THUTHA wa Daudi kũũraga Goliathu-rĩ, Abineri mũnene wa ita akĩmũtwara he Saulu. Saulu nĩakenirio mũno nĩ Daudi. Aamũtuire mwathi wa andũ a ita na agĩtwarũo gũtũũra nyũmba-inĩ ya mũthamaki.

Thutha-inĩ, rĩrĩa ita rĩoimire kũhũrana na Afilisiti, andũ-a-nja makĩina makiugaga atĩrĩ: ‘Saulu nĩoragĩte andũ ngiri nyingĩ, nake Daudi akoraga andũ ngiri makũmi maingĩ.’ Ũndũ ũcio ũgĩtũma Saulu aigue ũiru, tondũ Daudi nĩatũũgĩririo kũmũkĩra. No ĩndĩ Jonathani mũrũ wa Saulu ndaigana kũigua ũiru. Nĩendete Daudi mũno makĩria, nake Daudi nĩamwendete. Nao eerĩ makĩgĩa na kĩrĩkanĩro atĩ megũtũũra marĩ arata.

Daudi aarĩ mũhũri mwega wa kĩnanda, nake Saulu nĩakenagio nĩ nyĩmbo ciake. Ĩndĩ mũthenya ũmwe-rĩ, ũiru wa Saulu ũgĩtũma eke kĩũndũ kĩũru mũno. Rĩrĩa Daudi aahũraga kĩnanda, Saulu akĩyoya itimũ rĩake na akĩrĩikia, akiuga: ‘Ngũikia Daudi itimũ ngamũthecithanie na rũthingo!’ Ĩndĩ Daudi agĩkomerera, na itimũ rĩkĩmũhĩtia. Ningĩ thutha-inĩ Saulu akĩhĩtia gũtheca Daudi rĩngĩ. Rĩu Daudi akĩmenya atĩ no mũhaka emenyerere mũno.

Wahota kũririkana kĩranĩro kĩrĩa Saulu eeranĩire? Oigĩte atĩ nĩangĩaheanire mwarĩ atuĩke mũtumia wa mũndũ ũrĩa ũngĩoragire Goliathu. Mũthia-inĩ Saulu akĩĩra Daudi atĩ no oe Mikali mwarĩ, no ĩndĩ mbere ambe orage thũ 100 cia Afilisiti. Ta wĩciirie ũguo! Saulu eehokete atĩ Afilisti nĩmangĩoragire Daudi. No nĩmaaremirũo, na nĩ ũndũ ũcio Saulu akĩhe Daudi mwarĩ atuĩke mũtumia wake.

Mũthenya ũmwe-rĩ, Saulu akĩĩra Jonathani o na ndungata ciake ciothe atĩ nĩarenda kũraga Daudi. No Jonathani akĩĩra ithe atĩrĩ: ‘Ndũkamwĩke ũũru. Nĩ ũndũ ndarĩ akwĩhia. Handũ ha ũguo, maũndũ marĩa atũire ekaga nĩũndũ waku nĩ mega mũno. Etwarithirie ũgwati-inĩ rĩrĩa oragire Goliathu, na rĩrĩa wonire, nĩ wakenirio nĩ ũndũ ũcio.’

Saulu nĩathikĩrĩirie mũrũwe, akĩĩhĩta atĩ ndagwĩka Daudi ũũru. Daudi agĩgĩcokio, na akĩambĩrĩria gũtungata Saulu thĩinĩ wa nyũmba yake rĩngĩ o ta rĩa mbere. Ĩndĩ, mũthenya ũmwe, rĩrĩa Daudi aahũraga kĩnanda-rĩ, ningĩ Saulu agĩikĩria Daudi itimũ. Daudi agĩkomerera, na itimũ rĩgĩtheca rũthingo. Rĩrĩ nĩ riita rĩa gatatũ! Riũ Daudi akĩmenya atĩ no mũhaka ore!

Ũtukũ ũcio Daudi agĩthiĩ mũciĩ gwake. Ĩndĩ Saulu agĩtũma andũ mathiĩ makamũrage. Mikali nĩamenyire ũrĩa ithe abangĩte gwĩka. Akĩĩra mũthuriwe atĩrĩ: ‘Ũngĩaga kwĩhonokia muoyo ũtukũ ũyũ-rĩ, nĩũkũroka kũũragwo.’ Ũtukũ ũcio Mikali agĩteithia Daudi orĩre ndirica-inĩ. Handũ ha ta mĩaka mũgwanja-rĩ, Daudi aarĩ no mũhaka eehithe kũndũ kũingĩ nĩguo ndakonekane nĩ Saulu.