Mũhunjia wa Ũthamaki Mwende:

TA HŨŨRA mbica ũrĩ wa famĩlĩ ya Betheli ya Brooklyn kĩroko kĩa Njumaa Oktomba 2, 1914. Ũikarĩte harĩa ũikaraga metha-inĩ mwetereire Mũrũ wa Ithe Witũ C. T. Russell akinye. O rĩmwe mũrango wa nyũmba ĩyo ya kũrĩĩra ũkahingũka, na Mũrũ wa Ithe Witũ Russell akaingĩra. Agatithia hanini, o ta ũrĩa amenyerete gwĩka, agacoka akageithia famĩlĩ ya Betheli akenete, “Mũrĩ ega rũcinĩ.” No handũ ha gũikarĩra gĩtĩ gĩake o rĩmwe, akahũũra rũhĩ na akamũmenyithia kĩmenyithia gĩkĩ gĩa gũcanjamũra: “Mahinda ma Ndũrĩrĩ nĩ mathiru; athamaki ao nĩ marĩkĩtie gwathana!” Ũgakena ũkaremwo nĩ kwĩgirĩrĩria, tondũ ũtũire wetereire ũndũ ũcio ihinda rĩa mĩaka mĩingĩ! Ũrĩ hamwe na arĩa angĩ a famĩlĩ ya Betheli, ũkahũũra hĩ mũno thutha wa kũigua ũhoro ũcio wa gũcanjamũra.

 Mĩaka mĩingĩ nĩ ĩhĩtũkĩte kuuma rĩrĩa Mũrũ wa Ithe Witũ Russell aaririe ciugo icio. Nĩ maũndũ marĩkũ Ũthamaki ũhingĩtie kuuma hĩndĩ ĩyo? Nĩ maingĩ mũno! Kũgerera mũbango ũcio wa Ũthamaki, Jehova akoretwo agĩtheria na kũmenyeria andũ ake, kuuma rĩrĩa maarĩ ngiri nini tu mwaka wa 1914, nginya ũmũthĩ ũyũ marĩ makĩria ma milioni mũgwanja na nuthu. Wee mwene ũgunĩkĩte na njĩra irĩkũ nĩ ũndũ wa kũmenyerio kũu?

Ũmũthĩ nĩ tũiguaga aarĩ na ariũ a Ithe witũ makiuga kaingĩ atĩ “ithondeka rĩa Jehova no rĩrathiĩ!” na ũcio nĩ ũhoro wa ma. No ũrĩa kũrĩ nĩ atĩ, kuuma mwaka wa 1914, gĩcunjĩ gĩa ithondeka rĩa Jehova gĩa kũrĩa igũrũ, gĩkoretwo gĩgĩthiĩ ihenya inene mũno o ta ũrĩa ũkuona wathoma ibuku rĩrĩ na kinyi. Nĩguo mahunjie ũhoro mwega thĩinĩ wa thĩ yothe, ahunjia a Ũthamaki mahũthĩrĩte njĩra mwanya mwanya ta ngathĩti cia mohoro, gũthiĩ makuuĩte ibandĩko, thenema, kandi cia kũruta ũira, inanda, redio, na nginya Intaneti.

Nĩ ũndũ wa Jehova kũrathima wĩra ũcio, rĩu nĩ tũhotaga gũcaba mabuku maitũ marĩa maragĩrĩria Bibilia na thiomi makĩria ma 670, na tũkamatigĩra andũ hatarĩ marĩhi. Erutĩri nĩ mateithagĩrĩria harĩ gwaka Nyũmba cia Ũthamaki, Nyũmba cia Igomano, na wabici cia honge, mabũrũri-inĩ marĩa matongu o hamwe na marĩa matarĩ ũhoti mũnene wa kĩĩmbeca. Na rĩrĩa gĩcanjama kĩoimĩra, aarĩ na ariũ a Ithe witũ nĩ mathiaga o na ihenya gĩcigo-inĩ kĩu gũteithia, makonania kũna atĩ ‘maciarĩtwo matuĩke ũteithio hingo ya mĩnyamaro.’—Thim. 17:17.

Mahinda-inĩ mamwe atongoria a ndini na a thirikari nĩ ‘magĩaga ngwatanĩro’ nĩguo matũũkĩrĩre, no wĩtĩkio witũ nĩ wĩkĩragwo hinya tuona ũrĩa kĩyo kĩu kĩao maita maingĩ ‘gĩtũmaga ũhoro ũrĩa mwega ũthiĩ na mbere.’—Thab. 94:20; Afil. 1:12.

Nĩ gĩtĩo kĩnene gwĩtanio hamwe na inyuĩ ‘andũ a nyũmba’ itũ. Gĩai na ma atĩ nĩ tũmwendete mũno inyuothe. Tũrerĩgĩrĩra atĩ maũndũ marĩa marĩ thĩinĩ wa ibuku rĩrĩ nĩ mekũmũteithia kuoya na ũritũ makĩria igai rĩanyu rĩa kĩĩroho gũkĩra hĩndĩ ĩngĩ o yothe.—Mat. 24:45.

Tũkĩmwendera maũndũ mega, nĩ ithuĩ

Ariũ a Ithe wanyu,

Kĩama Kĩrĩa Gĩtongoragia kĩa Aira a Jehova