NĨ ŨRAMENYA andũ aya Jakubu araria nao nĩa? Aacemanirie nao gĩthima-inĩ, thutha wa gũthiĩ rũgendo rwa mĩthenya mĩingĩ. Nĩ kũrĩithia maarĩithagia ng’ondu cio. Nake Jakubu akĩmoria: ‘Mũrĩ akũ andũ aya?’

Magĩcokia, ‘Tũrĩ a Harani.’

Jakubu akĩũria, ‘Nĩmũngĩkorũo mũũĩ Labani?’

Makiuga, ‘Ĩĩ, nĩtũmũũĩ.’ ‘Rakeli, mwarĩ, nĩwe ũũrĩa ũroka na ng’ondu cia ithe.’ Nĩ ũrona Rakeli o hau haraihu agĩũka?

Rĩrĩa Jakubu onire Rakeli arĩ na ng’ondu cia mamawe Labani-rĩ, agĩthiĩ akĩgaragaria ihiga rĩthenge gĩthima-inĩ nĩguo ng’ondu inyue maĩ. Jakubu agĩkĩmumunya Rakeli na akĩmwĩra aarĩ ũ. Agĩcanjamũka mũno, agĩgĩteng’era mũciĩ na akĩĩra ithe Labani.

Labani nĩ aigũire wega mũno nĩgũkorũo nĩmangĩaikaranirie na Jakubu. Na rĩrĩa Jakubu oririe ahikie Rakeli, Labani nĩ aakenire. No ningĩ-rĩ, agĩkĩũria Jakubu amũtungatĩre mĩaka mũgwanja nĩ ũndũ wa Rakeli. Na tondũ nĩ endete Rakeli mũno-rĩ, Jakubu agĩgĩka o ũguo. No rĩrĩa gwakinyire hĩndĩ ya ũhiki-rĩ, nĩ ũũĩ ũrĩa gwatuĩkire?

Labani aaheire Jakubu Lea mwarĩ ũrĩa waarĩ mũkũrũ handũ ha Rakeli. Hĩndĩ ĩrĩa Jakubu eetĩkĩrire gũtungatĩra Labani mĩaka ĩngĩ mũgwanja-rĩ, agĩkĩmũhe Rakeli o nake atuĩke mũtumia wake. Mahinda-inĩ macio-rĩ, Ngai nĩ eetĩkĩrĩtie andũ makorũo marĩ na makĩria ya mũtumia ũmwe. No rĩu-rĩ, ta ũrĩa Biblia ĩrutanaga, mũndũ agĩrĩirũo akorũo arĩ na mũtumia o ũmwe tu.