HĨNDĨ ĩrĩa Musa aacokire Misiri, nĩ erire mũrũ wa nyina maũndũ mothe ma ciama. Na rĩrĩa Musa na Haruni monirie Aisiraeli ciama icio-rĩ, andũ othe magĩtĩkia atĩ Jehova aarĩ hamwe nao.

Rĩu Musa na Haruni magĩthiĩ kuona Firauni. Maamwĩrire atĩrĩ: ‘Jehova Ngai wa Isiraeli ekuuga ũũ, “Reka andũ akwa mathiĩ mĩthenya ĩtatũ, nĩguo magaathathaiye werũ-inĩ.” ’ Nake Firauni agĩcokia: ‘Jehova ũcio ndimũũĩ niĩ, o na ningĩ ndingĩĩtĩkĩria Aisiraeli mathiĩ.’

Firauni nĩ arakarire, tondũ andũ nĩ meendaga rũtha kuuma wĩra-inĩ mathiĩ magathathaiye Jehova. Agĩtũma marute wĩra mũritũ makĩria. Aisiraeli nĩ macokereirie Musa nĩũndũ wa ũrĩa mongereirũo mĩnyamaro, Musa agĩkĩigua tha. No ĩndĩ Jehova akĩmwĩra atige kũmaka. Jehova akiuga atĩrĩ, ‘Nĩngũtũma Firauni areke andũ akwa mathiĩ.’

Musa na Haruni magĩthiĩ kuonana na Firauni rĩngĩ. Ihinda rĩrĩ makĩringa kĩama. Haruni agĩikia rũthanju rũake thĩ, rũgĩtuĩka nyoka nene. No o nao andũ arĩa ogĩ a Firauni magĩikia thanju cio thĩ, na igĩtuĩka nyoka. Hĩ, ta kĩrore! Nyoka ya Haruni ĩrameria nyoka cia andũ acio ogĩ. O na kũrĩ o ũguo-rĩ, Firauni ndaretĩkĩria Isiraeli mathiĩ.

Ihinda nĩ rĩakinyire Jehova onie Firauni ũndũ ũtakariganĩra. Wee-rĩ, nĩ ũĩ ũrĩa ekire? Ekire ũguo na ũndũ wa kũrehe mahũra 10, kana mathĩna bũrũri-inĩ wa Misiri.

Thutha wa mahũra maingĩ, Firauni agĩtũmanĩra Musa na akĩmwĩra ũũ: ‘Nina mahũra na nĩngũreka Aisiraeli mathiĩ.’ No ĩndĩ mahũra mathira Firauni akagarũrũka, akagiria andũ mathiĩ. No mũthia-inĩ, thutha wa ihũra rĩa 10, Firauni agĩtĩkĩria Aisiraeli mathiĩ.

Mahũra macio 10-rĩ, no ũmagwete rĩmwe rĩmwe? Takĩgarũre karatathi gaka tũthome ũhoro wamo.