1, 2. Nĩ mbaara ĩrĩkũ nene ĩrĩ hakuhĩ, na nĩ ciũria irĩkũ ciĩgiĩ mbaara ĩyo ciĩyumĩragia? (Rora mbica kĩambĩrĩria-inĩ gĩa gĩcunjĩ gĩkĩ.)

 KWA IHINDA rĩa mĩaka makiri maingĩ, thĩ ĩno nĩ ĩthahĩtio nĩ thakame yumanĩte na mbaara cia andũ, ta njũragano ya mbaara iria igĩrĩ cia thĩ hĩndĩ ya karine ya 20. No mbaara ĩrĩa nene makĩria thĩinĩ wa historĩ ya andũ ĩrĩ hakuhĩ. Mbaara ĩyo ndĩkoimana na ngucanio cia andũ, gatagatĩ ka mabũrũri ma gũkũ thĩ makĩrũa nĩ ũndũ wa itũmi cia mwĩyendo. Ĩndĩ, ĩgaakorũo ĩrĩ “mbaara ya mũthenya ũrĩa mũnene wa Ngai Mwene-Hinya-Wothe.” (Kũg. 16:14) Mbaara ĩyo ĩgaatuthũrũo nĩ thũ njũru, rĩrĩa ĩgaatharĩkĩra bũrũri ũrĩa wendetwo nĩ Ngai; tharĩkĩro ĩyo nĩ ĩgaatũma Jehova Mwathani Ũrĩa Mũnene onanie hinya wake wa kwananga na njĩra nene ĩtarĩ yoneka rĩngĩ thĩinĩ wa thĩ.

² Ciũria ici cia bata nĩ ciĩyumĩragia: Thũ ĩyo nĩ ĩrĩkũ? Ĩgaatharĩkĩra bũrũri ũrĩkũ? Ĩgaatharĩkĩra bũrũri ũcio rĩ, na njĩra ĩrĩkũ, na nĩkĩ? Nĩ tũrabatara kũmenya macokio ma ciũria icio, tondũ maũndũ macio nĩ magaatũhutia ithuĩ athathaiya a ma a Jehova thĩinĩ wa thĩ. No tuone macokio macio ũrathi-inĩ wa kũgucĩrĩria ũrĩa ũrĩ thĩinĩ wa Ezekieli mũrango wa 38 na 39.

3. Taarĩria maũndũ marĩa manene thĩinĩ wa ũrathi wa Ezekieli wĩgiĩ Gogu wa Magogu.

 ³ Thoma Ezekieli 38:1, 2, 8, 18; 39:4, 11. Maũndũ marĩa manene thĩinĩ wa ũrathi ũcio nĩ: “Ihinda-inĩ rĩa mũthia rĩa mĩaka ĩyo,” thũ ĩtagwo “Gogu wa . . . Magogu” nĩ ĩgaatharĩkĩra “bũrũri” wa andũ a Ngai. No tharĩkĩro ĩyo njũru nĩ ĩgaatũma “mangʼũrĩ . . . manene” ma Jehova maarahũke, na nĩ akaaingĩrĩra na ahoote Gogu. a Thutha wa kũhootana, Jehova nĩ akaaneana thũ ĩyo yake na arĩa othe magaakorũo hamwe nayo kũrĩ “nyoni cia mĩthemba yothe iria irĩaga nyama na kũrĩ nyamũ cia gĩthaka [matuĩke] irio ciacio.” Mũthia-inĩ, Jehova nĩ akaahe Gogu “handũ ha gũthikwo.” Nĩguo tũtaũkĩrũo ũrĩa ũrathi ũcio ũkaahinga ihinda rĩũkĩte, no mũhaka twambe tũmenye Gogu nũũ.

4. Tũngiuga atĩa igũrũ rĩgiĩ Gogu wa Magogu?

⁴ Gũkĩrĩ ũguo-rĩ, Gogu wa Magogu nũũ? Kuumana na ũrĩa Ezekieli ataarĩirie, no tuuge atĩ Gogu nĩ thũ ya athathaiya a ma. Hihi Gogu nĩ rĩĩtwa rĩngĩ rĩa Shaitani, thũ ĩrĩa nene makĩria ya athathaiya a ma? Kwa ihinda rĩa mĩaka mĩingĩ, ũguo nĩguo mabuku maitũ makoretwo makiuga. No gũthuthuria makĩria ũrathi wa Ezekieli nĩ gwatũmire tũrũnge ũtaũku witũ. Ngathĩti ya Mũrangĩri yataarĩirie atĩ Gogu wa Magogu ti rĩĩtwa rĩa kĩũmbe kĩa roho gĩtangĩoneka, no nĩ rĩa thũ ĩngĩoneka, na nĩyo ngwatanĩro ya mabũrũri ĩrĩa ĩgaatharĩkĩra ũthathaiya mũtheru. b Tũtanarĩrĩria kĩrĩa kĩngĩtũma tuuge ũguo, reke twambe tũthuthurie maũndũ merĩ marĩ thĩinĩ wa ũrathi wa Ezekieli marĩa maronania atĩ Gogu ti kĩũmbe kĩa roho.

5, 6. Nĩ maũndũ marĩkũ thĩinĩ wa ũrathi wa Ezekieli monanagia atĩ Gogu wa Magogu ti kĩũmbe kĩa roho?

⁵ “Nĩ ngaakũneana kũrĩ nyoni cia mĩthemba yothe iria irĩaga nyama . . . ũtuĩke irio ciacio.” (Ezek. 39:4) Kaingĩ Maandĩko maragia ũhoro wa nyoni iria irĩaga nyama igĩtambura nyamũ ĩkuĩte rĩrĩa maraheana mũkaana wĩgiĩ ituĩro rĩa Ngai. Ngai nĩ aaheanire mĩkaana ta ĩyo kũrĩ rũrĩrĩ rwa Isiraeli o hamwe na ndũrĩrĩ ingĩ itaarĩ cia Isiraeli. (Gũcok. 28:26; Jer. 7:33; Ezek. 29:3, 5) No ta rora wone atĩ mĩkaana ĩyo ya Ngai ndĩaheanirũo kũrĩ ciũmbe cia roho, ĩndĩ yaheanirũo kũrĩ andũ marĩ na mĩĩrĩ ya nyama na thakame. Ningĩ, nyoni ta icio hamwe na nyamũ cia gĩthaka irĩaga nyama no ti mĩĩrĩ ya roho. Kwoguo mũkaana ũcio wa Ngai ũrĩ thĩinĩ wa ũrathi wa Ezekieli wonanagia atĩ Gogu ti kĩũmbe kĩa roho.

⁶ “Nĩ ngaahe Gogu handũ ha gũthikwo . . . thĩinĩ wa Isiraeli.” (Ezek. 39:11) Maandĩko mationanagia atĩ ciũmbe cia roho nĩ ithikagwo gũkũ thĩ. Handũ ha ũguo, Shaitani na ndaimono ciake makaahingĩrũo thĩinĩ wa irima rĩtarĩ gĩturi ihinda rĩa mĩaka 1,000, na thutha ũcio maikio thĩinĩ wa iria rĩa mwaki rĩa mũhaano, kuonania atĩ makaaniinwo tene na tene. (Luk. 8:31; Kũg. 20:1-3, 10) Tondũ Gogu aratuĩka atĩ nĩ akaaheo “handũ ha gũthikwo” thĩinĩ wa thĩ, no tuuge atĩ we ti kĩũmbe kĩa roho.

7, 8. Mũthamaki wa mwena wa rũgongo “agaakinya mũthia” wake rĩ, na ũndũ ũcio ũhaanaine atĩa na ũrĩa gũgaathiĩ harĩ Gogu wa Magogu?

⁷ Angĩkorũo Gogu, thũ ĩyo ĩkaarehe tharĩkĩro ya mũthia harĩ  athathaiya a ma ti kĩũmbe kĩa roho-rĩ, hihi nũũ kana nĩ kĩĩ? Reke tuone morathi merĩ ma Bibilia marĩa megũtũteithia kũmenya Gogu wa Magogu.

⁸ “Mũthamaki wa mwena wa rũgongo.” (Thoma Danieli 11:40-45.) Danieli nĩ aarathire ũhoro wa thirikari nene cia thĩ iria ingĩkoimĩra kuuma matukũ-inĩ make nginya mahinda maya maitũ. Ũrathi ũcio ningĩ nĩ ũgwetete thũ igĩrĩ cia gĩũteti—“mũthamaki wa mwena wa mũhuro” na “mũthamaki wa mwena wa rũgongo”—na o ũrĩa mabũrũri ma gũkũ thĩ makoretwo makĩrũĩrĩra ũnene kwa ihinda rĩa mĩaka mĩingĩ, athamaki acio makoretwo makĩrũgamĩrĩrũo nĩ andũ kana thirikari itiganĩte. Ũhoro-inĩ wĩgiĩ tharĩkĩro ya mũthia ya mũthamaki wa mwena wa rũgongo “ihinda-inĩ rĩa mũthia,” Danieli ooigire ũũ: “Nĩ akoimagara arĩ na marakara manene nĩguo aniine na anange andũ aingĩ.” Mũthamaki ũcio wa mwena wa rũgongo akeerekeria tharĩkĩro yake harĩ athathaiya a Jehova. c Ĩndĩ o ta Gogu wa Magogu, mũthamaki ũcio nĩ “agaakinya mũthia” wake thutha wa kũremwo gũtharĩkĩra andũ a Ngai.

9. Nĩ ũndũ ũrĩkũ ũhaanaine wĩgiĩ ũrĩa gũgaathiĩ harĩ Gogu wa Magogu na ũrĩa gũgaathiĩ harĩ “athamaki a thĩ yothe ĩrĩa ĩikaragwo”?

⁹ “Athamaki a thĩ yothe ĩrĩa ĩikaragwo.” (Thoma Kũguũrĩrio 16:14, 16; 17:14; 19:19, 20.) Ibuku rĩa Kũguũrĩrio nĩ rĩarathĩte atĩ “athamaki a thĩ” nĩ mangĩgookĩrĩra Jesu, o we “Mũthamaki wa athamaki” kũrĩa igũrũ. No tondũ athamaki acio matikaahota gũkinya igũrũ, magaatharĩkĩra andũ arĩa manyitaga mbaru Ũthamaki wa Ngai gũkũ thĩ. Ĩndĩ nĩ makaahootwo hĩndĩ ya mbaara ya Hari–Magedoni. Ta rora wone atĩ mũthia wao ũgooka thutha wa gũtharĩkĩra andũ a Ngai. Ũndũ ũcio nĩ ũhaanaine na ũrĩa ũgwetetwo wĩgiĩ Gogu wa Magogu. d

10. Tũngiuga Gogu wa Magogu nũũ?

¹⁰ Thutha wa kwarĩrĩria maũndũ macio-rĩ, tũngiuga Gogu nũũ? Wa mbere, Gogu ti kĩũmbe kĩa roho. Wa kerĩ, Gogu nĩ mabũrũri ma gũkũ thĩ marĩa magaatharĩkĩra andũ a Ngai ihinda rĩũkĩte. No kũhoteke mabũrũri macio makaanyitana mathondeke ngwatanĩro. Nĩkĩ? Tondũ andũ a Ngai makoragwo thĩinĩ wa thĩ yothe, mabũrũri macio makaabatara gũkorũo na muoroto ũmwe na meke maũndũ marĩ na ũrũmwe nĩguo mamatharĩkĩre. (Mat. 24:9) Shaitani nĩwe ũgaakorũo abangĩte tharĩkĩro ĩyo. Kwa ihinda iraihu nĩ akoretwo agĩcogera mabũrũri ma gũkũ thĩ mokĩrĩre ũthathaiya wa ma. (1 Joh. 5:19; Kũg. 12:17) No ciugo iria irĩ thĩinĩ wa ũrathi wa Ezekieli wĩgiĩ Gogu wa Magogu cionanagia itemi rĩa mabũrũri ma gũkũ thĩ marĩa magaatharĩkĩra andũ a Jehova. e

11. Ũrathi wa Ezekieli ũtaaragĩria atĩa “bũrũri” ũrĩa Gogu agaatharĩkĩra?

¹¹ O ta ũrĩa  kĩbungo gĩa 3 kĩonanĩtie, Gogu wa Magogu nĩ akaarahũra mangʼũrĩ manene ma Jehova rĩrĩa agaatharĩkĩra bũrũri  ũrĩa wendetwo nĩ Jehova. Hihi nĩ bũrũri ũrĩkũ ũcio? Reke tũcokerere ũrathi wa Ezekieli. (Thoma Ezekieli 38:8-12.) Uugaga atĩ Gogu ‘agaatharĩkĩra bũrũri ũrĩa andũ a kuo maacokirio’ na ‘magĩcokanĩrĩrio kuuma ndũrĩrĩ-inĩ.’ Ningĩ uugaga ũũ igũrũ rĩgiĩ athathaiya acio maacokirio, arĩa matũũraga bũrũri-inĩ ũcio: “Maikaraga marĩ na ũgitĩri”; matũũra mao ti “magitĩre na thingo, mĩgamba, kana ihingo”; na nĩ “maregĩĩra [na] ũtonga.” Bũrũri ũcio nĩguo athathaiya a ma a Jehova maikaraga kũndũ guothe thĩinĩ wa thĩ. Tũngĩmenya atĩa bũrũri ũcio nĩ ũrĩkũ?

12. Nĩ gũcokio kũrĩkũ gwekĩkire thĩinĩ wa bũrũri wa Isiraeli mahinda-inĩ ma Bibilia?

¹² No tũteithĩke tũngĩthuthuria gũcokio kũrĩa gwekĩkire thĩinĩ wa Isiraeli ya tene, bũrũri ũrĩa andũ a Ngai arĩa athuure maaikaraga, makarutĩra wĩra, na magathathaĩria kwa ihinda rĩa mĩaka mĩingĩ. Rĩrĩa Aisiraeli maagire wĩhokeku, Jehova aarathire kũgerera Ezekieli atĩ bũrũri wao nĩ ũngĩkaanangwo na ũikare ũrĩ mũtiganĩrie. (Ezek. 33:27-29) No ningĩ Jehova nĩ aarathire atĩ matigari ma andũ arĩa mangĩkerira nĩ mangĩkoima ithamĩrio Babuloni na macokie ũthathaiya mũtheru bũrũri-inĩ ũcio. Nĩ ũndũ wa kũrathimwo nĩ Jehova, bũrũri wa Isiraeli nĩ ũngĩkaagarũrũka, ũthakare “o ta mũgũnda wa Edeni.” (Ezek. 36:34-36) Gũcokio kũu kwaambĩrĩirie mwaka wa 537 M.M.M. rĩrĩa Ayahudi arĩa maarĩ ithamĩrio maacokire Jerusalemu nĩguo macokie ũthathaiya wa ma bũrũri-inĩ wao ũrĩa meendete.

13, 14. (a) Bũrũri wa kĩĩroho nĩ kĩĩ? (b) Nĩ kĩĩ gĩtũmaga bũrũri ũcio wendwo nĩ Jehova?

¹³ Mahinda-inĩ maya, athathaiya a ma a Ngai nĩ maacokirio na njĩra o ta ĩyo. O ta ũrĩa Gĩcunjĩ gĩa 9 kĩa ibuku rĩrĩ kĩonanĩtie,  gũkinyĩria mwaka wa 1919, andũ a Ngai nĩ maakũũrĩtwo kuuma ũkombo-inĩ wa ihinda iraihu thĩinĩ wa Babuloni Ũrĩa Mũnene. Mwaka-inĩ ũcio, Jehova nĩ aacokirie athathaiya ake thĩinĩ wa bũrũri wa kĩĩroho. Bũrũri ũcio nĩ paradiso ya kĩĩroho—kũndũ kũrĩ na ũgitĩri na kũgaacĩrĩte kĩĩroho, kũrĩa tũthathayagĩria Ngai ũrĩa wa ma. Thĩinĩ wa bũrũri ũcio, tũikaranagia hamwe tũrĩ na ũgitĩri, twĩ na thayũ wa meciria na wa ngoro. (Thim. 1:33) Nĩ tũheagwo irio nyingĩ cia kĩĩroho, na nĩ tũkoragwo na wĩra mũingĩ ũtũmaga tũiganĩre wa kũhunjia igũrũ rĩgiĩ Ũthamaki wa Ngai. Hatarĩ nganja, nĩ tuonaga ũũma wa thimo ĩno: “Kĩrathimo kĩa Jehova nĩkĩo gĩtongagia mũndũ, na ndarĩ ruo onganagĩrĩria nakĩo.” (Thim. 10:22) Angĩkorũo nĩ twĩrutanagĩria kũnyita mbaru ũthathaiya mũtheru na ciugo na ciĩko, tũkoragwo thĩinĩ wa bũrũri ũcio—paradiso ya kĩĩroho—gũtekũmakania kũrĩa tũikaraga thĩinĩ wa thĩ ĩno.

¹⁴ Jehova nĩ endete bũrũri ũcio wa kĩĩroho. Nĩkĩ? Tondũ onaga aikari a guo marĩ “indo cia goro cia ndũrĩrĩ ciothe,” andũ arĩa agucĩrĩirie moke thĩinĩ wa ũthathaiya mũtheru. (Hag. 2:7; Joh. 6:44) Nĩ merutanagĩria kwĩhumba ũmũndũ mwerũ, ũrĩa wonanagia ngumo njega mũno cia Ngai we mwene. (Ef. 4:23, 24; 5:1, 2) Marĩ athathaiya a ma, nĩ merutagĩra biũ ũtungata-inĩ wake, mageka ũguo na njĩra imũgoocithagia na ikonania wendo wao harĩ we. (Rom. 12:1, 2; 1 Joh. 5:3) No mũhaka akorũo ngoro ya Jehova nĩ ĩiyũragwo nĩ gĩkeno rĩrĩa ona athathaiya ake makĩĩrutanĩria gũthakaria bũrũri ũcio wa kĩĩroho. Ta wĩcirie ũndũ ũyũ: Rĩrĩa waiga ũthathaiya  mũtheru mbere ũtũũro-inĩ waku, nĩ ũthakaragia paradiso ya kĩĩroho, o na ũgakenia ngoro ya Jehova!—Thim. 27:11.

15, 16. Gogu wa Magogu agaatharĩkĩra rĩ bũrũri witũ wa kĩĩroho ũrĩa ũcoketio?

¹⁵ Nĩ ũndũ wa bata kũririkana atĩ ica ikuhĩ ngwatanĩro ya mabũrũri ma gũkũ thĩ nĩ ĩgũtharĩkĩra bũrũri witũ wa kĩĩroho twendete. Tondũ tharĩkĩro ĩyo yarathĩtwo nĩ ĩgaatũhutia ithuĩ athathaiya a ma a Jehova, nĩ twendaga kũmenya ũhoro makĩria ũmĩgiĩ. Reke twarĩrĩrie ciũria ithatũ iria tũngĩĩyũria.

¹⁶ Gogu wa Magogu agaatharĩkĩra rĩ bũrũri witũ wa kĩĩroho ũrĩa ũcoketio? Ũrathi ũcio ũcoketie ũkoiga ũũ: “Ihinda-inĩ rĩa mũthia rĩa mĩaka ĩyo nĩ ũgaatharĩkĩra bũrũri” ũcio. (Ezek. 38:8) Ciugo icio ironania atĩ nĩ hakuhĩ na mũthia wa mũtabarĩre ũyũ wa maũndũ. Ririkana atĩ thĩna ũrĩa mũnene ũkaambĩrĩria na kwanangwo kwa Babuloni Ũrĩa Mũnene, ndini ciothe cia maheeni gũkũ thĩ. Thutha wa ndini cia maheeni kwanangwo na mbere ya Hari–Magedoni kwambĩrĩria, Gogu nĩ akaambĩrĩria tharĩkĩro nene na ya mũthia kwerekera athathaiya a ma.

17, 18. Jehova agaatongoria maũndũ atĩa hĩndĩ ya thĩna ũrĩa mũnene?

¹⁷ Gogu agaatharĩkĩra bũrũri ũrĩa ũcoketio wa athathaiya a ma a Jehova nĩkĩ? Ũrathi wa Ezekieli nĩ ũguũragia maũndũ merĩ—wa  mbere, ũrĩa Jehova atongoragia maũndũ, na wa kerĩ, muoroto mũũru wa Gogu.

¹⁸ Ũrĩa Jehova atongoragia maũndũ. (Thoma Ezekieli 38:4, 16.) Ta rora ũrĩa Jehova eerire Gogu: ‘Nĩ ngaagwĩkĩra ihocio thĩa-inĩ ciaku’ na “nĩ ngaatũma . . . ũũkĩrĩre bũrũri wakwa.” Hihi ciugo icio ironania atĩ Jehova nĩ agaatindĩkĩrĩria mabũrũri matharĩkĩre athathaiya ake? Aca o na hanini! Gũtirĩ hĩndĩ angĩtũma andũ ake macemanie na maũndũ moru. (Ayub. 34:12) No Jehova nĩ oĩ thũ ciake—atĩ nĩ igaathũũra athathaiya a ma na itigetĩkĩra kũũrũo nĩ mweke wa kũgeria kũmaniina. (1 Joh. 3:13) O ta arĩ gwĩkĩra agaakorũo agĩĩkĩra ihocio thĩa-inĩ cia Gogu, Jehova nĩ agaatongoria maũndũ nĩgetha mageekĩka kũringana na wendi Wake na ihinda rĩrĩa abangĩte. Ihinda rĩna thutha wa Babuloni Ũrĩa Mũnene kwanangwo, no kũhoteke Jehova nĩ agaatũma mabũrũri mahingie ũndũ ũrĩa ũgaakorũo ngoro-inĩ ciao. Kwoguo Jehova nĩ akaahingũra njĩra nĩ ũndũ wa tharĩkĩro ĩrĩa ĩgaatongoria harĩ Hari–Magedoni, mbaara ĩrĩa nene makĩria ya thĩ. Hĩndĩ ĩyo nĩ akaahonokia andũ ake, atũũgĩrie ũnene wake, na atherie rĩĩtwa rĩake.—Ezek. 38:23.

19. Nĩ kĩĩ gĩgaatũma Gogu agerie gũtunyana ũthathaiya mũtheru?

¹⁹ Muoroto mũũru wa Gogu. Mabũrũri nĩ ‘magaathugunda ũndũ  mũũru.’ Nĩ magaacaria mweke wa gũitũrũra marakara mao na rũmena rwao rwa ihinda iraihu harĩ athathaiya a Jehova, arĩa makooneka ta matarĩ na wa kũmateithia, ta “maikaraga matũũra matarĩ magitĩre na thingo, mĩgamba, kana ihingo.” Ningĩ mabũrũri macio nĩ makenda ‘gũtaha o na gũtunyana indo’ nyingĩ kuuma kũrĩ andũ arĩa “maregĩĩra [na] ũtonga.” (Ezek. 38:10-12) Hihi nĩ “ũtonga” ũrĩkũ? Andũ a Jehova nĩ marĩ ũtonga mũingĩ wa kĩĩroho; kĩndũ kĩrĩa tũkoragwo nakĩo kĩa goro makĩria nĩ ũthathaiya witũ mũtheru, ũrĩa tũheaga o Jehova wiki. Mabũrũri macio matikaageria gũtunyana ũthathaiya mũtheru atĩ tondũ nĩ monaga ũrĩ wa bata, no nĩ tondũ nĩ maũthũire o hamwe na arĩa maũtwarithagia na mbere.

20. Gogu agaatharĩkĩra bũrũri kana paradiso ya kĩĩroho na njĩra ĩrĩkũ?

²⁰ Gogu agaatharĩkĩra bũrũri kana paradiso ya kĩĩroho na njĩra ĩrĩkũ? No gũkorũo mabũrũri makaageria kũingĩrĩra ũtũũro witũ na gũtũma tũtige gũtwarithia ũthathaiya witũ na mbere. Nĩguo mahingie muoroto ũcio, no kũhoteke nĩ makaageria kũgiria irio cia kĩĩroho itũkinyĩre, matũgirie gũcemanagia hamwe, mathũkie ũrũmwe ũrĩa tũkoragwo naguo, na matũgirie kũhunjia na kĩyo ndũmĩrĩri ya Ngai. Macio mothe nĩ maũndũ makoragwo thĩinĩ wa paradiso ya kĩĩroho. Magĩtongorio nĩ Shaitani, mabũrũri macio nĩ makaageria kweheria athathaiya a ma o hamwe na ũthathaiya mũtheru, kuuma thĩinĩ wa thĩ.

21. Ũkoragwo na ngatho nĩkĩ nĩ ũndũ wa Jehova gũtũhe mũkaana wĩgiĩ ũndũ ũrĩa ũrĩ mbere itũ?

²¹ Tharĩkĩro ĩrĩa ĩroka ya Gogu wa Magogu nĩ ĩkaahutia athathaiya othe a ma thĩinĩ wa bũrũri wa kĩĩroho ũrĩa Ngai atũheete. Tũrĩ na ngatho mũno tondũ Jehova nĩ atũheete mũkaana wĩgiĩ ũndũ ũcio ũrĩ mbere itũ! O twetereire thĩna ũcio mũnene, reke tũtue itua rĩa kũrũmia ũthathaiya mũtheru, tũreke ũtuĩke ũndũ ũrĩa wa bata makĩria ũtũũro-inĩ witũ. Tweka ũguo, nĩ tũgũtũma bũrũri ũcio ũcoketio ũkorũo ũrĩ mũthaka ihinda-inĩ rĩrĩ. Na nĩ tũgaakorũo na mweke wa kwĩyonera ũndũ wa magegania mũno ihinda rĩũkĩte: Ũrĩa Jehova akaarũĩrĩra andũ ake na rĩĩtwa rĩake itheru hĩndĩ ya Hari–Magedoni, ta ũrĩa gĩcunjĩ kĩrĩa kĩrũmĩrĩire gĩtaarĩirie.