WEE-RĨ, nĩ ũĩ gĩtũmi kĩrĩa kĩratũma mũndũ ũyũ ahoe Jehova? Nĩkĩ gĩtũmĩte aigĩrĩre marũa maya kĩgongona-inĩ kĩa Jehova? Mũndũ ũyũ nĩ Hezekia. We nĩ mũthamaki wa mĩhĩrĩga ĩrĩa ĩĩrĩ ya Isiraeli. Na arĩ na thĩna mũingĩ mũno. Nĩkĩ?

Tondũ rĩu ita rĩa Ashuri nĩ rĩrĩkĩtie kũhũra mĩhĩrĩga ĩrĩa 10. Jehova etĩkĩririe ũndũ ũcio wĩkĩke tondũ andũ acio nĩ maganĩte mũno. Na rĩu ita rĩa Ashuri rĩũkĩte kũhũra ũthamaki wa mĩhĩrĩga ĩyo ĩĩrĩ.

No hĩndĩ mũthamaki wa Ashuri arĩkia gũtũma marũa kwĩ Mũthamaki Hezekia. Maya nĩmo marũa marĩa Hezekia aigĩte mbere ya Ngai. Marũa nĩ kũnyũrũria maranyũrũria Jehova, na makera Hezekia eneane. Na nĩkĩo gĩtũmi Hezekia arahoya ũũ: ‘Wee Jehova witũ tũhonokie kuuma mũthamaki wa Ashuri. Nĩ getha mothamaki mamenye atĩ wee wiki nĩwe Ngai.’ Jehova nĩ egũthikĩrĩria Hezekia rĩu?

Hezekia nĩ mũthamaki mwega. Ndahaana ta athamaki arĩa oru a ũthamaki wa mĩhĩrĩga ĩrĩa 10 ya Isiraeli, kana ta ithe Ahazu mũthamaki mũũru. Hezekia nĩ aakoretwo amenyereire mawatho mothe ma Jehova. Na rĩu Hezekia aarĩkia kũhoya, mũnabii Isaia akĩmũtũmĩra ndũmĩrĩri ĩno kuuma kũrĩ Jehova ĩrĩa yaugaga ũũ: ‘Mũthamaki wa Ashuri ndagoka itũũra rĩrĩ rĩa Jerusalemu. Gũtirĩ o na ũmwe wa ita rĩake ũkarĩkuhĩrĩria. Matigaikia mũguĩ o na ũmwe kuo.’

Ta rora mbica ĩno. We nĩ ũĩ thigari ici ciothe ikuĩte nĩa? Nĩ ita rĩa Ashuri. Jehova aarekirie mũraika wake, na akĩũraga thigari cia Ashuri 185,000 utukũ ũmwe tu. Rĩu mũthamaki wa Ashuri agĩĩthara.

Ũthamaki wa mĩhĩrĩga ĩyo ĩĩrĩ ũkĩhonokio, na andũ makĩgĩa na thayũ gwa kahinda. Thutha wa Hezekia gũkua mũriũ Manase agĩtuĩka mũthamaki. Manase na mũriũ Amoni maarĩ athamaki oru mũno. Rĩu ningĩ bũrũri ũkĩiyũrũo nĩ ũgeri wa ngero na wanangi. Rĩrĩa Amoni mũthamaki oragirũo nĩ ndungata ciake-rĩ, mũriũ wake Josia agĩgĩtuo mũthamaki wa mĩhĩrĩga ĩyo ĩĩrĩ.