JUSUFU aarĩ na mĩaka 17 tu rĩrĩa aatwarirũo Misiri. Aakinya kuo akĩenderio mũndũ wetagwo Potifaru. Potifaru aarutagĩra wĩra mũthamaki wa Misiri, ũrĩa wetagwo Firauni.

Jusufu nĩaarutĩire mũnene wake Potifaru wĩra na kĩo. Jusufu aagimaranga-rĩ, Potifaru akĩmũtua mũrũgamĩrĩri wa nyũmba yake yothe. Rĩu-rĩ, gĩtũmi kĩa Jusufu gũkorũo arĩ korokoro-inĩ nĩ kĩĩ? Nĩ ũndũ wa mũtumia wa Potifaru.

Rĩrĩa Jusufu aakũrire agĩtuĩka kĩĩrorerũa-rĩ, mũtumia wa Potifaru nĩendire makome nake. No Jusufu nĩ aamenyaga ũndũ ũyũ ndwagĩrĩire, na ndangĩekire ũguo. Mũtumia wa Potifaru akĩrakara mũno. Rĩrĩa mũthuriwe okire mũciĩ-rĩ, akĩmũhenia na akĩmwĩra ũũ: ‘Jusufu nĩ mũũru mũno nĩakũgeragia gũkoma na niĩ.’ Potifaru nĩ etĩkirie mũtumia wake na akĩrakarĩra Jusufu mũno. Kwoguo agĩathana aikio korokoro-inĩ.

Mũndũ ũrĩa warũgamĩrĩire korokoro-rĩ, o rĩmwe akĩona atĩ Jusufu aarĩ mũndũ mwega. Agĩkĩmũtua mũrũgamĩrĩri wa ohwo arĩa angĩ othe. Thutha ũcio-rĩ, Firauni akĩrakario nĩ mũmũtwarĩri gĩkombe na mũmũthondekeri mũgate, agĩkĩmaikia korokoro-inĩ. Ũtukũ ũmwe-rĩ, o mũndũ akĩrota kĩroto kĩa mwanya, no matiamenyaga mũtaũrĩre wa iroto ciao. Mũthenya ũcio ũngĩ Jusufu akiuga ũũ: ‘Njĩrai iroto cianyu.’ Rĩrĩa maamwĩrire-rĩ, Jusufu, na ũhoti wa Ngai, agĩkĩmataũrĩra iroto ciao.

Harĩ mũtũari wa gĩkombe-rĩ, Jusufu agĩkĩmwĩra ũũ: ‘Thutha wa matukũ matatũ nĩ ũkauma korokoro-inĩ, na ũcoke kũnengera Firauni gĩkombe rĩngĩ.’ Jusufu agĩkĩongerera kuuga: ‘Woima korokoro-inĩ, ĩra Firauni ũhoro wakwa, na ũndeithĩrĩrie kuuma gũkũ.’ Harĩ mũthondeki wa mũgate-rĩ, Jusufu agĩkĩmwĩra: ‘Thutha wa matukũ matatũ-rĩ, Firauni nĩ egwathana ũtinio mũtwe.’

Matukũ matatũ maathira-rĩ, o ũrĩa Jusufu oigĩte gũgĩtuĩka o ũguo. Firauni agĩgĩathana mũthondeki wa mĩgate atinio mũtwe. Mũtwari wa gĩkombe akĩrekererio kuuma korokoro-inĩ na akĩambĩrĩria gũtungatĩra mũthamaki rĩngĩ. No mũheani wa gĩkombe akĩriganĩrũo ũhoro wothe wa Jusufu. Nderire Firauni ũhoro wake, na kwoguo Jusufu agĩgĩikara o korokoro-inĩ.