GĨCUNJĨ KĨA 22
“Thathaiya Ngai”
ŨNDŨ ŨRĨA WARĨRĨIRIO: Gũcokera maũndũ marĩa manene ma ibuku rĩa Ezekieli na ũrĩa mahingaga ũmũthĩ na ũrĩa makaahinga mahinda mokĩte
1, 2. (a) Nĩ ũndũ ũrĩkũ ithuothe tũrabatara gũthuura? (b) Mũraika ũmwe mwĩhokeku ooigire atĩa rĩrĩa Johana eendaga kũmũthathaiya?
NO MŨHAKA o ũmwe witũ acokie kĩũria gĩkĩ kĩa bata: Nũũ ngũthathaiya? Andũ aingĩ no moige atĩ kĩũria kĩu nĩ kĩritũ na atĩ mũndũ no arigwo ũrĩa egũcokia. No ũrĩa kũrĩ nĩ atĩ, macokio nĩ mahũthũ na ma ĩmwe kwa ĩmwe. No tũthuurire gũthathaiya Jehova Ngai kana tũthuure gũthathaiya Shaitani ũrĩa Mũcukani.
2 Shaitani nĩ eriragĩria gũthathaiyo. Ũndũ ũcio nĩ woonekire wega makĩria rĩrĩa aageragia Jesu. O ta ũrĩa Gĩcunjĩ kĩa 1 kĩa ibuku rĩrĩ kĩonanĩtie, Shaitani eerire Jesu atĩ nĩ ekũmũhe kĩndũ kĩa goro—wathani igũrũ rĩa mothamaki mothe ma thĩ. Nĩ ũndũ ũrĩkũ Mũcukani eendaga Jesu eke nĩguo amũhe mothamaki macio? Aamwĩrire ũũ: “Wĩke gĩĩko gĩa gũũthathaiya.” (Mat. 4:9) Ngũrani na Shaitani, mũraika ũrĩa waheire mũtũmwo Johana ũguũrio nĩ aaregire gũthathaiyo. (Thoma Kũguũrĩrio 22:8, 9.) Rĩrĩa Johana eendaga gũthathaiya mũraika ũcio, mũrũ ũcio wa Ngai wa roho warĩ mwĩnyihia aamwĩrire ũũ: “Ndũgeke ũguo!” Handũ ha kuuga athathaiyo, mũraika ũcio ooigire ũũ, “Thathaiya Ngai.”
3. (a) Muoroto wa ibuku rĩrĩ ũkoretwo ũrĩ ũrĩkũ? (b) Tũkwarĩrĩria maũndũ marĩkũ rĩu?
3 Muoroto wa ibuku rĩrĩ ũkoretwo ũrĩ gwĩkĩra hinya itua ritũ rĩa gwĩka o ta ũrĩa mũraika ũcio aathanire—gũthathaiya Jehova Ngai na ngoro yothe. (Gũcok. 10:20; Mat. 4:10) Reke tũcokere na njĩra nguhĩ maũndũ marĩa twĩrutĩte megiĩ ũthathaiya mũtheru kuumana na morathi na cioneki cia Ezekieli. Thutha ũcio, tũkĩhũthĩra Maandĩko, nĩ tũgũcũthĩrĩria ihinda rĩũkĩte rĩrĩa o mũndũ thĩinĩ wa thĩ akaangʼethanĩra na igerio rĩa mũico, rĩrĩa rĩkoonania nĩa magaatũũra mone ũthathaiya mũtheru wa Jehova ũcoketio na njĩra nginyanĩru tene na tene.
Maũndũ Matatũ Marĩa Matĩtĩrithĩtio Ibuku-inĩ rĩa Ezekieli
4. Nĩ maũndũ marĩkũ matatũ matĩtĩrithĩtio ibuku-inĩ rĩa Ezekieli?
4 Ibuku rĩa Ezekieli rĩtũrutaga atĩ ũthathaiya mũtheru ndũhutĩtie gwĩka maũndũ ta arĩ o mũtugo. Ũbataraga (1) tũhe Jehova wĩrutĩri wa ngoro yothe, (2) tũtũũre tũrĩ na ũrũmwe thĩinĩ wa ũthathaiya mũtheru, na (3) tuonagie andũ arĩa angĩ wendo. Reke tuone ũrĩa maũndũ macio matatũ matĩtĩrithĩtio nĩ morathi na cioneki iria ciarĩrĩirio ibuku-inĩ rĩrĩ.
Ũndũ wa mbere: Kũhe Jehova wĩrutĩri wa ngoro yothe
5-9. Nĩ maũndũ marĩkũ twĩrutĩte megiĩ kũhe Jehova wĩrutĩri wa ngoro yothe?
5 Gĩcunjĩ gĩa 3: a Kĩoneki gĩa kũgegania kĩa Jehova athiũrũrũkĩirio nĩ mũkũnga-mbura na arĩ igũrũ rĩa ciũmbe irĩ hinya cia kĩĩroho gĩtũrutaga ma ya bata, atĩ no Mwene-Hinya-Wothe wiki wagĩrĩire ũthathaiya witũ.—Ezek. 1:4, 15-28.
6 Gĩcunjĩ gĩa 5: Warĩ ũndũ wa kũmakania kuona kĩoneki kĩa hekarũ ya Jehova ĩgĩthahio! Kĩoneki kĩu kĩonanagia atĩ gũtirĩ ũndũ ũkoragwo ũrĩ mũhithe maitho-inĩ ma Jehova. Nĩ onaga ciĩko itarĩ cia wĩhokeku, ta rĩrĩa andũ ake mambĩrĩria gũthathaiya mĩhianano, nginya rĩrĩa ciĩko icio irekĩrũo hitho-inĩ ũndũ itaronwo nĩ andũ. Ciĩko ta icio nĩ imũtuurithagia na nĩ aherithagia arĩa maciĩkaga.—Ezek. 8:1-18.
7 Gĩcunjĩ kĩa 7: Matuĩro marĩa maatuĩrĩirũo ndũrĩrĩ iria ciathiũrũrũkĩirie Isiraeli, iria ciarĩ na ‘kĩnyũrũri kĩnene’ kũmerekera, monanagia atĩ Jehova nĩ aciirithagia arĩa manyamaragia andũ ake. (Ezek. 25:6) No ningĩ nĩ twĩrutaga ũndũ ũngĩ kuumana na ũrĩa Isiraeli maahiũranagia na ndũrĩrĩ icio—no mũhaka tũige wĩhokeku witũ harĩ Jehova mbere ya kĩndũ kĩngĩ o gĩothe. Tũtiagĩrĩirũo kũregeria ithimi citũ nĩguo tũiguane na andũ aitũ a famĩlĩ arĩa matathathayagia Jehova; o na tũtiagĩrĩirũo kũiga mwĩhoko witũ harĩ ũtonga kana kwĩingĩria maũndũ-inĩ ma ũteti na njĩra ya kũhe thirikari cia andũ wĩhokeku ũrĩa wagĩrĩirũo kũheo Jehova wiki.
8 Gĩcunjĩ gĩa 13 na 14: Kĩoneki kĩa hekarũ ĩrĩ kĩrĩma-inĩ kĩraihu mũno gĩtũrutaga atĩ no mũhaka tũtũũre kũringana na ithimi ndũũgĩru cia Jehova, nĩ ũndũ wa kũmenya atĩ nĩ mũnene gũkĩra ngai iria ingĩ ciothe.—Ezek. 40:1–48:35.
9 Gĩcunjĩ gĩa 15: Ũrathi ũrĩa ũtaarĩirie Isiraeli na Juda itariĩ ta ahũũri maraya ũtũririkanagia ũrĩa ũtharia wa kĩĩroho ũrĩ ũndũ ũrĩ magigi harĩ Jehova.—Ezek., mũrango wa 16, 23.
Ũndũ wa kerĩ: Gũtũũra tũrĩ na ũrũmwe thĩinĩ wa ũthathaiya mũtheru
10-14. Ũhoro wĩgiĩ gũtũũra tũrĩ na ũrũmwe ũthathaiya-inĩ mũtheru ũtĩtĩrithĩtio atĩa?
10 Gĩcunjĩ gĩa 8: Morathi marĩa meranĩire atĩ Jehova nĩ angĩkaarahũra “mũrĩithi ũmwe” nĩguo arũmbũyagie andũ Ake matĩtĩrithagia atĩ nĩ twagĩrĩirũo kũrutithanagia wĩra tũrĩ na ũrũmwe na thayũ tũrĩ rungu rwa ũtongoria wa Jesu.—Ezek. 34:23, 24; 37:24-28.
11 Gĩcunjĩ gĩa 9: Morathi ma Ezekieli megiĩ andũ a Ngai gũkũũrũo kuuma ũkombo-inĩ wa Babuloni na gũcokio bũrũri-inĩ wao makoragwo na ndũmĩrĩri harĩ andũ arĩa othe mendaga gũkenia Jehova ũmũthĩ. Athathaiya a ma a Jehova no mũhaka matigane na maũndũ matarĩ matheru ma ndini cia maheeni na matũũre matekwĩingĩrania namo. O na gũtuĩka tuumĩte thĩinĩ wa ndini na mĩrerere ĩtiganĩte, no mũhaka tũtũũrie ũrũmwe ũrĩa ũtũmenyithanagia atĩ tũrĩ andũ a Ngai.—Ezek. 11:17, 18; 12:24; Joh. 17:20-23.
12 Gĩcunjĩ gĩa 10: Ũhoro wĩgiĩ ũrũmwe nĩ watĩtĩrithirio nĩ kĩoneki kĩgiĩ mahĩndĩ momũ marĩa maacokire muoyo. Nĩ gĩtĩo kĩnene gũkorũo gatagatĩ-inĩ ka athathaiya arĩa macoketio na magatherio, arĩa marutithanagia wĩra hamwe matariĩ ta mbũtũ!—Ezek. 37:1-14.
13 Gĩcunjĩ gĩa 12: Ũhoro wĩgiĩ ũrũmwe nĩ watĩtĩrithirio mũno nĩ ũrathi wĩgiĩ tũmĩtĩ twĩrĩ tũrĩa twatuĩkire kamwe. Nĩ ũndũ wĩkĩraga wĩtĩkio witũ hinya mũno kuona arĩa aitĩrĩrie maguta na arĩa a ngʼondu ingĩ makĩhingia ũrathi ũcio! O na gũtuĩka tũratũũra thĩinĩ wa thĩ ĩgayũkanĩtio nĩ rũmena rwa ndini na ũteti, tũikaraga tũrĩ na ũrũmwe nĩ ũndũ wa gũkorũo na wendo na wĩhokeku.—Ezek. 37:15-23.
14 Gĩcunjĩ gĩa 16: Kĩoneki kĩa mũndũ ũrĩa warĩ na rũhĩa rwa mwandĩki rwa gwĩkĩra rangi na andũ arĩa maarĩ na matharaita ma kwananga gĩkoragwo na mũkaana mũrũmu—andũ arĩa makaaingĩra ihinda rĩa “thĩna mũnene” marĩ athathaiya a ma no o tu mageekĩrũo rũũri nĩguo mahonokio.—Mat. 24:21; Ezek. 9:1-11.
Ũndũ wa gatatũ: Kuonagia andũ arĩa angĩ wendo
15-18. Tũrabatara gũthiĩ na mbere kuonania wendo nĩkĩ, na tũngĩka ũguo atĩa?
15 Gĩcunjĩ gĩa 4: Kĩoneki kĩgiĩ ciũmbe iria inya irĩ muoyo nĩ gĩatũrutire ũhoro wĩgiĩ ngumo cia Jehova, ĩrĩa nene ĩrĩ wendo. Rĩrĩa twaria na tweka maũndũ na njĩra ya wendo, tuonanagia atĩ Jehova nĩwe Ngai witũ.—Ezek. 1:5-14; 1 Joh. 4:8.
16 Gĩcunjĩ gĩa 6 na 11: Wendo wa Ngai watũmire aamũre arangĩri, ta Ezekieli. Tondũ Ngai nĩ wendo, ndendaga mũndũ o na ũmwe akaaniinwo rĩrĩa akeeheria wathani wa Shaitani igũrũ rĩa thĩ. (2 Pet. 3:9) Tũrĩ na mweke wa kuonania wendo ta wa Ngai na njĩra ya kũhingia itemi ritũ harĩ gũteithĩrĩria mũrangĩri wa mahinda maya.—Ezek. 33:1-9.
17 Gĩcunjĩ gĩa 17 na 18: Jehova nĩ oĩ atĩ andũ aingĩ nĩ makaarega tha ciake na magerie kũniina athathaiya ake ehokeku. Wendo nĩ ũgaatũma Jehova arũĩrĩre andũ ake rĩrĩa “Gogu wa bũrũri wa Magogu” akaambĩrĩria gũtharĩkĩra andũ arĩa ehokeku harĩ We. Wendo witũ kwerekera andũ arĩa angĩ nĩ ũtũtindĩkaga kũheana mũkaana kũrĩ andũ aingĩ o ũrĩa kwahoteka atĩ Jehova nĩ akaaniina arĩa othe mahinyagĩrĩria andũ ake.—Ezek. 38:1–39:20; 2 Thes. 1:6, 7.
18 Gĩcunjĩ gĩa 19, 20, na 21: Wendo wa Jehova harĩ andũ nĩ wonekaga wega thĩinĩ wa kĩoneki kĩgiĩ rũũĩ rwa maĩ ma kũrehe muoyo na kĩrĩa kĩgiĩ kũgaywo kwa bũrũri. Cioneki icio cionanagia moimĩrĩro ma ũndũ ũrĩa mũnene mũno Jehova oonanirie wendo naguo, akĩruta muoyo wa Mũrũ wake nĩguo tuoherũo mehia na tũkorũo na ũtũũro mũkinyanĩru tũrĩ thĩinĩ wa famĩlĩ ya Ngai. Njĩra ĩmwe njega makĩria ya kuonania wendo witũ harĩ andũ nĩ kũmeera ũhoro wĩgiĩ ihinda rĩega rĩũkĩte rĩrĩa Jehova ahaarĩirie nĩ ũndũ wa andũ arĩa monanagia wĩtĩkio harĩ Mũrũ wake.—Ezek. 45:1-7; 47:1–48:35; Kũg. 21:1-4; 22:17.
Gĩĩko kĩa Wĩnyihia Mũnene Thutha wa Wathani wa Mĩaka Ngiri
19. Jesu ageeka atĩa hĩndĩ ya Wathani wa Mĩaka Ngiri? (Rora gathandũkũ, “Kũngʼethanĩra na Igerio rĩa Mũico.”)
19 Hĩndĩ ya Wathani wa Mĩaka Ngiri, Jesu nĩ akaariũkia andũ bilioni nyingĩ na eherie ruo rũrĩa rũrehagwo nĩ ‘thũ itũ, nĩyo gĩkuũ.’ (1 Kor. 15:26; Mar. 5:38-42; Atũm. 24:15) Ũtũũro wa andũ ũkoretwo ũhaana ta rũgano rwa kũũraga ngoro rũiyũire kĩeha na maũndũ moru. No o ũrĩa Jesu agaathiĩ akĩriũkagia rũciaro rũmwe thutha wa rũrĩa rũngĩ, agaakorũo agĩtharia rũgano rũu rũũru na akahe andũ arĩa makaariũkio mweke wa kwandĩka rũgano rũngĩ rwega. Mũthingi-inĩ wa igongona rĩa ũkũũri, nĩ akeeheria maũndũ mothe moru marĩa marehetwo nĩ mĩrimũ, mbaara, na ngʼaragu. Makĩria ma ũguo, nĩ agaatũteithia kweheria kĩhumo gĩa kĩeha kĩrĩa tũkoragwo nakĩo—mehia marĩa twagaire kuuma harĩ Adamu. (Rom. 5:18, 19) Jesu nĩ akooinanga biũ “mawĩra ma Mũcukani.” (1 Joh. 3:8) Nĩ ũndũ ũrĩkũ ũgeekĩka thutha ũcio?
Andũ arĩa makaariũkio nĩ magaakorũo na mweke wa kwandĩka rũgano rũngĩ rwega
20. Jesu hamwe na arĩa 144,000 makoonania wĩnyihia mũnene atĩa? Taarĩria. (Rora mbica kĩambĩrĩria-inĩ gĩa gĩcunjĩ gĩkĩ.)
20 Thoma 1 Akorintho 15:24-28. Rĩrĩa andũ othe magaatuĩka akinyanĩru, na thĩ ĩgarũrũo ĩtuĩke Paradiso o ta ũrĩa Jehova aatanyĩte kĩambĩrĩria-inĩ, Jesu na arĩa 144,000 magaathamaka hamwe nake nĩ makoonania wĩnyihia mũnene; nĩ magaacokeria Jehova Ũthamaki. Nĩ makaaneana wathani ũrĩa magaakorũo naguo kwa ihinda rĩa mĩaka ngiri, na makaaũneana na njĩra ya thayũ meyendeire. Maũndũ marĩa mothe Ũthamaki ũcio ũkaahingia magaatũũra tene na tene.
Igerio rĩa Mũico
21, 22. (a) Thĩ ĩgaakorũo ĩhaana atĩa mũthia-inĩ wa mĩaka ĩyo ngiri ĩmwe? (b) Nĩ kĩĩ gĩgaatũma Jehova arekererie Shaitani na ndaimono?
21 Jehova nĩ agaacoka eke ũndũ wa mwanya mũno, ũrĩa ũkoonania atĩ nĩ agaakorũo na ma atĩ raiya ake a gũkũ thĩ nĩ magaaikara marĩ ehokeku. Nĩ agaathana atĩ Shaitani na ndaimono ciake marekererio kuuma irima rĩrĩa rĩtarĩ gĩturi kũrĩa magaakorũo mahingĩirũo kwa ihinda rĩa mĩaka ngiri ĩmwe. (Thoma Kũguũrĩrio 20:1-3.) Thĩ ĩrĩa magaakora ĩgaakorũo ĩrĩ ngũrani mũno na ĩrĩa mooĩ. Mbere ya Hari–Magedoni, andũ aingĩ nĩ magaakorũo mahĩtithĩtio nĩ Shaitani, na ũrũmwe wa andũ ũgaakorũo ũthũkĩtio nĩ rũmena na mũthutũkanio. (Kũg. 12:9) No mũthia-inĩ wa mĩaka ĩyo ngiri, andũ othe magaakorũo magĩthathaiya Jehova marĩ famĩlĩ ĩrĩ na ũrũmwe na wendo. Thĩ ĩgaakorũo ĩrĩ Paradiso ĩrĩ na thayũ.
22 Nĩ kĩĩ gĩgaatũma Jehova arekererie eki-naĩ ta Shaitani na ndaimono thĩinĩ wa thĩ ĩyo theru ũguo? Tondũ andũ aingĩ arĩa magaakorũo muoyo mũthia-inĩ wa mĩaka ĩyo ngiri, wĩhokeku wao marĩ athathaiya a Jehova ndũgakorũo ũgeretio. Aingĩ ao maakuire matamenyete Jehova na magaacoka mariũkio thĩinĩ wa Paradiso. Jehova to muoyo akaamahe, no ningĩ nĩ akaamahe mabataro mao mothe ma kĩĩmwĩrĩ na ma kĩĩroho. Matigaakorũo macemanĩtie na ũgucania mũũru, magaakorũo macemanĩtie na ũgucania wa andũ ega tu. Magaakorũo mathiũrũrũkĩirio nĩ andũ mendete Jehova na mamũtungatagĩra. Shaitani no arehere andũ acio makaariũkio thitango o ta ĩrĩa aareheire Ayubu, atĩ matungatagĩra Ngai tondũ tu nĩ amagitagĩra na akamarathima. (Ayub. 1:9, 10) Kwoguo mbere ya Jehova kwandĩka marĩĩtwa maitũ ibuku-inĩ rĩa muoyo ũndũ matangĩthario, nĩ agaatũhe mweke wa kuonania atĩ hatarĩ nganja tũkoragwo tũrĩ ehokeku harĩ we arĩ Ithe witũ na Mwathani Ũrĩa Mũnene.—Kũg. 20:12, 15.
23. Nĩ ũndũ ũrĩkũ o mũndũ agaacemania naguo?
23 Gwa kahinda kanini, Shaitani nĩ akaaheo mweke wa kũheenereria andũ nĩguo matige gũtungatĩra Ngai. Hihi igerio rĩu rĩgaakorũo rĩhaana atĩa? Hatarĩ nganja, o mũndũ nĩ agaacemania na ũndũ ta ũrĩa Adamu na Hawa maacemanirie naguo—gũthuura gwĩtĩkĩra ithimi cia Jehova, kũnyita wathani wake mbaru, na kũmũthathaiya kana gũthuura kũremera Ngai na kũnyita Shaitani mbaru.
24. Andũ arĩa makaaremera Ngai metĩtwo Gogu na Magogu nĩkĩ?
24 Thoma Kũguũrĩrio 20:7-10. Andũ arĩa makaaremera Ngai mũthia-inĩ wa mĩaka ĩyo ngiri metĩtwo Gogu na Magogu. Magaakorũo na ngumo ihaana cia aremi arĩa Ezekieli aarathire atĩ nĩ magaatharĩkĩra andũ a Ngai hĩndĩ ya thĩna ũrĩa mũnene. Gĩkundi kĩu kĩa mbere, “Gogu wa bũrũri wa Magogu” kĩarĩ ndũrĩrĩ itiganĩte iria ciakararagia wathani wa Ngai. (Ezek. 38:2) O nao andũ arĩa makaaremera Ngai mũthia-inĩ wa Wathani wa Mĩaka Ngiri wa Kristo metĩtwo “ndũrĩrĩ.” Rĩĩtwa rĩu nĩ rĩa kũgegania. Nĩkĩ? Tondũ hĩndĩ ya Wathani wa Mĩaka Ngiri, ngayũkano ciothe cia ndũrĩrĩ igaakorũo iniinĩtwo; andũ othe magaakorũo marĩ raiya a thirikari ĩmwe, nĩyo Ũthamaki wa Ngai. Tũgaakorũo tũrĩ a rũrĩrĩ rũmwe rwa kĩĩroho. Na njĩra ya gwĩta aremi acio Gogu na Magogu na kuuga atĩ magaakorũo marĩ “ndũrĩrĩ,” ũrathi ũcio wonanagia atĩ Shaitani nĩ akaahota kũrehe ngayũkano gatagatĩ ka andũ amwe a Ngai. Gũtirĩ mũndũ ũgaatindĩkĩrĩrio kũnyita Shaitani mbaru. Mũndũ wothe mũkinyanĩru nĩwe ũgeetuĩra itua rĩake.
Andũ arĩa makaaremera Ngai metĩtwo Gogu na Magogu (Rora kĩbungo gĩa 24)
25, 26. Hihi nĩ andũ aigana makaanyitanĩra na Shaitani, na gũgaathiĩ atĩa harĩ o?
25 Hihi nĩ andũ aigana makaanyitanĩra na Shaitani? Mũigana wa andũ arĩa magaatuĩka aremi ũgaakorũo ũtariĩ “ta mũthanga wa iria.” Ciugo icio to mũhaka ikorũo ikĩonania atĩ mũigana wao ũgaakorũo ũrĩ mũnene mũno. Tũmenyaga ũguo atĩa? Ta wĩcirie ũhoro wĩgiĩ kĩĩranĩro kĩrĩa Iburahimu eerĩirũo. Jehova ooigire atĩ mbeũ ya Iburahimu ĩngĩgaakorũo ĩtariĩ “ta mũthanga ũrĩa ũkoragwo hũgũrũrũ-inĩ cia iria.” (Kĩam. 22:17, 18) Ĩndĩ arĩa maacokire gũtuĩka a mbeũ ĩyo nĩ andũ 144,001. (Gal. 3:16, 29) O na gũtuĩka andũ acio nĩ aingĩ, nĩ anini mũno maringithanĩtio na mũigana wothe wa andũ. Na njĩra o ta ĩyo, no kũhoteke andũ arĩa makaanyitanĩra na Shaitani magaakorũo marĩ aingĩ, no mũigana wao ndũgaakorũo ũrĩ mũnene mũno. Aremi acio matigaakorũo marĩ ũgwati mũnene harĩ ndungata njĩhokeku cia Jehova.
26 Andũ arĩa makaanyitanĩra ũremi-inĩ ũcio makaaniinwo o na ihenya. Marĩ hamwe na Shaitani na ndaimono, matigaacoka gũkorũo kuo rĩngĩ, na matigaakorũo na kĩĩrĩgĩrĩro gĩa gũkaanacoka muoyo rĩngĩ. Matua mao moru na moimĩrĩro ma matua macio nomo magaatũũra maririkanagwo tene na tene.—Kũg. 20:10.
27-29. Gũgaathiĩ atĩa harĩ arĩa makaahĩtũka igerio rĩa mũico?
27 No marĩĩtwa ma andũ arĩa makaahĩtũka igerio rĩa mũico nĩ makaandĩkwo thĩinĩ wa “ibuku rĩa muoyo” ũndũ matangĩthario. (Kũg. 20:15) Thutha ũcio, aarĩ na ariũ othe ehokeku a Jehova nĩ makaamũhe ũthathaiya ũrĩa ũmwagĩrĩire, marĩ famĩlĩ ĩmwe ĩrĩ na ũrũmwe.
28 Ta wĩcirie ũhoro wĩgiĩ ihinda rĩu. Nĩ ũgaakenera kũruta wĩra ũrĩ na uumithio na gũkorũo na arata ega. Gũtirĩ hĩndĩ wee kana andũ arĩa wendete mũkaanyamarĩka rĩngĩ. Nĩ ũgaakorũo na mũrũgamo mwega mbere ya Jehova ũtekũbatara igongona rĩa Jesu rĩa ũkũũri. O mũndũ nĩ agaakorũo na ũrata mwega na Ngai gũtarĩ ũndũ ũkũmũgirĩrĩria. Na ũndũ ũrĩa wa bata makĩria nĩ atĩ, andũ arĩa magaakorũo igũrũ na gũkũ thĩ makaanyitanĩra ũthathaiya-inĩ mũtheru na njĩra nginyanĩru. Hĩndĩ ĩyo ũthathaiya mũtheru nĩ ũgaakorũo ũcoketio biũ!
Rĩrĩa ũgaatuĩka mũkinyanĩru, ũgaakorũo na mũrũgamo mwega mbere ya Jehova ũtekũbatara igongona rĩa Jesu rĩa ũkũũri (Rora kĩbungo gĩa 28)
29 Hihi wee nĩ ũgaakorũo kuo wone mũthenya ũcio mũnene? No ũkorũo kuo angĩkorũo nĩ ũgũthiĩ na mbere kũrũmĩrĩra maũndũ matatũ manene marĩa twĩrutĩte ibuku-inĩ rĩa Ezekieli—kũhe Jehova wĩrutĩri wa ngoro yothe, gũtũũra tũrĩ na ũrũmwe thĩinĩ wa ũthathaiya mũtheru, na kuonagia andũ arĩa angĩ wendo. Nĩ harĩ ũndũ ũngĩ wa mũico na wa bata tũngĩĩruta kuumana na morathi ma Ezekieli. Nĩ ũndũ ũrĩkũ ũcio?
Ta wĩcirie gĩkeno kĩrĩa gĩgaakorũo kuo rĩrĩa ũũmbi wothe kũrĩa igũrũ na gũkũ thĩ ũkaanyitanĩra ũthathaiya-inĩ mũtheru ũrĩ na ũrũmwe (Rora kĩbungo gĩa 27-29)
“Nĩ Makaamenya Atĩ Niĩ nĩ Niĩ Jehova”
30, 31. Moimĩrĩro ma ciugo “nĩ makaamenya atĩ niĩ nĩ niĩ Jehova” magaakorũo marĩ marĩkũ (a) harĩ thũ cia Ngai? (b) harĩ andũ a Ngai?
30 Ciugo “nĩ makaamenya atĩ niĩ nĩ niĩ Jehova” nĩ icokeretwo maita maingĩ thĩinĩ wa ibuku rĩa Ezekieli. (Ezek. 6:10; 39:28) Harĩ thũ cia Ngai, moimĩrĩro ma ciugo icio magaakorũo marĩ mbaara na gĩkuũ. To kũmenya tu ikaamenya atĩ Jehova arĩ kuo, ĩndĩ nĩ ikeeruta na rĩacio ũrĩa rĩĩtwa rĩake inene riugĩte—“Nĩ Atũmaga Maũndũ Mekĩke.” “Jehova mũnene wa ita” nĩ akoonania atĩ we nĩ “njamba ya ita ĩrĩ hinya” na njĩra ya gũcitooria. (1 Sam. 17:45; Tham. 15:3) Magaataũkĩrũo nĩ ma ĩno ya bata ĩgiĩ Jehova macereirũo mũno: Gũtirĩ ũndũ ũngĩmũgiria kũhingia muoroto wake.
31 Harĩ andũ a Ngai, moimĩrĩro ma ciugo “nĩ makaamenya atĩ niĩ nĩ niĩ Jehova” magaakorũo marĩ thayũ na muoyo. Jehova nĩ agaatũma tũtuĩke kĩrĩa eendaga tũtuĩke kĩambĩrĩria-inĩ—aarĩ na ariũ monanagia ngumo ciake na njĩra nginyanĩru. (Kĩam. 1:26) Ihinda-inĩ rĩrĩ, Jehova nĩ atuĩkĩte Ithe witũ ũrĩ wendo na Mũrĩithi ũtũgitagĩra. Ica ikuhĩ nĩ egũtuĩka Mũthamaki wa gũtũhootanĩra. Mũthenya ũcio ũtanakinya, rekei twĩcũranagie ndũmĩrĩri ya Ezekieli. Rekei tuonanagie kũgerera ciugo na ciĩko citũ o mũthenya atĩ nĩ tũĩ Jehova na nĩ tũĩ ũrĩa rĩĩtwa rĩake riugĩte. Tweka ũguo, rĩrĩa huho cia kwananga cia thĩna ũrĩa mũnene ikaarekererio, tũtigaakorũo na guoya. Handũ ha ũguo, tũgaatiira mĩtwe itũ na igũrũ, tondũ nĩ tũkaamenya atĩ ũhonokio witũ nĩ ũkuhĩrĩirie. (Luk. 21:28) Ihinda-inĩ rĩrĩ, rekei tũteithie andũ kũndũ guothe kũmenya na kwenda Ngai ũrĩa wiki wagĩrĩire gũthathaiyo, Ũrĩa ũrĩ na rĩĩtwa inene gũkĩra mothe—Jehova.—Ezek. 28:26.
a Namba cia icunjĩ iria igwetetwo nĩ cia icunjĩ iria irĩ thĩinĩ wa ibuku rĩrĩ.
