SULEIMANI aarĩ kamwana ka muumo rĩrĩa aatuĩkire mũthamaki. Nĩ eendete Jehova, na akarũmĩrĩra ũtaari mwega ũrĩa ithe Daudi aamũhete. Jehova nĩ aakenirio nĩ Suleimani, na kwoguo ũtukũ ũmwe akĩmwĩra na njĩra ya kĩroto atĩrĩ: ‘Ta hoya kĩrĩa ngũkũhe.’

Suleimani agĩgĩcokia atĩrĩ: ‘Jehova Ngai wakwa, niĩ ndĩgĩtariĩ ota kaana kanini ndirĩ na ũũgĩ wa kũmenya ũrĩa ingĩthamaka. He ngoro ĩĩna ũũgĩ wa gũcirĩra andũ aku hotage gũkũũrana wega na ũũru.’

Jehova nĩakenirio nĩ ihoya rĩa Suleimani. Nĩ ũndũ ũcio Akiuga ũũ: ‘Tondũ nĩwahoya ũũgĩ, na ndũnehoera atĩ ũtũũre muoyo matukũ maingĩ, kana kwĩhoera ũtonga, nĩndakũhe ngoro ĩĩ na ũũgĩ, gũkĩra mũndũ o wothe wanatũũra. O na ningĩ indo iria ũtahoete o nacio nĩndakũhe, nacio nĩ ũtonga na gwĩkĩrĩrũo.’

Hĩndĩ ĩo atumia erĩ magĩũka kũrĩ Suleimani marĩ na thĩna mũnene mũno. Ũmwe akiuga: ‘Niĩ na mũtumia ũyũ tũtũũraga nyũmba ĩmwe, nĩ ndĩraciarire kahĩĩ na thikũ igĩrĩ ciahĩtũka mũtumia ũyũ ũngĩ o nake araciara kahĩĩ. Rĩu ũtukũ kaana gake karakua. Na rĩrĩa ndĩrakomete, araiga kaana gake gakuũ harĩa ndĩrakomete na aroya gakwa. Rĩrĩa ndĩrokĩrire ndarora kaana kau gakuũ, ndĩrona atĩ ti gakwa.’

Nake mũtumia ũcio ũngĩ akiuga: ‘Aca! No rĩrĩ kaana gaka ke muoyo nĩko gakwa, nako kaana kau gakuũ nĩko gaku!’ Mũtumia ũrĩa wa mbere akiuga atĩrĩ: ‘Aca! Kaana gaka gakuũ nĩko gaku, nako kaana kau ke muoyo nĩko gakwa!’ Ũguo nĩguo atumia acio maakararanagia. Rĩu-rĩ, Suleimani egwĩka atĩa?

Agĩtũmanĩra rũhiũ rũa njora, na rĩrĩa rũokire akiuga ũũ: ‘Atũraniai kaana gaka ke muoyo njatũ igĩrĩ, mũnengere mũtumia ũmwe rũatũ rũmwe, nake mũtumia ũrĩa ũngĩ mũmũnengere rũu rũngĩ.’

Mũtumia ũrĩa waarĩ mwene kaana agĩkayũrũrũka akiuga, ‘Aca! Ndagũthaitha ndũgakorage. Mũnengerei kaana kau ke muoyo!’ Mũtumia ũcio ũngĩ akiuga atĩrĩ: ‘Gatingĩtuĩka gakwa kana gaku; reke gaatũranio njatũ igĩrĩ.’

Hĩndĩ ĩyo Suleimani agĩcokia: ‘Nengerai ũcio kaana kau ke muoyo; menyai mũkorage o na atĩa; ũcio nĩwe nyina wako.’ Suleimani aamenyire ũndũ ũcio tondũ nyina wa kaana kũna nĩ aakendete mũno tondũ nĩ etĩkĩrire gũtigĩra mũtumia ũcio ũngĩ kaana kau handũ ha koragwo. Rĩrĩa andũ maigwire ũrĩa Suleimani aatuire cira ũcio mũritũ, magĩgĩkena mũno nĩ kũgĩa na mũthamaki mũũgĩ.

Ihinda-inĩ rĩa wathani wa Suleimani, Ngai akĩrathima andũ na ũndũ wa gũtũma tĩĩri ũkũrie ngano nyingĩ na thaĩri, thabibũ na ngũyũ na irio ingĩ cia mĩthemba ĩngĩ. Andũ mehumbaga nguo njega na magatũũra thĩinĩ wa nyũmba njega. Kwarĩ na indo nyingĩ njega makĩria cia kũigana andũ othe.