TARORA mũndũ ũyũ ũrĩ thĩinĩ wa maĩ. Kaĩ arĩ na thĩna mũingĩ-ĩ, kana tigũo? Thamaki ĩĩrĩa ĩrĩ hakuhĩ kũmũmeria! Wee nĩ ũĩ mũndũ ũyũ nũũ? Rĩĩtwa rĩake nĩ Jona. Tareke tuone ũrĩa eingĩririe thĩna-inĩ ũcio.

Jona nĩ mũnabii wa Jehova. Ti kahinda karaihu kuuma gĩkuũ kĩa mũnabii Elisha rĩrĩa Jehova erire Jona: ‘Ũkĩra, ũthiĩ Nineve, itũũra rĩrĩa inene. Wanĩrĩre ũkĩrĩgũũthũkagĩra, amu ũũru wa ene rĩo wambatĩte ũgakinya o harĩ niĩ.’

Ĩndĩ Jona ndendire gũthiĩ. Agĩkĩhaica merikabu ĩrĩa yaathiyaga mwena ũngĩ handũ ha Nineve. Jehova ndakenirio nĩ gĩĩko kĩa Jona gĩa kũũra. Agĩgĩtũma kũgĩe na kĩhuhũkanio kĩnene. Kĩarĩ kĩũru ũ atĩ merikabu yaarĩ hakuhĩ kũũrĩra. Atwari a merikabu nĩ metigĩrire mũno, na makĩambĩrĩria gũkaĩra ngai ciao imateithie.

Mũthia-inĩ Jona akĩmera atĩrĩ: ‘Ndĩmwĩtigĩri Jehova, Ngai ũrĩa wombire igũrũ na thĩ. Na nĩ kũũra njũrĩire gwĩka kwenda kwa Jehova.’ Kwoguo atwari a merikabu magĩkĩmũria: ‘Nĩ atĩa tũgũgwĩka nĩ getha tũhorererũo nĩ iria?’

Jona akĩmera, ‘Njoyai mũnjikie iria-inĩ, na hĩndĩ ĩyo nĩ mũkũhorererũo nĩ iria.’ Atwari a merikabu matiendaga gwĩka ũguo, no ĩndĩ rĩrĩa iria rĩakĩrĩrĩirie gũthũka magĩkĩmũikia iria-inĩ. O rĩmwe kĩhuhũkanio gĩgĩthira, na iria rĩkĩhorera.

Na rĩrĩa Jona orĩire maĩ-inĩ, kĩũngũyũ kĩu kĩnene gĩkĩmũmeria. No ndakuire. Mĩthenya ĩtatũ na matukũ mene Jona aarĩ thĩinĩ wa nda ya kĩũngũyũ kĩu. Jona nĩ eririre mũno nĩ ũndũ wa kũrega gwathĩkĩra Jehova athiĩ Nineve. Nĩ ũũĩ ũrĩa ekire?

Jona aahoire Jehova amũteithie. Nake Jehova agĩtũma kĩũngũyũ gĩtahĩke Jona igũrũ rĩa thĩ nyũmũ. Thutha wa ũguo Jona agĩgĩthiĩ Nineve. Na githĩ ũndũ ũyũ ndũgũgĩtũruta gĩtũmi kĩa bata mũno gĩa gwĩka ũrĩa wothe Jehova oigĩte?