TARORA mbica ici. O ĩmwe yacio ĩronania ihũra rĩrĩa Jehova aareheire Misiri. Mbica-inĩ ya mbere nĩ ũrona Haruni akĩgũtha Rũũĩ rwa Nile na rũthanju rwake. Rĩrĩa aarũgũthire–rĩ, maĩ maruo magĩtuĩka thakame. Thamaki igĩkua na rũũĩ rũkĩambĩrĩria kũnunga.

Ningĩ, Jehova agĩtũma ciũra ciumĩre Rũũĩ-inĩ rwa Nile. Ciaiyũire kũndũ guothe—obeni-inĩ (riko rĩa mĩgate), ngĩo-inĩ cia mĩgate, morĩrĩ-inĩ ma andũ—kũndũ guothe. Rĩrĩa ciũra ciakuire-rĩ, Amisiri magĩciũngania ihĩba, na bũrũri ũkĩnunga nĩ ũndũ wa cio.

Rĩu ningĩ Haruni akĩgũtha thĩ na rũthanju rwake, naruo rũkũngũ rũgĩtuĩka rũmuru. Tũtũ nĩ tũrũagĩ tũnini tũrũmanaga. Rũmuru rũarĩ ihũra rĩa gatatũ thĩinĩ wa bũrũri wa Misiri.

Mahũra macio mangĩ maaturirie Amisiri oiki tu, Aisiraeli ca. Rĩa kana rĩarĩ ihũra rĩa ngi nene iria ciombĩrĩire nyũmba ciothe cia Amisiri. Ihũra rĩa gatano rĩerekeirio harĩ nyamũ. Ng’ombe, ng’ondu na mbũri nyingĩ cia Amisiri igĩkua.

Rĩu ningĩ, Musa na Haruni makĩoya mũhu makĩũhurunja rĩera-inĩ. Ũgĩtũma andũ na nyamũ manyitwo nĩ mahũha ma ironda. Rĩrĩ rĩarĩ ihũra rĩa gatandatũ.

Thutha ũcio Musa agĩtambararia guoko na igũrũ, nake Jehova aagĩtũma kũgĩe na marurumĩ na mbura ya mbembe. Mbura ĩyo ya mbembe nĩyo yarĩ njũru mũno ĩrĩa Amisiri matonete mbere ĩyo.

Ihũra rĩa kanana rĩarĩ rĩa ngigĩ nyingĩ mũno. Mbere ĩyo kana kuuma hĩndĩ ĩyo-rĩ, gũtirĩ kwagĩa ngigĩ nyingĩ ũguo. Ciarĩire kĩndũ o gĩothe kĩrĩa mbura ya mbembe ĩtaathũkĩtie.

Ihũra rĩa ikũmi rĩarĩ rĩa nduma. Ihinda rĩa thikũ ithatũ bũrũri wothe ũkĩiyũra nduma nene, ĩndĩ kũrĩa guothe Aisiraeli matũũraga kwarĩ na ũtheri.

Mũthia-inĩ-rĩ, Ngai akĩĩra andũ mahake thakame ya karũhĩ kana ya gatũrũme hingĩro-inĩ ya mĩrango yao. Rĩu mũraika wa Ngai akĩhĩtũkĩra igũrũ rĩa Misiri. Mũraika ona thakame-rĩ, ndaigana kũũraga mũndũ o na ũmwe nyũmba ĩyo. Ĩndĩ nyũmba ciothe iria itaarĩ hake thakame hingĩro-inĩ ya mĩrango-rĩ, mũraika wa Ngai akĩũraga marigithathi ma andũ na nyamũ. Rĩrĩ rĩarĩ ihũra rĩa 10.

Thutha wa ihũra rĩrĩ, Firauni akĩrekereria Aisiraeli mathiĩ. Andũ a Ngai nĩ mehaarĩirie gũthiĩ, na ũtukũ o ũcio makĩambĩrĩria thama yao kuuma Misiri.