1. Tũrabatara gwĩka atĩa nĩguo tũtigĩrĩre atĩ ũthathaiya witũ nĩ ũrakenia Jehova, na nĩkĩ?

JESU ooigire ũũ: “Athathaiya a ma magaathathayagia Awa na roho na ma, nĩ gũkorũo nĩ ta acio Awa acaragia mamũthathayagie.” (Johana 4:23; 6:44) No mũhaka o ũmwe witũ ‘athiĩ na mbere gũthuthuria nĩguo akũũrane maũndũ marĩa metĩkĩrĩkĩte nĩ Mwathani.’ (Aefeso 5:10) Ũndũ ũcio ndũkoragwo ũrĩ mũhũthũ hĩndĩ ciothe. Shaitani nĩ ageragia gũtũhĩtithia nĩguo twĩke maũndũ matakenagia Jehova.—Kũguũrĩrio 12:9.

2. Taarĩria ũrĩa gwekĩkire hakuhĩ na Kĩrĩma gĩa Sinai.

² Shaitani ageragia gũtũhĩtithia atĩa? Njĩra ĩmwe ahũthagĩra nĩ gũtũma twage kũmenya wega ũndũ ũrĩa wagĩrĩire na ũrĩa ũtagĩrĩire. Ta rora ũrĩa gwathiire harĩ rũrĩrĩ rwa Isiraeli rĩrĩa maambĩte hema hakuhĩ na Kĩrĩma gĩa Sinai. Musa aambatĩte kĩrĩma-inĩ, na andũ nĩ maamwetagĩrĩra acoke kambĩ-inĩ. Marigĩrĩrio-inĩ, makĩnoga nĩ gweterera na makĩra Haruni amathondekere ngai. Nake agĩthondeka mũhianano wa thahabu watariĩ ta njaũ. Thutha ũcio andũ makĩgĩa na gĩkũngũĩro. Magĩthiũrũrũka njaũ ĩyo makĩinaga, na makĩmĩinamĩrĩra. Meeciragia atĩ rĩrĩa marainamĩrĩra njaũ ĩyo, nĩ Jehova maathathayagia. O na  kũrĩ ũguo, gũkorũo atĩ andũ acio moonaga gĩkũngũĩro kĩu kĩrĩ “gĩathĩ kĩa Jehova,” ũndũ ũcio ndwatũmire gĩkorũo kĩrĩ kĩagĩrĩru. Jehova oonire ũndũ ũcio ũrĩ ũhoi mĩhianano, na aingĩ ao nĩ maaniinirũo. (Thama 32:1-6, 10, 28) Nĩ ũndũ ũrĩkũ tũreruta? Ndũgetĩkĩre kũheenererio. ‘Ndũkahutie kĩndũ gĩtarĩ gĩtheru,’ na ũreke Jehova akũrute ũndũ ũrĩa wagĩrĩire na ũrĩa ũtagĩrĩire.—Isaia 52:11; Ezekieli 44:23; Agalatia 5:9.

3, 4. Nĩkĩ nĩ wega gũthuthuria kĩhumo kĩa ikũngũĩro nyingĩ iria ciendetwo mũno?

³ Rĩrĩa Jesu aarĩ gũkũ thĩ, nĩ aarutire atũmwo ake ũrĩa mangĩiga kĩonereria kĩega ũhoro-inĩ wĩgiĩ ũthathaiya mũtheru. Thutha wake gũkua, atũmwo nĩ maathiire na mbere kũruta arutwo erũ motaaro ma Jehova. No thutha wa atũmwo gũkua, arutani a maheeni nĩ maambĩrĩirie kũrehe maũndũ mahĩtanu o hamwe na mĩtugo na ikũngũĩro cia athathaiya a ngai cia maheeni thĩinĩ wa kĩũngano. O na nĩ maaheire ikũngũĩro imwe cia athathaiya a ngai cia maheeni marĩĩtwa mangĩ nĩguo cioneke ta irĩ cia Gĩkristiano. (2 Athesalonike 2:7, 10; 2 Johana 6, 7) Ikũngũĩro nyingĩ harĩ icio no ciendetwo nginya ũmũthĩ, na no igaathagĩrĩria mawĩtĩkio ma maheeni, o na maũndũ ma ndaimono. *—Kũguũrĩrio 18:2-4, 23.

⁴ Kũndũ kũingĩ thĩinĩ wa thĩ ũmũthĩ, ikũngũĩro na thigũkũ nĩ gĩcunjĩ kĩa bata kĩa ũtũũro wa andũ. Ĩndĩ o ũrĩa ũgũthiĩ na mbere kwĩruta ũrĩa Jehova onaga maũndũ, wahota kuona bata wa kũgarũrĩra mwĩcirĩrie waku igũrũ rĩgiĩ ikũngũĩro imwe. Ũndũ ũcio wahota gũkorũo ũtarĩ  mũhũthũ, ĩndĩ no ũkorũo na ma atĩ Jehova nĩ egũgũteithia. Reke tũthuthurie kĩhumo kĩa ikũngũĩro imwe ciendetwo mũno nĩguo tũtaũkĩrũo nĩ ũrĩa Jehova acionaga.

5. Nĩ ũira ũrĩkũ ũronania atĩ Jesu ndaaciarirũo Dicemba 25?

⁵ Kũndũ kũingĩ thĩinĩ wa thĩ, Krismasi ĩkũngũyagĩrũo Dicemba 25, mũthenya ũrĩa andũ aingĩ meciragia atĩ nĩguo Jesu aaciarirũo. Bibilia ndĩtwĩraga mũthenya o na kana mweri ũrĩa Jesu aaciarirũo, no nĩ harĩ ũndũ ĩtwĩraga wĩgiĩ ihinda rĩu rĩa mwaka. Luka aandĩkire atĩ rĩrĩa Jesu aaciarirũo Bethilehemu, “arĩithi maaikaraga nja,” makĩrora ndũũru ciao. (Luka 2:8-11) Mweri-inĩ wa Dicemba, Bethilehemu gũkoragwo na heho, mbura, na mbarabu, kwoguo arĩithi matingĩakorirũo maikarĩte nja hamwe na ndũũru ciao ũtukũ. Tũreruta atĩa kuumana na ũndũ ũcio? Jesu aaciarirũo ihinda-inĩ rĩrĩa rĩera rĩarĩ rĩega, no ti Dicemba. Ũira wa Bibilia na wa historĩ wonanagia atĩ aaciarirũo ihinda-inĩ rĩa mĩeri ĩrĩa rĩu ĩtagwo Septemba na Oktomba.

6, 7. (a) Maũndũ maingĩ marĩa mekagwo hĩndĩ ya Krismasi maambĩrĩirie atĩa? (b) Gĩtũmi gitũ gĩa kũheana iheo kĩagĩrĩire gũkorũo kĩrĩ kĩrĩkũ?

⁶ Gũkĩrĩ ũguo-rĩ, Krismasi yaambĩrĩirie atĩa? Yoimanire na ikũngũĩro cia athathaiya a ngai cia maheeni, ta gĩkũngũĩro kĩa Aroma kĩrĩa gĩetagwo Saturnalia, kĩrĩa kĩaamũrĩirũo ngai ya ũrĩmi yetagwo Saturn. Ibuku rĩmwe riugaga ũũ: “Maũndũ maingĩ ma gwĩkenia marĩa mekagwo hĩndĩ ya Krismasi moimanĩte na gĩkũngũĩro kĩa Aroma gĩetagwo Saturnalia, kĩrĩa gĩakũngũyagĩrũo gatagatĩ-inĩ ka mweri wa Dicemba. Kwa ngerekano, maũndũ ta ndĩa nene, kũheana iheo, na gwakia mĩcumaa, mooimanire  na gĩkũngũĩro kĩu.” (The Encyclopedia Americana) Ningĩ, mũthenya wa gũciarũo wa ngai ya riũa ya Perisia yetagwo Mithra wakũngũyagĩrũo Dicemba 25.

⁷ O na kũrĩ ũguo, andũ aingĩ arĩa makũngũyagĩra Krismasi ũmũthĩ matiĩciragia ũhoro wa atĩ yoimanire na ũthathaiya wa ngai cia maheeni. Meciragia ũhoro wa Krismasi ĩrĩ o ihinda rĩega rĩa gũkorũo hamwe na andũ a famĩlĩ, gũkenera irio njega, na kũheana iheo. Hatarĩ nganja, nĩ twendete andũ aitũ a famĩlĩ na arata, na Jehova endaga ndungata ciake cionanagie ũtaana. O  ta ũrĩa 2 Akorintho 9:7 ĩtwĩraga, “Ngai endete mũndũ ũheanaga akenete.” Jehova ndendaga tuonanagie ũtaana o mahinda ma mwanya tu. Andũ a Jehova nĩ makenagĩra kũheana iheo na gũkorũo hamwe na arata na andũ a famĩlĩ ihinda o rĩothe rĩa mwaka, matekwĩrĩgĩrĩra kũheo atĩ tondũ nĩ maheana. Maheanaga tondũ nĩ mendete andũ arĩa angĩ.—Luka 14:12-14.

8. Hihi atuĩria a njata maaheire Jesu iheo arĩ gakenge? Taarĩria.

⁸ Andũ aingĩ makĩenda kũnyita mbaru ũhoro wa kũheana iheo hĩndĩ ya Krismasi, moigaga atĩ andũ atatũ ogĩ nĩ maareheire Jesu iheo arĩ gakenge mũharatĩ-inĩ. Nĩ ũhoro wa ma atĩ nĩ kũrĩ andũ maaceereire Jesu na makĩmũrehera iheo. Mahinda-inĩ ma Bibilia, andũ nĩ maaheanaga iheo kũrĩ andũ arĩa maarĩ igweta. (1 Athamaki 10:1, 2, 10, 13) No hihi ũrĩ wamenya atĩ Bibilia yugaga atĩ andũ acio maarĩ atuĩria a njata, andũ meekaga maũndũ ma ũragũri na matiathathayagia Jehova? Ningĩ matiaceereire Jesu rĩrĩa aarĩ gakenge mũharatĩ-inĩ. Maamũceereire thutha ũcio arĩ “mwana” mũnini, na aaikaraga nyũmba thĩinĩ hĩndĩ ĩyo.—Mathayo 2:1, 2, 11.

9. Nĩ ikũngũĩro irĩkũ cia mũthenya wa gũciarũo igwetetwo thĩinĩ wa Bibilia?

⁹ Mũthenya ũrĩa kaana gaciarũo nĩ ũkoragwo ũrĩ wa gĩkeno. (Thaburi 127:3) No ũguo ti kuuga atĩ nĩ twagĩrĩirũo gũkũngũĩra mũthenya wa gũciarũo. Ta wĩcirie ũndũ ũyũ: No ikũngũĩro igĩrĩ tu cia mũthenya wa gũciarũo igwetetwo thĩinĩ wa Bibilia. Gĩkũngũĩro kĩmwe kĩa mũthenya wa gũciarũo kĩarĩ kĩa Firauni wa Misiri na kĩu kĩngĩ kĩarĩ kĩa Mũthamaki Herode Antipa. (Thoma Kĩambĩrĩria  40:20-22; Mariko 6:21-29.) Atongoria acio erĩ matiarĩ ndungata cia Jehova. Ũhoro wa ma nĩ atĩ, gũtirĩ handũ tũthomaga thĩinĩ wa Bibilia atĩ nĩ kũrĩ mũthathaiya wa Jehova wakũngũĩire mũthenya wa gũciarũo.

10. Akristiano a tene moonaga ikũngũĩro cia mũthenya wa gũciarũo atĩa?

¹⁰ Ibuku rĩmwe riugaga atĩ Akristiano a tene “moonaga mũndũ gũkũngũĩra mũthenya wake wa gũciarũo arĩ mũtugo wa athathaiya a ngai cia maheeni.” (The World Book Encyclopedia) Mĩtugo ta ĩyo yoimanĩte na mawĩtĩkio ma maheeni. Kwa ngerekano, Angiriki a tene meetĩkĩtie atĩ o mũndũ nĩ aagitagĩrũo nĩ roho wakoragwo ho agĩciarũo. Na meeciragia atĩ roho ũcio nĩ wahutanĩtie na ngai yaciarĩtwo o mũthenya ũcio mũndũ ũcio aciarũo. Makĩria ma mawĩtĩkio macio ma athathaiya a ngai cia maheeni, ikũngũĩro cia mũthenya wa gũciarũo nĩ ihutanĩtie na ũtuĩria wa njata na ũragũri.

11. Jehova endaga tuonanie ũtaana rĩ?

¹¹ Andũ aingĩ monaga atĩ mũthenya wao wa gũciarũo nĩ mũthenya wa mwanya ũrĩa magĩrĩirũo kuonio wendo. Ĩndĩ no tuonanie wendo harĩ andũ aitũ a famĩlĩ na arata mahinda mothe thĩinĩ wa mwaka, handũ ha o mũthenya ũmwe wa mwanya. Jehova endaga tũkorũo tũrĩ atugi na tũrĩ ataana hingo ciothe. (Thoma Atũmwo 20:35.) Nĩ tũmũcokagĩria ngatho o mũthenya nĩ ũndũ wa kĩheo kĩa muoyo, no tũtiĩkaga ũguo o mũthenya ũrĩa twaciarirũo.—Thaburi 8:3, 4; 36:9.

12. Nĩ na njĩra ĩrĩkũ mũthenya witũ wa gũkua ũngĩkorũo ũrĩ mwega gũkĩra mũthenya witũ wa gũciarũo?

¹² Kohelethu 7:1 yugaga ũũ: “Nĩ kaba rĩĩtwa rĩega gũkĩra maguta marĩa mega, na nĩ kaba mũthenya wa gũkua gũkĩra mũthenya wa gũciarũo.” Nĩ na njĩra ĩrĩkũ  mũthenya witũ wa gũkua ũngĩkorũo ũrĩ mwega gũkĩra mũthenya witũ wa gũciarũo? Hĩndĩ ĩrĩa twaciarũo, gũtirĩ ũndũ mwega kana mũũru tũkoragwo twĩkĩte na ũtũũro witũ. No hĩndĩ ĩrĩa twahũthĩra ũtũũro witũ gũtungatĩra Jehova na gwĩkĩra andũ arĩa angĩ maũndũ mega, nĩ tũgĩaga na “rĩĩtwa rĩega,” kana ngumo njega, na Jehova nĩ agaatũririkana o na twakua. (Ayubu 14:14, 15) Andũ a Jehova matikũngũyagĩra mũthenya wao wa gũciarũo o na kana wa Jesu. Mũthenya ũrĩa tu Jesu aatwathire  tũkũngũyagĩre nĩ wa Kĩririkano gĩa gĩkuũ gĩake.—Luka 22:17-20; Ahibirania 1:3, 4.

13, 14. Akristiano a ma magaga gũkũngũĩra Ista nĩkĩ?

¹³ Ista nĩ thigũkũ ĩrĩa Akristiano a maheeni moigaga atĩ maririkanaga kũriũka gwa Kristo. No rĩrĩ, hihi Kristo nĩ ooigire andũ makũngũyagĩre kũriũka gwake? Aca. Mabuku ma historĩ matwĩraga atĩ Akristiano a tene matiakũngũyagĩra Ista na atĩ yumanĩte na mĩtugo ya ũthathayia wa ngai cia maheeni. Ibuku rĩmwe riugaga ũũ: “Gũtirĩ ũndũ o na ũmwe wonanagia atĩ harĩ handũ thĩinĩ wa kĩrĩkanĩro kĩrĩa kĩerũ Ista yakũngũĩirũo. . . . Ũtheru wa mahinda ma mwanya ndwoĩkaine nĩ Akristiano a mbere.” (The Encyclopædia Britannica) Hatarĩ nganja, Ista ndĩhutanĩtie na kũriũka kwa Jesu.

¹⁴ Hihi Jehova nĩ akenaga rĩrĩa ona andũ magĩtukania mĩtugo ya ndini cia maheeni na kũriũka kwa Mũrũ wake? Aca ndakenaga. (2 Akorintho 6:17, 18) Ũhoro wa ma nĩ atĩ, Jehova ndarĩ aatwĩra tũkũngũyagĩre kũriũka kwa Jesu.

15. Thigũkũ ya mwaka mwerũ yoimire kũ?

¹⁵ O bũrũri ũkũngũyagĩra thigũkũ ya mwaka mwerũ na njĩra ngũrani. No kũndũ kũingĩ nĩ gũkoragwo na ndĩa nene mũthenya wa Dicemba 31. Na kaingĩ ndĩa-inĩ icio gũkoragwo kũiyũire waganu na ũrĩĩu. Makĩria ma ũguo, gĩkũngũĩro kĩu kiumanĩte na ũthathaiya wa ngai cia maheeni. Ibuku rĩmwe riugaga ũũ: “Aroma maamũrire mũthenya ũcio ũtuĩke wa kũririkana ngai yao yetagwo Janu, ĩrĩa yarĩ ngai ya ihingo, mĩrango, na ciambĩrĩria. Mweri wa Janũarĩ wetanirio na ngai ya  Janu, ĩrĩa yarĩ na mothiũ merĩ, ũmwe ũrorete mbere na ũrĩa ũngĩ thutha.”—The World Book Encyclopedia.

16, 17. Nĩ ũndũ ũrĩkũ tũrabatara gwĩciria ũhoro waguo hĩndĩ ĩrĩa tũrabanga ũhiki?

¹⁶ Ũhiki ũkoragwo ũrĩ ihinda rĩa gĩkeno. Mohiki makũngũyagĩrũo na njĩra nyingĩ ngũrani kũndũ gũtiganĩte thĩinĩ wa thĩ. Kaingĩ andũ matiĩciragia kũrĩa maũndũ marĩa mekagwo hĩndĩ ya ũhiki mooimire, kwoguo no mage kũmenya atĩ maũndũ mamwe moimanĩte na mawĩtĩkio ma ũthathaiya wa ngai cia maheeni. No Akristiano mangĩkorũo makĩbanga ũhiki, magĩrĩirũo gũtigĩrĩra atĩ ũhiki wao nĩ ũgũkenia Jehova. Mangĩmenya kĩhumo kĩa maũndũ marĩa mekagwo hĩndĩ ya ũhiki, no mahote gũtua matua mega.—Mariko 10:6-9.

¹⁷ Andũ amwe metĩkĩtie atĩ maũndũ mamwe mekagwo hĩndĩ ya ũhiki nĩ marehagĩra acio marahikania ‘mũnyaka.’ (Isaia 65:11) Kwa ngerekano, kũndũ kũmwe andũ nĩ maikagĩria mũhiki na mũhikania mũcere kana indo ingĩ ta icio. Metĩkĩtie atĩ ũndũ ũcio nĩ ũgũtũma acio mahikania magĩe na ciana, gĩkeno, na ũtũũro mũraihu na atĩ nĩ ũkũmagitĩra kuumana na maũndũ moru. No Akristiano nĩ magĩrĩirũo gwĩthema ũndũ o wothe ũhutanĩtie na ndini ya maheeni.—Thoma 2 Akorintho 6:14-18.

18. Nĩ motaaro marĩkũ mangĩ ma Bibilia mangĩhũthĩka harĩ mohiki?

¹⁸ Akristiano marenda kũhikania mangĩenda ũhiki wao ũkorũo ũrĩ ihinda rĩa gĩkeno na rĩrĩ na gĩtĩo na andũ arĩa othe megũka ũhiki-inĩ wao makenere. Ageni arĩa megũthiĩ ũhiki wa Akristiano matiagĩrĩirũo kwaria maũndũ matarĩ ma ũtugi, ma waganu, kana ma kwagĩra mũhiki na mũhikania gĩtĩo o hamwe na andũ arĩa angĩ. (Thimo  26:18, 19; Luka 6:31; 10:27) Ũhiki wa Akristiano ndwagĩrĩire gũkorũo na “mwĩyonanio wa indo iria mũndũ arĩ nacio ũtũũro-inĩ.” (1 Johana 2:16) Angĩkorũo nĩ ũrabanga ũhiki, tigĩrĩra atĩ nĩ ũrĩkenaga waririkana ihinda rĩu.—Rora Kohoro ka 28 Mũico-inĩ wa Ibuku.

19, 20. Mũtugo wa kũringithania ngirathi woimire kũ?

¹⁹ Kaingĩ hĩndĩ ya mohiki na mambura mangĩ ma gũkenanĩra hamwe andũ nĩ maringithanagia ngirathi. Ihinda-inĩ rĩu, mũndũ ũmwe agwetaga ciugo cia kwendanĩra maũndũ mega nao acio angĩ makoya ngirathi ciao na igũrũ. Akristiano magĩrĩirũo kuona atĩa mũtugo ũcio wa kũringithania ngirathi?

²⁰ Ibuku rĩmwe riugaga atĩ no kũhoteke mũtugo wa kũringithania ngirathi woimanire na ũndũire wa ũthathaiya wa ngai cia maheeni “wa kũhe ngai kĩndũ kĩamũre gĩa kũnyua.” (International Handbook on Alcohol and Culture) Ũndũ ũcio wekagwo “nĩgetha mũndũ enderũo maũndũ mega, na ihoya rĩu rĩagwetagwo na ciugo nini ta ‘ũrogĩa na ũtũũro mũraihu!’ kana ‘ũrogĩa na ũgima mwega wa mwĩrĩ!’” Mahinda-inĩ ma tene, andũ mooyaga ikombe ciao na igũrũ nĩguo mahoe ngai ciao kĩrathimo. No ũguo tiguo Jehova aheanaga irathimo.—Johana 14:6; 16:23.

21. Nĩ mĩthemba ĩrĩkũ ĩngĩ ya ikũngũĩro Akristiano magĩrĩirũo gwĩthema?

²¹ Rĩrĩa ũratua itua kana nĩ ũkũnyitanĩra gĩkũngũĩro-inĩ kĩna kana ndũgwĩka ũguo, wĩcirie ũhoro wa  mĩerekera kana mĩtugo ĩrĩa gĩkũngũĩro kĩu kĩgaathagĩrĩria. Kwa ngerekano, ikũngũĩro imwe na mambura mamwe ma gwĩkenia makoragwo na nyĩmbo cia ũũra-thoni, kũnyua njohi hatarĩ gĩthimi, o na ngomanio itagĩrĩire. Ningĩ ikũngũĩro ta icio ciahota kũgaathĩrĩria mĩtugo ya arũme arĩa makomaga na arũme na atumia arĩa makomaga na atumia kana ũhoro wa gũtũũgĩria bũrũri. Tũngĩnyitanĩra harĩ ikũngũĩro cia mĩthemba ĩyo-rĩ, hihi no tũkorũo tũgĩthũũra ũndũ ũrĩa Jehova athũire?—Thaburi 1:1, 2; 97:10; 119:37.

22. Nĩ kĩĩ kĩngĩteithia Mũkristiano gũtua itua kana nĩ ekũnyitanĩra gĩkũngũĩro-inĩ kĩna?

²² Akristiano nĩ mabatiĩ kwĩmenyerera mũno matikeingĩrie ikũngũĩro-inĩ o ciothe itatĩithagia Ngai. Mũtũmwo Paulo aandĩkire ũũ: “Kana nĩ kũrĩa mũrarĩa, kana nĩ kũnyua, kana nĩ ũndũ ũngĩ o wothe mũreka-rĩ, ĩkagai maũndũ mothe nĩguo mũgoocithie Ngai.” (1 Akorintho 10:31; rora Kohoro ka 29 Mũico-inĩ wa Ibuku.) Nĩ ma, ti ikũngũĩro ciothe ihutanĩtie na ngomanio itagĩrĩire, ndini cia maheeni, kana gũtũũgĩria bũrũri. Angĩkorũo gĩkũngũĩro kĩna gĩtirĩ mũgarũ na motaaro ma Bibilia, tũbatiĩ gwĩtuĩra itua kana nĩ tũkwĩingĩrania nakĩo. Ningĩ nĩ wega gwĩciria ũrĩa itua ritũ rĩkũhutia andũ arĩa angĩ.

23, 24. Tũngĩtaarĩria atĩa andũ aitũ a famĩlĩ arĩa matarĩ Aira a Jehova itua ritũ rĩgiĩ ikũngũĩro imwe?

²³ No gũkorũo nĩ ũtigĩte kũnyitanĩra ikũngũĩro-inĩ iria itatĩithagia Jehova. No andũ amwe a famĩlĩ yanyu arĩa matarĩ Aira a Jehova mahota gwĩciria atĩ ndũmendete kana ndũrenda kũnyitanĩra nao rĩngĩ. No gũkorũo  monaga atĩ mahinda ma thigũkũ nomo famĩlĩ ĩgĩaga na mweke wa gũkorũo hamwe. Hihi ũngĩka atĩa? Nĩ harĩ njĩra nyingĩ ũngĩhũthĩra kũmonia atĩ no ũmendete na atĩ nĩ a bata harĩ wee. (Thimo 11:25; Kohelethu 3:12, 13) No ũmanyite ũgeni mũkorũo hamwe nao mahinda-inĩ mangĩ.

²⁴ Andũ anyu a famĩlĩ mangĩenda kũmenya kĩrĩa gĩtũmĩte wambĩrĩrie kuona thigũkũ imwe itarĩ njĩtĩkĩrĩku, no ũcarie ũhoro ũngĩgũteithia kũmataarĩria itũmi ciaku thĩinĩ wa mabuku maitũ o hamwe na website ya jw.org/ki. Ndũkareke mone ta ũrageria gũcindana nao kana kũmatindĩkĩrĩria magĩe na mwĩcirĩrie ta waku. Teithia andũ anyu a famĩlĩ kuona atĩ nĩ harĩ maũndũ maingĩ weciririe ũhoro wamo ũgĩcoka ũgĩĩtuĩra itua. Ikara ũhooreire, na ‘ũreke ciugo ciaku ikoragwo irĩ cia ũtugi hingo ciothe, ta ciĩkĩrĩtwo cumbĩ.’—Akolosai 4:6.

25, 26. Aciari mangĩteithia ciana ciao atĩa kwenda ithimi cia Jehova?

²⁵ Nĩ harĩ bata o ũmwe witũ ataũkĩrũo wega nĩ itũmi ciake cia kwaga kũnyitanĩra ikũngũĩro-inĩ imwe. (Ahibirania 5:14) Muoroto witũ nĩ gũkenia Jehova. Na angĩkorũo tũrĩ aciari, no mũhaka twĩrutanĩrie gũteithia ciana citũ gũtaũkĩrũo nĩ motaaro ma Bibilia na kũmenda. Cingĩmenya Jehova biũ, o nacio nĩ irĩendaga kũmũkenia.—Isaia 48:17, 18; 1 Petero 3:15.

²⁶ Jehova nĩ akenaga kuona tũkĩĩrutanĩria biũ kũmũhe ũthathaiya mũtheru tũrĩ ehokeku. (Johana 4:23) No andũ aingĩ meciragia atĩ mũndũ ndangĩkorũo arĩ mwĩhokeku biũ thĩinĩ wa thĩ ĩno ĩtarĩ na wĩhokeku. Hihi ũcio nĩ ũhoro wa ma? Reke twarĩrĩrie ũndũ ũcio gĩcunjĩ-inĩ kĩrĩa kĩrũmĩrĩire.