TŨHĨĨ tũtũ twerĩ tũrĩ ngũũrani mũno, kana tiguo? Nĩũĩ marĩĩtwa matuo? Mũguĩmi nĩ Esau, nako kaarĩa kararĩithia getagwo Jakubu.

Esau na Jakubu maarĩ ariũ erĩ a mahatha a Isaaka na Rebeka. Ithe wao Isaaka, nĩendete Esau mũno, tondũ aarĩ mũguĩmi mwega ũrĩa warehagĩra famĩlĩ irio. Rebeka nake nĩendete Jakubu mũno, tondũ aarĩ kahĩĩ gakiri na kahoreri.

Guka wao Iburahimu arĩ o muoyo-rĩ, no tũhũũre mbica ya ũrĩa Jakubu eendaga kũmũthikĩrĩria akĩaria ũhoro wa Jehova. Mũthia-inĩ Iburaimu agĩkua arĩ na ũkũrũ wa mĩaka 175, hĩndĩ ĩrĩa mahatha macio maarĩ na ũkũrũ wa mĩaka 15.

Rĩrĩa Esau aarĩ na ũkũrũ wa mĩaka 40-rĩ, nĩaahikirie atumia erĩ a kuuma bũrũri wa Kanaani. Ũndũ ũyũ nĩwekĩrire Isaaka na Rebeka kĩeha mũno, tondũ atumia acio matiarĩ ahoi a Jehova.

Mũthenya ũmwe-rĩ, ũndũ mũna nĩwekĩkire ũrĩa watũmire Esau arakarĩre mũrĩ wa nyina Jakubu mũno. Ihinda nĩrĩakinyire rĩa Isaaka arathime mũriũ ũrĩa mũkũrũ. Na tondũ Esau nĩwe waarĩ mũkũrũ gũkĩra Jakubu-rĩ, Esau aagĩtanyĩte kwamũkĩra kĩrathimo kĩu. No ningĩ-rĩ, na hau kabere Esau nĩarĩkĩtie kwenderia Jakubu kĩhooto gĩa kwamũkĩra kĩrathimo kĩu. Ningĩ-rĩ, hĩndĩ ya gũciarũo gwa tũhĩĩ tũu twerĩ Ngai nĩoigĩĩte atĩ Jakubu nĩangĩamũkĩrire kĩrathimo. Na ũũ nĩguo gwatuĩkire. Isaaka aaheire mũrũ wake Jakubu kĩrathimo.

Thutha-inĩ, rĩrĩa Esau aamenyire ũhoro ũcio nĩaarakarĩire Jakubu mũno. Aarĩ mũrakaru mũno ũũ atĩ eendaga kũũraga Jakubu. Rĩrĩa Rebeka aiguire ũhoro ũcio-rĩ, nĩamakire mũno. Nĩ ũndũ ũcio akĩĩra mũthuriwe Isaaka atĩrĩ: ‘Kaĩ nĩ ũũru-ĩ angĩkorũo Jakubu no ahikie ũmwe wa atumia aya a kuuma Kanaani.’

Hĩndĩ ĩo Isaaka agĩĩta mũrũwe Jakubu akĩmwĩra atĩrĩ: ‘Menya ũkahikia mũtumia wa kuuma Kanaani. Ũkĩra ũthiĩ kwa nyũmba ya guukaguo Bethueli kũu Harani. Ũhikie ũmwe wa airĩtu a Labani, mamaguo.’

Jakubu nĩaathikĩrĩirie ithe, na o rĩo akĩambĩrĩria rũgendo rũu rũraya erekeire Harani kũrĩa mbarĩ ciao ciatũũraga.