Kũrĩ arĩa mendete Jehova Ngai na Kiugo gĩake, Bibilia:

Jesu ooigire ũũ: “Nĩ mũkũmenya ũhoro ũrĩa wa ma, naguo ũhoro ũrĩa wa ma ũmũkũũre ũkombo-inĩ.” (Johana 8:32) Ta wĩcirie ũrĩa waiguire hĩndĩ ĩrĩa wamenyire ũhoro wa ma rĩa mbere kuuma Bibilia-inĩ! Warĩ ũndũ wa gĩkeno mũno kũmenya atĩ no twĩrute ũhoro wa ma thĩinĩ wa thĩ ĩiyũire maheeni.—2 Timotheo 3:1.

Jehova Ngai endaga tũmenye ũhoro ũrĩa wa ma. Na ithuĩ nĩ twendaga kũmenyithia andũ arĩa angĩ tondũ nĩ tũmendete. No nĩ harĩ ũndũ ũngĩ twagĩrĩirũo gwĩka tũgĩtungatĩra Ngai. No mũhaka twĩrutanĩrie biũ gũtũũra tũrĩ Akristiano tondũ nĩ tũtĩĩte mũno motaaro ma Jehova. Jesu nĩ aataarĩirie njĩra ĩmwe ya bata tũngĩonania nayo atĩ nĩ twendete Ngai. Ooigire ũũ: “Mũngĩathĩkagĩra maathani makwa, mũgũtũũra wendo-inĩ wakwa, o ta ũrĩa njathĩkagĩra maathani ma Awa ngatũũra wendo-inĩ wake.”—Johana 15:10.

Jesu nĩ endete ithe biũ, na ekaga maũndũ mothe marĩa ithe amwĩra eke. Tũngĩĩgerekania na Jesu ũtũũro-inĩ witũ, Jehova nĩ egũtwenda na ithuĩ nĩ tũkũgĩa na gĩkeno kĩa ma. O ta ũrĩa Jesu ooigire, “angĩkorũo nĩ mũĩ maũndũ macio-rĩ, gũkena nĩ inyuĩ mũngĩmekaga.”—Johana 13:17.

Tũkwĩhoka atĩ ibuku rĩrĩ nĩ rĩgũgũteithia wĩrute gũtũũra kũringana na ũhoro ũrĩa wa ma kuuma Bibilia-inĩ na ũtuĩke mũrata wa Ngai. Nĩ ihoya ritũ atĩ wendo waku harĩ Ngai nĩ ũkuongerereka na atĩ nĩ ũgũtũũra ‘wendo-inĩ wa Ngai nĩguo ũkaaheo muoyo wa tene na tene.’—Judasi 21.