MŨTUMIA ũyũ ũrĩ mbica-inĩ ĩno-rĩ, nĩũramenya nũũ? Rĩĩtwa rĩake nĩ Rebeka. Na mũndũ ũũrĩa ũroka gũtũngana nake nĩ Isaaka. Egũtuĩka mũtumia wake. Gwatuĩkire ũguo atĩa?

Ĩĩni, Iburahimu endaga mũrũwe Isaaka agĩe na mũtumia mwega. Ndendaga Isaaka ahikie ũmwe wa atumia a Kaanani, tondũ andũ acio maathathayagia ngai cia maheni. Nĩ ũndũ ũcio Iburahimu agĩĩta ndungata yake akĩmĩĩra: ‘Ngwenda ũcoke Harani ũkinye kũrĩ andũ aitũ, ũrutĩre mũrũ wakwa Isaaka mũka kuo.’

O rĩmwe ndungata ya Iburahimu ĩkĩoya ngamĩra ikũmi ĩkĩoha rũgendo rũu rũraya. Rĩrĩa yaakinyire hakuhĩ na kũrĩa mbarĩ ya Iburahimu yatũũraga-rĩ, ĩkĩrũgama gĩthima-inĩ. Kwarĩ mathaa ma kĩhwaĩ-inĩ, rĩrĩa andũ-a-nja a itũũra rĩu mathiaga gũtaha maĩ gĩthima-inĩ. Hĩndĩ ĩyo ndungata ya Iburahimu ĩkĩhoya Jehova ĩkĩuga: ‘Reke mũirĩtu ũrĩa ũrĩhee maĩ na ahe ngamĩra atuĩke nĩwe mũtumia ũrĩa ũthurĩire Isaaka.’

O kahinda kau Rebeka agĩgĩũka gũtaha maĩ. Rĩrĩa ndungata ĩyo yamũhoire maĩ-rĩ, mũirĩtu ũcio akĩmũkundia. Agĩcoka agĩthiĩ agĩtaha maĩ ma kũnyotora ngamĩra icio ciothe. Ũcio waarĩ wĩra mũritũ tondũ ngamĩra inyuaga maĩ maingĩ mũno.

Rĩrĩa aarĩkirie wĩra ũcio-rĩ, ndungata ya Iburahimu ĩkĩmũria rĩĩtwa rĩa ithe. Ningĩ ĩkĩmũria kana no ĩhote kũrara ũtukũ ũcio kwao mũciĩ. Nake agĩcokia: ‘Baba etagwo Bethueli, na nĩ harĩ handũ haku ha kũrara.’ Ndungata ya Iburahimu nĩ yoĩ atĩ Bethueli aarĩ mũriũ wa Nahoru ũrĩa warĩ mũrũ wa nyina na Iburahimu. Kwoguo agĩturia ndu agĩkĩgooca Jehova nĩũndũ wa kũmũkinyia kwa mbarĩ ya Iburahimu.

Ũtukũ ũcio-rĩ, ndungata ya Iburahimu ĩkĩĩra Bethueli na Labani mũrũ wa nyina na Rebeka gĩtũmi gĩa gũka gwake. Erĩ magĩtĩkanĩria atĩ Rebeka no athiĩ nayo na ahikĩre Isaaka. Rebeka orio-rĩ, oigire atĩa? Oigire, ‘ĨĨ,’ nĩendaga gũthiĩ. Kwoguo mũthenya ũyũ ũngĩ makĩhaica ngamĩra makĩambĩrĩria rũgendo rũu rũraya rũa gũcoka Kanaani.

Rĩrĩa maakinyire, kwarĩ kĩhwaĩ-inĩ. Rebeka akĩona mũndũ waceeraga mũgũnda-inĩ. Aarĩ Isaaka. Nake nĩ aakenire mũno nĩ kuona Rebeka. Nyina wa Isaaka Sara aakuĩte mĩaka ĩtatũ yarĩkĩtie kũhĩtũka, na kwoguo aarĩ o na kĩeha. Na rĩu Isaaka agĩkĩenda Rebeka mũno, na gĩkeno gĩake gĩkĩmũcokerera.