Ũthathaiya no ũtaarĩrio atĩ nĩ “gĩĩko gĩa kuonania gĩtĩo na wendo harĩ ngai.” Thĩinĩ wa Bibilia, ciugo cia rũthiomi rwa tene iria itaũrĩtwo “ũthathaiya” no irehe rĩciria rĩa mũndũ ũronania gĩtĩo kĩnene, kana kwĩnyihĩria ciũmbe. (Mat. 28:9) Ciugo icio ningĩ no ihũthĩrũo gũtaarĩria gĩĩko gĩa kĩndini harĩ Ngai kana kĩndũ kĩngĩ kĩrathathaiyo. (Joh. 4:23, 24) Ũhoro ũrĩa ũthiũrũrũkĩirie nĩguo ũteithagia kũmenya ũrĩa ciugo icio igũtaũkĩka.

Jehova, Mũũmbi na Mwathani Mũnene wa Igũrũ na Thĩ, nowe tu wagĩrĩire kũheo wĩrutĩri witũ wa ngoro yothe. (Kũg. 4:10, 11) Tũthathayagia Jehova na njĩra ya gũtĩa ũnene wake na rĩĩtwa rĩake. (Thab. 86:9; Mat. 6:9, 10) Maũndũ macio merĩ—ũnene wa Jehova na rĩĩtwa rĩake—nĩ marĩrĩirio mũno ibuku-inĩ rĩa Ezekieli. Ciugo “Jehova Mwathani Ũrĩa Mũnene” ihũthĩkĩte maita 217 thĩinĩ wa ibuku rĩa Ezekieli tu, na ciugo “nĩ mũkaamenya atĩ niĩ nĩ niĩ Jehova” na ingĩ ta icio ikahũthĩka makĩria ma maita 60.—Ezek. 2:4; 6:7.

O na kũrĩ ũguo, ũthathaiya witũ ti ũndũ tũiguaga na kũu thĩinĩ tu; ĩndĩ, ũthathaiya wa ma nĩ ũkoragwo na ciĩko. (Jak. 2:26) Rĩrĩa tweyamũrĩra Jehova, twĩhĩtaga atĩ ũtũũro-inĩ witũ wothe, nĩ tũrĩmwathĩkagĩra arĩ Mwathani Witũ Ũrĩa Mũnene na tũkonania gĩtĩo kĩnene biũ harĩ rĩĩtwa rĩake. Ririkana atĩ macokio-inĩ ma Jesu igerio-inĩ rĩa gatatũ, nĩ aakuruhithanirie ũthathaiya na “ũtungata mũtheru.” (Mat. 4:10) Tondũ tũrĩ athathaiya a Jehova, nĩ tũkenagĩra kũmũtungatĩra. a (Gũcok. 10:12) Tũkoragwo tũkĩrutĩra Ngai witũ ũtungata mũtheru rĩrĩa tũreka maũndũ marahutania ĩmwe kwa ĩmwe na ũthathaiya witũ na marabatara twĩime. Nĩ maũndũ marĩkũ macio?

Ũtungata mũtheru nĩ wa mĩthemba mĩingĩ, na yothe nĩ ya bata harĩ Jehova. Tũkoragwo tũkĩruta ũtungata mũtheru rĩrĩa tũrahunjĩria andũ arĩa angĩ, rĩrĩa tũranyitanĩra mĩcemanio-inĩ thĩinĩ wa Nyũmba ya Ũthamaki, na rĩrĩa tũraaka kũndũ gwa gũcemanĩria na tũgakũiga kũrĩ kwega. Makĩria ma ũguo, tũkoragwo tũkĩruta ũtungata mũtheru rĩrĩa tũranyitanĩra ũthathaiya-inĩ wa famĩlĩ, tũkĩnyita mbaru wĩra wa gũteithia Akristiano arĩa makoretwo nĩ icanjama cia ndũire, tũkĩĩrutĩra igomano-inĩ, kana tũgĩtungata Betheli. (Ahib. 13:16; Jak. 1:27) Tũngĩiga ũthathaiya mũtheru mbere meciria-inĩ na ngoro-inĩ citũ, nĩ tũrĩrutaga “ũtungata mũtheru mũthenya na ũtukũ.” Nĩ tũkenagĩra gũthathaiya Ngai witũ, Jehova!—Kũg. 7:15.