũrũri ũrĩa ngũkuonia.’ Rĩu-rĩ, Iburahimu nĩaathĩkĩire Ngai na agĩtigana na mũtũũrĩre mwega kũu Uru? Ĩĩni, nĩguo ekire. Tondũ Iburahimu hingo ciothe nĩaathĩkagĩra Ngai-rĩ, nĩkĩo gĩatũmire etwo mũrata wa Ngai.
Amwe a famĩlĩ ya Iburahimu maathire hamwe nake rĩrĩa oimire Uru. Tera ithe wake maathire hamwe. O ũndũ ũmwe na Loti mũriũ wa mũrũ wa nyina. O na ningĩ Iburahimu agĩthiĩ na Sara mũtumia wake. Ihinda rĩahĩtũka-rĩ, othe magĩkinya handũ hetagwo Harani, harĩa Tera aakuĩrĩire. Maarĩ kũraya mũno kuuma Uru.
Thutha wa ihinda inyinyi kũhĩtũka Iburahimu na nyũmba yake makiuma Harani magĩkinya bũrũri wetagwo Kanaani. Jehova akiuga: ‘Ũyũ nĩguo bũrũri ũrĩa ngahee ciana ciaku.’ Iburahimu aikarire Kanaani na atũũraga hema-inĩ.
Ngai akĩambĩrĩria gũteithia Iburahimu ũũ atĩ akĩgĩa na rũru rũnene rwa ng’ondu na nyamũ ingĩ o na ndungata magana maingĩ. No we na Sara matiigana kũgĩa na ciana ciao kĩũmbe.
Rĩrĩa Iburahimu aarĩ na ũkũrũ wa mĩaka 99, Jehova akĩmũĩra: ‘Ndakwĩra atĩ nĩ ũgatuĩka ithe wa andũ a ndũrĩrĩ nyingĩ.’ Ũndũ ũyũ ũngĩahotekire atĩa tondũ rĩu Iburahimu na Sara maarĩ akũrũ mũno akũgĩa na mwana?
