ŨNGĨKUA-RĨ, nyũkwa angĩigua atĩa ũngĩcokio muoyo? Kaĩ no akene-ĩ! No rĩrĩ, mũndũ ũrĩkĩtie gũkua no atũũre rĩngĩ? Kũrĩ gwekĩka ũguo?

Tarora mũndũ ũyũ, na mũtumia na kahĩĩ kanini. Mũndũ ũcio nĩ mũnabii Elija. Nake mũtumia aarĩ wa ndigwa kuuma itũũra rĩa Zarephathu, nako kahĩĩ nĩ mũriũ. Ĩĩ, mũthenya ũmwe kahĩĩ nĩkarwarire. Gakĩhĩrũo mũno o nginya thutha-nĩ gagĩkua. Elija akĩĩra mũtumia ũcio atĩrĩ: ‘Ta nengere mũrũguo.’

Elija akĩoya kahĩĩ kau gakuũ agĩgakomia gĩtanda-inĩ gĩake kanyũmba ka igũrũ. Agĩkĩhoya ũũ: ‘Jehova ndagũthaitha ũreke kahĩĩ gaka gacoke muoyo.’ Nako kahĩĩ kau gakĩambĩrĩria kũhihia! Rĩu Elija agĩgaikũrũkia nyũmba akĩĩra nyina atĩrĩ: ‘Ta rora, mũrũguo e muoyo!’ Nĩ kĩo gĩtũmi nyina akenete ũũ.

Mũnabii ũngĩ wa Jehova wa bata etagwo Elisha. Aatungatagĩra Elija. Na ihinda rĩathianga Jehova akĩhũthĩra Elisha o nake kũringa ciama. Mũthenya ũmwe Elisha nĩ aathire itũũra-inĩ rĩa Shunemu, na nĩ kwarĩ mũtumia wamũtugire mũno. Thutha-inĩ mũtumia ũcio nĩ aaciarire kaana ga kahĩĩ.

Rũcinĩ rũmwe, mwana arĩkĩtie gũkũrakũra, akĩrũmĩrĩra ithe kũrĩa aarutaga wĩra mũgũnda. O rĩmwe kahĩĩ kau gakĩambĩrĩria gũkaya: ‘Wũi mũtwe-ĩ!’ Kahĩĩ kau karĩkia gũtwarwo mũciĩ gagĩkua. Kaĩ nyina nĩ aakĩiguire kĩeha-ĩ! Hĩndĩ o ĩyo agĩthiĩ kwĩ Elisha.

Rĩrĩa Elisha aakinyire agĩtonyia kaana kau gakuũ nyũmba. Nĩ aahoire Jehova, na agĩkomera mwĩrĩ wa kaana kau. O narua, mwĩrĩ wa kaana kau ũkĩgĩa na ũrugarĩ, na gagĩathimũra maita mũgwanja. Na kaĩ nyina nĩaakenire rĩrĩa okire agĩkora kaana gake karĩ muoyo-ĩ!

Andũ aingĩ mũno nĩmakuĩte. Ũndũ ũyũ nĩ ũtũmĩte famĩlĩ na arata ao magĩe na kĩeha kĩingĩ mũno. Tũtirĩ na ũhoti wa kũriũkia akuũ. Ĩndĩ Jehova ena ũhoti. Thutha hanini nĩtũkwĩruta ũrĩa arĩĩhota kũriũkia mamilioni ma andũ aingĩ arĩa marĩkĩtie gũkua.