1-3. (a) “Mangʼũrĩ . . . manene” ma Jehova magaakorũo na moimĩrĩro marĩkũ? (Rora mbica kĩambĩrĩria-inĩ gĩa gĩcunjĩ gĩkĩ.) (b) Tũkwarĩrĩria ũndũ ũrĩkũ?

 TA HŨŨRA mbica athuri, atumia, na ciana marũgamĩte hamwe makĩina rwĩmbo rwa Ũthamaki. Thutha ũcio, mũthuri wa kĩũngano akahoya mahoya ma kuuma ngoro, agĩthaitha Jehova amagitĩre. Andũ othe thĩinĩ wa kĩũngano marĩ na ma atĩ Jehova nĩ ekũmarũmbũiya, ĩndĩ no marabatara kũũmĩrĩrio na gwĩkĩrũo hinya. Na kũu nja kũiyũire inegene rĩa mbaara. Hari–Magedoni nĩ yambĩrĩirie!—Kũg. 16:14, 16.

² Hĩndĩ ya mbaara ya Hari–Magedoni, Jehova akaaniinana arĩ na “mangʼũrĩ . . . manene,” no ndakaaniina andũ ega na oru hamwe. (Thoma Ezekieli 38:18.) Ndakerekeria marakara make kũrĩ mbũtũ ĩmwe kana bũrũri ũmwe, no akaamerekeria kũrĩ andũ aingĩ arĩa marĩ kũndũ gũtiganĩte thĩinĩ wa thĩ. Mũthenya ũcio, andũ arĩa makooragwo nĩ Jehova “makooima gĩturi kĩmwe gĩa thĩ o nginya gĩturi kĩrĩa kĩngĩ gĩa thĩ.”—Jer. 25:29, 33.

³ Nĩ kĩĩ gĩgaatũma Jehova, Ngai ũrĩ wendo, ũrĩa ũtaaragĩrio atĩ nĩ “mũigua tha na mũcayanĩri” na “ndahiũhaga kũrakara,” oe ikinya ta rĩu arĩ na “mangʼũrĩ . . . manene”? (Tham. 34:6; 1 Joh.  4:16) Reke tuone ũrĩa macokio ma kĩũria kĩu mangĩtũũmĩrĩria, matwĩkĩre hinya, na matwĩkĩre ngoro tũthiĩ na mbere na wĩra witũ wa kũhunjia.

4, 5. Nĩ na njĩra ĩrĩkũ marakara ma Jehova marĩ ngũrani na ma andũ arĩa matarĩ akinyanĩru?

⁴ Nĩ twagĩrĩirũo kwamba gũtaũkĩrũo atĩ marakara ma Jehova matihaana ta ma andũ arĩa matarĩ akinyanĩru. Rĩrĩa mũndũ arĩrĩmbũka nĩ marakara na amaitũrũra, kaingĩ ekaga maũndũ atekwĩgirĩrĩria na moimĩrĩro magakorũo marĩ moru. Kwa ngerekano, Kaini, mũrũ wa irigithathi wa Adamu, nĩ ‘aacinirũo nĩ marakara’ tondũ Jehova nĩ aaregire igongona rĩake no agĩtĩkĩra kĩheo kĩrĩa Habili aarutire. Moimĩrĩro maarĩ marĩkũ? Kaini akĩũraga mũrũ wa nyina ũrĩa warĩ mũthingu. (Kĩam. 4:3-8; Ahib. 11:4) Ningĩ wĩcirie ũhoro wa Daudi, ũrĩa ũtaaragĩrio atĩ aarĩ mũndũ wĩtĩkĩrĩkĩte ngoro-inĩ ya Jehova. (Atũm. 13:22) Nginya mũndũ ũcio warĩ mwega aarĩ hakuhĩ gwĩka ũndũ mũũru rĩrĩa aaiguire atĩ mũndũ ũmwe warĩ mũtongu wetagwo Nabali nĩ aamũrumĩte na akaruma arũme arĩa maarĩ nake. Marĩrĩmbũkĩte nĩ marakara, Daudi na thigari ciake “makĩĩyoha hiũ ciao cia njora,” marĩ na muoroto wa kũũraga Nabali ũcio ũtaarĩ na ngatho o hamwe na arũme othe a nyũmba yake. Wega nĩ atĩ, Abigaili, mũtumia wa Nabali, nĩ aahotire kũiguithia Daudi na arũme ake matikerĩhĩrie. (1 Sam. 25:9-14, 32, 33) Kwoguo Jehova aarĩ na gĩtũmi kĩega gĩa gũtongoria Jakubu kwandĩka ciugo ici: “Marakara ma mũndũ matirehaga ũthingu wa Ngai.”—Jak. 1:20.

⁵ Ngũrani na marakara ma andũ, marĩa kaingĩ monanagio na njĩra ĩtagĩrĩire, hingo ciothe Jehova nĩ agiragĩrĩria marakara make na akonania wega gĩtũmi kĩa arakare. Nginya rĩrĩa Jehova arĩ na mangʼũrĩ manene, ekaga maũndũ na njĩra ya ũthingu. Rĩrĩa aratharĩkĩra thũ, gũtirĩ hĩndĩ aniinaga “mũndũ mũthingu hamwe na ũrĩa mwaganu.” (Kĩam. 18:22-25) Makĩria ma ũguo, marakara ma Jehova marahũragwo nĩ itũmi cia ũthingu. Reke tũthuthurie itũmi igĩrĩ na maũndũ marĩa tũngĩĩruta kuumana nacio.

6. Jehova ekaga atĩa rĩrĩa rĩĩtwa rĩake rĩathahio?

⁶ Gĩtũmi: Rĩĩtwa rĩa Jehova rĩngĩthahio. Andũ arĩa moigaga atĩ marũgamĩrĩire Jehova no mageka maũndũ ma waganu nĩ mamũthũkagĩria rĩĩtwa, na kwoguo makarahũra marakara make. (Ezek. 36:23) O ta ũrĩa icunjĩ iria ihĩtũkĩte cia ibuku rĩrĩ cionanĩtie, rũrĩrĩ rwa Isiraeli nĩ rwacambithirie rĩĩtwa rĩa Jehova na gĩkĩro kĩnene. Kwoguo, mĩerekera na ciĩko cia rũrĩrĩ rũu nĩ ciarakaririe Jehova. No gũtirĩ hĩndĩ aaremirũo kũgirĩrĩria marakara make—aarũithirie andũ ake na gĩkĩro kĩrĩa kĩagĩrĩire, ategũkĩria njano. (Jer. 30:11) Na thutha wa marakara ma Jehova kũhingia muoroto wake, ndaathiaga na mbere kũmarakarĩra.—Thab. 103:9.

7, 8. Nĩ maũndũ marĩkũ tũreruta kuumana na ũrĩa Jehova aahiũranirie na Aisiraeli?

 ⁷ Maũndũ ma kwĩruta: Ũrĩa Jehova aahiũranirie na Aisiraeli nĩ mũkaana mũrũmu harĩ ithuĩ. O ta Aisiraeli a tene, tũrĩ na mweke wa gwĩtanio na rĩĩtwa rĩa Jehova. Ithuĩ tũrĩ Aira a Jehova. (Isa. 43:10) Ciugo na ciĩko citũ nĩ ihutagia ũrĩa andũ monaga Jehova. Tũtingĩenda gũkĩragĩrĩria gwĩka maũndũ moru na kwoguo tũgacambithia rĩĩtwa rĩa Jehova. Ũtũũro ta ũcio wa ũhinga nĩ warahũraga marakara ma Jehova, na nĩ oyaga ikinya rĩa kũgitĩra rĩĩtwa rĩake.—Ahib. 3:13, 15; 2 Pet. 2:1, 2.

⁸ Hihi mũkaana wa atĩ Jehova no onanie “mangʼũrĩ . . . manene” nĩ wagĩrĩirũo gũtũgirĩrĩria kũmũkuhĩrĩria? Aca. Nĩ tũĩ atĩ Jehova nĩ arĩ wetereri na nĩ ohanagĩra. (Isa. 55:7; Rom. 2:4) No ningĩ nĩ tũĩ atĩ nĩ arũnganaga rĩrĩa habatarania. O na nĩ tũmũtĩaga mũno, twamenya atĩ marakara make nĩ marĩrĩmbũkagĩra arĩa mehagia matekwĩrira na atĩ ndangĩmetĩkĩria mathiĩ na mbere gũkorũo gatagatĩ-inĩ ka andũ ake. (1 Kor. 5:11-13) Jehova nĩ atwĩrĩte wega kĩrĩa kĩngĩtũma arakare. Nĩ itemi ritũ gwĩthema mĩerekera na ciĩko iria ingĩmũrakaria.—Joh. 3:36; Rom. 1:26-32; Jak. 4:8.

9, 10. Jehova ekaga atĩa rĩrĩa andũ ake ehokeku mehĩtĩrũo? Heana ngerekano.

⁹ Gĩtũmi: Andũ a Jehova ehokeku mangĩĩhĩtĩrũo. Jehova nĩ arakaraga rĩrĩa thũ ciatharĩkĩra andũ ehokeku arĩa megitagia rungu rwa ũgitĩri wake. Kwa ngerekano, thutha wa Aisiraeli kuuma Misiri, Firauni na mbũtũ yake ĩrĩ hinya maathiire gũũkĩrĩra andũ acio moonekaga ta matarĩ na ũteithio, arĩa maacokanĩrĩire hũgũrũrũ-inĩ cia Iria Itune. No rĩrĩa thigari icio irĩ hinya ciarũmĩrĩire Aisiraeli igereire thĩ nyũmũ gatagatĩ ka iria, Jehova agĩcomora magũrũ ma ngaari ciacio cia mbaara na agĩtũma ciikio iria-inĩ gatagatĩ. “Gũtirĩ o na ũmwe wao wahonokire.” (Tham. 14:25-28) Marakara ma Jehova maarĩrĩmbũkĩire Amisiri nĩ ũndũ wa “wendo [wake] mwĩhokeku” harĩ andũ ake.—Thoma Thama 15:9-13.

¹⁰ Ũndũ ũmwe na ũcio, wendo wa Jehova harĩ andũ ake nĩ wamũtindĩkire oe ikinya matukũ-inĩ ma Mũthamaki Hezekia. Mbũtũ ya Aashuri, ĩrĩa yarĩ na hinya na njũru mũno matukũ-inĩ macio, nĩ yathiĩte gũtharĩkĩra itũũra rĩa Jerusalemu. Ndungata njĩhokeku cia Jehova nĩ ciehĩtĩirũo kũrigicĩrio, ũndũ ũrĩa ũngĩacũngĩrĩirie gĩkuũ kĩũru kĩa o kahora. (2 Ath. 18:27) Nĩ ũndũ ũcio, Jehova agĩtũma mũraika ũmwe, ũrĩa woragire thigari 185,000 na ũtukũ ũmwe! (2 Ath. 19:34, 35) Ta hũũra mbica ũrĩa kambĩ ya Aashuri yahaanaga rũcinĩ rũrĩa rwarũmĩrĩire. Kwarĩ na matimũ, ngo, na hiũ cia njora igwĩte kũndũ guothe. Gũtirĩ tũrumbeta twokĩririe arũme acio. Gũtirĩ mawatho maarutirũo ma gũcokanĩrĩria thigari icio. Gwakirĩte ki kambĩ-inĩ ĩyo, na ciimba ciaiyũrĩte kũndũ guothe.

11. Ngerekano iria irĩ Maandĩko-inĩ cia ũrĩa Jehova ekaga rĩrĩa andũ ake mehĩtĩrũo itũũmagĩrĩria na igatwĩkĩra hinya na njĩra ĩrĩkũ?

¹¹ Maũndũ ma kwĩruta: Ngerekano icio cia ũrĩa Jehova ekaga rĩrĩa andũ ake mehĩtĩrũo nĩ mũkaana mũrũmu harĩ thũ citũ: “Nĩ  ũndũ wa kũguoyohia kũgwa moko-inĩ ma Ngai ũrĩa ũtũũraga muoyo” rĩrĩa marakara make marahũrũo. (Ahib. 10:31) Harĩ ithuĩ, ngerekano icio nĩ cia kũũmĩrĩria na cia gũtwĩkĩra hinya. Nĩ tũiguaga tũũmĩrĩirio twamenya atĩ Shaitani, thũ itũ ĩrĩa nene, ndagaatooria. Ica ikuhĩ, “ihinda inini” rĩrĩa akoretwo agĩathana nĩ rĩgũkinya mũthia! (Kũg. 12:12) Ihinda rĩu rĩtanakinya, no tũtungatĩre Jehova na ũmĩrĩru, tũrĩ na ma atĩ gũtirĩ mũndũ, kana ithondeka, kana thirikari ĩngĩtũgirĩrĩria gwĩka wendi wa Ngai. (Thoma Thaburi 118:6-9.) Mũtũmwo Paulo nĩ oonanirie ũũma ũrĩa tũrĩ naguo kũgerera ciugo ici aandĩkire atongoretio nĩ roho wa Ngai: “Angĩkorũo Ngai arĩ hamwe na ithuĩ-rĩ, nũũ ũngĩtũũkĩrĩra?”—Rom. 8:31.

12. Nĩ kĩĩ gĩgaatũma mangʼũrĩ ma Jehova marahũke hĩndĩ ya thĩna ũrĩa mũnene?

¹² Hĩndĩ ya thĩna ũrĩa mũnene ũrĩa ũrĩ mbere, Jehova nĩ akoya ikinya atũgitĩre, o ta ũrĩa aagitĩire Aisiraeli rĩrĩa maarũmĩrĩirũo nĩ Amisiri na akĩgitĩra Ayahudi arĩa maarĩ Jerusalemu rĩrĩa yarigicĩirio nĩ Aashuri. Rĩrĩa thũ citũ ikaageria gũtũniina, wendo mũrikĩru wa Jehova harĩ ithuĩ nĩ ũgaatũma mangʼũrĩ make marahũke.  Arĩa makaaga kuona ũgwati ũrĩa ũrĩ mbere magerie gũtũtharĩkĩra, makaahaana ta marahutia kĩũma kĩa riitho rĩa Jehova. Akooya ikinya rĩa na ihenya. (Zek. 2:8, 9) Njũragano ĩrĩa ĩgaakorũo kuo ndĩrĩ yoneka rĩngĩ. No thũ cia Ngai itigaakorũo na gĩtũmi kĩiganu gĩa kũmaka rĩrĩa Jehova akaamaitũrũrĩra marakara make. Nĩkĩ hihi?

13. Nĩ mĩkaana ĩrĩkũ Jehova aheanĩte?

¹³ Jehova “ndahiũhaga kũrakara” na nĩ aheanĩte mĩkaana mĩingĩ atĩ nĩ ekũniina arĩa mamũkararagia na makehĩtĩra andũ ake. (Tham. 34:6, 7) Jehova aahũthĩrire anabii ta Jeremia, Ezekieli, Danieli, Kristo Jesu, na atũmwo ta Petero, Paulo, na Johana kũheana mũkaana wĩgiĩ mbaara nene ya mũthia.—Rora gathandũkũ, “Mĩkaana ya Jehova Ĩgiĩ Mbaara Nene Ĩrĩa Ĩroka.”

14, 15. Nĩ wĩra ũrĩkũ Jehova arutĩte, na ekĩte ũguo nĩkĩ?

¹⁴ Jehova nĩ aandĩkithirie mĩkaana ĩyo thĩinĩ wa Kiugo gĩake. Ningĩ nĩ aatigĩrĩire atĩ Bibilia nĩrĩo ibuku rĩrĩa rĩngĩgaataũrũo mũno na rĩkinyĩre andũ aingĩ makĩria. Kũndũ guothe thĩinĩ wa thĩ, nĩ  atũmĩte kũgĩe mbũtũ ya erutĩri arĩa mateithagia andũ arĩa angĩ kwĩruta ũrĩa mangĩgĩa ũrata mwega na Ngai na makaheana mũkaana wĩgiĩ “mũthenya ũrĩa mũnene wa Jehova.” (Zef. 1:14; Thab. 2:10-12; 110:3) Nĩ ateithĩtie andũ ake mataũre mabuku ma kwĩruta Bibilia na thiomi magana maingĩ na mahũthĩre mathaa milioni nyingĩ o mwaka makĩaria ũhoro wa ciĩranĩro na mĩkaana ĩrĩa ĩrĩ thĩinĩ wa Kiugo gĩake.

¹⁵ Jehova ahotithĩtie wĩra ũcio wothe ũrutwo “tondũ ndendaga mũndũ o na ũmwe akaaniinwo no endaga othe merire.” (2 Pet. 3:9) Nĩ gĩtĩo kĩnene kũrũgamĩrĩra Ngai witũ ũrĩ wendo na wetereri na gũkorũo na gacunjĩ kanini wĩra-inĩ wa gũtheremia ndũmĩrĩri yake! O na kũrĩ ũguo, ica ikuhĩ andũ arĩa matatindanagĩra na mĩkaana ĩyo matigũkorũo na ihinda rĩa kũgarũrũka.

16, 17. Hihi Jehova nĩ atuĩte mũthenya ũrĩa akaarehe mbaara ya mũthia? Taarĩria.

¹⁶ Jehova nĩ atuĩte mũthenya ũrĩa akaarehe mbaara ya mũthia. Nĩ oĩ kabere rĩrĩa andũ ake makaambĩrĩria gũtharĩkĩrũo. (Mat. 24:36) Jehova amenyaga atĩa rĩrĩa thũ ciake igaatharĩkĩra andũ ake?

 ¹⁷ O ta ũrĩa Gĩcunjĩ gĩa 17 kĩa ibuku rĩrĩ kĩonanĩtie, Jehova eerire Gogu ũũ: ‘Nĩ ngaagwĩkĩra ihocio thĩa-inĩ ciaku.’ Nĩ agaatongoria maũndũ nĩguo mabũrũri mabange tharĩkĩro ĩyo. (Ezek. 38:4) Ũguo ti kuuga atĩ Jehova nĩwe ũkaambĩrĩria mbaara ĩyo; ningĩ ti kuuga atĩ nĩ atunyaga andũ arĩa mamũkararagia wĩyathi wao wa gwĩthuurĩra. Handũ ha ũguo, ũndũ ũcio ũronania atĩ Jehova no ahote gũthoma ngoro na nĩ oĩ ũrĩa thũ ciake igeeka maũndũ-inĩ matiganĩte.—Thab. 94:11; Isa. 46:9, 10; Jer. 17:10.

18. Nĩ kĩĩ gĩgaatũma andũ marũe na Mwene-Hinya-Wothe?

¹⁸ Angĩkorũo Jehova tiwe ũkaambĩrĩria tharĩkĩro ĩyo kana atindĩkĩrĩrie thũ ciake irũe mbaara-rĩ, nĩ kĩĩ gĩgaatũma andũ meke ũndũ ũngĩtũma marũe na Mwene-Hinya-Wothe we mwene? Gĩtũmi kĩmwe nĩ atĩ gũkinyĩria ihinda rĩu, no kũhoteke magaakorũo meĩrĩte atĩ Ngai ndarĩ kuo kana atĩ ndangĩingĩrĩra maũndũ ma andũ. Kwahoteka mageciria ũguo tondũ magaakorũo maniinĩte mathondeka mothe ma ndini cia maheeni thĩinĩ wa thĩ. Kwoguo no gũkorũo makeĩra atĩ korũo Ngai arĩ kuo, nĩ angĩgitĩrĩte mathondeka marĩa moigaga atĩ nĩwe marũgamagĩrĩra. Matikaamenya atĩ  Ngai we mwene nĩwe wekĩrĩte rĩĩciria rĩu ngoro-inĩ ciao nĩguo maniine ndini iria imũcambithĩtie na gĩkĩro kĩnene.—Kũg. 17:16, 17.

19. Kwahoteka nĩ ũndũ ũrĩkũ ũgeekĩka thutha wa ndini cia maheeni kũniinwo?

¹⁹ Kahinda kanini thutha wa ndini cia maheeni kũniinwo, no kũhoteke Jehova nĩ akeera andũ ake maheane ndũmĩrĩri nditũ, ĩrĩa ĩringithanĩtio na mbura ya mbembe thĩinĩ wa ibuku rĩa Kũguũrĩrio, na mbembe ĩmwe ĩrĩ na ũritũ wa kilo ta 20. (Kũg. 16:21, kohoro ka magũrũ-inĩ) Ndũmĩrĩri ĩyo, ĩrĩa hihi ĩgaakorũo ĩkiuga atĩ mathondeka ma gĩũteti na ma kĩbiacara marĩ hakuhĩ gũthira, nĩ ĩkaarakaria arĩa makaamĩigua ũũ atĩ nĩ makaaruma Ngai. No kũhoteke ndũmĩrĩri ĩyo nĩyo ĩgaatũma mabũrũri matharĩkĩre andũ a Ngai, nĩguo matũkirie kaimana. Mageeciria atĩ tũtirĩ na ũgitĩri, na no tũniinwo na njĩra hũthũ. Magaakorũo meheenetie mũno!

20, 21. Gogu nũũ, na gũgaathiĩ atĩa harĩ we?

²⁰ O ta ũrĩa Gĩcunjĩ gĩa 17 kĩa ibuku rĩrĩ kĩonanĩtie, Ezekieli aahũthĩrire rĩĩtwa rĩa ũrathi, “Gogu wa bũrũri wa Magogu,” kwaria ũhoro wa ngwatanĩro ya mabũrũri ĩrĩa ĩgaatũtharĩkĩra. (Ezek. 38:2) No arĩa magaathondeka ngwatanĩro ĩyo magaakorũo mahaana ta manyitithanĩtio na karũrigi tu. O na gũtuĩka nĩ makooneka ta marĩ na ũnyitanĩri, no magaakorũo na roho wa macindano, mwĩtĩo, na kwenda gũtũũgĩria bũrũri wao. Ũgaakorũo ũrĩ ũndũ mũhũthũ harĩ Jehova gũtũma o mũndũ ‘okĩrĩre mũrũ wa ithe’ na rũhiũ rwa njora. (Ezek. 38:21) No kũniinwo kũu kwa mabũrũri gũtigaakorũo kuumanĩte na andũ.

²¹ Thũ citũ itananiinwo, nĩ ikoona kĩmenyithia kĩa Mũrũ wa mũndũ, kĩrĩa hihi gĩgaakorũo kĩrĩ ũndũ ũkĩrĩte wa ndũire ũrĩa ũkoonania hinya wa Jehova na Jesu. Maũndũ marĩa akararia acio makoona nĩ magaatũma matangĩke mũno. O ta ũrĩa Jesu aarathire, “andũ nĩ makaaringĩka nĩ ũndũ wa guoya, na nĩ ũndũ wa maũndũ marĩa magaakorũo makĩĩrĩgĩrĩra mekĩke thĩinĩ wa thĩ ĩrĩa ĩikaragwo.” (Luk. 21:25-27) Nĩ makaamaka mũno rĩrĩa makaamenya atĩ nĩ meehĩngĩcĩte nĩ ũndũ wa gũtharĩkĩra andũ a Jehova. No mũhaka makaamenya itemi rĩa Mũũmbi witũ arĩ mũtongoria wa mbũtũ, Jehova mũnene wa ita. (Thab. 46:6-11; Ezek. 38:23) Hatarĩ nganja Jehova nĩ akaahũthĩra mbũtũ cia igũrũ na maũndũ ma ndũire kũgitĩra ndungata ciake njĩhokeku ĩndĩ aniine thũ ciake.—Thoma 2 Petero 2:9.

22, 23. Nĩa makaagitĩra andũ a Ngai, na kwahoteka makoona wĩra wao atĩa?

²² Ta wĩcirie ũrĩa Jesu agaakorũo na wendi mũnene agĩtongoria tharĩkĩro kwerekera thũ cia Ngai na akĩgitĩra andũ arĩa mendete Ithe na makamũtungatĩra. Ningĩ ta wĩcirie ũrĩa Akristiano arĩa aitĩrĩrie maguta magaakorũo makĩigua hĩndĩ ĩyo. Kahinda kanini mbere ya Hari–Magedoni kwambĩrĩria, arĩa magaakorũo matigarĩte thĩinĩ wa thĩ nĩ magaatwarũo igũrũ nĩgetha arĩa othe  144,000 manyitanĩre na Jesu mbaara-inĩ ĩyo. (Kũg. 17:12-14) Hatarĩ nganja aingĩ ao nĩ magaakorũo magĩĩte ũrata wa hakuhĩ hamwe na arĩa a ngʼondu ingĩ makĩrutithania wĩra nao matukũ-inĩ ma kũrigĩrĩria. Ihinda-inĩ rĩu, arĩa aitĩrĩrie maguta nĩ magaakorũo na wathani na ũhoti wa kũgitĩra arĩa maamanyitaga mbaru marĩ ehokeku hĩndĩ ya magerio mao.—Mat. 25:31-40.

²³ Araika o nao nĩ magaakorũo thĩinĩ wa mbũtũ ĩyo ya igũrũ ya Jesu. (2 Thes. 1:7; Kũg. 19:14) Ihinda ihĩtũku nĩ maamũteithirie kweheria Shaitani na ndaimono kũrĩa igũrũ. (Kũg. 12:7-9) Na nĩ makoretwo magĩteithĩrĩria harĩ gũcokanĩrĩria andũ gũkũ thĩ arĩa mangĩenda gũthathaiya Jehova. (Kũg. 14:6, 7) Nĩ ũgaakorũo ũrĩ ũndũ mwagĩrĩru Jehova kũhũthĩra araika kũgitĩra andũ acio ehokeku! Ũndũ ũrĩa wa bata makĩria nĩ atĩ, arĩa othe magaakorũo thĩinĩ wa mbũtũ ya Jehova nĩ makoona kĩrĩ gĩtĩo gũtheria na gũtetera rĩĩtwa rĩake, kana ngumo yake, na njĩra ya gũteithĩrĩria kũniina thũ ciake.—Mat. 6:9, 10.

24. Arĩa a kĩrĩndĩ kĩnene kĩa ngʼondu ingĩ mageeka atĩa?

²⁴ Tondũ arĩa a kĩrĩndĩ kĩnene kĩa ngʼondu ingĩ nĩ magaakorũo na ũgitĩri wa mbũtũ ĩyo ĩrĩ hinya na wendi mũnene, matigaakorũo na gĩtũmi gĩa gwĩtigĩra. Ũrĩa makaabatara gwĩka nĩ ‘kũrũgama mehandĩte na matiire mĩtwe yao, tondũ ũhonokio wao ũgaakorũo ũkuhĩrĩirie.’ (Luk. 21:28) Kwoguo mũthenya wa Jehova ũtanakinya, nĩ harĩ bata tũteithie andũ aingĩ ũrĩa kwahoteka mamenye na makũrie wendo harĩ Ithe witũ ũrĩ tha na ũgitanagĩra!—Thoma Zefania 2:2, 3.

25. Nĩ ũndũ ũrĩkũ tũkwarĩrĩria thĩinĩ wa gĩcunjĩ kĩrĩa kĩrũmĩrĩire?

²⁵ Moimĩrĩro ma mbaara cia andũ makoragwo marĩ kwaga mĩbango na kĩeha. Ngũrani na ũguo, moimĩrĩro ma Hari–Magedoni magaakorũo marĩ mĩbango na gĩkeno. Hihi gũgaakorũo kũhaana atĩa rĩrĩa mangʼũrĩ ma Jehova magaathira, njamba ciake cia ita icokie hiũ ciacio njora-inĩ, na mĩgambo ya mũthia ya mbaara ĩyo nene ĩthire? Thĩinĩ wa gĩcunjĩ kĩrĩa kĩrũmĩrĩire, nĩ tũkwarĩrĩria ihinda rĩu rĩũkĩte rĩa gũcanjamũra.