NĨ ŨŨĨ ũrĩa kairĩtũ gaka karoiga? Karera mũtumia mũmwathi ũhoro wa mũnabii wa Jehova Elisha, na maũndũ ma magegania marĩa Jehova amũhotithagia gwĩka. Mũtumia mũgaathe ndoĩ ũhoro wa Jehova tondũ we ti Mũisiraili. Ta reke tuone gĩtũmi kĩrĩa gĩtũmĩte kairĩtu gaka gakorũo karĩ thĩinĩ wa nyũmba ya mwathi wako.

Mũtumia mũgaathe nĩ Mũsuriata. Mũthuri wake nĩ Naamani, mũnene wa mbũtũ cia ita rĩa Suriata. Asuriata nĩmarĩkĩtie gũtaha kairĩtu gaka kanini ka Isiraeli, na gagĩtwarĩrũo mũtumia wa Naamani gatuĩke ndungata yake.

Naamani aarĩ na mũrimũ mũũru wetagwo mangũ. Mũrimũ ũyũ no ũtũme o na nyama cia mũndũ igwe. Ũũ nĩguo kairĩtu karera mũtumia wa Naamani: ‘Na arĩ korũo mwathi wakwa onana na mũnabii ũrĩa ũtũũraga Isiraeli. No amũhonie mangũ maya make.’ Thutha-inĩ ũhoro ũyũ ũgĩkinyĩra mũthuri wa mũtumia ũcio.

Naamani nĩ eendaga mũno makĩria ahone; na nĩ ũndũ ũcio akĩamũra gũthiĩ Isiraeli. Aakinya kuo aathire nyũmba-inĩ ya Elisha. Elisha agĩatha ndungata yake ĩĩre Naamani athiĩ Rũũĩ-inĩ rwa Jorodani ethambe maita mũgwanja. Ũndũ ũyũ ũgĩtũma Naamani arakare mũno na akiuga ũũ: ‘Njũĩ cia gwitũ mũciĩ nĩ njega gũkĩra rũũĩ o ruothe rwa Isiraeli!’ Thutha wa kwaria ũguo, Naamani akĩhũndũka.

Ũmwe wa ndungata ciake akĩmwĩra atĩrĩ: ‘Baba, rĩu-rĩ, korũo Elisha akwĩrire wĩke ũndũ mũnene-rĩ, nĩ ũngĩwĩkire. Nĩkĩ kĩragiria wĩthambe ũthere ta ũrĩa akwĩrire?’ Naamani nĩ aathikĩrĩirie ndungata yake na agĩtoboka Rũũĩ rwa Jorodani matoboka mũgwanja. Rĩrĩa eekire ũguo mwĩrĩ wake ũkĩmũcokerera na akĩhona!

Naamani agĩgĩkena mũno. Agĩcoka kũrĩ Elisha na akĩmwĩra: ‘Ti-itherũ ndĩ kũmenya atĩ gũtirĩ Ngai ũngĩ gũkũ thĩ guothe, tiga o gũkũ Isiraeli. Na tondũ ũcio ndagũthaitha wĩtĩkĩre kĩheo gĩkĩ gĩakwa.’ No ĩndĩ Elisha akĩmũcokeria akiuga: ‘Ndirĩ kĩndũ ingĩamũkĩra.’ Elisha nĩ amenyire atĩ warĩ ũndũ mũũru kũamũkĩra kĩheo, tondũ nĩ Jehova warĩkĩtie kũhonia Naamani. Ĩndĩ ndungata ya Elisha Gehazi nĩ erirĩirie iheo icio mũno.

Ũũ nĩguo Gehazi ekire. Thutha wa Naamani gũthiĩ, Gehazi akĩmuma thutha. Rĩu Gehazi akĩmwĩra: ‘Elisha andekia ngwĩre atĩ nĩ ekwenda iheo imwe ciaku nĩ ũndũ wa arata mamũkora o ro rĩu.’ Na kaĩ ũmenye maya nĩ maheni-ĩ. No ĩndĩ Naamani ndamenyire atĩ marĩ maheni; na kwoguo agĩkĩhe Gehazi indo imwe.

Rĩrĩa Gehazi aacokire mũciĩ, Elisha nĩ aamenyaga ũrĩa eekĩte. Jehova nĩ aarĩkĩtie kũmũmenyithia. Kwoguo akĩmwĩra: ‘Tondũ nĩ weka ũndũ ũcio mũũru-rĩ, nĩũkũnyitwo nĩ mangũ macio ma Naamani.’ Na akĩnyitwo o rĩo!

Maũndũ maya mothe megũtũruta atĩa? Mbere, twagĩrĩirũo nĩ gũtuĩka ta kairĩtu kau kanini na twaragie ũhoro wa Jehova. Ũndũ ũcio no ũkorũo ũrĩ mwega mũno. Kerĩ, tũtiagĩrĩirũo nĩ gwĩtĩĩya ta Naamani hau mbere, no nĩ twagĩrĩirũo nĩ gwathĩkĩra ndungata cia Ngai. Na wa gatatũ, tũtiagĩrĩirũo nĩ kũhenania ta Gehazi. Githĩ to twĩrute maũndũ maingĩ tũngĩthoma Biblia?