Ngai eraga andũ a mĩthemba yothe mamũkuhagĩrĩrie na njĩra ya mahoya. (Thaburi 65:2) No ningĩ ti mahoya mothe athikagĩrĩria kana akametĩkĩra. Kwa ngerekano-rĩ, mahoya ma mũthuri wĩkaga mũtumia wake maũndũ moru no magirĩrĩrio. (1 Petero 3:7) Ningĩ, rĩrĩa Aisiraeli maakĩrĩrĩirie gwĩka maũndũ moru, Ngai nĩ aaregire kũigua mahoya mao. Ma nĩ atĩ, kwaranĩria na Jehova mahoya-inĩ nĩ gĩtĩo kĩnene. O na kũrĩ ũguo, Ngai no aigue nginya mahoya ma andũ mekĩte mehia maritũ mangĩĩrira.​—Thoma Isaia 1:15; 55:7.

Wĩrorere video ya Hihi Ngai Athikagĩrĩria Mahoya Mothe?

Mahoya nĩ gĩcunjĩ kĩa ũthathaiya witũ, kwoguo twagĩrĩirũo kũhoya Mũũmbi witũ wiki, Jehova. (Mathayo 4:10; 6:9) Ningĩ, tondũ tũtirĩ akinyanĩru, twagĩrĩirũo kũhoya thĩinĩ wa rĩĩtwa rĩa Jesu tondũ nĩ aakuire nĩ ũndũ wa mehia maitũ. (Johana 14:6) Jehova ndendaga tũcokagĩre mahoya tũigĩte meciria-inĩ maitũ kana mandĩkĩtwo handũ. Endaga tũmũhoyage kuuma ngoro.​—Thoma Mathayo 6:7; Afilipi 4:6, 7.

Mũũmbi witũ nĩ aiguaga o na hĩndĩ ĩrĩa twamũhoya na ngoro. (1 Samueli 1:12, 13) Atwĩraga tũmũhoyage hingo ciothe, ta rũcinĩ na hwaĩ-inĩ, hĩndĩ ĩrĩa tũrarĩa, na hĩndĩ ĩrĩa tũrĩ na mathĩna.​—Thoma Thaburi 55:22; Mathayo 15:36.

Gũkuhĩrĩria Ngai ti ũndũ mũhũthũ tondũ tũtũũranagia na andũ matetĩkĩtie Ngai, na manyũrũragia kĩĩranĩro gĩake gĩa gũkaarehe thayũ thĩinĩ wa thĩ. (2 Timotheo 3:1, 4; 2 Petero 3:3, 13) Kwoguo nĩ tũrabatara kũnyitanagĩra na aarĩ na ariũ a Ithe witũ nĩguo twĩkĩranage ngoro.​—Thoma Ahibirania 10:24, 25.

 Kũnyitanĩra na andũ arĩa mendete Ngai nĩ gũtũteithagia kũmũkuhĩrĩria. Mĩcemanio ya Aira a Jehova ĩtũheaga mĩeke ya kũgunĩka kuumana na wĩtĩkio wa arĩa angĩ.​—Thoma Aroma 1:11, 12.

No ũkuhĩrĩrie Jehova na njĩra ya gwĩcũrania maũndũ marĩa wĩrutĩte kuumana na Kiugo gĩake. Wĩcũranie ũhoro wa mawĩko make, ũtaaro wake, na ciĩranĩro ciake. Gwĩcũrania na kũhoya nĩ gũtũmaga tũtaũkĩrũo nĩ bata wa wendo na ũũgĩ wa Ngai.​—Thoma Joshua 1:8; Thaburi 1:1-3.

Ũngĩkuhĩrĩria Ngai angĩkorũo tu nĩ ũkũmwĩhoka, na ũkorũo na wĩtĩkio harĩ we. Ĩndĩ wĩtĩkio nĩ ta kĩndũ kĩrĩ muoyo kĩrĩa kĩbataraga kũheo irio. No mũhaka ũthiĩ na mbere gwaka wĩtĩkio waku na njĩra ya gwĩcũrania itũmi cia maũndũ marĩa wĩtĩkĩtie.​—Thoma Mathayo 4:4; Ahibirania 11:1, 6.

Jehova nĩ arũmbũyagia arĩa mamwendete. No amagitĩre kuumana na ũndũ o wothe ũngĩthũkia wĩtĩkio wao na kĩĩrĩgĩrĩro kĩao kĩa muoyo wa tene na tene. (Thaburi 91:1, 2, 7-10) Nĩ atũheaga mũkaana wĩgiĩ njĩra cia ũtũũro iria ingĩthũkia ũgima witũ wa mwĩrĩ na gĩkeno gitũ. Jehova nĩ atũrutaga njĩra ĩrĩa njega biũ ya ũtũũro.​—Thoma Thaburi 73:27, 28; Jakubu 4:4, 8.