1. Nĩ ndini irĩkũ imwe irũmagĩrĩrũo thĩinĩ wa Afrika?

 HAKUHĨ andũ othe thĩinĩ wa Afrika nĩ metĩkĩtie atĩ nĩ ũndũ wa bata gũthathaiya Ngai. O na kũrĩ ũguo, matiĩtĩkanagĩria ũrĩa agĩrĩirũo nĩ gũthathaiyo. Amwe mathathayagĩria mũthigiti-inĩ, nao angĩ makahũthĩra njĩra cia ũndũire. Angĩ nao mathiaga kanitha. No ningĩ tũtiagĩrĩirũo gwĩciria atĩ thĩinĩ wa Afrika kwĩ ndini o ithatũ tu. Gatagatĩ-inĩ ka Ũithĩramu kũrĩ mawatho na mawĩtĩkio ngũrani. Ndini cia ũndũire ikoragwo irĩ ngũrani kũringana na kũndũ. Na gatagatĩ-inĩ ka ndini cia Gĩkristiano, gũkoragwo na nyamũkano o na nene makĩria. Makĩria ma ndini iria nene cia Gĩkristiano, nĩ kũrĩ makanitha mangĩ ngiri nyingĩ thĩinĩ wa Afrika.

2. (a) Nĩ maũndũ marĩkũ mahutagia itua rĩa mũndũ rĩgiĩ ndini ĩrĩa ekũrũmĩrĩra? (b) Nĩ maũndũ marĩkũ matangĩonania atĩ ndini nĩ njĩtĩkĩrĩku nĩ Ngai?

² Nĩ kĩĩ gĩtũmaga andũ mathathaiye na njĩra ĩrĩa mathathayagia nayo? Andũ aingĩ marũmagĩrĩra ndini ya aciari ao. Maũndũ marĩa meekĩkire tene o namo nĩ mahutagia itua rĩgiĩ ndini iria andũ mekũrũmĩrĩra. Ibuku rĩtagwo The Africans—A Triple Heritage riugĩte ũũ: “Ũithĩramu watheremire mwena wa rũgongo wa Sahara (werũ mũnene wa mũthanga ũkoragwo mwena wa rũgongo wa Afrika) kũgerera ũhootani, . . . Ũkristiano watheremire mwena wa mũhuro wa Sahara na njĩra o ĩyo. Angĩkorũo Ũithĩramu watheremire mwena wa rũgongo wa Sahara kũgerera  rũhiũ rwa njora, Ũkristiano watheremire mwena wa mũhuro wa Sahara kũgerera mũcinga.” O na kũrĩ ũguo, aingĩ aitũ twĩtĩkĩtie atĩ ndini ĩrĩa tũrũmagĩrĩra nĩ ĩkenagia Ngai. No ndini ndĩtuĩkaga ya ma atĩ tondũ aciari aitũ nĩyo marũmagĩrĩra kana atĩ tondũ bũrũri mũna ũrĩ hinya nĩguo wareheire maguka maitũ ndini ĩyo.

3-5. Nĩ ngerekano ĩrĩkũ ĩngĩtũteithia kuona atĩ ti ndini ciothe irutanaga ma?

³ O na gũtuĩka ndini ciothe ciugaga atĩ iraheana ũtongoria wa kwĩhokeka wĩgiĩ gũtungatĩra Ngai, mawoni ma cio nĩ ngũrani. Irutanaga maũndũ maingĩ ngũrani megiĩ Ngai nũũ na maũndũ marĩa endaga twĩke. Ta hũũra mbica ũheetwo wĩra thĩinĩ wa kambuni nene. Ũrĩ wĩra-inĩ mũthenya wa mbere, ũkamenya atĩ mũnene wa kambuni arĩ rũtha. Kwoguo, ũkoria aruti a wĩra atatũ wĩra ũrĩa wagĩrĩirũo nĩ kũruta. Mũruti wĩra wa mbere akoiga atĩ mũnene arenda ũhaatage wabici. Wa kerĩ akoiga atĩ wagĩrĩirũo kũhaka nyũmba rangi. Nake wa gatatũ agakwĩra atĩ wĩra waku nĩ wa gũtwara marũa.

⁴ Ũgacoka ũkoria aruti wĩra acio ũhoro wĩgiĩ mũnene. Wa mbere akoiga atĩ mũnene ũcio nĩ mũndũ mũraihu, mwĩthĩ, na ti mũndũ mwega. Wa kerĩ akoiga atĩ nĩ mũndũ mũkuhĩ, mũkũrũ, na nĩ arĩ tha. Nake wa gatatũ agakwĩra atĩ mũnene o na ti mũndũrũme, nĩ mũtumia. Hatarĩ nganja no wone atĩ aruti wĩra acio atatũ matingĩkorũo othe mararia ũhoro wa ma. Nĩguo ũtũũrie wĩra ũcio mwerũ, no ũbatare gũtuĩria nĩguo ũmenye mũnene ũcio na ũmenye wĩra ũrĩa arenda ũrute.

⁵ Ũguo noguo kũrĩ ũhoro-inĩ wĩgiĩ ndini. Tondũ nĩ kũrĩ mawoni maingĩ megiĩ Ngai nũũ, na ũrĩa endaga twĩke-rĩ, no mũhaka tũthuthurie wega biũ nĩguo tũtigĩrĩre atĩ ũthathaiya witũ nĩ ũratwarana na ũhoro wa ma. No tũngĩĩruta atĩa ma ĩrĩa ĩkoniĩ Ngai?