1, 2. Nĩ kĩheo kĩrĩkũ kĩa goro Jehova aatũheire?

JEHOVA nĩ aheete o ũmwe witũ kĩheo kĩa magegania. Kĩheo kĩu nĩ muoyo. (Kĩambĩrĩria 1:27) Endaga tũkorũo na ũtũũro ũrĩa mwega biũ. Kwoguo nĩ atũheete motaaro marĩa matũrutaga ũrĩa tũngĩtua matua mega. Nĩ twagĩrĩirũo kũhũthagĩra motaaro macio nĩgetha matũteithagie “gũkũũrana wega na ũũru.” (Ahibirania 5:14) Rĩrĩa tweka ũguo, tũkoragwo tũkĩreka Jehova atũmenyerie gwĩciragia na njĩra ĩrĩa yagĩrĩire. Rĩrĩa twatũũra kũringana na motaaro ma Ngai na tuona ũrĩa matũmaga ũtũũro witũ wagĩre, nĩ tũtaũkagĩrũo nĩ ũrĩa marĩ ma bata.

² Ũtũũro no ũkorũo ũrĩ mũritũ mũno. Rĩmwe na rĩmwe nĩ kuumagĩra maũndũ matarĩrĩirio ĩmwe kwa ĩmwe nĩ watho wa Bibilia. Kwa ngerekano, no tũbatare gũtua matua megiĩ njĩra cia ũrigitani iria ikoniĩ ũhũthĩri wa thakame. Nĩ kĩĩ kĩngĩtũteithia gũtua matua megũkenia Jehova? Bibilia nĩ ĩkoragwo na motaaro marĩa matũrutaga ũrĩa Jehova onaga muoyo na thakame. Tũngĩtaũkĩrũo nĩ motaaro macio, no tũhote gũtua matua ma ũũgĩ na tũtigwo tũrĩ na thamiri njega. (Thimo 2:6-11) Reke rĩu tũthuthurie mamwe ma motaaro macio.

3, 4. (a) Ngai aaguũririe atĩa mawoni make megiĩ thakame? (b) Thakame ĩrũgamĩrĩire kĩĩ?

³ Bibilia ĩtũrutaga atĩ thakame nĩ kĩndũ gĩtheru tondũ ĩrũgamagĩrĩra muoyo. Na muoyo nĩ kĩndũ kĩa goro harĩ Jehova. Thutha wa Kaini kũũraga mũrũ wa nyina, Jehova aamwĩrire ũũ: “Thakame ya mũrũ wa nyũkwa nĩ ĩrandĩrĩra kuuma tĩri-inĩ.” (Kĩambĩrĩria 4:10) Thakame ya Habili yarũgamĩrĩire muoyo wake, kwoguo rĩrĩa Kaini ooragire Habili nĩ kũmũruta aamũrutire muoyo.

⁴ Thutha wa Mũiyũro wa hĩndĩ ya Nuhu, Ngai eerire andũ atĩ no marĩe nyama. No nĩ aaheanire watho wa ĩmwe kwa ĩmwe akiuga ũũ: “Mũtikanarĩanĩrie nyama na muoyo wayo—ũguo nĩ kuuga thakame yayo.” (Kĩambĩrĩria 9:4) Watho ũcio ũhutĩtie njiarũa ciothe cia Nuhu, nginya ithuĩ. Hatarĩ nganja, Jehova onaga thakame ĩrũgamĩrĩire muoyo. Na nĩ tũbatiĩ kuonaga thakame na njĩra o ta ĩyo.—Thaburi 36:9.

5, 6. Watho wa Musa woonanagia atĩa mawoni ma Jehova megiĩ muoyo na thakame?

⁵ Thĩinĩ wa Watho ũrĩa Jehova aaheire Musa, ooigire ũũ: “Mũndũ o wothe . . . angĩkaarĩa thakame ya mũthemba o wothe, hatarĩ nganja nĩ ngeerekeria ũthiũ wakwa harĩ mũndũ ũcio ũrarĩa thakame ndĩmũũkĩrĩre, na ndĩmweherie gatagatĩ-inĩ ka andũ ao. Nĩ gũkorũo muoyo wa kĩũmbe kĩa mwĩrĩ wa nyama ũrĩ thĩinĩ wa thakame.”—Maũndũ ma Alawii 17:10, 11.

⁶ Watho wa Musa woigĩte atĩ mũndũ angĩoragire nyamũ nĩguo ĩtuĩke irio, aagĩrĩirũo gũita thakame yayo thĩ. Ũndũ ũcio woonanagia atĩ muoyo wa nyamũ ĩyo nĩ wacokio kũrĩ Mũũmbi, Jehova. (Gũcokerithia Maathani  12:16; Ezekieli 18:4) No Jehova ndeerĩgagĩrĩra Aisiraeli marute nginya itata rĩa mũico rĩrĩa maraita thakame ya nyamũ. Mangĩekire ũrĩa wothe mangĩahotire nĩguo marute thakame ĩyo, nĩ mangĩarĩire nyama ĩyo marĩ na thamiri theru. Rĩrĩa monania gĩtĩo harĩ thakame ya nyamũ, moonanagia atĩ nĩ matĩĩte Mũheani wa muoyo, Jehova. Watho ningĩ nĩ werĩte Aisiraeli marutage nyamũ irĩ magongona nĩ ũndũ wa kũhumbĩra mehia.—Rora Kohoro ga 19 na 20 Mũico-inĩ wa Ibuku.

7. Daudi oonanirie atĩa atĩ nĩ aatĩĩte thakame?

⁷ No tuone ũrĩa thakame ĩrĩ ya bata kuumana na ũndũ ũrĩa Daudi eekire rĩrĩa aarũaga na Afilisti. Arũme arĩa maarĩ na Daudi nĩ moonire atĩ aarĩ mũnyotu mũno, kwoguo magĩthiĩ gĩcigo-inĩ kĩarĩ na ũgwati gĩa thũ na makĩingĩria mĩoyo yao ũgwati-inĩ nĩguo mamũtahĩrie maĩ. No rĩrĩa maareheire Daudi maĩ macio, akĩrega kũmanyua na “akĩmaita thĩ mbere ya Jehova.” Daudi akiuga atĩrĩ: “Wee Jehova, kũroaga gũtuĩka ũguo atĩ no njĩke ũndũ ũcio! Hihi no nyue thakame ya arũme mathiĩte makaingĩria mĩoyo yao ũgwati-inĩ?” Daudi nĩ aataũkagĩrũo nĩ ũrĩa muoyo na thakame irĩ cia goro harĩ Ngai.—2 Samueli 23:15-17.

8, 9. Akristiano ũmũthĩ magĩrĩirũo gũkorũo na mawoni marĩkũ megiĩ thakame?

⁸ Gũkinyĩria hĩndĩ ya Akristiano a karine ya mbere, andũ a Ngai matiabataraga kũruta magongona ma nyamũ rĩngĩ. Ĩndĩ no maabataraga gũkorũo na mawoni marĩa magĩrĩire megiĩ thakame. ‘Gwĩthema thakame’ warĩ ũmwe wa maũndũ mamwe ma Watho marĩa Jehova eendaga Akristiano marũmagĩrĩre. Ũndũ ũcio warĩ wa bata o ta gwĩthema ngomanio itagĩrĩire kana ũhoi mĩhianano.—Atũmwo 15:28, 29.

 ⁹ Ũguo noguo gũtariĩ ũmũthĩ. Tũrĩ Akristiano, nĩ tũĩ atĩ Jehova nĩwe Kĩhumo kĩa muoyo na atĩ mĩoyo yothe nĩ yake. Ningĩ nĩ tũĩ atĩ thakame nĩ kĩndũ gĩtheru na ĩrũgamagĩrĩra muoyo. Kwoguo nĩ tũtigagĩrĩra atĩ nĩ twathuthuria motaaro ma Bibilia rĩrĩa tũratua matua o mothe megiĩ njĩra cia ũrigitani iria ikoniĩ ũhũthĩri wa thakame.

10, 11. (a) Aira a Jehova monaga atĩa gwĩkĩrũo thakame ĩrĩ yothe kana icunjĩ inya iria nene cia thakame? (b) Nĩ matua marĩkũ o Mũkristiano arabatara gwĩtuĩra?

¹⁰ Aira a Jehova nĩ mataũkagĩrũo atĩ ‘gwĩthema thakame’ nĩ makĩria ma kwaga kũmĩrĩa kana kũmĩnyua. Gwĩthema kũhutĩtie kwaga gwĩtĩkĩra gwĩkĩrũo thakame, kwaga kũheana thakame itũ, na kwaga kũiga thakame itũ nĩguo tũcoke twĩkĩrũo thutha-inĩ. Ningĩ nĩ kũhutĩtie kwaga gwĩtĩkĩra gwĩkĩrũo gĩcunjĩ o gĩothe harĩ icunjĩ iria inya nene cia thakame—hengereca ndune (red cells), hengereca njerũ (white cells), hengereca cia kũgiria thakame kuura (platelets), na gĩcunjĩ kĩrĩa kĩhaana maĩ (plasma).

¹¹ Icunjĩ icio inya nene cia thakame no igayanio tũcunjĩ tũngĩ tũnini twa thakame. O Mũkristiano nĩwe wagĩrĩirũo gwĩtuĩra kana nĩ egwĩtĩkĩra tũcunjĩ tũu twa thakame kana ndegwĩtĩkĩra. Ũguo noguo kũrĩ harĩ njĩra cia ũrigitani iria ihũthagĩra thakame ya mũrwaru. O mũndũ nĩwe wagĩrĩirũo gwĩtuĩra itua ũrĩa thakame yake ĩkũhũthĩrũo angĩkorũo agĩthĩnjwo, agĩthimwo, kana akĩamũkĩra ũrigitani ũngĩ o wothe.—Rora Kohoro ka 21 Mũico-inĩ wa Ibuku.

12. (a) Matua maitũ marĩa tũbataraga kũhũthĩra thamiri makoragwo marĩ ma bata harĩ Jehova nĩkĩ? (b) Nĩ kĩĩ kĩngĩtũteithia gũtua matua ma ũũgĩ megiĩ njĩra cia ũrigitani?

¹² Hihi matua maitũ marĩa tũbataraga kũhũthĩra thamiri nĩ makoragwo marĩ ma bata harĩ Jehova? Ĩĩ, nĩ  ma bata. Jehova nĩ endaga kũmenya ũhoro wĩgiĩ meciria na mĩoroto itũ. (Thoma Thimo 17:3; 24:12.) Nĩ ũndũ ũcio-rĩ, hĩndĩ ĩrĩa tũratua itua rĩgiĩ ũrigitani, nĩ tũrabatara kũhoya ũtongoria wa Jehova, na tũcoke twĩke ũthuthuria wĩgiĩ ũrigitani ũcio. Thutha ũcio tũhũthĩre thamiri itũ ĩmenyeretio kũgerera Bibilia gwĩtuĩra itua. Tũtiagĩrĩirũo kũũria andũ arĩa angĩ mangĩka atĩa korũo nĩo, ningĩ andũ angĩ matiagĩrĩirũo kũgeria gũtũtuĩra itua. O Mũkristiano “arĩkuuaga mũrigo wake mwene.”—Agalatia 6:5; Aroma 14:12.

13. Twĩrutaga ũndũ ũrĩkũ wĩgiĩ Jehova kuumana na mawatho na motaaro make megiĩ thakame?

¹³ Ũndũ o wothe Jehova atwĩraga twĩke nĩ wa gũtũguna na wonanagia wendo wake harĩ ithuĩ. (Thaburi 19:7-11) No tũtimwathĩkagĩra o tondũ mawatho make nĩ matũgunaga. Tũmwathĩkagĩra tondũ nĩ tũmwendete. Wendo witũ harĩ Jehova nĩ ũtũtindĩkaga twĩtheme gwĩkĩrũo thakame. (Atũmwo 15:20) Ũndũ ũcio ningĩ nĩ ũgitagĩra ũgima witũ wa mwĩrĩ. Andũ aingĩ ũmũthĩ nĩ moĩ mogwati mamwe ma gwĩkĩrũo thakame, na ndagĩtarĩ aingĩ metĩkĩtie atĩ gũthĩnja mũndũ matekũmwĩkĩra thakame nĩguo ũndũ ũrĩa mwega harĩ ũgima wa mwĩrĩ wa mũrwaru. Hatarĩ nganja, njĩra cia Jehova nĩ cia ũũgĩ na cia wendo.—Thoma Isaia 55:9; Johana 14:21, 23.

14, 15. (a) Jehova aaheire andũ ake mawatho marĩkũ nĩguo amagitĩre? (b) Ũngĩhũthĩra atĩa motaaro marĩa marĩ thĩinĩ wa mawatho macio?

¹⁴ Mawatho ma Ngai hingo ciothe makoretwo marĩ ma kũguna andũ ake. Jehova nĩ aaheire Aisiraeli a tene mawatho ma kũmagitĩra kuumana na mogwati manene.  Kwa ngerekano, watho ũmwe woigĩte atĩ mwene mũciĩ aagĩrĩirũo gwaka karũthingo kanini gũthiũrũrũkĩria nyũmba yake igũrũ nĩguo mũndũ ndakagwe. (Gũcokerithia Maathani 22:8) Watho ũngĩ wakoniĩ nyamũ. Mũndũ angĩakorirũo na ndegwa yarũaga, aagĩrĩirũo kũmĩmenyerera nĩguo ndĩgatharĩkĩre kana yũrage mũndũ. (Thama 21:28, 29) Mũisiraeli angĩagire gwathĩkĩra mawatho macio, na ũndũ ũcio ũtũme mũndũ akue, nĩwe ũngĩarĩ na mahĩtia.

¹⁵ Kuumana na mawatho macio nĩ tũrona atĩ muoyo nĩ kĩndũ kĩa goro harĩ Jehova. Kũmenya ũguo kwagĩrĩirũo gũtũhutia atĩa? Twagĩrĩirũo kuonania atĩ nĩ tũtĩĩte muoyo kũgerera ũrĩa tũmenyagĩrĩra mũciĩ witũ, ngaari itũ, ũrĩa tũtwarithagia ngaari, na ũrĩa tũthuuraga maũndũ ma gwĩkenia. Andũ amwe, makĩria andũ ethĩ, monaga atĩ gũtirĩ ũndũ mũũru ũngĩhaanĩka harĩ o, na kwoguo makeingĩria ũgwati-inĩ na makahũthia maũndũ marĩa mangĩmagera ngero. No ũguo tiguo Jehova endaga tũkorũo tũtariĩ. Endaga tuone mĩoyo yothe ĩrĩ ya bata—muoyo witũ o na mĩoyo ya andũ arĩa angĩ.—Kohelethu 11:9, 10.

16. Jehova onaga kũruta nda atĩa?

¹⁶ Muoyo wa mũndũ o wothe nĩ wa bata harĩ Jehova. O na kaana gatarĩ gaciare nĩ ka bata harĩ we. Rungu rwa Watho wa Musa, mũndũ angĩaguraririe mũtumia ũrĩ nda atekwenda na mũtumia ũcio kana kaana gake gakue, Jehova oonaga mũndũ ũcio arĩ na mahĩtia ma kũũragana. Ũguo nĩ kuuga atĩ, o na gũtuĩka ũndũ ũcio wekĩkire atekwenda, harĩ mũndũ woragĩtwo na muoyo ũcio no mũhaka ũngĩarĩhirũo. (Thoma Thama 21:22, 23.) Ngai onaga kaana gatarĩ gaciare karĩ mũndũ ũrĩ muoyo. Ũkĩmenyaga ũguo-rĩ, ũgwĩciria onaga kũruta nda  atĩa? Ũgwĩciria aiguaga atĩa akĩona twana milioni nyingĩ tũtarĩ tũciare tũkĩũragwo o mwaka?

17. Nĩ ũndũ ũrĩkũ ũngĩũmĩrĩria mũtumia warutĩte nda atanamenya Jehova?

¹⁷ Ĩ angĩkorũo mũtumia nĩ aarutĩte nda atanamenya ũrĩa Jehova onaga ũndũ ũcio? No akorũo na ma atĩ Jehova no amuohere na mũthingi wa igongona rĩa Jesu. (Luka 5:32; Aefeso 1:7) Mũtumia wekĩte mahĩtia ta macio tene ndarabatara gũikara akĩiguaga arĩ na mahĩtia angĩkorũo nĩ erirĩte kuuma ngoro. “Jehova nĩ mũigua tha na mũcayanĩri . . . O ta ũrĩa irathĩro kũraihanĩrĩirie na ithũĩro, no taguo aigĩte mehia maitũ kũraya na ithuĩ.”—Thaburi 103:8-14.

18. Tũrabatara gwĩka ũrĩa wothe tũngĩhota nĩguo tweherie rũmena meciria-inĩ maitũ nĩkĩ?

¹⁸ Gũkorũo na gĩtĩo harĩ kĩheo kĩrĩa Ngai atũheete kĩa muoyo kwambagĩrĩria ngoro-inĩ citũ thĩinĩ biũ. Nĩ kũhutĩtie ũrĩa tuonaga andũ arĩa angĩ. Mũtũmwo Johana aandĩkire ũũ: “Mũndũ o wothe ũthũire mũrũ wa Ithe nĩ mũũragani.” (1 Johana 3:15) Tũngĩkorũo tũtendete mũndũ ũrĩa ũngĩ, ũndũ ũcio no ũtuĩke rũmena o na tũtekũmenya. Rũmena no rũtũme mũndũ age gũtĩa andũ arĩa angĩ, amaigĩrĩre igenyo, o na kana erirĩrie makue. Jehova nĩ oĩ ũrĩa tũiguaga kwerekera andũ arĩa angĩ. (Maũndũ ma Alawii 19:16; Gũcokerithia Maathani 19:18-21; Mathayo 5:22) Tũngĩmenya atĩ tũrĩ na rũmena kwerekera mũndũ, tũrabatara kwĩrutanĩria nĩguo tweherie ũndũ ũcio meciria-inĩ maitũ.—Jakubu 1:14, 15; 4:1-3.

19. Mawoni ma Jehova megiĩ ũhinya magĩrĩirũo gũtũhutia atĩa?

¹⁹ Nĩ kũrĩ njĩra ĩngĩ tũngĩonania nayo atĩ nĩ tuonaga  muoyo ũrĩ wa bata. Thĩinĩ wa Thaburi 11:5 twĩrutaga atĩ Jehova “nĩ athũire mũndũ o wothe wendete ũhinya.” Tũngĩthuura maũndũ ma gwĩkenia marĩ na ũhinya, no tũkorũo tũkĩonania atĩ nĩ twendete ũhinya. Hihi no twende gwĩkĩra ciugo, maũndũ, na mbica irĩ na ũhinya meciria-inĩ maitũ? Ithenya rĩa ũguo, tũngĩenda kũiyũria meciria maitũ na maũndũ matheru na ma thayũ.—Thoma Afilipi 4:8, 9.

20-22. (a) Jehova onaga thĩ ya Shaitani atĩa? (b) Andũ a Ngai mangĩonania atĩa atĩ o “ti a thĩ ĩno”?

²⁰ Thĩ ya Shaitani ndĩtĩĩte muoyo, na Jehova amĩonaga ĩrĩ na mahĩtia ma gũita thakame, ũguo nĩ kuuga mahĩtia ma kũũragana. Kwa ihinda rĩa mĩaka mĩingĩ, thirikari cia gĩũteti nĩ itũmĩte andũ milioni nyingĩ makue, nginya ndungata nyingĩ cia Jehova. Thĩinĩ wa Bibilia, thirikari icio itaaragĩrio atĩ nĩ nyamũ njũru na ihũthagĩra ũhinya. (Danieli 8:3, 4, 20-22; Kũguũrĩrio 13:1, 2, 7, 8) Thĩinĩ wa thĩ ũmũthĩ, wendia wa matharaita ũkoragwo ũrĩ biacara nene. Andũ nĩ magĩaga na mbeca nyingĩ nĩ ũndũ wa kwendia matharaita ta macio moru. Hatarĩ nganja, “thĩ yothe ĩkoragwo rungu rwa hinya wa ũrĩa mũũru.”—1 Johana 5:19.

²¹ No Akristiano a ma “ti a thĩ ĩno.” Andũ a Jehova matinyitaga mbaru mwena o wothe wa ũteti kana wa mbaara. O ta ũrĩa matoraganaga, matinyitaga mbaru ithondeka o rĩothe rĩũragaga andũ. (Johana 15:19; 17:16) Rĩrĩa Akristiano maranyarirũo, matiĩrĩhagĩria ũũru na ũũru. Jesu aarutanire atĩ twagĩrĩirũo kwenda nginya thũ citũ.—Mathayo 5:44; Aroma 12:17-21.

 ²² Ndini o nayo nĩ ĩkoretwo na itemi harĩ ikuũ cia andũ milioni nyingĩ. Bibilia yugaga ũũ ĩkĩaria ũhoro wa Babuloni Ũrĩa Mũnene, ndini ciothe cia maheeni gũkũ thĩ: “Thĩinĩ wake nĩ kuoonekire thakame ya anabii na ya arĩa aamũre na ya arĩa othe manathĩnjwo thĩinĩ wa thĩ.” Hihi nĩ ũrataũkĩrũo kĩrĩa gĩtũmaga Jehova atwathe ũũ: “Umai thĩinĩ wake, inyuĩ andũ akwa”? Arĩa mathathayagia Jehova matinyitanagĩra na ndini ya maheeni.—Kũguũrĩrio 17:6; 18:2, 4, 24.

23. ‘Kuuma thĩinĩ wa’ Babuloni Ũrĩa Mũnene kũhutĩtie maũndũ marĩkũ?

²³ ‘Kuuma thĩinĩ wa’ Babuloni Ũrĩa Mũnene nĩ kũhutĩtie kuonania wega atĩ nĩ tũtigĩte kũnyitanĩra na ndini o yothe ya maheeni. Kwa ngerekano, no tũbatare gũtigĩrĩra atĩ rĩĩtwa ritũ nĩ rĩeherio mabuku-inĩ ma ndini. No nĩ harĩ ũndũ ũngĩ ũrabatarania. Nĩ tũrabatara gũthũũra na kũregana na maũndũ moru marĩa ndini ya maheeni ĩkaga. Ndini ya maheeni nĩ ĩtĩkĩragia na ĩgatũma andũ meingĩrie maũndũ-inĩ ma waganu, ũteti, na ũkoroku. (Thoma Thaburi 97:10; Kũguũrĩrio 18:7, 9, 11-17) Ihinda-inĩ rĩa mĩaka mĩingĩ, ũndũ ũcio nĩ ũtũmĩte andũ milioni nyingĩ morũo nĩ mĩoyo yao.

24, 25. Nĩ na njĩra ĩrĩkũ kũmenya Jehova gũtũmaga tũgĩe na thayũ na thamiri njega?

²⁴ Tũtanamenya Jehova, o ũmwe witũ nĩ aanyitaga mbaru na njĩra ĩmwe kana ĩngĩ maũndũ moru marĩa thĩ ya Shaitani ĩkaga. No rĩu nĩ tũgarũrũkĩte. Nĩ twĩtĩkĩrĩte ũkũũri na tũkeyamũrĩra Ngai. Nĩ tũkoragwo na “mahinda ma gũcanjamũra moimĩte kũrĩ Jehova we mwene.” Tũkoragwo na thayũ na thamiri njega nĩ ũndũ wa kũmenya atĩ nĩ tũrakenia Ngai.—Atũmwo 3:19; Isaia 1:18.

 ²⁵ O na angĩkorũo hĩndĩ ĩmwe nĩ twanyitanagĩra na ithondeka rĩtatĩĩte muoyo, Jehova no atuohere na mũthingi wa igongona rĩa ũkũũri. Nĩ tũcokagia ngatho mũno nĩ ũndũ wa kĩheo kĩa muoyo kĩrĩa Jehova atũheete. Tuonanagia ngatho citũ na njĩra ya gwĩka ũrĩa wothe tũngĩhota gũteithia andũ angĩ merute ũhoro wa Jehova, matigane na thĩ ya Shaitani, na makorũo na ũrata wa hakuhĩ hamwe na Ngai.—2 Akorintho 6:1, 2.

26-28. (a) Jehova aaheire Ezekieli wĩra ũrĩkũ wa mwanya? (b) Jehova atũheete wĩra ũrĩkũ ũmũthĩ?

²⁶ Thĩinĩ wa Isiraeli ya tene, Jehova eerire mũnabii Ezekieli ahe andũ mũkaana atĩ ica ikuhĩ Jerusalemu nĩ ĩngĩanangirũo na amarute ũrĩa maabataraga gwĩka nĩguo mahonoke. Ezekieli aangĩagire kũhe andũ acio mũkaana, Jehova nĩ angĩamũũririe mĩoyo yao. (Ezekieli 33:7-9) Ezekieli nĩ oonanirie atĩ nĩ oonaga muoyo ũrĩ wa bata na njĩra ya gwĩka ũrĩa wothe angĩahotire nĩguo akinyie ndũmĩrĩri ĩyo ya bata.

²⁷ Jehova nĩ atũheete wĩra wa kũhe andũ mũkaana atĩ thĩ ya Shaitani nĩ ĩkwanangwo ica ikuhĩ na tũmateithie mamenye Jehova nĩguo makaahonoka maingĩre thĩinĩ wa thĩ njerũ. (Isaia 61:2; Mathayo 24:14) Tũngĩenda gwĩka ũrĩa wothe tũngĩhota nĩguo tũkinyĩrie arĩa angĩ ndũmĩrĩri ĩyo. Tũrerĩgĩrĩra nĩ tũkoiga ũũ o ta Paulo: “Niĩ ndikoorio thakame ya mũndũ o na ũmwe, nĩ gũkorũo ndirĩ ndaga kũmwĩra maũndũ mothe megiĩ wendi wa Ngai.”—Atũmwo 20:26, 27.

²⁸ Nĩ kũrĩ maũndũ mangĩ ũtũũro-inĩ tũrabatara gũkorũo tũrĩ atheru. Reke tũthuthurie mamwe mamo thĩinĩ wa gĩcunjĩ kĩrĩa kĩrũmĩrĩire.