THUTHA wa Mũthamaki Jeroboamu gũkua-rĩ, athamaki arĩa maarũmĩrĩire gwatha bũrũri wa Isiraeli wa mĩhĩrĩga 10 othe maarĩ oru. Mũthamaki Ahabu nĩwe waarĩ mũũru gũkĩra othe. Nĩ ũũĩ gĩtũmi nĩ kĩĩ? Gĩtũmi kĩmwe kĩnene nĩ Jezebeli, mũtumia wake mwaganu.

Jezebeli ndaarĩ mũtumia Mũisiraeli. We aarĩ mwarĩ wa mũthamaki wa Sidoni. Athathaiyagia ngai ya maheni Baali, na agĩtũma Ahabu na Aisiraeli aingĩ o nao mathathaiye Baali. Jezebeli nĩaathũire Jehova na nĩoragire anabii aingĩ ake. Arĩa angĩ makĩĩhitha ngurunga-inĩ nĩ getha matikoragwo. Jezebeli aangĩerirĩirie kĩndũ-rĩ, o na mũndũ nĩangĩoragire.

Mũthenya ũmwe Mũthamaki Ahabu aarĩ na kĩeha mũno. Rĩu Jezebeli akĩmũũria atĩrĩ: ‘Nĩkĩ gĩgũtũma ũigue ũũru ũũ ũmũthĩ?’

Ahabu akĩmũcokeria atĩrĩ, ‘Nĩ ũndũ wa ũrĩa Nabothu aanjokeirie. Ngwendete kũgũra mũgũnda wake wa mĩthabibũ. No aanjĩrire atĩ ndangĩhe.’

Jezebeli aamũcokeirie atĩrĩ, ‘Tiga kĩeha. Nĩ niĩ ngũkũhe.’

Rĩu Jezebeli agĩkĩandĩkĩra athuri atongoria a itũũra rĩrĩa Nabothu atũũraga marũa. Aamerire ũũ marũa-inĩ: ‘Cariai andũ aaganu mũno nao moige atĩ Nabothu nĩarumĩte Ngai o na mũthamaki witũ. Mũcoke mũnyite Nabothu, mũmũtware nja ya itũũra, mũmũhũre na mahiga nyuguto akue.’

Rĩrĩa Jezebeli aamenyire atĩ Nabothu nĩakuĩte-rĩ, akĩĩra Ahabu atĩrĩ: ‘Ũkĩra ũkegwatĩre mũgũnda wake wa mĩthabibu.’ We-rĩ, nĩũgwĩtĩkania atĩ Jezebeli nĩagĩrĩirũo nĩ kũherithio nĩ gĩĩko kĩu kĩũru mũno eekire?

Kwoguo, ihinda rĩahĩtũka-rĩ, Jehova akĩrekia Jehu athiĩ akamũherithie. Rĩrĩa Jezebeli aiguire atĩ Jehu nĩaroka, aakĩĩhaka rangi maitho na akĩgeria gwĩthakaria. No rĩrĩa Jehu okire na akĩona Jezebeli arĩ ndirica-inĩ-rĩ, aanĩrĩire andũ arĩa maarĩ thĩinĩ wa nyũmba ĩo ya mũthamaki akĩmera: ‘Mũikiei agwe thĩ!’ Ta ũrĩa ũrona mbica-inĩ, arũme acio nĩmaathĩkire. Mamũikirie thĩ, na agĩkua. Ũcio nĩguo waarĩ mũthia wa Jezebeli mũtumia ũcio mwaganu.