1, 2. Tũngĩka atĩa nĩguo tũtũũre wendo-inĩ wa Ngai?

ITHUOTHE nĩ twendaga gũkorũo na hinya na ũgima mwega wa mwĩrĩ. Nĩkĩo tũgeragia kũrĩa irio njega, kũmenyeria na kũmenyerera mĩĩrĩ itũ. O na gũtuĩka maũndũ macio nĩ mabataraga kĩyo, nĩ tũkenagĩra moimĩrĩro, kwoguo tũtikuaga ngoro. No nĩ tũbataraga gũkorũo na hinya na ũgima mwega na njĩra ĩngĩ.

² O na gũtuĩka nĩ tũgĩĩte na kĩambĩrĩria kĩega harĩ kũmenya Jehova, nĩ tũbatiĩ gũthiĩ na mbere gwĩkĩra hinya ũrata witũ hamwe nake. Rĩrĩa Judasi eekĩrire Akristiano ngoro akĩmeera, “Mwĩige wendo-inĩ wa Ngai,” nĩ aataarĩirie ũrĩa mangĩekire ũguo. Aameerire ũũ: “Mwĩyakei igũrũ rĩa wĩtĩkio wanyu ũrĩa mũtheru mũno.” (Judasi 20, 21) Nĩ ũndũ ũcio-rĩ, nĩ na njĩra ĩrĩkũ tũngĩaka wĩtĩkio ũrĩ na hinya?

3-5. (a) Shaitani angĩenda ũkorũo na mawoni marĩkũ megiĩ ithimi cia Jehova? (b) Wee wonaga atĩa mawatho na motaaro ma Jehova?

³ Nĩ harĩ bata wee mwene ũkorũo na ma atĩ njĩra cia Jehova nĩcio njega makĩria. Shaitani endaga wĩcirie atĩ ithimi cia Ngai nĩ nditũ mũno kũrũmĩrĩra na atĩ no ũkorũo na gĩkeno makĩria ũngĩĩtuĩra ũndũ ũrĩa mwega na ũrĩa mũũru. Kuuma o mũgũnda-inĩ wa Edeni, Shaitani  akoretwo akĩgeria gũtũma andũ metĩkie ũndũ ũcio. (Kĩambĩrĩria 3:1-6) Na no arageria mũno nginya ũmũthĩ.

⁴ Hihi Shaitani akoragwo akiuga ũrĩa kũrĩ? Hihi ithimi cia Jehova nĩ itũgiragĩrĩria mũno? Aca. Kwa ngerekano, ta hũũra mbica ũgĩceeranga kamũtitũ-inĩ gathaka. Ũkona rũgiri rũraihu rũrigicĩirie handũ. Hihi ũkeyũria atĩrĩ, ‘Haha hekĩrĩtwo rũgiri rwa kũgirĩrĩria nĩkĩ?’ No hĩndĩ o ĩyo ũkaigua mũrũthi wararama mwena ũcio ũngĩ wa rũgiri. Rĩu ũgũkorũo na mawoni marĩkũ megiĩ rũgiri rũu? No ũkene tondũ rũgiri rũu nĩ rũrakũgitĩra ndũkarĩo nĩ mũrũthi ũcio. Motaaro ma Jehova matariĩ ta rũgiri rũu, nake Mũcukani atariĩ ta mũrũthi ũcio. Kiugo kĩa Ngai gĩtũheaga mũkaana ũyũ: “Tũũriai ũhoti wanyu wa gwĩciria, ikaragai mwĩiguĩte! Thũ yanyu Mũcukani, acangacangaga ta mũrũthi ũrararama, agĩetha mũndũ wa gũtambura.”—1 Petero 5:8.

⁵ Jehova endaga tũkorũo na ũtũũro ũrĩa mwega biũ. Ndendaga tũheenio nĩ Shaitani. Nĩkĩo atũheete mawatho na motaaro ma gũtũgitĩra na gũtũma tũkorũo na gĩkeno. (Aefeso 6:11) Jakubu aandĩkire ũũ: “Mũndũ ũrĩa ũroraga na kinyi watho ũrĩa mũkinyanĩru ũrĩa ũrehaga wĩyathi na agatũũra thĩinĩ waguo . . . nĩ arĩkenagĩra ũndũ ũrĩa areka.”—Jakubu 1:25.

6. Nĩ kĩĩ kĩngĩtũteithia gũkorũo na ma atĩ njĩra cia Ngai nĩcio njega makĩria?

⁶ Rĩrĩa twarũmĩrĩra ũtongoria wa Jehova, ũtũũro witũ nĩ wagĩraga na ũrata witũ hamwe nake ũkagĩa hinya makĩria. Kwa ngerekano, nĩ tũgunĩkaga rĩrĩa twamũhoya kaingĩ ta ũrĩa atwĩrĩte twĩkage. (Mathayo 6:5-8; 1 Athesalonike 5:17) Nĩ tũkenaga rĩrĩa twathĩkĩra ũtongoria wake wa gũcemanagia hamwe nĩguo  tũmũthathaiye na twĩkĩrane ngoro na rĩrĩa twanyitanĩra biũ wĩra-inĩ wa kũhunjia na kũrutana. (Mathayo 28:19, 20; Agalatia 6:2; Ahibirania 10:24, 25) Tweciria ũrĩa maũndũ macio matũteithĩtie gũtũũria wĩtĩkio witũ ũrĩ na hinya, nĩ tũkoragwo na ma o na makĩria atĩ njĩra cia Jehova nĩcio njega makĩria.

7, 8. Nĩ kĩĩ kĩngĩtũteithia nĩguo tũtikamake nĩ ũndũ wa magerio mangĩũka ihinda rĩũkĩte?

⁷ Twahota kũmaka atĩ ihinda rĩũkĩte no tũcemanie na magerio ma wĩtĩkio marĩa magaakorũo marĩ maritũ mũno harĩ ithuĩ. Ũngĩkaigua ũguo, ririkana ciugo ici cia Jehova: “Niĩ Jehova, nĩ niĩ Ngai waku, o we Ũrĩa ũkũrutaga nĩguo ũgunĩke wee mwene, o we Ũrĩa ũgũtongoragia njĩra-inĩ ĩrĩa wagĩrĩirũo kũgerera. Na arĩ korũo no ũrũmĩrĩre maathani makwa! Thayũ waku ũngĩhaana o ta rũũĩ naguo ũthingu waku ũhaane o ta makũmbĩ ma iria.”—Isaia 48:17, 18..

 ⁸ Tũngĩathĩkĩra Jehova, thayũ witũ ũrĩhaanaga ta rũũĩ rũtahũaga, naguo ũthingu witũ ũrĩhaanaga ta makũmbĩ ma iria marĩa maikaraga magĩthiaga hũgũrũrũ-inĩ. O na tũngĩcemania na ũndũ ũrĩkũ ũtũũro-inĩ, no tũkorũo tũrĩ ehokeku. Bibilia ĩtwĩragĩra ũũ: “Ikagĩria Jehova mũrigo waku, na nĩ arĩgũtiiragĩrĩra. Gũtirĩ hĩndĩ akaareka mũndũ ũrĩa mũthingu agwe.”—Thaburi 55:22.

9, 10. Mũndũ gũkorũo arĩ mũgima nĩ kuuga atĩa?

⁹ O ũrĩa ũgwĩkĩra hinya ũrata waku hamwe na Jehova, noguo ‘ũkwĩrutanĩria gũkinyĩra ũgima.’ (Ahibirania 6:1) Mũndũ gũkorũo arĩ mũgima nĩ kuuga atĩa?

¹⁰ Tũtituĩkaga Akristiano agima no ũndũ tu wa kũgĩa mĩaka mĩingĩ. Nĩguo tũtuĩke agima, no mũhaka tũtue Jehova Mũrata witũ ũrĩa mũnene na tũgerie kuonaga maũndũ ũrĩa we amonaga. (Johana 4:23) Paulo aandĩkire ũũ: “Andũ arĩa matũũraga kũringana na mwĩrĩ maigaga meciria mao maũndũ-inĩ ma mwĩrĩ, no arĩa matũũraga kũringana na roho maigaga meciria mao maũndũ-inĩ ma roho.” (Aroma 8:5) Mũndũ mũgima ndakoragwo ekĩrĩire ikeno kana indo cia kĩĩmwĩrĩ ũtũũro-inĩ wake. Ithenya rĩa ũguo, aigaga meciria make harĩ gũtungatĩra Jehova na agatua matua ma ũũgĩ ũtũũro-inĩ wake. (Thimo 27:11; thoma Jakubu 1:2, 3.) Ndetĩkagĩra kũgucĩrĩrio eke maũndũ moru. Mũndũ mũgima nĩ amenyaga ũndũ ũrĩa wagĩrĩire na akoragwo ehotorete kũwĩka.

11, 12. (a) Paulo ooigire atĩa igũrũ rĩgiĩ ‘ũhoti wa gũtaũkĩrũo’ wa Mũkristiano? (b) Nĩ na njĩra ĩrĩkũ gũtuĩka Mũkristiano mũgima kũngĩringithanio na gũtuĩka mũteng’eri?

¹¹ Kĩyo nĩ kĩbataranagia nĩguo mũndũ akorũo arĩ mũgima. Mũtũmwo Paulo aandĩkire ũũ: “Irio nyũmũ  nĩ cia andũ agima, arĩa mamenyeretie ũhoti wao wa gũtaũkĩrũo na njĩra ya kũũhũthĩra, makahota gũkũũrana wega na ũũru.” (Ahibirania 5:14) Kiugo “mamenyeretie” no gĩtũme twĩcirie ũhoro wa ũrĩa mũteng’eri emenyeragia.

¹² Rĩrĩa tuona mũteng’eri ũrĩ na ũhoti mwega agĩteng’era, nĩ tũmenyaga atĩ nĩ aabatarire ihinda na kwĩmenyeria nĩguo agĩe na ũhoti ũcio. Ndaaciarirũo arĩ mũteng’eri. Rĩrĩa mwana aciarũo, ndamenyaga wega kũhũthĩra moko na magũrũ make. No thutha wa ihinda, nĩ erutaga kũnyita indo na gũthiĩ. Angĩĩmenyeria, no atuĩke mũteng’eri. Na njĩra o ta ĩyo, nĩ tũbataraga ihinda na kwĩmenyeria nĩguo tũtuĩke Akristiano agima.

13. Nĩ kĩĩ kĩrĩtũteithagia kũgĩa na mwĩcirĩrie ta wa Jehova?

¹³ Ibuku-inĩ rĩrĩ, nĩ tũthuthurĩtie ũrĩa tũngĩgĩa na mwĩcirĩrie ta wa Jehova, na kuona maũndũ ta ũrĩa amonaga. Nĩ twĩrutĩte gũkenera na kwenda ithimi cia Jehova. Rĩrĩa tũratua matua, nĩ twĩyũragia ũũ: ‘Nĩ mawatho kana motaaro marĩkũ ma Bibilia mangĩhũthĩka ũndũ-inĩ ũyũ? Ingĩmahũthĩra atĩa? Hihi Jehova angĩenda njĩke atĩa?’—Thoma Thimo 3:5, 6; Jakubu 1:5.

14. Twagĩrĩirũo gwĩka atĩa nĩguo twake wĩtĩkio witũ?

¹⁴ Gũtirĩ hĩndĩ tũtigaga gwaka wĩtĩkio witũ harĩ Jehova. O ta ũrĩa kũrĩa irio njega gũtũteithagia kũgĩa mĩĩrĩ ĩrĩ na hinya, noguo kwĩruta ũhoro wĩgiĩ Jehova gũtũteithagia gwaka wĩtĩkio ũrĩ na hinya. Rĩrĩa twambĩrĩirie kwĩruta Bibilia, nĩ twerutire ma cia mũthingi ciĩgiĩ Jehova na njĩra ciake. No o ũrĩa mahinda marathiĩ, nĩ twagĩrĩirũo gũtaũkĩrũo nĩ maũndũ marikĩru. Ũguo  nĩguo Paulo eendaga kuuga rĩrĩa aagwetire ciugo ici: “Irio nyũmũ nĩ cia andũ agima.” Rĩrĩa twahũthĩra maũndũ marĩa tweruta, nĩ tũgĩaga na ũũgĩ. Bibilia ĩtwĩraga ũũ: “Ũũgĩ nĩguo ũndũ ũrĩa wa bata makĩria.”—Thimo 4:5-7; 1 Petero 2:2.

15. Gũkorũo na wendo wa ma harĩ Jehova na harĩ aarĩ na ariũ a Ithe witũ nĩ kwa bata mũno nĩkĩ?

¹⁵ Mũndũ no akorũo na hinya na ũgima mwega wa mwĩrĩ, no nĩ oĩ atĩ nĩgetha atũũre ũguo, no mũhaka athiĩ na mbere kwĩmenyerera. Na njĩra o ta ĩyo, mũndũ mũgima nĩ oĩ atĩ nĩ abatiĩ kwĩrutanĩria nĩguo atũũrie ũrata wake hamwe na Jehova ũrĩ na hinya. Paulo atũririkanagia ũndũ ũyũ: “Ikaragai mũkĩĩgeragia kana mũrĩ thĩinĩ wa wĩtĩkio; ikaragai mũgĩĩthuthuragia ũrĩa mũtariĩ kũna.” (2 Akorintho 13:5) O na kũrĩ ũguo, to wĩtĩkio ũrĩ na hinya tu tũbataraga. No mũhaka wendo witũ harĩ Jehova na harĩ aarĩ na ariũ a Ithe witũ ũthiĩ na mbere gũkũra. Paulo ooigire ũũ: “Ingĩkorũo na . . . ũmenyo wothe, o na ngorũo na wĩtĩkio mũnene ũngĩhota gũthamia irĩma, no ngorũo itarĩ na wendo, ndĩ wa tũhũ.”—1 Akorintho 13:1-3.

16. Shaitani angĩenda tũigue atĩa?

¹⁶ Shaitani endaga twĩcirie atĩ gũtirĩ hĩndĩ tũngĩagĩrĩra gũkenia Jehova. No ende tũigue tũkuĩte ngoro na twĩcirie atĩ mathĩna maitũ matirĩ kĩhonia. Ndendaga twĩhoke aarĩ na ariũ a Ithe witũ, na ndendaga tũkorũo na gĩkeno. (Aefeso 2:2) Shaitani nĩ oĩ atĩ mwĩcirĩrie ũtagĩrĩire no ũtũthũkie na ũthũkie ũrata witũ hamwe na Ngai. No Jehova nĩ atũheete kĩndũ gĩa gũtũteithia kũrũa na mwĩcirĩrie ũtagĩrĩire. Nĩ atũheete kĩĩrĩgĩrĩro.

17. Kĩĩrĩgĩrĩro gĩtũteithagia atĩa?

 ¹⁷ Thĩinĩ wa rĩandĩko rĩa 1 Athesalonike 5:8, Bibilia ĩringithanagia kĩĩrĩgĩrĩro gitũ na ngũbia ĩrĩa ĩgitagĩra mũtwe wa mũthigari hĩndĩ ĩrĩa arĩ mbaara-inĩ, ĩgeta ngũbia ĩyo “kĩĩrĩgĩrĩro kĩa ũhonokio.” Gũkorũo na kĩĩrĩgĩrĩro harĩ ciĩranĩro cia Jehova no kũgitĩre meciria maitũ na gũtũteithie kũregana na mwĩcirĩrie ũtagĩrĩire.

18, 19. Jesu eekĩrirũo hinya atĩa nĩ kĩĩrĩgĩrĩro kĩrĩa aarĩ nakĩo?

¹⁸ Kĩĩrĩgĩrĩro kĩrĩa Jesu aarĩ nakĩo nĩ kĩamũteithirie kũgĩa na hinya. Ũtukũ wa mũico wa ũtũũro wake gũkũ thĩ, nĩ aahiũranirie na moritũ maingĩ. Mũrata wake wa hakuhĩ nĩ aamũkunyanĩire. Ũngĩ akĩmũkaana akiuga atĩ o na ndamũũĩ. Nao angĩ makĩmũtiganĩria na makĩũra. Andũ a bũrũri wao makĩmũũkĩrĩra, na makiuga oragwo na njĩra ya kũnyarirũo. Nĩ kĩĩ kĩamũteithirie gũkirĩrĩria maũndũ macio maarĩ na ruo? “Nĩ ũndũ wa gĩkeno kĩrĩa kĩaigĩtwo mbere yake, nĩ aakirĩrĩirie mũtĩ  wa kũnyarirĩrũo na ndaamakirio nĩ gũconorithio na rĩu aikarĩte thĩ guoko-inĩ kwa ũrĩo gwa gĩtĩ kĩa ũnene kĩa Ngai.”—Ahibirania 12:2.

¹⁹ Jesu nĩ aamenyaga atĩ angĩaikarire arĩ mwĩhokeku, nĩ angĩagoocithirie Ithe na onanie atĩ Shaitani nĩ mũheenania. Kĩĩrĩgĩrĩro kĩu nĩ kĩamũreheire gĩkeno kĩnene. Ningĩ nĩ aamenyaga atĩ thutha wa ihinda inini nĩ angĩacokire kũrĩ Ithe kũrĩa igũrũ. Kĩĩrĩgĩrĩro kĩu nĩ kĩamũteithirie gũkirĩrĩria. O ta Jesu, no mũhaka tũige meciria maitũ harĩ kĩĩrĩgĩrĩro gitũ. Nĩ kĩrĩtũteithagia gũkirĩrĩria o na kũngĩthiĩ atĩa.

20. Nĩ kĩĩ kĩrĩgũteithagia gũkorũo na mwĩcirĩrie ũrĩa wagĩrĩire?

²⁰ Jehova nĩ onaga wĩtĩkio na ũkirĩrĩria waku. (Isaia 30:18; thoma Malaki 3:10.) Eranĩire atĩ “nĩ arĩkũhingagĩria merirĩria ma ngoro yaku.” (Thaburi 37:4) Nĩ ũndũ ũcio, igaga meciria maku harĩ kĩĩrĩgĩrĩro gĩaku. Shaitani endaga ũkue ngoro na wone ta ciĩranĩro cia Jehova  itakaahinga. No ndwagĩrĩirũo gwĩtĩkĩra gũtoorio nĩ mwĩcirĩrie ũtagĩrĩire! Ũngĩona ta kĩĩrĩgĩrĩro gĩaku kĩrathiĩ kĩagĩte hinya, hoya Jehova agũteithie. Ririkanaga ciugo ici irĩ thĩinĩ wa Afilipi 4:6, 7: “Mũtigatangĩkage nĩ ũndũ o na ũrĩkũ, no maũndũ-inĩ mothe menyithagiai Ngai maũndũ marĩa mũbataraga kũgerera mahoya na mathaithana o hamwe na gũcokia ngatho; naguo thayũ wa Ngai ũrĩa ũkĩrĩte ũtaũku wothe nĩ ũrĩgitagĩra ngoro cianyu na ũhoti wanyu wa gwĩciria kũgerera Kristo Jesu.”

21, 22. (a) Muoroto wa Jehova harĩ thĩ nĩ ũrĩkũ? (b) Wee ũtuĩte itua rĩa gwĩka atĩa?

²¹ Wĩcũranagie kaingĩ ũhoro wĩgiĩ ũtũũro mwega wa ihinda rĩũkĩte. Ica ikuhĩ, mũndũ wothe ũrĩ muoyo arĩthathayagia Jehova. (Kũguũrĩrio 7:9, 14) Ta wĩcirie ũhoro wĩgiĩ muoyo thĩinĩ wa thĩ njerũ. Ũgaakorũo ũrĩ mwega gũkĩra ũndũ o wothe tũngĩĩcirĩria! Shaitani, ndaimono ciake, na maũndũ mothe moru nĩ magaakorũo mathirĩte. Ndũkaarwara, na ndũgaakua. Ithenya rĩa ũguo, ũgookĩraga o mũthenya ũiyũirũo nĩ hinya na ũkenete nĩ ũndũ wa gũkorũo ũrĩ muoyo. Andũ othe makaaruta wĩra hamwe nĩguo matue thĩ paradiso. O mũndũ agaakoragwo na irio njega na handũ harĩ na ũgitĩri ha gũikara. Andũ matigaakoragwo marĩ oru kana marĩ na ũhinya no magaakoragwo marĩ na ũtugi kwerekera arĩa angĩ. Thutha wa ihinda, andũ othe thĩinĩ wa thĩ nĩ magaakenera “wĩyathi ũrĩ na riri wa ciana cia Ngai.”—Aroma 8:21.

²² Jehova endaga ũmũtue Mũrata waku ũrĩa mũnene. Nĩ ũndũ ũcio ĩka ũrĩa wothe ũngĩhota gwathĩkĩra Jehova na kũmũkuhĩrĩria o mũthenya. Rekei ithuothe tũtũũre wendo-inĩ wa Ngai tene na tene!—Judasi 21.