Mogarũrũku Megiĩ Ũtaũku Witũ
Kwa ihinda rĩa mĩaka mĩingĩ, kũgerera ngathĩti ya Mũrangĩri, nĩ gwĩkĩtwo mogarũrũku megiĩ ũtaũku witũ wa maũndũ matiganĩte ma ũrathi wa Ezekieli. Na ibuku rĩrĩ, Ũthathaiya Mũtheru wa Jehova nĩ Ũcoketio!, rĩrĩ na maũndũ mangĩ mekĩtwo ũgarũrũku. Ta rora kana no ũhote gũcokia ciũria ici.
Mothiũ marĩa mana ma ciũmbe iria irĩ muoyo marũgamĩrĩire kĩĩ?
Ũtaũku witũ wa tene: O ũthiũ harĩ mothiũ macio mana ma ciũmbe icio irĩ muoyo, kana akerubi, ũrũgamĩrĩire ngumo ĩmwe harĩ ngumo iria inya nene cia Jehova.
Ũtaũku mwerũ: O na gũtuĩka o ũthiũ harĩ mothiũ macio mana ma ciũmbe icio irĩ muoyo ũrũgamĩrĩire ngumo ĩmwe harĩ ngumo iria inya nene cia Jehova, mothiũ macio mana marĩ hamwe marũgamĩrĩire ngumo ciothe iria Jehova akoragwo nacio. Ningĩ, mothiũ macio mana nĩ matũrutaga ũhoro wĩgiĩ ũtũũgĩru mũnene wa hinya na riri wa Jehova.
Gĩtũmi kĩa ũgarũrũku ũcio: Thĩinĩ wa Kiugo kĩa Ngai, namba inya kaingĩ ĩhũthagĩrũo kũrũgamĩrĩra kĩndũ kĩrĩ gĩothe hatarĩ kĩndũ gĩtigĩrĩirũo. Kwoguo, mothiũ macio mana marĩ hamwe, mathondekete makĩria ma ngumo inya cia kũgucĩrĩria—nĩmo mũthingi wa ngumo cia magegania cia Jehova. Ningĩ, o ũthiũ warĩ wa kĩũmbe kĩrĩ na riri, hinya, na ũhoti. O na kũrĩ ũguo, ciũmbe icio ciothe inya irĩ hinya iria ciarũgamĩrĩire ũũmbi, o ta ũrĩa cioonanĩtio nĩ mothiũ macio mana ma o kerubi, ciarĩ rungu rwa gĩtĩ kĩa ũnene kĩa Jehova. Ũndũ ũcio ũronania atĩ Jehova nĩwe Mwathani Ũrĩa Mũnene.
Mũndũ ũrĩa warĩ na rũhĩa rwa mwandĩki rwa gwĩkĩra rangi arũgamĩrĩire ũ?
Ũtaũku witũ wa tene: Mũndũ ũrĩa warĩ na rũhĩa rwa gwĩkĩra rangi arũgamĩrĩire aitĩrĩrie maguta arĩa matigarĩte gũkũ thĩ. Kũgerera wĩra wa kũhunjia na kũrutana, ihinda-inĩ rĩrĩ, arĩa aitĩrĩrie maguta nĩ marekĩra rũũri rwa mũhaano mathiithi-inĩ ma andũ arĩa matuĩkaga a “kĩrĩndĩ kĩnene.” —Kũg. 7:9.
Ũtaũku mwerũ: Mũndũ ũcio warĩ na rũhĩa rwa mwandĩki rwa gwĩkĩra rangi arũgamĩrĩire Jesu Kristo. Ageekĩra andũ a kĩrĩndĩ kĩnene rũũri rĩrĩa magaatuĩrũo atĩ o nĩ ngʼondu hĩndĩ ya “thĩna mũnene.”—Mat. 24:21.
Gĩtũmi kĩa ũgarũrũku ũcio: Jehova ehokeire Mũrũ wake wĩra wa gũtuanĩra. (Joh. 5:22, 23) Kũringana na Mathayo 25:31-33, Jesu nĩwe ũgaatua ciira wa mũico kana mũndũ nĩ “ngʼondu” kana nĩ “mbũri.”
Hihi airĩtu a nyina ũmwe arĩa maarĩ maraya, Ohola na Oholiba, marũgamĩrĩire ndini iria ciĩĩtaga cia Gĩkristiano iria ihutĩtie kanitha wa Gatoreki, na cia Gĩprotestanti?
Ũtaũku witũ wa tene: Ohola (Samaria, itũũra rĩrĩa inene rĩa Isiraeli), mũirĩtu ũrĩa mũkũrũ, arũgamĩrĩire kanitha wa Gatoreki; Oholiba (Jerusalemu, itũũra rĩrĩa inene rĩa Juda), mũirĩtu ũrĩa mũnini, arũgamĩrĩire ndini cia Gĩprotestanti.
Ũtaũku mwerũ: Airĩtu acio maarĩ ahũũri maraya matirũgamĩrĩire gĩcunjĩ o na kĩmwe kĩa ndini iria ciĩĩtaga cia Gĩkristiano. Handũ ha ũguo, airĩtu acio matũrutaga ũrĩa Jehova aiguaga rĩrĩa andũ arĩa hĩndĩ ĩmwe maarĩ ehokeku harĩ we meingĩria harĩ ũmaraya wa kĩĩroho. Jehova nĩ athũire ndini ciothe cia maheeni.
Gĩtũmi kĩa ũgarũrũku ũcio: Gũtirĩ ũndũ thĩinĩ wa Maandĩko wonanagia atĩ Ohola na Oholiba marũgamĩrĩire ndini icio ciĩĩtaga cia Gĩkristiano. Kũrĩ hĩndĩ Isiraeli na Juda maatariĩ ta atumia ehokeku a Jehova, no gũtirĩ hĩndĩ ndini iria ciĩĩtaga cia Gĩkristiano irĩ ciakorũo na ũkuruhanu ta ũcio hamwe na Jehova. Makĩria ma ũguo, ũhoro wĩgiĩ kũringithanio kwa andũ a Ngai arĩa mataarĩ ehokeku na ahũũri maraya thĩinĩ wa Ezekieli mũrango wa 16 na wa 23, nĩ ũheanaga kĩĩrĩgĩrĩro gĩa kũgarũrũka na gũcokio. Ndini iria ciĩĩtaga cia Gĩkristiano, irĩ gĩcunjĩ kĩa Babuloni Ũrĩa Mũnene, itikoragwo na kĩĩrĩgĩrĩro ta kĩu.
Hihi ndini iria ciĩĩtaga cia Gĩkristiano nĩcio irũgamĩrĩirũo nĩ Jerusalemu ya tene ĩrĩa yaregenyũkĩte?
Ũtaũku witũ wa tene: Ndini iria ciĩĩtaga cia Gĩkristiano nĩcio irũgamĩrĩirũo nĩ Jerusalemu ĩrĩa ĩtaarĩ na wĩhokeku. Kwoguo, kwanangwo kwa Jerusalemu kwarĩ ũrathi wa kuonania kũniinwo kwa ndini icio ciĩĩtaga cia Gĩkristiano.
Ũtaũku mwerũ: Maũndũ matarĩ ma wĩhokeku marĩa maarĩ thĩinĩ wa Jerusalemu, ta ũhoi mĩhianano na ungumania mũingĩ, nĩ matũririkanagia maũndũ marĩa marekĩka thĩinĩ wa ndini iria ciĩĩtaga cia Gĩkristiano, no rĩu tũtiugaga atĩ ndini icio nĩcio irũgamĩrĩirũo nĩ Jerusalemu ĩyo ya tene.
Gĩtũmi kĩa ũgarũrũku ũcio: Gũtirĩ na gĩtũmi gĩa Kĩĩmandĩko gĩa kuuga atĩ ndini icio nĩcio irũgamĩrĩirũo nĩ Jerusalemu. Ngũrani na Jerusalemu ya tene, gũtirĩ hĩndĩ ndini icio ciĩĩtaga cia Gĩkristiano irĩ ciakorũo na ũthathaiya mũtheru. Ningĩ nĩ kũrĩ hĩndĩ Jerusalemu yooheirũo nĩ Jehova kwa ihinda, no gũtirĩ hĩndĩ ndini icio ikooherũo.
Kĩoneki kĩgiĩ mũkuru wa mahĩndĩ momũ kĩahingire na njĩra ĩrĩkũ?
Ũtaũku witũ wa tene: Mwaka-inĩ wa 1918, Akristiano aitĩrĩrie maguta arĩa maanyariragwo, nĩ maatwarirũo ũkombo-inĩ thĩinĩ wa Babuloni Ũrĩa Mũnene, makĩhaana ta makuĩte na wĩra wao ũkĩhaana ta wathira. Ihinda rĩu ikuhĩ rĩa gũkorũo ũkombo-inĩ rĩathirire mwaka wa 1919 rĩrĩa Jehova aamarahũrire marĩ ahunjia a Ũthamaki.
Ũtaũku mwerũ: Ihinda rĩu rĩa kũhaana ta makuĩte marĩ ũkombo-inĩ wa kĩĩroho rĩarĩ iraihu mũno na rĩaambĩrĩirie tene mbere ya mwaka wa 1918. Rĩaambĩrĩirie hĩndĩ ya karine ya kerĩ Mahinda Maitũ na rĩgĩthira mwaka wa 1919 M.M. na rĩringanaga na ihinda iraihu rĩa gũkũra thĩinĩ wa ngerekano ya Jesu ya ngano na itindiĩ.
Gĩtũmi kĩa ũgarũrũku ũcio: Isiraeli a tene maaikarire ithamĩrio ihinda iraihu, kwambĩrĩria mwaka wa 740 M.M.M. nginya mwaka wa 537 M.M.M. Ũrathi wa Ezekieli uugaga atĩ mahĩndĩ macio maarĩ “momũ” kana “momũ mũno,” kuonania atĩ arĩa marũgamĩrĩirũo nĩ mahĩndĩ macio maakoretwo makuĩte ihinda iraihu mũno. Na gũcokio muoyo kwa mahĩndĩ macio gũtaaragĩrio atĩ kũngĩekĩkire ikinya gwa ikinya kuonania atĩ ũndũ ũcio nĩ ũngĩoire ihinda.
Kũnyitithanio gwa tũmĩtĩ twĩrĩ kũrũgamĩrĩire kĩĩ?
Ũtaũku witũ wa tene: Thutha wa gũkorũo matarĩ na ũrũmwe gwa kahinda kanini hĩndĩ ya Mbaara ya Mbere ya Thĩ, Akristiano aitĩrĩrie maguta arĩa maarĩ ehokeku nĩ maagĩire na ũrũmwe rĩngĩ mwaka wa 1919.
Ũtaũku mwerũ: Ũrathi ũcio wonanagia atĩ Jehova nĩ angĩgaatũma athathaiya ake matuĩke kĩndũ kĩmwe. Thutha wa mwaka wa 1919, o ũrĩa ihinda rĩahĩtũkaga, andũ aingĩ arĩa marĩ na kĩĩrĩgĩrĩro gĩa gũtũũra gũkũ thĩ nĩ maanyitanĩire na aitĩrĩrie maguta arĩa matigarĩte gũkũ thĩ. Ikundi icio cierĩ ithathayagia Jehova hamwe irĩ kĩndũ kĩmwe.
Gĩtũmi kĩa ũgarũrũku ũcio: Ũrathi ũcio nduonanagia atĩ kamũtĩ kamwe kaambire kuunwo maita merĩ gagĩcoka gakĩnyitithanio gagĩtuĩka kamwe. Kwoguo ũrathi ũcio ndwaragĩrĩria ũhoro wa gĩkundi kĩmwe kĩngĩagayũkanire na thutha ũcio kĩnyitithanio. Ithenya rĩa ũguo, ũtaaragĩria ũrĩa ikundi igĩrĩ ngũrani ingĩanyitithanirio.
Gogu wa Magogu Nũũ?
Ũtaũku witũ wa tene: Gogu wa Magogu nĩ rĩĩtwa rĩa ũrathi rĩa Shaitani thutha wa kũingatwo kuuma igũrũ.
Ũtaũku mwerũ: Gogu wa Magogu nĩ ngwatanĩro ya mabũrũri ma gũkũ thĩ ĩrĩa ĩgaatharĩkĩra athathaiya a ma hĩndĩ ya thĩna ũrĩa mũnene.
Gĩtũmi kĩa ũgarũrũku ũcio: Ũrathi wĩgiĩ Gogu, atĩ nĩ akaaneanwo atuĩke irio cia nyoni iria irĩaga nyama na aheo handũ ha gũthikwo gũkũ thĩ, wonanagia atĩ Gogu ti kĩũmbe kĩa roho. Makĩria ma ũguo, tharĩkĩro ya Gogu nĩ ĩringaine na ũrĩa mabuku ma Danieli na Kũguũrĩrio moigaga igũrũ rĩgiĩ tharĩkĩro ya mabũrũri ma gũkũ thĩ kwerekera andũ a Ngai. —Dan. 11:40, 44, 45; Kũg. 17:14; 19:19.
Hihi Ezekieli oonire na agĩceera thĩinĩ wa hekarũ nene ya kĩĩroho ĩrĩa mũtũmwo Paulo aacokire gũtaarĩria?
Ũtaũku witũ wa tene: Hekarũ ĩrĩa Ezekieli oonire kĩoneki-inĩ noyo hekarũ ya kĩĩroho ĩrĩa mũtũmwo Paulo aataarĩirie.
Ũtaũku mwerũ: Ezekieli ndoonire hekarũ ya kĩĩroho ĩrĩa yaambĩrĩirie gũkorũo kuo mwaka wa 29 M.M., ĩndĩ kĩoneki kĩu kĩonanagia ũrĩa ũthathaiya mũtheru ũrĩa wataarĩirio nĩ Watho wa Musa ũngĩacokirio thutha wa kuuma ithamĩrio. Ũhoro ũrĩa Paulo aataarĩirie atongoretio nĩ roho wĩgiĩ hekarũ ya kĩĩroho waragĩrĩria wĩra ũrĩa Jesu aarutire arĩ Mũthĩnjĩri-Ngai Ũrĩa Mũnene Makĩria, kuuma mwaka wa 29 nginya 33 M.M. Kĩoneki kĩa Ezekieli kĩgiĩ hekarũ, kĩrĩa gĩtagwetaga ũhoro wa mũthĩnjĩri-Ngai mũnene, kĩaragĩrĩria ũhoro wa gũcokio gwa kĩĩroho kũrĩa kwaambĩrĩirie mwaka wa 1919 M.M. Kwoguo tũticaragia kĩrĩa kĩrũgamĩrĩirũo nĩ maũndũ mothe na ithimi cia hekarũ ĩrĩa Ezekieli oonire kĩoneki-inĩ. Ithenya rĩa ũguo, twagĩrĩirũo kũrora maũndũ marĩa kĩoneki kĩu kĩa Ezekieli kĩngĩtũruta igũrũ rĩgiĩ ithimi cia Jehova ciĩgiĩ ũthathaiya mũtheru.
Gĩtũmi kĩa ũgarũrũku ũcio: Nĩ harĩ maũndũ ma bata maarĩ ngũrani gatagatĩ ka hekarũ ĩrĩa Ezekieli oonire kĩoneki-inĩ na hekarũ ya kĩĩroho. Kwa ngerekano, nĩ kwarutagwo magongona maingĩ thĩinĩ wa hekarũ ya Ezekieli; thĩinĩ wa hekarũ ya kĩĩroho, no igongona rĩmwe rĩarutirũo, “riita rĩmwe rĩa kũigana.” (Ahib. 9:11, 12) Mĩaka mĩingĩ mbere ya Kristo gũka, ihinda rĩa Jehova rĩa kũguũria ma ndikĩru ciĩgiĩ hekarũ ya kĩĩroho rĩtiakinyĩte.
