1-3. (a) Andũ aingĩ maiguaga atĩa igũrũ rĩgiĩ wĩra wao? (b) Nĩ ciũria irĩkũ tũkwarĩrĩria thĩinĩ wa gĩcunjĩ gĩkĩ?

KŨNDŨ guothe thĩinĩ wa thĩ andũ nĩ marutaga wĩra na kĩyo nĩguo mone mabataro mao na ma famĩlĩ ciao. Andũ aingĩ matiendete wĩra wao, na amwe o na nĩ metigagĩra gũthiĩ wĩra o mũthenya. Angĩkorũo ũguo nĩguo wee ũiguaga-rĩ, ũngĩka atĩa nĩguo ũkenagĩre wĩra waku makĩria? Nĩ atĩa ũngĩka nĩguo wende wĩra waku?

² Jehova atwĩraga ũũ: “Mũndũ wothe agĩrĩirũo kũrĩa na kũnyua na gũkenera wĩra wake wothe mũritũ. Kĩu nĩ kĩheo kuuma kũrĩ Ngai.” (Kohelethu 3:13) Jehova aatũũmbire ũndũ tũrĩbataraga na tũkerirĩria kũruta wĩra. Nĩ endaga tũkenagĩre ũndũ ũrĩa tũreka.—Thoma Kohelethu 2:24; 5:18.

³ Kwoguo-rĩ, nĩ kĩĩ kĩngĩtũteithia gũkenagĩra wĩra witũ? Nĩ mawĩra ta marĩkũ Akristiano magĩrĩirũo gwĩthema? Tũngĩhota atĩa gũkorũo na ũigananĩru harĩ wĩra witũ na ũthathaiya witũ harĩ Jehova? Na nĩ wĩra ũrĩkũ wa bata makĩria tũngĩruta?

4, 5. Jehova akoragwo na mawoni marĩkũ megiĩ wĩra?

⁴ Jehova we mwene nĩ endete kũruta wĩra. Rĩandĩko rĩa Kĩambĩrĩria 1:1 riugaga ũũ: “Kĩambĩrĩria-inĩ Ngai nĩ  oombire igũrũ na thĩ.” Ngai arĩkia kũũmba thĩ na indo ciothe iria irĩ thĩinĩ wayo, ooigire atĩ ũũmbi wake warĩ ‘mwega mũno.’ (Kĩambĩrĩria 1:31) Mũũmbi witũ nĩ aakenirio nĩ indo iria oombĩte.—1 Timotheo 1:11.

⁵ Gũtirĩ hĩndĩ Jehova atigaga kũruta wĩra. Jesu ooigire ũũ: “Awa atũire arutaga wĩra o nginya rĩu.” (Johana 5:17) O na gũtuĩka tũtiũĩ maũndũ mothe ma magegania marĩa Jehova akoretwo agĩka, nĩ tũĩ mamwe mamo. Nĩ akoretwo agĩthuura arĩa magaathana hamwe na Mũrũ wake, Jesu Kristo, marĩ Ũthamaki-inĩ. (2 Akorintho 5:17) Ningĩ Jehova nĩ aratongoria na akarũmbũiya andũ. Nĩ ũndũ wa wĩra wa kũhunjia ũrĩa ũrarutwo thĩinĩ wa thĩ yothe, andũ milioni nyingĩ nĩ maramenya Jehova na makagĩa na kĩĩrĩgĩrĩro gĩa gũgaatũũra tene na tene thĩinĩ wa paradiso gũkũ thĩ.—Johana 6:44; Aroma 6:23.

6, 7. Jesu nĩ mũruti wĩra wa mũthemba ũrĩkũ?

⁶ O ta Ithe, Jesu nĩ endete kũruta wĩra. Jesu atanoka gũkũ thĩ, nĩ aanyitanĩire na Ngai arĩ “mũruti wĩra njorua” harĩ kũũmba indo ciothe iria irĩ igũrũ na gũkũ thĩ. (Thimo 8:22-31; Akolosai 1:15-17) Rĩrĩa Jesu aarĩ gũkũ thĩ, aathiire na mbere kũruta wĩra na kĩyo. Arĩ mũndũ mwĩthĩ, nĩ eerutire wĩra wa gwaka na mbaũ, na no kũhoteke aakaga nyũmba na indo ingĩ cia mbaũ. Jesu nĩ aamenyire wĩra wake wega ũũ atĩ ooĩkaine ta “bundi ũrĩa wa mbaũ.”—Mariko 6:3.

⁷ O na kũrĩ ũguo, wĩra ũrĩa Jesu oonaga ũrĩ wa bata makĩria arĩ gũkũ thĩ warĩ kũhunjia ũhoro ũrĩa mwega na kũruta andũ ũhoro wĩgiĩ Jehova. Aarĩ na mĩaka ĩtatũ na nuthu ya kũrĩkia ũtungata wake, na aarutaga wĩra na kĩyo kuuma rũcinĩ tene nginya ũtukũ biũ. (Luka  21:37, 38; Johana 3:2) Jesu aathiaga kilomita magana maingĩ agereire barabara cia tĩri, akĩhunjia ũhoro ũrĩa mwega kũrĩ andũ aingĩ o ũrĩa angĩahotire.—Luka 8:1.

8, 9. Nĩ kĩĩ gĩatũmaga Jesu akenere wĩra wake?

⁸ Harĩ Jesu, kũruta wĩra wa Ngai kwarĩ ta irio. Wĩra ũcio nĩ wamũheaga hinya. Kũrĩ thikũ Jesu aarutaga wĩra na kĩyo mũno nginya akaga ihinda rĩa kũrĩa irio. (Johana 4:31-38) Aahũthagĩra mweke o wothe gũteithia andũ arĩa angĩ merute ũhoro wĩgiĩ Ithe. Nĩkĩo eerire Jehova ũũ: “Nĩ ngũgoocithĩtie gũkũ thĩ, na ngarĩkia wĩra ũrĩa ũũheete ndute.”—Johana 17:4.

⁹ Hatarĩ nganja, Jehova na Jesu nĩ marutaga wĩra na kĩyo mũno na nĩ makenaga na makaiganĩra nĩ ũndũ wa wĩra wao. Tũngĩenda ‘kwĩgerekanagia na Ngai’ na ‘kwĩrutanĩria biũ kũrũmĩrĩra makinya ma’ Jesu. (Aefeso 5:1; 1 Petero 2:21) Nĩkĩo twĩrutanagĩria kũruta wĩra na kĩyo na tũgeka ũrĩa wothe tũngĩhota ũndũ-inĩ ũrĩa tũreka.

10, 11. Nĩ kĩĩ kĩngĩtũteithia gũkorũo na mwerekera mwega wĩgiĩ wĩra witũ?

¹⁰ Tũrĩ andũ a Jehova, tũrutaga wĩra na kĩyo nĩguo tũhingie mabataro maitũ na ma famĩlĩ citũ. Nĩ twendaga gũkenera wĩra witũ, no ũndũ ũcio no ũkorũo ũtarĩ mũhũthũ. Nĩ ũndũ ũcio-rĩ, tũngĩka atĩa angĩkorũo tũtikenagĩra wĩra witũ?

¹¹ Korũo na mwerekera ũrĩa wagĩrĩire. No tũremwo gũcenjia kũrĩa tũrutaga wĩra kana mũigana wa wĩra ũrĩa tũrutaga, ĩndĩ no tũhote gũcenjia mwerekera witũ. Gũtaũkĩrũo nĩ kĩrĩa Jehova erĩgagĩrĩra kuuma kũrĩ ithuĩ no gũtũteithie. Kwa ngerekano: Jehova erĩgagĩrĩra kĩongo kĩa famĩlĩ arũmbũiye mabataro ma famĩlĩ yake o  ũrĩa wothe angĩhota. Bibilia yugaga atĩ mũndũ ũrĩa wagaga kũhingĩria famĩlĩ yake mabataro “nĩ mũũru gũkĩra mũndũ ũtarĩ wĩtĩkio.” (1 Timotheo 5:8) Angĩkorũo ũrĩ kĩongo kĩa famĩlĩ, nĩ ũrutaga wĩra na kĩyo nĩguo ũhingĩrie famĩlĩ yaku mabataro. O na angĩkorũo nĩ wendete kana ndwendete wĩra ũrĩa ũrutaga, nĩ ũkenagia Jehova nĩ ũndũ wa kũhingĩria famĩlĩ yaku mabataro.

12. Kũruta wĩra na kĩyo na gũkorũo tũrĩ ehokeku gũtũgunaga atĩa?

¹² Rutaga wĩra na kĩyo na ũkoragwo ũrĩ mwĩhokeku. Ũndũ ũcio no ũtũme ũkorũo ũrĩ ũndũ mũhũthũ harĩ wee gũkenagĩra wĩra waku. (Thimo 12:24; 22:29) Gĩtũmi kĩmwe nĩ tondũ, ũrĩa ũkwandĩkĩte nĩ arĩkwĩhokaga. Andũ nĩ mendete kwandĩka aruti wĩra ehokeku tondũ matingĩmaiya mbeca, indo, o na kana mahinda. (Aefeso 4:28) Ũndũ wa bata o na makĩria nĩ atĩ, Jehova nĩ amenyaga rĩrĩa ũraruta wĩra na kĩyo na ũgakorũo ũrĩ mwĩhokeku. No ũkorũo na “thamiri ĩrĩ na wĩhokeku” tondũ nĩ ũramenya atĩ nĩ ũrakenia Ngai ũrĩa wendete.—Ahibirania 13:18; Akolosai 3:22-24.

13. Nĩ ũndũ ũrĩkũ ũngĩ ũngĩkĩka nĩ ũndũ wa wĩhokeku witũ wĩra-inĩ?

¹³ Menya atĩ mĩthiĩre yaku ũrĩ wĩra-inĩ no ĩgoocithie Jehova. Ũndũ ũcio nĩ ũtũheaga gĩtũmi kĩngĩ gĩa gũkenagĩra wĩra witũ. (Tito 2:9, 10) O na mũndũ mũrutaga wĩra nake no ende kwĩruta Bibilia nĩ ũndũ wa kĩonereria gĩaku kĩega.—Thoma Thimo 27:11; 1 Petero 2:12.

14-16. Nĩ maũndũ marĩkũ tũbatiĩ gwĩciria ũhoro wamo tũgĩthuura wĩra?

¹⁴ Bibilia ndĩgwetaga mawĩra marĩa Mũkristiano agĩrĩirũo kũruta na marĩa atagĩrĩirũo kũruta. No nĩ ĩkoragwo  na motaaro mangĩtũteithia gũtua matua mega megiĩ wĩra. (Thimo 2:6) Tũkĩhũthĩra motaaro ma Bibilia, no twĩyũrie ciũria ici irũmĩrĩire.

¹⁵ Hihi wĩra ũyũ nĩ ũrĩtũmaga batare gwĩka ũndũ Jehova oigĩte nĩ mũũru? Nĩ twĩrutĩte ũhoro wĩgiĩ mĩtugo ĩrĩa Jehova athũire, ta kũiya na kũheenania. (Thama 20:4; Atũmwo 15:29; Aefeso 4:28; Kũguũrĩrio 21:8) Kwoguo nĩ twĩthemaga wĩra o wothe ũtatwaranaga na ithimi cia Jehova.—Thoma 1 Johana 5:3.

 ¹⁶ Hihi wĩra ũyũ nĩ ũnyitaga mbaru kana ũkagaathĩrĩria ũndũ Jehova akaananĩtie? Kwa ngerekano, ĩ ũngĩheo wĩra wa karani thĩinĩ wa thibitarĩ ĩteithagĩrĩria andũ kũruta nda? Gũkorũo ũrĩ karani ti ũũru. No nĩ ũĩ ũrĩa Jehova onaga kũruta nda. Kwoguo o na angĩkorũo wee mwene ndũngĩteithĩrĩria kũruta nda-rĩ, na githĩ to wone atĩ maitho-inĩ ma Jehova nĩ ũnyitanĩire mahĩtia-inĩ macio?—Thama 21:22-24.

17. Nĩ kĩĩ kĩngĩtũteithia gũtua matua megũkenia Ngai?

¹⁷ Twahũthĩra motaaro ma Ngai, no tũtuĩke ta andũ arĩa mataarĩirio thĩinĩ wa Ahibirania 5:14, “arĩa mamenyeretie ũhoti wao wa gũtaũkĩrũo na njĩra ya kũũhũthĩra, makahota gũkũũrana wega na ũũru.” Wĩyũrie ũũ: ‘Ingĩtĩkĩra wĩra ũyũ-rĩ, hihi andũ angĩ no mahĩngĩke? Hihi wĩra ũyũ no ũtũme batare gũtiga mũndũ ũrĩa tũhikanĩtie nake na ciana ciakwa thiĩ bũrũri ũngĩ? Ũndũ ũcio ũngĩmahutia atĩa?’

18. Nĩkĩ no ũkorũo ũrĩ ũndũ mũritũ kũiga ũthathaiya witũ mbere ũtũũro-inĩ?

¹⁸ No ũkorũo ũrĩ ũndũ mũritũ kũiga ũthathaiya witũ harĩ Jehova mbere ũtũũro-inĩ witũ mahinda-inĩ maya ma “ũgwati maritũ kũhiũrania namo.” (2 Timotheo 3:1) Kuona wĩra na kũũtũũria ti ũndũ mũhũthũ. Nĩ tũbatiĩ kũrũmbũiya famĩlĩ citũ, no nĩ tũĩ atĩ ũthathaiya witũ nĩguo wagĩrĩirũo gũka mbere. Tũtingĩtĩkĩra indo cia kĩĩmwĩrĩ ikorũo irĩ cia bata makĩria ũtũũro-inĩ witũ. (1 Timotheo 6:9, 10) Nĩ ũndũ ũcio-rĩ, tũngĩka atĩa nĩguo ‘tũkũũranage maũndũ marĩa ma bata makĩria’ na o hĩndĩ ĩyo tũhingĩrie famĩlĩ itũ mabataro mayo?—Afilipi 1:10.

19. Kwĩhoka Jehova gũtũteithagia atĩa gũkorũo na ũigananĩru ũhoro-inĩ wĩgiĩ wĩra witũ?

 ¹⁹ Wĩhoke Jehova biũ. (Thoma Thimo 3:5, 6.) Nĩ tũĩ atĩ Ngai nĩ amenyaga kĩrĩa tũrabatara na atĩ nĩ atũrũmbũyagia mũno. (Thaburi 37:25; 1 Petero 5:7) Kiugo gĩake gĩtwĩraga ũũ: “Mũtũũrĩre-inĩ wanyu-rĩ, tigagai kwenda mbeca, na mũiganagĩre na indo iria mũrĩ nacio. Nĩ gũkorũo we [Ngai] oigĩte ũũ: ‘Ndirĩ hĩndĩ ngaagũtiga, na ndirĩ hĩndĩ ngaagũtirika.’” (Ahibirania 13:5) Jehova ndendaga tũikare tũgĩtangĩkaga ũhoro-inĩ wĩgiĩ kũhingĩria famĩlĩ citũ mabataro. Nĩ onanĩtie maita maingĩ atĩ no ahote kũhingĩria andũ ake mabataro mao. (Mathayo 6:25-32) O na angĩkorũo tũrutaga wĩra ũrĩkũ, nĩ tũthomaga Kiugo kĩa Ngai tũtegũtĩrĩria, tũkahunjia ũhoro ũrĩa mwega, na tũgathiĩ mĩcemanio ya Gĩkristiano.—Mathayo 24:14; Ahibirania 10:24, 25.

20. Nĩ na njĩra ĩrĩkũ tũngĩhũthia ũtũũro witũ?

²⁰ Korũo na riitho irũngĩrĩru. (Thoma Mathayo 6:22, 23.) Ũguo nĩ kuuga kũhũthia ũtũũro waku nĩguo ũhote kũiga ũtungata waku harĩ Jehova mbere. Nĩ tũĩ atĩ ndũngĩkorũo ũrĩ ũndũ wa ũũgĩ gwĩtĩkĩria mbeca, mũtũũrĩre mwega, kana indo cia kĩĩrĩu ikorũo irĩ cia bata makĩria gũkĩra ũrata witũ hamwe na Ngai. Kwoguo-rĩ, nĩ kĩĩ kĩrĩtũteithagia kũiga maũndũ marĩa ma bata mbere? No mũhaka twĩrutanĩrie tũtigakorũo na thiirĩ. Angĩkorũo ũrĩ na thiirĩ, banga ũrĩa ũngĩũnyihanyihia kana ũũrĩhe. Tũngĩaga kwĩmenyerera, indo cia kĩĩmwĩrĩ no ihũthĩre mahinda maitũ maingĩ o hamwe na hinya, na no twage mahinda ma kũhoya, kwĩruta, kana kũhunjia. Handũ ha gwĩtĩkĩria indo  cia kĩĩmwĩrĩ iritũhie ũtũũro witũ, tũngĩenda kwĩruta kũiganagĩra na indo cia mũthingi ta ‘irio na nguo.’ (1 Timotheo 6:8) Na o ũrĩa maũndũ maitũ mangĩkorũo matariĩ, nĩ wega gũikara tũgĩĩthuthuragia nĩguo tuone ũrĩa tũngĩtungatĩra Jehova makĩria.

21. Tũrabatara gũtua ũndũ ũrĩa tũkũiga mbere ũtũũro-inĩ witũ nĩkĩ?

²¹ Iga maũndũ marĩa ma bata mbere. Nĩ twagĩrĩirũo kũhũthagĩra mahinda maitũ, hinya, o na indo citũ na njĩra ya ũũgĩ. Tũngĩaga kwĩmenyerera, maũndũ matarĩ ma bata mũno, ta gĩthomo kana mbeca, no mahũthĩre  mahinda maitũ maingĩ. Jesu ooigire ũũ: “Caragiai Ũthamaki wa Ngai mbere.” (Mathayo 6:33) Matua marĩa tũtuaga, mĩtugo itũ, maũndũ marĩa twĩkaga o mũthenya, na mĩoroto itũ nĩ ĩguũragia ũndũ ũrĩa tũkoragwo tũigĩte mbere ngoro-inĩ citũ.

22, 23. (a) Wĩra ũrĩa wa bata makĩria tũngĩgĩa naguo tũrĩ Akristiano nĩ ũrĩkũ? (b) Nĩ kĩĩ kĩrĩtũteithagia gũkenagĩra wĩra witũ?

²² Wĩra ũrĩa wa bata makĩria tũrĩ naguo nĩ gũtungatĩra Jehova na kũhunjĩria andũ arĩa angĩ ũhoro ũrĩa mwega. (Mathayo 24:14; 28:19, 20) O ta Jesu, twendaga gwĩka ũrĩa wothe tũngĩhota wĩra-inĩ ũcio. Andũ amwe nĩ mathiĩte kũrĩa kũrĩ na bata mũnene makĩria wa ahunjia. Angĩ nao nĩ mareruta rũthiomi rũgeni nĩgetha mahote kũhunjĩria andũ arĩa maragia rũthiomi rũu. Aria na andũ arĩa mekĩte maũndũ macio, ũmorie ũrĩa maiguaga. Nĩ megũkwĩra atĩ gĩkeno kĩao nĩ kĩongererekete na ũtũũro wao ũkagĩa muoroto makĩria.—Thoma Thimo 10:22.

²³ Ũmũthĩ, aingĩ aitũ nĩ tũhũthagĩra mathaa maingĩ wĩra-inĩ kana tũkaruta mawĩra matiganĩte nĩgetha tũhingĩrie famĩlĩ citũ mabataro ma mũthingi. Jehova nĩ oĩ ũguo, na nĩ akenagio nĩ maũndũ mothe marĩa twĩkaga nĩgetha tũrũmbũiye famĩlĩ citũ. Nĩ ũndũ ũcio, rekei ithuothe tũthiĩ na mbere kwĩgerekania na Jehova na Jesu na njĩra ya kũruta wĩra na kĩyo, gũtekũmakania wĩra ũrĩa tũrutaga. Ningĩ rekei tũririkanage atĩ wĩra witũ ũrĩa wa bata makĩria nĩ gũtungatĩra Jehova na kũhunjia ũhoro ũrĩa mwega wa Ũthamaki wa Ngai. Ũndũ ũcio nĩ ũrĩtũrehagĩra gĩkeno kĩa ma.