SAULU rĩu ningĩ akĩgeria kũnyita Daudi. Akĩũngania thigari ciake iria thure 3,000 magĩthiĩ kũmũcaria. Rĩrĩa Daudi aamenyire ũhoro ũcio, agĩtũma athigani magatuĩrie kũrĩa Saulu na andũ ake maambĩte hema ũtuku ũcio. Daudi akĩũria erĩ a andũ ake: ‘Nũũ ũgũikũrũkania na niĩ, tũkinye he Saulu kĩraaro-inĩ gĩake?’

Nake Abishai akiuga atĩrĩ, ‘Nĩ niĩ.’ Abishai nĩ mũrũ wa Zeruia mwarĩ wa nyina na Daudi. Rĩrĩa Saulu na andũ ake maarĩ toro-rĩ, Daudi na Abishai magĩkuungĩrĩra kahoora kĩraaro-inĩ. Makĩoya itimũ na kabũthũ ka maĩ cia Saulu, iria ciarĩ mũtwe-inĩ wa Saulu. Gũtirĩ mũndũ wa monire kana kũmaigua tondũ maarĩ toro ta wa gĩkuũ.

Rĩu ta kĩone Daudi na Abishai. Nĩ metharire, na marĩ o gacũmbĩrĩ-inĩ ga kĩrĩma. Daudi akĩanĩrĩra agĩĩta mũtongoria wa ita rĩa Isiraeli: ‘Abineri, ũkĩagĩte kũmenyerera mwathi waku, mũthamaki witũ, nĩ ũndũ kĩ? Ta rora! Itimũ rĩake na kabũthũ ka maĩ irĩkũ?’

Saulu akĩarahũka. Agĩkĩmenya mũgambo wa Daudi, na akĩũria atĩrĩ: ‘Ĩ ũcio nĩ mũgambo waku Daudi?’ Nĩ ũrona Saulu na Abineri haarĩa mũhuro?

Daudi agĩcokeria Saulu atĩrĩ, ‘Ĩĩ, mũthamaki ũyũ, mwathi wakwa.’ Nake Daudi akĩũria: ‘Nĩkĩ kĩragĩtũma ũnũmĩrĩre na ihenya? Kaĩ ndĩgĩĩkĩte atĩa? Itimũ rĩaku nĩwa rĩrĩ, mũthamaki ũyũ. Mũndũ ũmwe wa aanake acio nĩaringe arĩiyĩre.’

Saulu akiuga atĩrĩ, ‘Nĩnjĩhĩtie. Nĩnjĩkĩte ũndũ wa ũkĩgu.’ Daudi agĩgĩthiĩra, nake Saulu akĩhũndũka, akĩĩinũkĩra. Daudi agĩkĩĩra na ngoro atĩrĩ: ‘No mũhaka mũthenya ũmwe ngoragwo na guoko gwa Saulu. Nĩ ngũrĩra bũrũri wa Afilisiti.’ Na ũguo nĩguo eekire. Daudi nĩ aahotire kũhenia Afilisiti na agĩtũma metĩkie atĩ arĩ mwena wao.

Thutha ũcio Afilisiti magĩthiĩ kũhũrana na Isiraeli. Mbaara-inĩ, Saulu na Jonathani makĩũragũo. Ũhoro ũyũ nĩ wekĩrire Daudi kĩeha mũno, akĩandĩka rũĩmbo rũega, rũrĩa ainire ũũ: ‘Ndĩ na kĩeha kĩnene mũno nĩ ũndũ waku, wee Jonathani mũrũ-wa-iya. Wee ũratũire ũnjĩkaga maũndũ mega mũno!’

Thutha ũcio, Daudi akĩhũndũka Isiraeli itũũra-inĩ rĩa Hebironi. Nĩ haagĩire mbaara gatagatĩ-inĩ ka andũ arĩa maathuraga Ishiboshethu mũrũ wa Saulu atuĩke mũthamaki na arĩa mendaga Daudi atuĩke mũthamaki. Mũthiani andũ a Daudi makĩhotana. Daudi aarĩ wa mĩaka 30 rĩrĩa aatuirũo mũthamaki. Kahinda ka mĩaka mũgwanja na nuthu agĩathana arĩ Hebironi. Amwe a ariũ ake arĩa maaciarĩrũo kũu metagwo Amunoni, Abisalomu na Adonija.

Ihinda nĩ rĩakinyire rĩrĩa Daudi na andũ ake maathire gũtaha mũciĩ mũthaka wetagwo Jerusalemu. Joabu, mũrũ ũngĩ wa Zeruia, mwarĩ wa nyina na Daudi agĩtongoria mbaara. Nĩ ũndũ ũcio Daudi agĩtũũgĩria Joabu atuĩke mũnene wa ita rĩake. Na rĩu Daudi akĩambĩrĩria gwathana kuuma itũũra-inĩ rĩa Jerusalemu.