TARORA ũrĩa andũ aya maranyũrũria mwanake ũyũ. Nĩ ũmũĩ? Ũyũ nĩ Jeremia. Nĩ mũnabii wa Ngai wa bata mũno.

Ihinda ikũhĩ thutha wa Mũthamaki Josia kũhehenja mĩhianano ĩrĩa yaarĩ bũrũri-inĩ, Jehova eerire Jeremia atuĩke mũnabii Wake. O na kũrĩ ũguo-rĩ, Jeremia eeciririe atĩ aarĩ mũnyinyi mũno gũtuo mũnabii. No Jehova akiuga atĩ nĩekũmũteithia.

Jeremia eerire Aisiraeli matige gũcoka gwĩka maũndũ moru. Agĩkĩmera atĩrĩ, ‘Ngai iria andũ a ndũrĩrĩ mahoyaga nĩ cia maheni.’ No ĩndĩ Aisiraeli monaga atĩ kaba gũthathaiya mĩhianano handũ ha gũthathaiya Jehova Ngai wa ma. Rĩrĩa Jeremia eerire andũ atĩ Ngai nĩekũmaherithia nĩ ũndũ wa ũũru wao-rĩ, o no kũmũthekerera.

Mĩaka ĩkĩhĩtũka. Josia agĩgĩkua, na mĩeri ĩtatũ thutha ũcio Jehoiakimu mũrũwe agĩtuĩka mũthamaki. Jeremia aathire na mbere kwĩra andũ atĩrĩ: ‘Jerusalemu nĩrĩkwanangwo angĩkorũo mũtikũgarũrĩra njĩra cianyu njũru.’ Athĩnjĩri-Ngai makĩnyita Jeremia na makĩanĩrĩra: ‘Wee tiitherũ ndũrĩ hingo ũtegũkua, nĩ ũndũ wa kuuga ũguo.’ Magĩcoka makĩĩra anene a Isiraeli atĩrĩ: ‘Jeremia no mũhaka oragwo, tondũ wa kwaria ũũru igũrũ rĩa itũũra riitũ.’

Rĩu Jeremia angĩekire atĩa? Ndaretigĩra! Agĩkĩmera othe ũũ: ‘Nĩ Jehova wandekirie ndĩmwarĩrie maũndũ maya. Mwaga kũgarũrĩra mĩthiĩre yanyu-rĩ, Jehova nĩakwananga Jerusalemu. Ĩndĩ menyai ũũ: Mũngĩnjũraga, mũgũita thakame ya mũndũ ũtarĩ na ũũru ekĩte.’

Anene makĩreka Jeremia atũũre, no ĩndĩ Aisiraeli matiagarũrĩire njĩra ciao njũru. Thutha ũcio Nebukadinezaru, mũthamaki wa Babuloni, agĩũka kũhũrana na Jerusalemu. Mũthia-inĩ Nebukadinezaru agĩtua Aisiraeli ndungata ciake. Agĩtwara ngiri nyingĩ Babuloni. Ta wĩĩcirie ũrĩa arĩ ũndũ wa magegania andũ ũtoĩ makũrutĩte mũciĩ gwaku ũgatwarũo bũrũri mũgeni!