ŨYŨ nĩ mũhaano wa paradiso ta ũrĩa Ngai hihi aahotete kũonia mũnabii wake Isaia. Isaia atũũrire ihinda ikuhĩ thutha wa Jona.

Kiugo Paradiso nĩ kuuga “mũgũnda mũgemu mũno.” Ũndũ ũyũ nĩ ũgũkũririkania ũndũ tũrĩkĩtie kũona na hau kabere ibuku-inĩ rĩrĩ? Ũroneka ta arĩ mũgũnda mũgemu ũrĩa Jehova Ngai aathondekeire Adamu na Hawa, kana tiguo? No rĩrĩ, kũrĩ hĩndĩ thĩ yothe ĩgatuĩka paradiso?

Jehova nĩ eerire mũnabii wake Isaia aandĩke ũhoro wa paradiso njerũ ĩrĩa yũkĩte ya andũ a Ngai. Oigire ũũ: ‘Njũi igatũranagia na ng’ondu irĩ na thayũ. Gacaũ ka ng’ombe o na ka mũrũthi ikarĩaga hamwe, na twana tũnini tũcitongoragie. O na gakenge gatikagerũo ngero gagĩthaka hakuhĩ na irima rĩa nyoka ĩrĩ na thumu.’

Andũ aingĩ maahota kuuga ũũ: ‘Ũndũ ũyũ ndũngĩkĩka. Gũkoretwo kũrĩ na mathĩna thĩ, na gũtirĩ hĩndĩ makaga.’ Ta wĩcirie ũhoro ũcio: Ngai aaheire Adamu na Hawa mũciĩ wa mũthemba ũrĩkũ?

Ngai aigire Adamu na Hawa thĩinĩ wa paradiso. Nĩ ũndũ wa kwaga gwathĩkĩra Ngai makĩũrũo nĩ mũciĩ wao mũthaka, magĩkũra na magĩkua. Ngai eeranĩire andũ arĩa mamwendete nĩ akamahee indo iria ciothe Adamu na Hawa maateire.

Paradiso ĩyo njerũ ĩroka gũtirĩ gũtihania kana kũnyarirana. Gũgakorũo kũrĩ na thayũ mũkinyanĩru. Andũ othe magakoragwo marĩ na ũgima wa mwĩrĩ na gĩkeno kĩnene. Gũkahana o ta ũrĩa Ngai endete kũhane hau kĩambĩrĩria-inĩ. Nĩ tũkwĩruta thutha-inĩ ũrĩa Ngai agatũma ũndũ ũyũ wĩkĩke.