1. Taarĩria ũrĩa arangĩri, kana anabii a Jehova maakoretwo magĩka, na maũndũ marĩa maarũmĩrĩire.

 TA HŨŨRA mbica mũrangĩri arũgamĩte igũrũ rĩa thingo cia Jerusalemu, egitĩire maitho ndagacinwo nĩ ũtheri wa riũa rĩgĩthũa. Agaikia maitho nĩguo one kũraihu. O rĩmwe akoya karumbeta gake na igũrũ, akahuhia na hinya nĩguo agĩe na rĩera, agakahuuha nĩgetha aheane mũkaana atĩ mbũtũ ya Babuloni nĩ gũka ĩroka. No aikari a itũũra rĩu arĩa mataratindanĩra nĩ acerere kuoya ikinya rĩa gwathĩkĩra mũkaana wa mũrangĩri ũcio. Kwa ihinda rĩa mĩaka mĩingĩ, arangĩri kana anabii arĩa mamũrĩtwo nĩ Jehova nĩ makoretwo makĩheana mũkaana atĩ mũthenya ũyũ nĩ ũgaakinya, no andũ acio matiigana gũthikĩrĩria. Rĩu mbũtũ ya Babuloni ĩrigicĩirie itũũra rĩu. Thutha wa kũrigicĩria itũũra rĩu mĩeri mĩingĩ, thigari icio ikamomora thingo ciarĩo na ikaingĩra thĩinĩ, ikamomora hekarũ, na ikooraga kana ikanyita aikari a Jerusalemu mĩgwate, o acio matarĩ na wĩtĩkio na makoretwo makĩhoya mĩhianano.

2, 3. (a) Nĩ ũndũ ũrĩkũ aikari a thĩ mekũngʼethanĩra naguo ica ikuhĩ, na nĩ itua rĩrĩkũ marabatara gũtua ihinda-inĩ rĩrĩ? (b) Nĩ ciũria irĩkũ tũkwarĩrĩria?

² Ũmũthĩ, mbũtũ cia Jehova cia kũniinana nĩ iroka kũngʼethanĩra na andũ arĩa matarĩ na wĩtĩkio gũkũ thĩ. (Kũg. 17:12-14) Mbaara ĩyo nĩyo ĩgaakorũo ĩrĩ mũthia wa thĩna ũrĩa mũnene ũtarĩ  woneka rĩngĩ. (Mat. 24:21) No andũ ti acerere mũno kuoya ikinya rĩa gwathĩkĩra mũkaana ũrĩa ũheanagwo nĩ arĩa Jehova amũrĩte marute wĩra wa mũrangĩri.

³ Nĩ kĩĩ gĩatũmire Jehova aamũre arangĩri? Mũrangĩri aheanaga ndũmĩrĩri ĩrĩkũ? Nĩa makoretwo marĩ arangĩri, na ithuĩ tũkoragwo na itemi rĩrĩkũ? Reke twarĩrĩrie macokio ma ciũria icio.

4. Nĩ kĩĩ gĩatũmire Jehova aamũre arangĩri? (Rora mbica kĩambĩrĩria-inĩ gĩa gĩcunjĩ gĩkĩ.)

⁴ Thoma Ezekieli 33:7. Mahinda-inĩ ma Bibilia, mũrangĩri kaingĩ aarũgamaga igũrũ rĩa thingo cia itũũra nĩgetha ateithĩrĩrie kũgitĩra aikari a rĩo. Arangĩri moonanagia atĩ mũtongoria wa itũũra nĩ aarũmbũyagia raiya ake. O na gũtuĩka mũgambo wa coro wa mũrangĩri nĩ ũngĩahahũrire aikari me toro, nĩ ũngĩahonokirie mĩoyo ya arĩa mawathĩkĩra. O ũndũ ũmwe na ũcio, Jehova ndaamũrĩte arangĩri nĩgetha mahahũre Aisiraeli na ndũmĩrĩri ciĩgiĩ kũniinwo, ĩndĩ eekaga ũguo tondũ nĩ aarũmbũyagia andũ ake na nĩ eendaga kũhonokia mĩoyo.

5, 6. Njĩra ĩmwe Jehova onanagia kĩhooto gĩake nayo nĩ ĩrĩkũ?

⁵ Rĩrĩa Jehova aamũrire Ezekieli atuĩke mũrangĩri, nĩ oonanirie ngumo ciake cia gũtwĩkĩra ngoro. Reke twarĩrĩrie ngumo igĩrĩ oonanirie.

⁶ Kĩhooto: Jehova nĩ onanagia kĩhooto na njĩra ya kũhiũrania na ithuĩ tũrĩ mũndũ ũmwe ũmwe atarĩ na mũthutũkanio. Kwa ngerekano, o na gũtuĩka ndũmĩrĩri ya Ezekieli yaiguirũo na ĩkĩregwo nĩ kĩrĩndĩ kĩnene, Jehova ndoonaga Aisiraeli othe marĩ kĩrĩndĩ kĩa aremi; handũ ha ũguo, eendaga kuona ũrĩa o mũndũ ekwamũkĩra ndũmĩrĩri ĩyo. Nĩ aagwetire maita maingĩ ũhoro wĩgiĩ kwarĩria “mũndũ mwaganu” na “mũndũ mũthingu.” Kwoguo, Jehova atuanagĩra kũringana na ũrĩa o mũndũ ekũiyũkia ndũmĩrĩri.—Ezek. 33:8, 18-20.

7. Jehova atuagĩra andũ kũringana na kĩĩ?

⁷ Ningĩ kĩhooto kĩa Jehova nĩ kĩonekaga kũgerera ũrĩa atuagĩra andũ. Andũ matituagĩrũo kũringana na maũndũ marĩa meekire tene, ĩndĩ matuagĩrũo kũringana na ũrĩa mekũiyũkia ndũmĩrĩri ya mũkaana ĩrĩa maraheo ihinda-inĩ rĩu. Jehova eerire Ezekieli atĩrĩ: “Rĩrĩa ndera mũndũ mwaganu ũũ: ‘Hatarĩ nganja nĩ ũgũkua,’ nake agarũrĩre atigane na mehia make na eke maũndũ ma kĩhooto na ma ũthingu, . . . hatarĩ nganja nĩ egũthiĩ na mbere gũtũũra muoyo.” Jehova agĩcoka akiuga ciugo ici cia gwĩkĩra ngoro: “Gũtirĩ rĩhia o na rĩmwe rĩa marĩa eekĩte rĩkaaririkanwo.” (Ezek. 33:14-16) No ningĩ arĩa manakorũo makĩrũmĩrĩra njĩra ya ũthingu matiagĩrĩirũo gwĩciria atĩ matingĩũrio nĩ ũndũ wa ũremi wao ihinda-inĩ rĩrĩ atĩ tondũ maarĩ athĩki tene. Jehova ooigire atĩ mũndũ angĩhoka “ũthingu wake mwene eke maũndũ moru, gũtirĩ ũndũ o na ũmwe wake wa ũthingu ũkaaririkanwo, no agaakua nĩ ũndũ wa maũndũ macio moru ekĩte.”—Ezek. 33:13.

8. Mĩkaana ĩrĩa yaheanagwo nĩ anabii ĩtũrutaga atĩa ũhoro wĩgiĩ kĩhooto kĩa Jehova?

 ⁸ Jehova ningĩ nĩ onanagia kĩhooto na njĩra ya kũheana mũkaana ihinda rĩrĩa rĩagĩrĩire atanoya ikinya. Ezekieli aambĩrĩirie wĩra wake mĩaka ta ĩtandatũ mbere ya mbũtũ ya Babuloni kwananga Jerusalemu. No Ezekieli tiwe warĩ wa mbere kũhe andũ a Ngai mũkaana atĩ nĩ mangĩkorio nĩ ũndũ wa ciĩko ciao. Makĩria ma mĩaka igana rĩmwe mbere ya Jerusalemu kwanangwo, Jehova nĩ aatũmire anabii ta Hosea, Isaia, Mika, Odedi, na Jeremia marĩ arangĩri. Jehova eerire Jeremia aririkanie Aisiraeli ũũ: ‘Ndamũrire arangĩri na makiuga atĩrĩ, “Thikĩrĩriai mũgambo wa coro!”’ (Jer. 6:17) Kwoguo Jehova na arangĩri acio matingĩoririo nĩ ũndũ wa mĩoyo ĩrĩa yorire rĩrĩa Jehova aahũthĩrire Ababuloni kũhingia ituĩro rĩake.

9. Jehova oonanirie wendo mwĩhokeku atĩa?

⁹ Wendo: Jehova nĩ oonanirie wendo mwĩhokeku na njĩra ya gũtũma arangĩri ake makaheane mũkaana, to kũrĩ andũ arĩa athingu, ĩndĩ nĩ nginya kũrĩ arĩa aganu, arĩa maamũiguithagia ũũru ngoro na makahaka rĩĩtwa rĩake gĩko. Ta wĩcirie ũndũ ũyũ: Aisiraeli maarĩ andũ a Jehova no maaikaraga makĩmũtiganagĩria na makarũmĩrĩra ngai cia maheeni! Jehova nĩ oonanirie ruo rũrĩa aaiguaga ngoro-inĩ nĩ ũndũ wa kwaga kwĩhokeka kwao na njĩra ya kũgerekania rũrĩrĩ rũu na mũtumia mũtharia. (Ezek. 16:32) O na kũrĩ ũguo, Jehova ndaahiũhire kũmatiganĩria. Handũ ha kwĩrĩhĩria, aacaragia ũrĩa mangĩmũcokerera. Aahũthagĩra rũhiũ rwa njora thutha wa kũmahe mweke wa kwĩrira. Nĩkĩ? Eerire Ezekieli ũũ: “Ndikenagio nĩ gĩkuũ kĩa mũndũ mwaganu, no handũ ha ũguo nyendaga mũndũ mwaganu agarũrĩre njĩra yake athiĩ na mbere  gũtũũra muoyo.” (Ezek. 33:11) Ũguo nĩguo Jehova aaiguaga mahinda-inĩ macio, na noguo aiguaga nginya ũmũthĩ.—Mal. 3:6.

10, 11. Nĩ maũndũ marĩkũ tũngĩĩruta kuumana na ũrĩa Jehova aarũmbũyanagia na andũ ake?

¹⁰ Nĩ maũndũ marĩkũ tũreruta kuumana na ũrĩa Jehova oonanirie kĩhooto na wendo kwerekera Aisiraeli? Ũndũ ũmwe tũreruta nĩ atĩ tũtiagĩrĩirũo kuona andũ arĩa tũhunjagĩria marĩ kĩrĩndĩ, ĩndĩ twagĩrĩirũo kũmona marĩ mũndũ ũmwe ũmwe. No tũkorũo tũhĩtĩtie mũno tũngĩtuĩra mũndũ atĩ ndagĩrĩirũo kũhunjĩrio nĩ ũndũ wa mĩtugo yake ya tene, kana nĩ ũndũ wa ũndũire, rũrĩrĩ, ũhoti wa kĩĩmbeca, kana rũthiomi rwake. Jehova nĩ aarutire mũtũmwo Petero ũndũ wa bata ũhũthĩkaga nginya ũmũthĩ atĩ: “Ngai ndarĩ mũthutũkanio, no thĩinĩ wa ndũrĩrĩ ciothe, mũndũ ũrĩa ũmwĩtigĩrĩte na wĩkaga ũrĩa kwagĩrĩire nĩ etĩkĩrĩkaga nĩ we.”—Atũm. 10:34, 35.

¹¹ Ũndũ ũngĩ tũreruta nĩ atĩ nĩ twagĩrĩirũo gũikara tũgĩĩthuthuragia tondũ ciĩko citũ cia tene cia ũthingu itingĩtũma twage kũũrio tũngĩka ũũru ihinda-inĩ rĩrĩ. Twagĩrĩirũo kũririkana atĩ o na ithuĩ nĩ tũkoragwo na mĩerekera ya kwĩhia o ta andũ arĩa tũhunjagĩria. Kwoguo o na ithuĩ nĩ twagĩrĩirũo kũrũmĩrĩra ũtaaro ũyũ mũtũmwo Paulo aaheire kĩũngano gĩa Korintho: “Mũndũ ũrĩa wĩciragia atĩ nĩ arũgamĩte nĩ emenyagĩrĩre ndakae kũgwa. Gũtirĩ igerio rĩmũkorete tiga o marĩa makoraga andũ.” (1 Kor. 10:12, 13) Tũtingĩenda gũtuĩka ta mũndũ ũrĩa ‘wĩhokaga ũthingu wake mwene’ na njĩra ya gwĩciria atĩ no twĩke maũndũ moru tũtekũũrio atĩ tondũ nĩ twĩkaga maũndũ mega. (Ezek. 33:13) Gũtekũmakania  tũtungatĩire Jehova ihinda rĩigana atĩa, hingo ciothe twagĩrĩirũo gũkoragwo tũrĩ na wĩnyihia na twĩhaarĩirie gwathĩka.

12. Angĩkorũo tene nĩ twekĩte mehia maritũ-rĩ, nĩ ũndũ ũrĩkũ twagĩrĩirũo kũririkana?

¹² Ĩ angĩkorũo tene nĩ twekĩte mehia maritũ no nĩ tũiguaga tũgĩthumbũka nĩ ũndũ wa mehia macio? Ndũmĩrĩri ya Ezekieli ĩtũrutaga atĩ Jehova nĩ akaaherithia andũ arĩa mehagia na makaga kwĩrira. Ningĩ nĩ tũreruta atĩ Jehova nĩ Ngai wĩ wendo no ti wa kwĩrĩhĩria. (1 Joh. 4:8) Tũngĩonania na ciĩko citũ atĩ nĩ twĩrirĩte, tũtiagĩrĩirũo kuona ta mehia maitũ marĩ manene ũndũ tũtangĩiguĩrũo tha nĩ Ngai. (Jak. 5:14, 15) Jehova nĩ aakoragwo ehaarĩirie kuohera Aisiraeli arĩa meeingĩragia ũtharia-inĩ wa kĩĩroho, na o na ithuĩ nĩ akoragwo ehaarĩirie gũtuohera.—Thab. 86:5.

13, 14. (a) Arangĩri maagĩrĩirũo kũheana ndũmĩrĩri ĩrĩkũ? (b) Isaia aaheanire ndũmĩrĩri ĩrĩkũ?

¹³ Thoma Ezekieli 33:2, 3. Nĩ ndũmĩrĩri ĩrĩkũ arangĩri a Jehova maagĩrĩirũo kũheana? Ũndũ ũmwe wa bata maagĩrĩirũo gwĩka nĩ kũheana mĩkaana. No ningĩ nĩ maaheanaga ũhoro mwega. Reke tuone ngerekano cigana ũna.

¹⁴ Isaia, ũrĩa watungatire kuuma kĩndũ mwaka wa 778 nginya 732 M.M.M., nĩ aaheanire mũkaana wa atĩ Ababuloni nĩ mangĩatharĩkĩire Jerusalemu na matware aikari akuo ithamĩrio. (Isa. 39:5-7) No ningĩ nĩ aatongoririo nĩ roho kwandĩka ũũ: “Ta thikĩrĩria! Arangĩri aku nĩ kwanĩrĩra maranĩrĩra. Maroigĩrĩria marĩ hamwe nĩ gĩkeno, nĩ gũkorũo nĩ makeeyonera wega rĩrĩa Jehova agaacokanĩrĩria Zayuni rĩngĩ.” (Isa. 52:8) Isaia aaheanire ũhoro ũrĩa mwega makĩria—ũthathaiya wa ma nĩ ũngĩacokirio!

15. Jeremia aaheanire ndũmĩrĩri ĩrĩkũ?

¹⁵ Jeremia, ũrĩa watungatire kuuma mwaka wa 647 nginya 580 M.M.M., kaingĩ eragwo atĩ aarathaga o ũhoro wa maũndũ moru. Hatarĩ nganja, nĩ aarutire wĩra mũnene mũno wa kũhe Aisiraeli aganu mũkaana wĩgiĩ thĩna ũrĩa Jehova angĩamareheire. a No ningĩ nĩ aaheanire ũhoro mwega rĩrĩa aarathire atĩ andũ a Ngai nĩ mangĩacokire bũrũri-inĩ wao na ũthathaiya mũtheru ũcokio kuo.—Jer. 29:10-14; 33:10, 11.

16. Ndũmĩrĩri ya Ezekieli yagunire atĩa andũ arĩa maarĩ ithamĩrio Babuloni?

¹⁶ Ezekieli aamũrirũo gũtuĩka mũrangĩri mwaka wa 613 M.M.M., na no kũhoteke aatungatire nginya kĩndũ mwaka wa 591 M.M.M. O ta ũrĩa gĩcunjĩ gĩa 5 na 6 kĩa ibuku rĩrĩ kĩonanĩtie, Ezekieli nĩ aaheire Aisiraeli mũkaana arĩ na kĩyo, akĩmeera ũhoro wĩgiĩ mwanangĩko ũrĩa ũngĩamakorire, kwoguo agĩĩthema gũcokererũo nĩ ihĩtia rĩa ũiti wa thakame nĩ ũndũ wa mĩoyo ĩrĩa ĩngĩaniinirũo. Ezekieli to kũhe aaheire arĩa maarĩ ithamĩrio mũkaana wa atĩ Jehova nĩ angĩaherithirie andũ a Jerusalemu arĩa maaregenyũkĩte, ĩndĩ nĩ aateithirie andũ acio maarĩ ithamĩrio Babuloni gũikara meiguĩte kĩĩroho na gũkorũo mehaarĩirie nĩ ũndũ wa wĩra ũrĩa warĩ mbere. Thutha wa mĩaka 70 ya gũkorũo ithamĩrio, Jehova nĩ angĩgaateithia arĩa  mangĩgaakorũo matigarĩte macoke bũrũri-inĩ wa Isiraeli. (Ezek. 36:7-11) Andũ acio mangĩgaakorũo marĩ ciana na tũcũkũrũ twa arĩa maathikĩrĩirie Ezekieli. O ta ũrĩa icunjĩ iria irĩ thĩinĩ wa Gĩcigo gĩa 3 kĩa ibuku rĩrĩ cionanĩtie, Ezekieli nĩ aaheanire ũhoro mũingĩ mwega, akĩonania atĩ ũthathaiya mũtheru nĩ ũngĩacokirio Jerusalemu.

17. Nĩ ihinda-inĩ rĩrĩkũ Jehova akoretwo akĩamũra arangĩri?

¹⁷ Hihi anabii acio maarĩirie andũ a Ngai ihinda-inĩ rĩa kũniinwo kwa Jerusalemu mwaka-inĩ wa 607 M.M.M. no o tu Jehova anahũthĩra marĩ arangĩri? Aca to o tu. Jehova nĩ akoretwo akĩamũra arangĩri ihinda-inĩ o rĩothe rĩa mwanya rĩgiĩ kũhinga kwa muoroto wake, nĩguo maheane mũkaana harĩ andũ arĩa ehia na maheane ndũmĩrĩri ya ũhoro mwega.

18. Johana Mũbatithania aarutire wĩra ũrĩkũ?

¹⁸ Karine-inĩ ya mbere Mahinda Maitũ, Johana Mũbatithania nĩ aarutire wĩra wa mũrangĩri. Nĩ aaheire andũ a nyũmba ya Isiraeli mũkaana atĩ nĩ mangĩaregirũo. (Mat. 3:1, 2, 9-11) No nĩ harĩ ũndũ ũngĩ eekire. Jesu ooigire atĩ Johana nĩwe “mũtũmwo” ũrĩa warathĩtwo, ũrĩa wahaarĩirie njĩra nĩ ũndũ wa Mesia. (Mal. 3:1; Mat. 11:7-10) Ũndũ ũmwe wĩgiĩ wĩra ũcio warĩ kũheana ũhoro mwega atĩ Jesu, o we “Gatũrũme ka Ngai,” nĩ aakinyĩte na nĩ aangĩeheririe “mehia ma kĩrĩndĩ gĩa gũkũ thĩ.”—Joh. 1:29, 30.

19, 20. Jesu na arutwo ake maatungatire marĩ arangĩri na njĩra ĩrĩkũ?

¹⁹ Jesu nĩwe warĩ mũrangĩri ũrĩa mũnene. O ta Ezekieli, aatũmĩtwo nĩ Jehova kũrĩ “nyũmba ya Isiraeli.” (Ezek. 3:17; Mat. 15:24) Jesu nĩ aaheire rũrĩrĩ rwa Isiraeli mũkaana atĩ nĩ rũngĩaregirũo, na Jerusalemu yanangwo. (Mat. 23:37, 38; 24:1, 2; Luk. 21:20-24) No wĩra ũrĩa mũnene aarutaga nĩ kũhunjia ũhoro ũrĩa mwega.—Luk. 4:17-21.

²⁰ Rĩrĩa Jesu aarĩ gũkũ thĩ eerire arutwo ake ũũ: “Ikaragai mwĩhũgĩte.” (Mat. 24:42) Nĩ maathĩkĩire uuge wake na makĩruta wĩra wa arangĩri, makĩheana mũkaana wa atĩ Jehova nĩ aaregete nyũmba ya Isiraeli, o hamwe na itũũra rĩa Jerusalemu. (Rom. 9:6-8; Gal. 4:25, 26) O ta arangĩri arĩa maarĩ mbere yao, nĩ maahunjirie ũhoro mwega. Ndũmĩrĩri yao yarĩ nginya kũmenyithania atĩ o na andũ a ndũrĩrĩ nĩ mangĩakorirũo marĩ amwe a Isiraeli a Ngai arĩa maaitĩrĩirio maguta kũgerera roho, na nĩ mangĩagĩire na mweke wa kũnyitanĩra na Kristo harĩ gũcokia ũthathaiya mũtheru gũkũ thĩ.—Atũm. 15:14; Gal. 6:15, 16; Kũg. 5:9, 10.

21. Paulo aaigire kĩonereria kĩrĩkũ?

²¹ Mũtũmwo Paulo nĩ aaigire kĩonereria kĩega arĩ mũrangĩri karine-inĩ ya mbere. Nĩ ooyaga wĩra wake na ũritũ. O ta Ezekieli, Paulo nĩ aamenyaga atĩ angĩagire kũhingia wĩra wake nĩ angĩagĩire na ihĩtia rĩa ũiti wa thakame. (Atũm. 20:26, 27) Paulo aarũmĩrĩire kĩonereria kĩa arangĩri arĩa angĩ na njĩra ya kũhe andũ mũkaana o hamwe na kũhunjia ũhoro mwega. (Atũm. 15:35; Rom.  1:1-4) Agĩtongorio nĩ roho mũtheru, aagwetire ũrathi ũyũ waandĩkirũo nĩ Isaia: “Kũu irĩma igũrũ-rĩ, kaĩ magũrũ ma ũrĩa ũrehaga ũhoro mwega nĩ mathaka-ĩ,” na akĩũringithania na wĩra ũrĩa ũrutagwo nĩ arũmĩrĩri a Kristo makĩhunjia ũhoro wa Ũthamaki wa Ngai.—Isa. 52:7, 8; Rom. 10:13-15.

22. Gwathiire atĩa thutha wa atũmwo gũkua?

²² Thutha wa atũmwo gũkua, ũregenyũki ũrĩa warathĩtwo nĩ wokire na ũgĩtherema kĩũngano-inĩ gĩa Gĩkristiano. (Atũm. 20:29, 30; 2 Thes. 2:3-8) Kwa ihinda iraya, Akristiano a maheeni arĩa maringithanĩtio na itindiĩ, nĩ maaingĩhire gũkĩra arũmĩrĩri a Kristo, arĩa maringithanĩtio na ngano, nayo ndũmĩrĩri ya Ũthamaki wa Ngai ĩkĩhumbĩrũo nĩ morutani ma maheeni. (Mat. 13:36-43) O na kũrĩ ũguo, rĩrĩa ihinda rĩa Jehova rĩa gũcokia ũthathaiya wa ma rĩakinyire, o rĩngĩ nĩ oonanirie wendo na kĩhooto gĩake na njĩra ya kwamũra arangĩri a kũheana mũkaana o hamwe na kũhunjia ũhoro mwega. Arangĩri acio nĩa?

23. C. T. Russell na arĩa maanyitanagĩra nake maarutire wĩra ũrĩkũ?

²³ Mĩaka ĩigana ũna mbere ya 1914, Charles Taze Russell na arĩa maanyitanagĩra nake nĩo maarĩ “mũtũmwo” ũrĩa warĩ “athondeke njĩra” mbere ya Ũthamaki wa Kĩĩmesia kũhandwo. b (Mal. 3:1) Ningĩ gĩkundi kĩu nĩ kĩarutaga wĩra wa mũrangĩri gĩkĩhũthĩra ngathĩti ya Zion’s Watch Tower and Herald of Christ’s Presence kũheana  mũkaana wĩgiĩ ituĩro rĩa Ngai na kũhunjia ũhoro ũrĩa mwega wa Ũthamaki wa Ngai.

24. (a) Ngombo ĩrĩa njĩhokeku ĩkoretwo ĩgĩtungata ĩrĩ mũrangĩri na njĩra ĩrĩkũ? (b) Wĩrutĩte atĩa kuumana na kĩonereria kĩa arĩa manatungata marĩ arangĩri? (Rora mũcoro, “Arangĩri Amwe Maigĩte Kĩonereria Kĩega.”)

²⁴ Thutha wa Ũthamaki kũhandwo, Jesu nĩ aamũrire gakundi kanini ka arũme matungate marĩ ngombo ĩrĩa njĩhokeku. (Mat. 24:45-47) Kuuma hĩndĩ ĩyo, ngombo ĩrĩa njĩhokeku, na noyo Kĩama Kĩrĩa Gĩtongoragia, nĩ ĩkoretwo ĩkĩruta wĩra wa mũrangĩri. Ngombo ĩyo ĩtongoragia wĩra-inĩ wa kũheana mũkaana wĩgiĩ “mũthenya wa kwĩrĩhĩria,” na wa kũhunjia ũhoro wĩgiĩ “mwaka wa wendi mwega wa Jehova.”—Isa. 61:2; ningĩ rora 2 Akorintho 6:1, 2.

25, 26. (a) Nĩ wĩra ũrĩkũ arĩ o mũhaka ũrutwo nĩ arũmĩrĩri othe a Kristo, na ũrutagwo atĩa? (b) Nĩ ũndũ ũrĩkũ tũkwarĩrĩria thĩinĩ wa gĩcunjĩ kĩrĩa kĩrũmĩrĩire?

²⁵ O na gũtuĩka ngombo ĩyo njĩhokeku nĩyo ĩtongoragia wĩra-inĩ wa mũrangĩri, Jesu eerire arũmĩrĩri ake “othe” ‘maikare meiguĩte.’ (Mar. 13:33-37) Twathĩkagĩra watho ũcio na njĩra ya gũikara twĩiguĩte kĩĩroho, tũkĩnyitaga mbaru tũrĩ na wĩhokeku mũrangĩri wa matukũ maya. Tuonanagia atĩ nĩ tũraikara twĩiguĩte na njĩra ya kũhingia wĩra ũrĩa tũheetwo wa kũhunjia. (2 Tim. 4:2) Nĩ kĩĩ gĩtũtindĩkaga gwĩka ũguo? Ũndũ ũmwe nĩ atĩ nĩ twendaga kũhonokia mĩoyo. (1 Tim. 4:16) Ica ikuhĩ andũ aingĩ nĩ mekũũrũo nĩ mĩoyo yao nĩ ũndũ wa kwaga gwathĩkĩra mũkaana ũrĩa ũraheanwo nĩ mũrangĩri wa matukũ maya. (Ezek. 3:19) No gĩtũmi kĩrĩa kĩnene nĩ atĩ nĩ twendaga mũno kũheana ũhoro ũrĩa mwega makĩria—ũthathaiya mũtheru nĩ ũcoketio! Mahinda-inĩ maya ma “mwaka wa wendi mwega wa Jehova,” andũ aingĩ marĩ o na mweke wa gũka kũnyitanĩra na ithuĩ ũthathaiya-inĩ wa Jehova, Ngai witũ wĩ kĩhooto na wendo. Ica ikuhĩ arĩa othe makaahonoka mũico wa mũtabarĩre ũyũ mũũru nĩ makaagunĩka kuumana na wathani wa Mũrũ wake, Kristo Jesu. Nĩ kĩĩ kĩngĩkĩgiria tũteithĩrĩrie mũrangĩri wa matukũ maya kũhunjia ũhoro ũcio mwega ũguo?—Mat. 24:14.

²⁶ O na mũico wa mũtabarĩre ũyũ mũũru ũtakinyĩte, Jehova nĩ anyitithanĩtie andũ ake na njĩra ya magegania. Gĩcunjĩ kĩrĩa kĩrũmĩrĩire nĩ kĩarĩrĩirie ũrathi wĩgiĩ tũmĩtĩ twĩrĩ tũrĩa tũhũthĩrĩtwo kuonania ũrĩa ũndũ ũcio wĩkĩkĩte.