No mũhaka akorũo Ezekieli nĩ oonete mĩcongo mĩnene ya ndegwa irĩ na mathagu na mĩrũthi ĩrĩ na ciongo cia andũ ĩrũgamĩtio mbere ya nyũmba cia athamaki na hekarũ. Mĩcongo ta ĩyo nĩ yakoragwo kũndũ kũingĩ thĩinĩ wa Ashuri na Babulonia ya tene. O ta eroreri arĩa angĩ othe, no mũhaka akorũo nĩ eeroragĩra ciũmbe icio irĩ hinya agegete, imwe ciarĩ na ũraihu wa na igũrũ wa hakuhĩ fiti 20. O na kũrĩ ũguo, o na ciũmbe icio ingĩonekire irĩ na hinya atĩa, itiarĩ muoyo, ciacongetwo kuuma ihiga-inĩ.

Ngũrani nacio, ciũmbe inya iria Ezekieli oonire thĩinĩ wa kĩoneki ciarĩ ‘ciũmbe irĩ muoyo.’ Kaĩ ĩyo nĩ ngũrani nene-ĩ! Kĩoneki kĩu nĩ kĩahutirie Ezekieli mũno ũũ atĩ aahũthĩrire ciugo ‘ciũmbe irĩ muoyo’ maita 11 ũhoro-inĩ wa kwambĩrĩria wa ũrathi wake. (Ezek. 1:5-22) Kĩoneki kĩu gĩa ciũmbe inya irĩ muoyo igĩthiĩ irĩ hamwe irorete kũndũ kũmwe irĩ rungu rwa gĩtĩ kĩa ũnene kĩa Ngai no mũhaka akorũo nĩ gĩateithirie Ezekieli mũno kuona atĩ Jehova nĩ aratongoria ũũmbi wake wothe. Ũmũthĩ, kĩoneki o kĩu nĩ gĩtuonagia wega ũhoti na hinya wa Jehova na riri wa ũnene wake.—1 Maũ. 29:11.