GATHANDŨKŨ KA ŨRUTANI GA 19A
Njũũĩ cia Irathimo Kuuma Kũrĩ Jehova
Ta wĩcirie ũhoro wa icunjĩ ngũrani cia Bibilia iria ihũthagĩra ciugo “rũũĩ” na “maĩ” kuonania irathimo iria ciumaga kũrĩ Jehova. Irĩ ciothe hamwe, nĩ itũrutaga ũndũ wa gwĩkĩra ngoro mũno wĩgiĩ ũrĩa Jehova atũrathimaga. Na njĩra ĩrĩkũ?
JOELI 3:18 Ũrathi ũcio wonanagia itherũkĩro rĩa maĩ rĩratherera kuuma harĩa hatheru ha hekarũ. Rĩgatherera nĩguo rĩnyuithie “Mũkuru [mũũmũ] wa Mĩtĩ ya Mĩgaa.” Kwoguo Joeli na Ezekieli moonire rũũĩ rũgĩtũma kũndũ kũũmũ kũgĩe na muoyo. Morathi-inĩ macio merĩ, rũũĩ rwoimaga nyũmba-inĩ ya Jehova, kana hekarũ-inĩ.
ZEKARIA 14:8 Mũnabii Zekaria oonire “maĩ ma muoyo” magĩtherera moimĩte itũũra rĩa Jerusalemu. Nuthu ya maĩ macio yathiire yerekeire iria rĩa mwena wa irathĩro, kana Iria rĩa Cumbĩ, nayo nuthu ĩyo ĩngĩ ĩgĩthiĩ yerekere iria rĩa mwena wa ithũĩro, kana Iria rĩa Mediterenia. Jerusalemu yarĩ “itũũra rĩa Mũthamaki ũrĩa mũnene,” Jehova Ngai. (Mat. 5:35) Kwoguo Zekaria kũgweta itũũra rĩu gũtũririkanagia wathani wa Jehova igũrũ rĩa thĩ yothe ihinda-inĩ rĩũkĩte. Kwa ihinda iraihu, nĩ tũtaũkĩirũo atĩ maĩ marĩa magwetetwo ũrathi-inĩ ũcio monanagia atĩ Jehova akaarathima ikundi igĩrĩ cia andũ ehokeku thĩinĩ wa Paradiso, arĩa makaahonoka thĩna ũrĩa mũnene na arĩa makaariũkio thutha-inĩ.
KŨGUŨRĨRIO 22:1, 2 Mũtũmwo Johana oonire rũũĩ rwa mũhaano rũhaanaine na rũrĩa Ezekieli oonire. No handũ ha kuuma hekarũ-inĩ, rwoimĩte gĩtĩ-inĩ kĩa ũnene kĩa Jehova. Kwoguo kũroneka atĩ o ta kĩoneki kĩa Zekaria, kĩoneki kĩu kĩaragĩrĩria irathimo cia wathani wa Ngai hĩndĩ ya Mĩaka Ngiri.
Ũrĩa kũrĩ nĩ atĩ, gũkoragwo na ngũrani nini mũno gatagatĩ ka irathimo iria ciumanaga na wathani wa Jehova na iria irũgamĩrĩirũo nĩ rũũĩ rũrĩa Ezekieli oonire kĩoneki-inĩ. Irathimo icio ciothe ciumaga kũrĩ Jehova na igakinyĩra andũ arĩa othe ehokeku.
THABURI 46:4 Ta rora wone ũrĩa mũhari ũcio ũronania maũndũ maya merĩ—ũthathaiya na wathani. Ũronania rũũĩ rũrarehe gĩkeno kũrĩ “itũũra rĩa Ngai,” rĩrĩa rĩrũgamĩrĩire Ũthamaki na wathani, na kũrĩ “gĩikaro kĩrĩa gĩtheru na kĩrĩ riri kĩa Ũrĩa ũrĩ Igũrũ Mũno,” kĩrĩa kĩrũgamĩrĩire ũthathaiya mũtheru.
Icunjĩ icio irĩ hamwe, itũheaga ũũma wa atĩ Jehova nĩ akaarathima andũ ehokeku kũgerera njĩra igĩrĩ. Tũkaagunĩka tene na tene kuumana na wathani wake, na kuumana na mũbango wake wĩgiĩ ũthathaiya mũtheru. Nĩ ũndũ ũcio, ihinda-inĩ rĩrĩ rekei tũtue itua rĩa gũthiĩ na mbere gũcaria “maĩ ma muoyo” kuuma kũrĩ Jehova Ngai na Mũrũ wake, ũguo nĩ kuuga, maũndũ marĩa matũheaga nĩguo tũkoona muoyo wa tene na tene.—Jer. 2:13; Joh. 4:10.
