RĨU mĩaka ĩĩrĩ nĩ mĩhĩtũku, na Jusufu arĩ o korokoro-inĩ. Mũtwaranĩri gĩkombe ndarĩ aamũririkana. Rĩu ũtukũ ũmwe Firauni akĩrota iroto igĩrĩ cia mwanya mũno, na akĩrigwo nĩ ũtaũri wacio. Nĩ ũramwona akomete haarĩa? Rũcinĩ rũrũ rũngĩ Firauni agĩĩta andũ ake arĩa ogĩ na agĩkĩmera maũndũ marĩa aarotete. Ĩndĩ matigana kũmenya ũtaũri wa iroto icio.

Rĩu thutha-inĩ mũtwaranĩri gĩkombe akĩririkana Jusufu. Akĩĩra Firauni ũũ: ‘Hĩndĩ ĩrĩa ndarĩ korokoro-inĩ-rĩ, kwarĩ mũndũ ũmwe ũngĩahotire gũtaũra iroto.’ O rĩmwe Firauni agĩathana Jusufu arutwo korokoro-inĩ.

Rĩu Firauni akĩĩra Jusufu iroto ciake ũũ: ‘Ndonire ng’ombe mũgwanja noru na njega mũno. Ningĩ ngĩona ingĩ mũgwanja hinyaru na itarĩ njega. Nacio icio hĩnju ikĩrĩa ng’ombe icio noru.

‘Thĩinĩ wa kĩroto gĩakwa gĩa kerĩ ngĩona magira mũgwanja mega, maiyũrĩte ngano makĩmera mũtĩ-inĩ ũmwe wa ngano. Ngĩcoka ngĩona magira mũgwanja mahũthũ momanĩrĩru. Namo magira macio mahũthũ mũgwanja makĩmeria macio mũgwanja mega.’

Jusufu agĩkĩĩra Firauni atĩrĩ: ‘Iroto icio igĩrĩ ironania kĩndũ o kĩmwe. Ng’ombe icio mũgwanja noru na magira macio mũgwanja mega nĩ mĩaka mũgwanja, nacio ng’ombe icio mũgwanja hĩnju na magira mahũthũ mũgwanja nĩ mĩaka ĩngĩ mũgwanja. Nĩgũgũũka mĩaka mũgwanja ya bũthi mũnene bũrũri wothe wa Misiri. Thutha ũcio kũgĩe mĩaka mũgwanja ya ng’aragu.’

Jusufu akĩĩra Firauni atĩrĩ: ‘Thura mũndũ mũũgĩ na ũmũtue mũrũgamĩrĩri wa gũcokanĩrĩria irio ihinda-inĩ rĩrĩ rĩa mĩaka mũgwanja ya bũthi. Nĩ getha andũ matigathire mĩaka-inĩ ĩyo ĩrũmĩrĩire mũgwanja ya ng’aragu.’

Firauni agĩtĩkania na ũhoro ũcio. Agĩthura Jusufu acokanĩrĩrie irio, na gũciikia makũmbĩ-inĩ. Jusufu e wa kerĩ kuuma kũrĩ Firauni, agĩtuĩka mũndũ wa bata mũno thĩinĩ wa Misiri.

Mĩaka ĩnana thutha-inĩ, hĩndĩ ĩyo ya ng’aragu-rĩ, Jusufu nĩonire andũ arũme mokĩĩte. Nĩ ũũĩ maarĩ a? Ĩĩni, maarĩ ariũ arĩa akũrũ 10 a ithe wao! Ithe wao Jakubu amatũmĩte Misiri tondũ irio ciao ciarĩ hakuhĩ gũthira mũciĩ-inĩ kwao Kanaani. Jusufu nĩaamenyire ariũ a ithe, ĩndĩ o matigana kũmũmenya. Nĩ ũũĩ gĩtũmi nĩ kĩĩ? Nĩ tondũ rĩu Jusufu nĩakũrakũrĩte, na ningĩ akehumba nguo cia mwanya.

Jusufu nĩaririkanire atĩ rĩrĩa aarĩ kahĩĩ nĩarotete onete ariũ a ithe mokĩte kũmũinamĩrĩra. No ũririkane ũgĩthoma ũhoro ta ũcio? Nĩ ũndũ ũcio Jusufu rĩu akĩona atĩ nĩ Ngai wamũtũmĩte kũu Misiri, na haarĩ gĩtũmi kĩega. Ũgwĩciiria Jusufu ekire atĩa? Tareke tuone.