Kũrĩ Inyuĩ Mwendete Jehova:

Arĩa maarĩ kĩgomano-inĩ kĩa “Rĩĩtwa rĩa Ngai” kĩrĩa gĩekirũo mwaka wa 1971 nĩ maakenire mũno kwamũkĩra mabuku maigana ũna merũ. Mabuku macio maataarĩirio atĩ nĩ “maakĩrĩte ũrĩa mũndũ o wothe angĩĩcirĩria.” Ũhoro-inĩ wĩgiĩ ibuku rĩmwe rĩrĩa rĩarutirũo, mũrũ wa Ithe witũ ũmwe ooigire ũũ: “Tũtirĩ twakorũo na ibuku rĩngĩ rĩtaarĩirie ũhoro wa maũndũ marĩa magooka na njĩra njega ũguo!” Nĩ ibuku rĩrĩkũ aaragia ũhoro warĩo? Nĩ ibuku rĩarĩ na kĩongo,“The Nations Shall Know That I Am Jehovah”—How? No nĩ kĩĩ gĩatũmire ibuku rĩu rĩkenie andũ ũguo? Tondũ rĩarĩ na ũtaũku ũrĩa warĩ kuo wa morathi marĩa marĩ thĩinĩ wa ibuku rĩa Ezekieli—morathi marĩa mahutĩtie ihinda rĩũkĩte rĩa andũ othe.

Mĩaka ĩrĩa yarũmĩrĩire kuuma rĩrĩa ibuku rĩa ‘Know Jehovah’ rĩarutirũo, mũigana wa andũ a Ngai nĩ wongererekete na ihenya—kuuma andũ ta milioni 1.5 nginya makĩria ma milioni 8. (Isa. 60:22) Andũ acio milioni nyingĩ a Jehova maragia makĩria ma thiomi 900 ngũrani. (Zek. 8:23) Aingĩ ao matirĩ makorũo na mweke wa gũthoma ibuku rĩtaarĩirie na njĩra ndikĩru morathi marĩa mũnabii Ezekieli aandĩkire atongoretio nĩ roho wa Ngai.

Ningĩ, kuuma mwaka wa 1971, ũtaũku witũ wĩgiĩ ma nyingĩ cia Bibilia nĩ wagagĩrĩte na njĩra nene o ũrĩa ũtheri ũthiĩte na mbere kwara. (Thim. 4:18) Mwaka-inĩ wa 1985, nĩ twaambĩrĩirie gũtaũkĩrũo wega ũrĩa andũ arĩa a “ngʼondu ingĩ” matuagwo athingu magatuĩka arata a Ngai. (Joh. 10:16; Rom. 5:18; Jak. 2:23) Naguo mwaka-inĩ wa 1995, nĩ twataũkĩirũo riita rĩa mbere atĩ ituĩro rĩa mũthia rĩa “ngʼondu” na “mbũri” rĩgeekĩka hĩndĩ ya “thĩna mũnene.” (Mat. 24:21; 25:31, 32) Mogarũrũku macio mothe nĩ mahutĩtie ũtaũku witũ wĩgiĩ ibuku rĩa Ezekieli.

Mĩaka-inĩ ya ica ikuhĩ, ũtheri nĩ ũthiĩte na mbere kwara o na makĩria. Ta wĩcirie maũndũ marĩa twĩrutĩte kuumana na ngerekano cia Jesu. Rĩu nĩ tũiguaga tũthereirũo wega nĩ maũndũ macio thĩinĩ wa meciria na ngoro citũ. Ngerekano imwe ciacio ciaragia ũhoro wa maũndũ megwĩkĩka ica ikuhĩ hĩndĩ ya thĩna mũnene ũrĩa ũkuhĩrĩirie mũno. Na njĩra o ta ĩyo, ũtaũku witũ wĩgiĩ morathi mamwe marĩa marĩ thĩinĩ wa ibuku rĩa Ezekieli nĩ wagagĩrĩtio. Mamwe mamo nĩ morathi megiĩ Gogu wa Magogu (mũrango wa 38 na 39), wĩra wa mũndũ ũrĩa warĩ na rũhĩa rwa mwandĩki rwa gwĩkĩra rangi (mũrango wa 9), na mũkuru wa mahĩndĩ momũ hamwe na kũnyitithanio gwa tũmĩtĩ twĩrĩ na njĩra ya mũhaano (mũrango wa 37). Mogarũrũku macio mothe o namo nĩ marũngĩte ũhoro ũrĩa waandĩkirũo mĩaka mĩingĩ mĩhĩtũku thĩinĩ wa ibuku rĩa ‘Know Jehovah.’

Nĩkĩo andũ aingĩ a Jehova morĩtie atĩrĩ, “Nĩ rĩ tũkaagĩa na ibuku rĩrĩ na ũtaũku wa ica ikuhĩ wa morathi ma Ezekieli?” Ibuku rĩa Ũthathaiya Mũtheru wa Jehova nĩ Ũcoketio! rĩrĩ na ũhoro ũcio. Ũgĩthoma icunjĩ 22 iria irĩ thĩinĩ warĩo na ũgecũrania mbica thaka iria rĩrĩ nacio, nĩ ũkuona atĩ ũthuthuria mũrikĩru nĩ wekirũo rĩrĩa rĩahaaragĩrio. Nĩ tweciririe na njĩra ndikĩru na tũkĩhoya mũno nĩguo tũtaũkĩrũo nĩ kĩrĩa gĩatũmire Jehova aheane ibuku rĩu rĩa gũcanjamũra rĩa Ezekieli. Nĩ twathuthuririe na kinyi ciũria ta: Nĩ maũndũ marĩkũ marĩ ibuku-inĩ rĩa Ezekieli andũ arĩa maatũũraga matukũ-inĩ ma Ezekieli mangĩerutire kuumana namo, na ithuĩ tũngĩĩruta atĩa kuumana na maũndũ macio mahinda-inĩ maya? Nĩ morathi marĩkũ maragĩrĩria maũndũ makaahinga ihinda rĩũkĩte? Hihi nĩ twagĩrĩirũo kuona maũndũ mamwe morathi-inĩ ma Ezekieli  marĩ kĩĩruru kĩa maũndũ mangĩ? Macokio ma ciũria icio nĩ megũtũteithia gũtaũkĩrũo wega makĩria nĩ ibuku rĩrĩ rĩa Bibilia ithuothe tũkenagĩra kũrĩthoma.

Ũgĩthoma ibuku rĩa Ezekieli kuuma kĩambĩrĩria nginya mũthia, nĩ ũgũkenio mũno nĩ ũhoro wĩgiĩ gĩcunjĩ kĩa igũrũ kĩa ithondeka rĩa Jehova. Ningĩ hatarĩ nganja nĩ ũkũgegio nĩ ithimi ndũũgĩru iria Jehova aigĩire arĩa marĩ igũrũ na arĩa marĩ gũkũ thĩ arĩa mendaga kũmũthathaiya na njĩra ĩrĩa etĩkĩrĩte. Ibuku rĩrĩ rĩa Ũthathaiya Mũtheru nĩ rĩgũgũteithia kuonania ngatho nĩ ũndũ wa maũndũ marĩa Jehova ekĩire andũ ake na marĩa arĩmekĩra ihinda rĩũkĩte. Nĩ ũkuona atĩ ibuku rĩrĩ nĩ rĩratĩtĩrithia mũno maũndũ merĩ manene. Wa mbere, nĩguo tũkenie Jehova, no mũhaka tũmũmenye na tũmwĩtĩkĩre arĩ Mwathani Mũnene wa Igũrũ na Thĩ. Wa kerĩ, no mũhaka tũthathaiye Jehova na njĩra ĩrĩa etĩkĩrĩte, na tũtũũre kũringana na ithimi ciake ndũũgĩru.

Tũrehoka atĩ ibuku rĩrĩ nĩ rĩgwĩkĩra hinya itua rĩaku rĩa gũthathaiya Jehova na njĩra ĩgũtĩithia rĩĩtwa rĩake inene na itheru. Ningĩ, tũrehoka atĩ nĩ rĩgũgwĩkĩra ngoro ũthiĩ na mbere kwĩrĩgĩrĩra ihinda rĩrĩa ndũrĩrĩ ciothe igaakinyĩrĩra kũmenya atĩ we nĩwe Jehova.—Ezek. 36:23; 38:23.

Ithe witũ ũtwendete, Jehova, arorathima kĩyo kĩanyu gĩa gũtaũkĩrũo nĩ ibuku rĩu aatongoririe mũnabii Ezekieli kwandĩka.