DAUDI atanakua-rĩ, nĩaaheire Suleimani ngururo yumĩte kwĩ Ngai ya gwaka hekarũ ya Jehova. Mwaka-inĩ wa kana wa wathani wake, Suleimani nĩambĩrĩirie gwaka hekarũ, na yakuire mĩaka mũgwanaja na nuthu kũmĩrĩkia. Andũ ngiri nyingĩ mũno nĩmaarutire wĩra wa gwaka hekarũ, na mwako ũcio wahũthĩrire mbeca nyingĩ mũno mũno. Gĩtũmi nĩ ũndũ thahabu nyingĩ mũno na betha nyingĩ nĩ ciahũthĩrirũo.

Hekarũ yaarĩ na rumu igĩrĩ nene, o ta ũrĩa hema ya gũtũnganĩrũo yatariĩ. Ĩndĩ rumu ici nĩ nene maita merĩ gũkĩra iria ciarĩ cia hema. Suleimani nĩaigire ithandũkũ rĩa kĩrĩkanĩro thĩinĩ wa rumu ĩmwe ya hekarũ, na cio indo icio ingĩ ciaigagwo thĩinĩ wa hema-rĩ, ikĩigwo rumu ĩyo ĩngĩ.

Rĩrĩa hekarũ yaarĩkire, gũkĩgĩa na iruga inene. Ta ũrĩa ũrona mbica-inĩ, Suleimani aaturirie ndu mbere ya kĩgongona na akĩhoya. Suleimani akĩĩra Jehova ũũ, ‘O na matu-inĩ marĩa ma igũrũ mũno, ndũngĩiganĩra kuo; kaĩ akĩrĩ maita maigana hihi ũngĩaga kuiganĩra nyũmba ĩno njakĩte. No rĩrĩ, wee Ngai wakwa, ĩtĩkĩra gũthikĩrĩria ihoya rĩa andũ aku rĩrĩa mekũhoera handũ haha.’

Rĩrĩa Suleimani aarĩkirie kũhoya-rĩ, mwaki ũgĩgĩikũrũka uumĩte igũrũ. Ũgĩgĩcina ihaki rĩa njino biũ. Naguo riri wa Jehova ũkĩiyũra hekarũ. Ũndũ ũyũ ũkuonania atĩ Jehova nĩaathikĩrĩirie, na atĩ nĩakenirio nĩ hekarũ na mahoya ma Suleimani. Rĩu hekarũ, ithenya rĩa hema ya gũtũnganĩrũo, ĩgĩtuĩka handũ harĩa andũ marĩũkaga gũthathaiya.

Handũ ha ihinda iraya Suleimani aathanire na njĩra ya ũũgĩ, na andũ magĩkena. Suleimani nĩahikirie atumia aingĩ kuuma mabũrũri mangĩ arĩa matathathaiyagia Jehova. Nĩ ũrona ũmwe wao agĩthathaiya mbere ya mũhaanano? Mũthia-inĩ atumia acio magĩtũma Suleimani athathaiyie ngai ingĩ. Nĩ ũũĩ gwatuĩkire atĩa rĩrĩa Suleimani eekire ũguo? Ndaacokire kũiguĩra andũ tha rĩngĩ. Aatuĩkire mũũru, na andũ matiacokire gũkena rĩngĩ.

Ũndũ ũcio ũgĩtũma Jehova arakarĩre Suleimani, na akĩmwĩra ũũ, ‘Nĩ ngũgũtunya ũthamaki ũyũ waku ndĩũnengere mũndũ ũngĩ. No ndiĩka ũndũ ũcio matukũ-inĩ maku, no ngaũtunya mũrũguo. No rĩrĩ, ndikeheria andũ othe ũthamaki-inĩ wa mũrũguo.’ Ta reke tuone ũrĩa gwekĩkire.