WEE-RĨ, nĩ ũũĩ andũ aya nĩa na ũrĩa mareka? Maraathiĩ kũrũa, na acio marĩ mbere nĩ kũina maraina. No wĩũrie atĩrĩ: ‘Gĩtũmi nĩ kĩĩ aini matarĩ na hiũ cia njora na matimũ ma kũrũa namo?’ Reke tuone.

Jehoshafatu nĩ mũthamaki wa mĩhĩrĩga ĩrĩ ya ũthamaki wa Isiraeli. Aatũũraga ihinda rĩmwe na Mũthamaki Ahabu na mũtumia wake Jezebeli arĩa a ũthamaki ũrĩa wa mĩhĩrĩga 10. Indĩ Jehoshafatu aarĩ mũthamaki mwega, na Asa ithe o nake aarĩ mũthamaki mwega. Kwoguo ihinda rĩa mĩaka mĩingĩ andũ a ũthamaki wa mĩhĩrĩga ĩyo ĩrĩ nĩ maakoretwo na mũtũũrĩre mwega.

Na rĩu ũndũ mũna nĩ wekĩkire ũrĩa watũmire andũ metigĩre. Arekio amwe magĩgĩũka kũrehe ndũmĩrĩri kũrĩ Jehoshafatu makiuga: ‘Nĩ haroka kĩrĩndĩ kĩingĩ mũno kiumĩte bũrũri wa Moabi, na Amoni na kĩrĩma-inĩ kĩa Seiru kĩhũrane mbaara nawe.’ Aisiraeli aingĩ magĩtũngana Jerusalemu kũrongoria Jehova. Magĩthiĩ hekarũ-inĩ, nake Jehoshafatu akĩhoya ũũ: ‘Jehova Ngai witũ, tũtiũĩ ũrĩa tũgwĩka. Nĩ gũkorũo ithuĩ tũtirĩ na hinya wa kũhũrana na kĩrĩndĩ gĩkĩ kĩingĩhĩte ũũ. Maitho maitũ nĩwe macũthĩrĩirie.’

Jehova agĩgĩthikĩrĩria, na agĩtũma ũmwe wa ndungata ciake ere andũ ũũ: ‘Nĩ gũkorũo mbaara ĩno ti inyuĩ mũkũrũa, no nĩ Ngai. Mũtikagĩa na bata wa kũrũa. No gũikara mũgũikara o ro ũguo mwĩnunĩte mũone ũrĩa Jehova ekũmũhonokia.’

Rũcinĩ rũrũ rũngĩ Jehoshafatu akĩĩra andũ: ‘Wĩhokei Jehova!’ Rĩu agĩcoka akĩiga aini mbere ya athigari ake, na maathire makĩinaga nyĩmbo cia kũgooca Jehova. Nĩ ũũĩ ũrĩa gwatuĩkire rĩrĩa maakuhĩrĩirie irũĩro? Jehova agĩgĩtũma thigari icio thũ ciao ininane. Rĩrĩa Aisiraeli maakinyire-rĩ, makĩona thũ ciothe cia thigari ciao nĩ ciakuĩte!

Na githĩ Jehoshafatu ndaakĩrĩ mũũgĩ kwĩhoka Jehova? O na ithuĩ no tũtuĩke andũ ogĩ tũngĩmwĩĩhoka.