MUSA okĩte njĩra ĩyo yothe nginya kĩrĩma-inĩ kĩa Horebu gwetha nyeki ya ng’ondu ciake. Kũu akĩona kĩhinga gĩgĩakana, na gĩtingĩhĩa!

Musa akĩona arĩ ũndũ wa magegania. ‘Nĩngũkerũra naho, nĩ getha nyone kĩũndũ gĩkĩ.’ Rĩrĩa akuhĩhĩirie-rĩ, mũgambo ũkiuma kĩhinga-inĩ, ũkiuga: ‘Menya ũkuhĩhĩrie haha. Amba ũrute iratũ ciaku magũrũ, nĩ gũkorũo hau ũrũngiĩ nĩ handũ hatheru.’ Nĩ Ngai waaragia kũgerera mũraika, nake Musa akĩhitha ũthiũ wake.

Rĩu Ngai akiuga ũũ: ‘Nĩnyonete mĩnyarirĩko ya andũ akwa arĩa marĩ Misiri. Na rĩu nĩngũmohora, na nĩ we ngũtũma ũtongorie andũ akwa moime Misiri.’ Jehova ahaarĩirie gũtwara andũ ake bũrũri-inĩ mũthaka mũno wa Kanaani.

Rĩu Musa akiuga ũũ: ‘Niĩ na niĩ ndĩ ũ, na ingĩka ũguo atĩa? No ingĩthiĩ-rĩ, nao Aisiraeli manjũrie, “Agĩĩtagwo atĩa?” Ngamera atĩa?’

Ngai akiuga, ‘Ũkamera ũũ, “JEHOVA, o we Ngai wa Iburahimu, Ngai wa Isaaka, Ngai wa Jakubu, nĩwe ũndũmĩte kũrĩ inyuĩ.” ’ Ningĩ Jehova akĩongerera ũũ: ‘Rĩu nĩrĩo rĩĩtwa rĩakwa tene na tene.’

Musa agĩcokia, ‘Ĩ mangĩrega gwĩtĩkia ndamera nĩwe ũndũmĩte?’

Ngai akĩũria, ‘Nĩ kĩĩ kĩu ũgwete na guoko?’

Nake Musa agĩcokia ũũ: ‘Nĩ rũthanju.’

Ngai akĩmwĩra, ‘Tarũikie rũgũe thĩ.’ Rĩrĩa Musa aarũikirie thĩ-rĩ, rũthanju rũgĩtuĩka nyoka. Ningĩ Jehova akĩonia Musa kĩama kĩngĩ. Oigire ũũ: ‘Tonyia guoko gĩthũri-inĩ.’ Musa agĩĩka guo, na rĩrĩa acokire gũkũruta-rĩ, kwerũhĩte ta ira! Guoko kuonekanire ta kwarĩ na mũrimũ mũũru mũno wa mangũ. Thutha ũcio Jehova akĩhe Musa hinya wa gwĩka kĩama gĩa gatatũ. Mũthia-inĩ akiuga atĩrĩ: ‘Waringa ciama icio Aisiraeli nĩ megwĩtĩkia atĩ nĩ niĩ ngũtũmĩte.’

Nake Musa agĩcokerera Jethero, akĩmwĩra atĩrĩ: ‘Ta reke thiĩ njokerere andũ aitũ arĩa marĩ Misiri ngamenye ũrĩa matariĩ.’ Jethero akĩĩra Musa atĩrĩ, thiĩ na thayũ, nake Musa akĩoha rũgendo rwake gũcoka Misiri.