THUTHA wa Daudi kwambĩrĩria gũthamaka thĩinĩ wa Jerusalemu-rĩ, Jehova nĩ aaheire ita rĩake ũhotani mũingĩ mũno igũrũ rĩa thũ ciao. Jehova nĩeerĩire Aisiraeli kũmahe bũrũri wa Kanaani. Na rĩu, na ũndũ wa ũteithio wa Jehova, mũthia-inĩ bũrũri ũrĩa wothe merĩirũo ũgĩtuĩka wao.

Daudi nĩ mũthamaki mwega. Nĩendete Jehova. Ũndũ wa mbere ũrĩa eekire thutha wa gũtaha Jerusalemu waarĩ kũrehe ithandũkũ rĩa kĩrĩkanĩro rĩa Jehova kũu. Na nĩ eendaga gwaka hekarũ nĩguo rĩiguo kuo.

Hĩndĩ ĩrĩa Daudi aakũrire-rĩ, agĩĩka ihĩtia rĩũru mũno. Daudi nĩ oĩ atĩ nĩ mahĩtia kwĩyoera kĩndũ kĩa mũndũ ũngĩ. Mũthenya ũmwe hwaĩ-inĩ, arĩ kũu igũrũ rĩa nyũmba yake ya ũthamaki, akĩrora thĩ akĩona mũndũ-wa-nja waarĩ mũthaka mũno. Rĩĩtwa rĩake eetagwo Bathi-sheba, na mũthuri wake aarĩ ũmwe wa athigari ake na eetagwo Uria.

Daudi nĩ eerirĩirie Bathi-sheba mũno ũũ atĩ akĩrekania arehwo nyũmba ya ũthamaki. Mũthuri wake aarĩ mbara-inĩ kũnene. Daudi agĩkoma nake na thutha ũcio akĩmenya atĩ arĩ na ihu. Daudi akĩmaka mũno na agĩtũmana kũrĩ Joabu mũnene wa mbũtũ ya ita atware Uria mũhari wa mbere harĩa mbaara yamatĩire nĩguo oragwo. Uria aagĩkua-rĩ, Daudi akĩhikia Bathi-sheba.

Jehova nĩarakaririo mũno nĩ Daudi. Kwoguo agĩkĩrekia ndungata yake Nathani akamwĩre igũrũ rĩa mehia make. No wone Nathani akĩarĩria Daudi. Daudi nĩericũkirũo mũno nĩ ũrĩa eekĩte, na nĩ ũndũ ũcio Jehova ndaigana kũmũraga. No ĩndĩ Jehova akiuga: ‘Tondũ nĩ wĩkĩte maũndũ maya moru-rĩ, nĩ ũgũkorũo na mathĩna maingĩ mũno thĩinĩ wa nyũmba yaku.’ Na kaĩ Daudi nĩ aagĩire na mathĩna-ĩ!

O mbere, kaana ka Bathi-sheba gagĩkua. Na ningĩ irigithathi rĩa Daudi Amunoni rĩgĩkoma na mwarĩ wa ithe Tamaru na hinya. Rĩu ningĩ mũrũ wa Daudi Abisalomu akĩrakara mũno nĩ ũhoro ũcio na akĩũraga Amunoni. Thutha-inĩ, Abisalomu akĩendithia kũrĩ andũ, na agĩĩtua mũthamaki. Mũthia-inĩ, Daudi agĩtoria mbaara igũrũ rĩa Abisalomu, ũrĩa wacokire kũragwo. Ĩni, Daudi aarĩ na mathĩna maingĩ kũna kũna.

Gatagatĩ-inĩ ka maũndũ maya mothe-rĩ, Bathi-sheba agĩciara kahĩĩ getagwo Suleimani. Rĩrĩa aarĩ mũkũrũ na e mũrũaru-rĩ, mũrũwe Adonija akĩgeria gwĩtua mũthamaki. Daudi rĩu agĩatha Zadoku mũthĩnjĩri-Ngai, aitĩrĩrie Suleimani maguta mũtwe nĩguo atuĩke mũthamaki. Thutha wa kahinda gatarĩ kanene Daudi agĩkua arĩ wa mĩaka 70. Aathanire ihinda rĩa mĩaka 40, nake Suleimani agĩtuĩka mũthamaki wa Isiraeli.