1, 2. Kũringana na Ezekieli 47:1-12, nĩ kĩĩ Ezekieli oonire na akĩmenya? (Rora mbica kĩambĩrĩria-inĩ gĩa gĩcunjĩ gĩkĩ.)

 EZEKIELI nĩ oonire ũndũ ũngĩ wa magegania thĩinĩ wa kĩoneki gĩake kĩgiĩ hekarũ: Haarĩ na karũũĩ gaathereraga koimĩte hekarũ-inĩ! Ta hũũra mbica agĩtwarana na karũũĩ kau kaarĩ na maĩ matheru mũno. (Thoma Ezekieli 47:1-12.) Gaathereraga koimĩte itonyero-inĩ rĩa harĩa hatheru; gagacoka gakoimĩra nja ya mwako wa hekarũ hakuhĩ na kĩhingo kĩa mwena wa irathĩro. Mũraika ũrĩa waceeragia Ezekieli akĩmũtongoria kuuma hekarũ-inĩ, agĩthimaga matĩĩna o ũrĩa maathiaga. Mũraika ũcio aathiaga akĩĩraga Ezekieli rĩngĩ na rĩngĩ agerere maĩ-inĩ, na mũnabii ũcio akĩona atĩ karũũĩ kau gaathiaga gakĩrikaga, na thutha wa kahinda kanini gagĩtuĩka rũũĩ rũrĩ na maĩ maingĩ ũũ atĩ angĩahotire kũrũringa korũo tu nĩ aatonyire atubĩre!

² Ezekieli nĩ aamenyire atĩ rũũĩ rũu rweitagĩrĩra thĩinĩ wa Iria rĩa Cumbĩ na rĩrĩa rĩothe maĩ ma rũũĩ rũu matukana na maĩ ma rĩo, nĩ rwahonagia maĩ ma rĩo ma cumbĩ marĩa mataarĩ na kĩndũ kĩrĩ muoyo na kwoguo maĩ macio makĩiyũra thamaki. Na hũgũrũrũ-inĩ cia rũũĩ rũu, akĩona hakũrĩte mĩtĩ mĩingĩ ya mĩthemba yothe. O mweri, yarutaga maciaro mega ma kũrĩo, na ĩkaruta mathangũ maatuĩkaga ma kũhonania. No mũhaka akorũo maũndũ macio mothe  Ezekieli oonire nĩ maatũmire ngoro yake ĩiyũrũo nĩ thayũ na kĩĩrĩgĩrĩro. No hihi gĩcunjĩ kĩu gĩa kĩoneki kĩgiĩ hekarũ kĩahutirie atĩa Ezekieli na arĩa maarĩ nake ithamĩrio? Na gĩtũhutagia atĩa ũmũthĩ?

3. Nĩ kĩĩ gĩatũmire Ayahudi a mahinda ma tene mage gwĩciria atĩ rũũĩ rũrĩa rwarĩ kĩoneki-inĩ kĩa Ezekieli rwarĩ rũũĩ rwa biũ?

³ Hatarĩ nganja Ayahudi a mahinda ma tene matieciririe atĩ rũũĩ rũrĩa rwarĩ kĩoneki-inĩ rwarĩ rũũĩ rwa biũ. Handũ ha ũguo, no kũhoteke gĩcunjĩ kĩu kĩa Maandĩko kĩamaririkanirie ũrathi ũngĩ wĩgiĩ gũcokio, ũrĩa hihi waandĩkĩtwo makĩria ma karine igĩrĩ mbere ĩyo nĩ mũnabii Joeli. (Thoma Joeli 3:18.) Ayahudi mathoma ciugo icio Joeli aandĩkire atongoretio nĩ roho, matierĩgagĩrĩra atĩ irĩma nĩ “igaataatia ndibei ĩrĩ na cama” kana tũrĩma “tũthererie iria”; o na matierĩgagĩrĩra itherũkĩro rĩa maĩ rĩtherere “kuuma nyũmba-inĩ ya Jehova.” Ũndũ ũmwe na ũcio, no kũhoteke Ayahudi acio nĩ maataũkĩirũo atĩ ndũmĩrĩri ĩrĩa yarĩ kĩoneki-inĩ kĩa mũnabii Ezekieli ndĩaaragĩrĩria ũhoro wa rũũĩ rwa biũ. a Gũkĩrĩ ũguo-rĩ, nĩ ndũmĩrĩri ĩrĩkũ Jehova eendaga kũheana? Maandĩko nĩ matũteithagia gũtaũkĩrũo nĩ icunjĩ imwe cia kĩoneki kĩu. O na kũrĩ ũguo, tũkwarĩrĩria maũndũ matatũ meyumĩrĩtie wega, ma gũtwĩkĩra ngoro marĩa tũngĩĩruta kuuma gĩcunjĩ-inĩ kĩu kĩa ũrathi.

4. (a) Rũũĩ rũrĩa rwarĩ kĩoneki-inĩ kĩa Ezekieli rũngĩatũmire Ayahudi merĩgĩrĩre irathimo irĩkũ kuuma kũrĩ Jehova? (b) Bibilia ĩhũthĩrĩte atĩa ciugo “rũũĩ” na “maĩ” gũtũhe ũũma atĩ Jehova nĩ akaarathima andũ ake? (Rora gathandũkũ, “Njũũĩ cia Irathimo Kuuma Kũrĩ Jehova.”)

⁴ Rũũĩ rwa irathimo. Thĩinĩ wa Bibilia, kaingĩ njũũĩ na maĩ nĩ ihũthagĩrũo kuonania irathimo cia Jehova iria irehaga muoyo. Ezekieli oonire rũũĩ ta rũu rũgĩtherera kuuma hekarũ-inĩ, kwoguo kĩoneki kĩu nĩ kĩngĩatũmire andũ a Ngai merĩgĩrĩre atĩ nĩ mangĩakinyĩirũo nĩ irathimo cia Jehova cia kĩĩroho iria irehaga muoyo mangĩarũmirie ũthathaiya mũtheru. Nĩ irathimo irĩkũ icio? Nĩ mangĩamũkĩrire ũrutani wa kĩĩroho rĩngĩ kuuma kũrĩ athĩnjĩri-Ngai. Na tondũ magongona nĩ mangĩarutirũo thĩinĩ wa hekarũ, nĩ mangĩakorirũo na ma rĩngĩ atĩ mehia mao nĩ mangĩahumbĩrirũo. (Ezek. 44:15, 23; 45:17) Kwoguo, nĩ mangĩakorirũo marĩ atheru rĩngĩ, ta mathambĩtio na maĩ matheru marĩa mooimaga hekarũ-inĩ.

5. Rũũĩ rũrĩa rwarĩ kĩoneki-inĩ ruoonanirie atĩa atĩ hingo ciothe nĩ kũngĩakorirũo na irathimo cia kũigana andũ othe?

⁵ Hihi hingo ciothe nĩ kũngĩakorirũo na irathimo cia kũigana andũ othe? Kĩoneki kĩu nĩ gĩacokirie kĩũria kĩu na njĩra ya kuonania maĩ macio makĩongerereka na njĩra ya kĩama—kuuma karũũĩ kanini magatuĩka rũũĩ rũrĩ na maĩ maingĩ thutha wa itĩna ta rĩa mairo ĩmwe tu! (Ezek. 47:3-5) No kũhoteke Ayahudi arĩa mangĩacokirio bũrũri-inĩ wao nĩ mangĩaingĩhire, no irathimo cia Jehova nĩ ingĩongererekire nĩguo ihingie mabataro mao. Rũũĩ rũu ruoonanagia ũingĩ!

6. (a) Ũrathi ũcio waheanire ũũma ũrĩkũ? (b) Kĩoneki kĩu ningĩ kĩaheanire mũkaana ũrĩkũ? (Rora kohoro ka magũrũ-inĩ.)

⁶ Maĩ ma kũrehe muoyo. Thĩinĩ wa kĩoneki kĩa Ezekieli, rũũĩ rũu rweitagĩrĩra Iria-inĩ rĩa Cumbĩ, rũkahonia maĩ maingĩ ma rĩo. Ta rora wone atĩ maĩ macio maatũmaga gũkorũo na thamaki nyingĩ irĩ muoyo ũũ atĩ mĩthemba yacio yaringithanirio na ya Iria Rĩrĩa Inene, kana Iria rĩa Mediterenia. O na nĩ kwarĩ na biacara nene ya  gũtega thamaki hũgũrũrũ-inĩ cia Iria rĩa Cumbĩ gatagatĩ ga taũni igĩrĩ iria kwahoteka nĩ ciaraihanĩrĩirie mũno. Mũraika ũcio ooigire ũũ: “Ciũmbe ciothe nĩ irĩtũũraga muoyo kũrĩa guothe rũũĩ rũratherera.” No hihi ũguo nĩ kuuga atĩ maĩ macio mooimaga nyũmba-inĩ ya Jehova maakinyaga icigo ciothe cia Iria rĩa Cumbĩ? Aca. Mũraika ũcio aataarĩirie atĩ kũndũ kũmwe kwarĩ na matomboya gũtiakinyĩirũo nĩ maĩ macio ma kũrehe muoyo. Kũndũ kũu gwatigirũo kũrĩ “o na cumbĩ.” b (Ezek. 47:8-11) Kwoguo ũrathi ũcio nĩ waheanire ũũma atĩ ũthathaiya mũtheru nĩ ũngĩarahũrire andũ, ũtũme magaacĩre. No ningĩ nĩ waheanire mũkaana ũyũ: Ti andũ othe mangĩetĩkĩrire irathimo cia Jehova; o na ti andũ othe mangĩahonirio.

7. Mĩtĩ ĩrĩa yarĩ hũgũrũrũ-inĩ cia rũũĩ thĩinĩ wa kĩoneki yaheire Ayahudi arĩa maarĩ ithamĩrio ũũma ũrĩkũ?

⁷ Mĩtĩ ya irio na ya kũhonania. Ĩ nayo mĩtĩ ĩrĩa yarĩ hũgũrũrũ-inĩ cia rũũĩ? Na githĩ o nayo ndĩrongerera ũthaka wa kĩoneki kĩu? Ningĩ nĩ yongagĩrĩra bata wakĩo. Hatarĩ nganja Ezekieli na andũ arĩa angĩ a bũrũri wao nĩ maakenaga meciria ũhoro wa matunda marĩ na cama marĩa mangĩarutirũo nĩ mĩtĩ ta ĩyo, maciaro ngũrani o mweri! Ũndũ ũcio wa gũcanjamũra nĩ wamaheaga ũũma atĩ Jehova nĩ angĩamaheire irio cia kĩĩroho. Nĩ atĩa ũngĩ angĩamekĩire? Ta rora wone atĩ mathangũ ma mĩtĩ ĩyo ‘mangĩatuĩkire ma kũhonania.’ (Ezek. 47:12) Jehova nĩ aamenyaga atĩ, makĩria ma ũndũ ũngĩ o wothe, andũ acio mangĩacokire kuuma ithamĩrio nĩ mangĩabatarire kũhonio kĩĩroho, na nĩ aamerĩire atĩ nĩ angĩekire ũguo. Morathi mangĩ megiĩ gũcokio nĩ maarĩrĩirie ũrĩa eekire ũguo, ta ũrĩa Gĩcunjĩ gĩa 9 kĩa ibuku rĩrĩ kĩonanĩtie.

8. Nĩ kĩĩ kĩronania atĩ kĩoneki kĩa Ezekieli nĩ kĩngĩkaahinga na njĩra nene makĩria?

⁸ O na kũrĩ ũguo, o ta ũrĩa twarĩrĩirie thĩinĩ wa Gĩcunjĩ gĩa 9, andũ arĩa maacokire kuuma ithamĩrio moonire kũhinga kwa morathi macio na njĩra nini. Andũ acio nĩo maatũmire morathi macio mahinge na njĩra nini. Jehova ndangĩamarathimire na njĩra nene tondũ kaingĩ nĩ maacokagĩrĩra mĩthiĩre yao mĩũru, makaga gwathĩka, na magatiganĩria ũthathaiya mũtheru. Ayahudi arĩa maarĩ ehokeku nĩ maatuuragwo na magakua ngoro nĩ ũndũ wa mĩthiĩre ya Ayahudi arĩa angĩ. O na kũrĩ ũguo, athathaiya ehokeku a Jehova nĩ maamenyaga atĩ gũtirĩ hĩndĩ ciĩranĩro ciake ciagaga kũhinga; hingo ciothe nĩ ihingaga. (Thoma Joshua 23:14.) Kwoguo, kĩoneki kĩa Ezekieli nĩ kĩngĩkaahinga na njĩra nene makĩria hĩndĩ ĩmwe. No nĩ rĩ?

9. Nĩ rĩ kĩoneki kĩa Ezekieli kĩgiĩ hekarũ kĩngĩkaahinga na njĩra nene makĩria?

⁹ O ta ũrĩa tuoonire thĩinĩ wa Gĩcunjĩ gĩa 14 kĩa ibuku rĩrĩ, kĩoneki kĩa Ezekieli kĩgiĩ hekarũ nĩ kĩngĩkaahinga na njĩra nene makĩria “ihinda-inĩ rĩa mũthia rĩa matukũ,” rĩrĩa ũthathaiya mũtheru ũngĩgaatũũgĩrio gũkĩra hĩndĩ ĩngĩ o yothe. (Isa. 2:2) Gĩcunjĩ kĩu gĩa kĩoneki kĩa Ezekieli kĩrahinga atĩa ihinda-inĩ rĩrĩ?

10, 11. (a) Nĩ irathimo irĩkũ itũkinyagĩra ihaana ta rũũĩ ũmũthĩ? (b) Irathimo cia Jehova ciongererekete atĩa nĩguo ihingie mabataro marĩa mongererekete ma andũ matukũ-inĩ ma kũrigĩrĩria?

¹⁰ Rũũĩ rwa irathimo. Maĩ marĩa maathereraga kuuma nyũmba-inĩ ya Jehova matũririkanagia ũhoro wa irathimo irĩkũ ũmũthĩ? Hatarĩ  nganja nĩ matũririkanagia ũhoro wa maũndũ marĩa mothe Jehova atũheaga ma gũtũguna kĩĩroho. Ũndũ ũmwe nĩ igongona rĩa ũkũũri rĩa Kristo rĩrĩa rĩkoragwo na ũhoti wa gũtũtheria, na kwoguo rĩgatũma kũhoteke tuoherũo mehia. Ma iria irĩ Kiugo-inĩ kĩa Ngai o nacio nĩ iringithanagio na maĩ ma gũtheria marĩa marehaga muoyo. (Ef. 5:25-27) Irathimo ta icio itũkinyĩire atĩa mahinda-inĩ maya?

¹¹ Mwaka-inĩ wa 1919 kwarĩ na andũ ngiri nini tu maatungatagĩra Jehova, na nĩ maakenaga kwamũkĩra irio cia kĩĩroho iria maabataraga. Mĩaka ĩrĩa yarũmĩrĩire, maathiire o makĩingĩhaga. Ũmũthĩ, andũ a Ngai nĩ makĩria ma milioni inyanya. Hihi maĩ macio matheru ma ma cia kĩĩroho nĩ mongererekete nĩguo maigane andũ acio? Ĩĩ! Tũkoragwo tũtaarĩirio ma nyingĩ mũno cia Bibilia. Ihinda-inĩ rĩa mĩaka igana rĩmwe mĩhĩtũku, andũ a Ngai nĩ makinyĩirũo nĩ Bibilia, mabuku, ngathĩti, broshua, na trakti bilioni nyingĩ. O ta rũũĩ rũrĩa Ezekieli oonire kĩoneki-inĩ, ma cia kĩĩroho nĩ ciongererekete na ihenya nĩguo ihingie mabataro marĩa mongererekete ma andũ arĩa anyotu kĩĩroho thĩinĩ wa thĩ yothe. Kwa ihinda iraihu, nĩ gũkoretwo gũgĩcabwo mabuku mararĩrĩria Bibilia. Na ihinda-inĩ rĩrĩ, kũgerera website ya jw.org, ũhoro ta ũcio nĩ wonekaga intaneti-inĩ na thiomi makĩria ma 900! Maĩ macio ma kĩĩroho mahutagia atĩa andũ arĩa makoragwo na ngoro njega?

12. (a) Tuonete ndũmĩrĩri ya ũhoro wa ma ĩgĩteithia andũ gũkũria wĩtĩkio harĩ Jehova na njĩra ĩrĩkũ? (b) Ũmũthĩ kĩoneki kĩu gĩtũheaga mũkaana ũrĩkũ wa ihinda rĩrĩa rĩagĩrĩire? (Ningĩ rora kohoro ka magũrũ-inĩ.)

¹² Maĩ ma kũrehe muoyo. Ezekieli eerirũo ũũ: “Ciũmbe ciothe nĩ irĩtũũraga muoyo kũrĩa guothe rũũĩ rũratherera.” Ta wĩcirie ũrĩa ndũmĩrĩri ya ũhoro wa ma ĩkinyĩire arĩa othe mokĩte bũrũri-inĩ witũ wa kĩĩroho ũrĩa ũcoketio. Ma cia Bibilia nĩ ikinyĩire ngoro cia andũ milioni nyingĩ na ikamateithia makũrie wĩtĩkio harĩ Jehova. O na kũrĩ ũguo, kĩoneki kĩu nĩ kĩheanaga mũkaana wa ihinda rĩrĩa rĩagĩrĩire: Ti andũ othe mathiaga na mbere gwĩtĩkĩra ma icio. O ta kũndũ kũrĩa kwarĩ gũtondoru na kwarĩ na matomboya thĩinĩ wa Iria rĩa Cumbĩ kĩoneki-inĩ kĩa Ezekieli, nĩ kũrĩ andũ matigaga gwĩtĩkĩra na kũhũthĩra ma icio. c Tũroaga kũhaana tao.—Thoma Gũcokerithia Maathani 10:16-18.

13. Nĩ maũndũ marĩkũ tũngĩĩruta ũmũthĩ kuumana na mĩtĩ ĩyo yarĩ kĩoneki-inĩ?

¹³ Mĩtĩ ya irio na ya kũhonania. Hihi mĩtĩ ĩrĩa yarĩ hũgũrũrũ-inĩ cia rũũĩ thĩinĩ wa kĩoneki nĩ ĩtũrutaga maũndũ ma gũtwĩkĩra ngoro ũmũthĩ? Hatarĩ nganja nĩ ĩtũrutaga! Ririkana atĩ mĩtĩ ĩyo nĩ yarutaga maciaro ngũrani ma matunda marĩ cama o mweri, na mathangũ mayo nĩ maahũthĩkaga harĩ kũhonania. (Ezek. 47:12) Kwoguo nĩ ĩtũririkanagia atĩ tũtungatagĩra Ngai ũtũheaga irio cia kĩĩroho arĩ na ũtaana na agatũhonia na njĩra ĩrĩa ya bata makĩria, ya kĩĩroho. Thĩinĩ wa thĩ ũmũthĩ, andũ nĩ arwaru na ahũtu na njĩra ya kĩĩroho. Ngũrani nao, ta wĩcirie ũhoro wa maũndũ marĩa Jehova atũheaga. Hihi ũrĩ warĩkia gũthoma gĩcunjĩ kĩa ngathĩti ĩmwe itũ, ũkĩina rwĩmbo rwa kũrĩkĩrĩria kĩgomano, kana ũkĩrĩkia kwĩrorera video kana programu ya broadcast na ũkĩigua ũrathimĩtwo nĩ ũndũ wa  gũkorũo na irio ta icio cia kĩĩroho? Hatarĩ nganja nĩ tũheagwo irio njega cia kĩĩroho. (Isa. 65:13, 14) Hihi irio citũ cia kĩĩroho nĩ itũmaga tũkorũo na ũgima mwega wa kĩĩroho? Ũtaaro mwega ũrĩa tũheagwo uumĩte Kiugo-inĩ kĩa Ngai nĩ ũtũteithagia gwĩthema mehia ta ngomanio itagĩrĩire, ũkoroku, na kwaga wĩtĩkio. Ningĩ Jehova nĩ aigĩte mũbango wa gũteithia Akristiano gũtooria mũrimũ wa kĩĩroho ũrĩa ũrehagwo nĩ mehia maritũ. (Thoma Jakubu 5:14.) Ti itherũ nĩ tũkoragwo tũrathimĩtwo, o ta ũrĩa mĩtĩ ĩrĩa yarĩ kĩoneki-inĩ kĩa Ezekieli yonanĩtie.

14, 15. (a) Nĩ ũndũ ũrĩkũ twagĩrĩirũo kwĩruta kuumana na kũndũ kwarĩ na matomboya kũrĩa gũtaahonirio kĩoneki-inĩ kĩa Ezekieli? (b) Rũũĩ rũrĩa rwarĩ kĩoneki-inĩ kĩa Ezekieli rũtũgunaga atĩa ũmũthĩ?

¹⁴ Ningĩ nĩ harĩ ũndũ tũngĩĩruta kuumana na kũndũ kũu kwarĩ na matomboya kũrĩa gũtaahonirio. Tũtingĩenda kwaga kũreka irathimo cia Jehova itũkinyĩre ũtũũro-inĩ witũ. No ũkorũo ũrĩ ũndũ wa kĩeha mũno gũikara tũtahonetio, ta andũ aingĩ thĩinĩ wa thĩ ĩno ndwaru. (Mat. 13:15) Handũ ha ũguo, tũngĩenda kũgunĩka kuumana na rũũĩ rũu rwa irathimo. Rĩrĩa twanyua maĩ matheru ma kĩĩroho kuuma Kiugo-inĩ kĩa Ngai, rĩrĩa twera arĩa angĩ ũhoro wa ma cia Bibilia kũgerera wĩra wa kũhunjia, rĩrĩa twamũkĩra ũtongoria, tuomĩrĩrio, kana twaheo ũteithio nĩ athuri a kĩũngano arĩa mamenyeretio nĩ ngombo ĩrĩa njĩhokeku, no twĩcirie ũhoro wa rũũĩ rũrĩa Ezekieli oonire kĩoneki-inĩ. Rũũĩ rũu rũheanaga muoyo na rũkahonania kũrĩa guothe rũratherera!

¹⁵ Ĩ nakuo kũhinga kwa mahinda mokĩte kwa rũũĩ rũu rwarĩ kĩoneki-inĩ? O ta ũrĩa tũkuona, rũũĩ rũu rũgaatherera na njĩra nene makĩria thĩinĩ wa Paradiso ĩrĩa ĩroka.

16, 17. (a) Nĩ na njĩra ĩrĩkũ maĩ ma muoyo magaakorũo marĩ maingĩ o na makĩria thĩinĩ wa Paradiso? (b) Tũkaagunĩka atĩa kuumana na rũũĩ rũu rwa irathimo thĩinĩ wa Paradiso?

¹⁶ Hihi nĩ ũhũũraga mbica ũrĩ thĩinĩ wa Paradiso, ũrĩ hamwe na arata na andũ a famĩlĩ, mũgĩkenera ũtũũro biũ? Gũthuthuria ũhoro wa rũũĩ rũrĩa Ezekieli oonire kĩoneki-inĩ no gũgũteithie kuona mbica ĩyo wega makĩria. Na njĩra ĩrĩkũ? Ta wĩcirie o rĩngĩ ũhoro wa maũndũ matatũ meyumĩrĩtie wega thĩinĩ wa kĩoneki kĩu.

¹⁷ Rũũĩ rwa irathimo. Rũũĩ rũu rwa mũhaano rũgaakorũo rũrĩ rũnene makĩria thĩinĩ wa Paradiso, tondũ irathimo ciaruo itigaakorũo irĩ cia kĩĩroho tu, no nĩ nginya cia kĩĩmwĩrĩ. Hĩndĩ ya Wathani wa Mĩaka Ngiri wa Jesu, Ũthamaki wa Ngai nĩ ũgaateithia andũ ehokeku kũgunĩka kuumana na igongona rĩa ũkũũri na njĩra nene makĩria. Nĩ magaateithio gũtuĩka akinyanĩru o kahora! Gũtigaacoka gũkorũo na mĩrimũ, ndagĩtarĩ, andũ a gũtumberia arwaru, thibitarĩ, kana marĩhi ma kũrũgamĩrĩra ũrigitani! Maĩ macio ma muoyo nĩ magaakinyĩra andũ milioni nyingĩ arĩa makaahonoka Hari–Magedoni, “kĩrĩndĩ kĩnene” kĩrĩa gĩkoima “thĩna-inĩ ũrĩa mũnene.” (Kũg. 7:9, 14) Ĩndĩ o na gũtuĩka gũtherera kwa rũũĩ rũu rwa irathimo kĩambĩrĩria-inĩ gũgaakorũo kũrĩ ũndũ wa gũcanjamũra, gũkaahaana o ta karũũĩ kanini karatherera kũringithanĩtio na maũndũ marĩa  magooka thutha-inĩ. O ta ũrĩa kĩoneki kĩa Ezekieli kĩonanĩtie, rũũĩ rũu nĩ rũkaarama nĩguo rũhingie mabataro maingĩ makĩria.

18. Nĩ na njĩra ĩrĩkũ “rũũĩ rwa maĩ ma muoyo” rũgaatuĩka rũũĩ rũnene hĩndĩ ya Mĩaka Ngiri?

¹⁸ Maĩ ma kũrehe muoyo. Hĩndĩ ya Mĩaka Ngiri, “rũũĩ rwa maĩ ma muoyo” rũgaatuĩka rũũĩ rũnene. (Kũg. 22:1) Andũ bilioni nyingĩ matangĩtarĩka nĩ makaariũkio kuuma kũrĩ arĩa akuũ na maheo mweke wa gũtũũra tene na tene thĩinĩ wa Paradiso! Irathimo cia Jehova kũgerera Ũthamaki wake igaakorũo irĩ nginya gũcokia andũ aingĩ muoyo, arĩa makomete rũkũngũ-inĩ rwa thĩ kwa ihinda iraihu magithĩtio hinya nĩ gĩkuũ. (Isa. 26:19) No hihi andũ acio makaariũkio nĩ magaatũũra muoyo tene na tene?

19. (a) Nĩ ũndũ ũrĩkũ wonanagia atĩ nĩ gũgaakorũo na maĩ mangĩ ma kĩĩroho kuuma kũrĩ Ngai thĩinĩ wa Paradiso? (b) Nĩ na njĩra ĩrĩkũ andũ amwe ‘magaatigwo marĩ o na cumbĩ’ mahinda mokĩte?

¹⁹ No mũhaka o mũndũ ethuurĩre. Hĩndĩ ĩyo, nĩ gũkaahingũrũo ikũnjo njerũ. Kwoguo maĩ ma gũcanjamũra marĩa makooima kũrĩ Jehova nĩ nginya ma njerũ iria ikaaguũrio, morutani merũ ma kĩĩroho. Githĩ ti ũndũ wa gwĩkĩra ngoro gwĩciria ũndũ ũcio twĩrĩgĩrĩire? O na kũrĩ ũguo, andũ amwe nĩ makaarega kĩrathimo kĩu, na handũ ha ũguo mathuure kwaga gwathĩkĩra Jehova. No kũhoteke andũ amwe nĩ magaatuĩka aremi hĩndĩ ĩyo ya Mĩaka Ngiri, no matigeetĩkĩrio gũthũkia thayũ thĩinĩ wa Paradiso. (Isa. 65:20) Ũndũ ũcio wahota gũgaatũririkania kĩoneki kĩa Ezekieli na twĩcirie ũhoro wa kũndũ kũu kwarĩ na matomboya kũrĩa gwaikarire gũtarĩ na maciaro, ‘gũgĩtigwo kũrĩ o na cumbĩ.’ Ũgaakorũo ũrĩ ũndũ wa ũrimũ  mũno kũrega kũnyua maĩ macio ma muoyo! Thutha wa ihinda rĩu rĩa Mĩaka Ngiri, andũ amwe aremi nĩ makaanyitanĩra na Shaitani. Arĩa othe makaaregana na wathani wa Jehova wa ũthingu magaakorũo na mũthia ũmwe: gĩkuũ gĩa tene na tene.—Kũg. 20:7-12.

20. Nĩ mũbango ũrĩkũ wa gũtũguna hĩndĩ ya Mĩaka Ngiri ũtũririkanagia ũhoro wa mĩtĩ ĩrĩa Ezekieli oonire?

²⁰ Mĩtĩ ya irio na ya kũhonania. Jehova ndendaga mũndũ o na ũmwe witũ akaaga kuona muoyo wa tene na tene. Nĩguo atũteithie kwĩgwatĩra mweke ũcio wa magegania araheana, o rĩngĩ nĩ agaatigĩrĩra atĩ nĩ gũgaakorũo na mũbango ũngĩringithanio na mĩtĩ ĩyo Ezekieli oonire. No thĩinĩ wa Paradiso, irathimo iria ikoima kũrĩ Jehova igaakorũo irĩ cia kĩĩmwĩrĩ o na cia kĩĩroho. Kũrĩa igũrũ, Jesu Kristo hamwe na arĩa 144,000 magaathana nake magaakorũo marĩ athamaki ihinda-inĩ rĩu rĩa Mĩaka Ngiri. Acio 144,000 nĩ magaatungata marĩ athĩnjĩri-Ngai, na nĩ magaatũma andũ arĩa ehokeku magunĩke kuumana na igongona rĩa ũkũũri rĩa Kristo, mamateithie gũtuĩka akinyanĩru. (Kũg. 20:6) Mũbango ũcio wa kũhonania kĩĩmwĩrĩ na kĩĩroho ũtũririkanagia ũhoro wa mĩtĩ ĩrĩa Ezekieli oonire hũgũrũrũ-inĩ cia rũũĩ, mĩtĩ ĩrĩa yarutaga matunda mega ma kũrĩo, na yarĩ na mathangũ ma kũhonania. Kĩoneki kĩa Ezekieli nĩ kĩringaine na ũrathi ũngĩ wa gwĩkĩra ngoro, ũrĩa waandĩkirũo nĩ mũtũmwo Johana. (Thoma Kũguũrĩrio 22:1, 2.) Mathangũ ma mĩtĩ ĩrĩa Johana oonire maarĩ “ma kũhonia ndũrĩrĩ.” Andũ milioni nyingĩ ehokeku nĩ makaagunĩka kuumana na ũtungata wa arĩa 144,000 marĩ athĩnjĩri-Ngai.

21. Gwĩcũrania ũhoro wĩgiĩ rũũĩ rũrĩa Ezekieli oonire kĩoneki-inĩ gũkũhutagia atĩa, na nĩ ũndũ ũrĩkũ rĩu tũkwarĩrĩria? (Rora gathandũkũ, “Karũũĩ Kanini Gũtuĩka Rũũĩ Rũrĩ na Maĩ Maingĩ!”)

²¹ Wecũrania igũrũ rĩgiĩ rũũĩ rũrĩa Ezekieli oonire thĩinĩ wa kĩoneki-rĩ, githĩ ndũraigua ngoro yaku ĩiyũirũo nĩ thayũ na kĩĩrĩgĩrĩro? Nĩ twĩrĩgĩrĩire mahinda mega mũno mbere itũ! Na ta wĩcirie ũndũ ũyũ—mĩaka ngiri nyingĩ mĩhĩtũku, Jehova aahũthĩrire morathi gũtũteithia kũhũũra mbica mahinda macio, agatũnyita ũgeni arĩ na wetereri nĩguo tũgaakorũo kuo twĩyonere maũndũ marĩa magwetetwo morathi-inĩ macio makĩhinga na njĩra nene. Hihi wee nĩ ũgaakorũo kuo? Wahota kwĩyũria kana nĩ gũkaahoteka ũtũũre thĩinĩ wa Paradiso. Reke rĩu twarĩrĩrie ũrĩa icunjĩ cia kũrĩkĩrĩria cia ũrathi wa Ezekieli itũheaga ũũma.