1, 2. Wee wendete Jehova Ngai nĩkĩ?

HIHI wee nĩ wendete Ngai? No kũhoteke nĩ ũmwendete mũno ũũ atĩ nĩ ũmwĩyamũrĩire. No gũkorũo ũmuonaga arĩ Mũrata waku wa hakuhĩ mũno. No o na ũtanenda Jehova, we nĩ aakwendete. Tũthomaga ũũ thĩinĩ wa Bibilia: “Ithuĩ twendanaga tondũ nĩwe waambire gũtwenda.”—1 Johana 4:19.

² Ta wĩcirie ũhoro wa njĩra iria ciothe Jehova atuonetie wendo wake nacio. Nĩ atũheete thĩ ĩtuĩke mũciĩ witũ mũthaka hamwe na indo ciothe iria tũbataraga nĩgetha tũkenere ũtũũro. (Mathayo 5:43-48; Kũguũrĩrio 4:11) Nĩ endaga tũkorũo na ũrata mwega hamwe nake, na nĩ atũmĩte tũhote kwĩruta ũhoro wake. Rĩrĩa tũrathoma Bibilia, tũkoragwo tũgĩthikĩrĩria Jehova. Na rĩrĩa tũrahoya, akoragwo agĩtũthikĩrĩria. (Thaburi 65:2) Atũtongoragia na agatũhe hinya kũgerera hinya wake mũnene wa roho mũtheru. (Luka 11:13) O na nĩ aatũmire Mũrũ wake endete gũkũ thĩ nĩguo atũkũũre kuuma harĩ mehia na gĩkuũ.—Thoma Johana 3:16; Aroma 5:8.

3. Tũngĩka atĩa nĩguo tũtũũrie ũrata mwega hamwe na Jehova?

 ³ Ta wĩcirie hanini ũhoro wa mũrata ũmwe waku wa hakuhĩ, mũndũ ũkoretwo hamwe nawe mahinda-inĩ ma gĩkeno na mahinda-inĩ ma kĩeha. Gũtũũria ũrata ta ũcio wa hakuhĩ ũrĩ mũrũmu nĩ kũbataraga kĩyo. Ũguo noguo gũtariĩ harĩ ũrata witũ hamwe na Jehova, Mũrata ũrĩa wa hakuhĩ mũno tũngĩgĩa nake. Ũrata witũ hamwe nake no ũtũũre tene na tene. Nĩ ũndũ ũcio Bibilia ĩtwĩraga ũũ: “Mwĩige wendo-inĩ wa Ngai.” (Judasi 21) Tũngĩka ũguo atĩa? Bibilia ĩcokagia ĩkoiga ũũ: “Kwenda Ngai nĩ atĩrĩ, tũrũmagĩrĩre maathani make; na maathani make ti mũrigo.”—1 Johana 5:3.

4, 5. Wendo waku harĩ Jehova waambĩrĩirie gũkũra atĩa?

⁴ Mũtũmwo Johana nĩ aandĩkire ũhoro wa wendo witũ harĩ Ngai. Hihi no ũririkane hĩndĩ ĩrĩa waambĩrĩirie kwenda Jehova?

⁵ Ta ririkana ũrĩa waiguire rĩrĩa werutire rĩa mbere atĩ Jehova nĩ endaga ũgaatũũra tene na tene thĩinĩ wa thĩ yake njerũ. Nĩ werutire ũhoro wa maũndũ mothe marĩa ekĩte nĩguo ũndũ ũcio ũhoteke, na ũkĩmenya atĩ Jehova nĩ aatũheire kĩheo kĩa goro rĩrĩa aatũmire Mũrũ wake mwene gũkũ thĩ. (Mathayo 20:28; Johana 8:29; Aroma 5:12, 18) O ũrĩa wamenyire ũrĩa Jehova akwendete, noguo ngoro yaku yahutirio, na o nawe ũkĩambĩrĩria kũmwenda.—Thoma 1 Johana 4:9, 10.

6. Kwenda mũndũ kũhutĩtie ũndũ ũrĩkũ? Wendo waku harĩ Ngai ũgũtindĩkĩte wĩke atĩa?

⁶ No ũndũ ũcio wa kũigua wendete Ngai warĩ o kĩambĩrĩria. Kwa ngerekano, tũngĩkorũo nĩ twendete mũndũ, nĩ twĩkaga makĩria ma kũmwĩra  “Nĩ ngwendete.” Wendo nĩ ũtũmaga twende gwĩka maũndũ mangĩtũma mũndũ ũcio akene. Na njĩra o ta ĩyo, wendo waku harĩ Jehova nĩ watũmire wende gũtũũra na njĩra ĩkũmũkenia. O ũrĩa wendo ũcio wakũrire, no kũhoteke nĩ wamwĩyamũrĩire na ũkĩbatithio. Rĩrĩa wekire ũguo, werĩire Jehova atĩ nĩ ũkũmũtungatĩra tene na tene. (Thoma Aroma 14:7, 8.) Ũngĩhingia atĩa kĩĩranĩro kĩu?

7. Angĩkorũo nĩ twendete Jehova-rĩ, tũgwĩka atĩa? Maathani mamwe make nĩ marĩkũ?

⁷ Tondũ nĩ twendete Jehova, nĩ ‘tũrũmagĩrĩra maathani make.’ Twĩkaga ũguo atĩa? Na njĩra ya kũmwathĩkĩra. Thĩinĩ wa Bibilia nĩ twĩrutaga ũrĩa Jehova endaga tũtũũre. Kwa ngerekano, nĩ atwĩraga atĩ nĩ ũũru kũrĩĩo, kũiya kana kũheenania, gũkoma na mũndũ tũtahikanĩtie nake, kana gũthathaiya mũndũ ũngĩ kana kĩndũ kĩngĩ tiga we.—1 Akorintho 5:11; 6:18; 10:14; Aefeso 4:28; Akolosai 3:9.

8, 9. Tũmenyaga atĩa ũrĩa Jehova arenda twĩke maũndũ-inĩ marĩa Bibilia ĩtaheanĩte watho wa ĩmwe kwa ĩmwe? Heana ngerekano.

⁸ No nĩgetha tũkenie Jehova, nĩ tũrabatara gwĩka makĩria ma gwathĩkĩra maathani make tu. Ndatũheete mawatho maingĩ megiĩ ũrĩa twagĩrĩirũo gwĩka maũndũ-inĩ mothe ma ũtũũro. Kwoguo nĩ kũrĩ hĩndĩ tũtarĩonaga watho wa ĩmwe kwa ĩmwe thĩinĩ wa Bibilia wa gũtwĩra ũrĩa twagĩrĩrũo gwĩka. Nĩ kĩĩ kĩngĩtũteithia gũtua matua mega? (Aefeso 5:17) Bibilia nĩ ĩkoragwo na motaaro, ma cia mũthingi iria itũrutaga ũrĩa Jehova onaga maũndũ. Na rĩrĩa twathoma Bibilia, nĩ tũmenyaga wega ũrĩa Jehova atariĩ. Nĩ twĩrutaga ũrĩa eciragia,  nginya maũndũ marĩa endete na marĩa athũire.—Thoma Thaburi 97:10; Thimo 6:16-19; rora Kohoro ka 1 Mũico-inĩ wa Ibuku.

⁹ Kwa ngerekano-rĩ, nĩ kĩĩ gĩtũteithagia kũmenya ũndũ ũrĩa tũkwĩrorera thĩinĩ wa TV kana intaneti-inĩ? Jehova ndatwĩrĩte ĩmwe kwa ĩmwe ũrĩa twagĩrĩirũo gwĩka. No motaaro marĩa atũheete no matũteithie gũtua matua mega. Mahinda-inĩ maya maũndũ maingĩ ma gwĩkenia maiyũrĩte ũhinya na ngomanio. Thĩinĩ wa Bibilia, Jehova atwĩraga atĩ “nĩ athũire mũndũ o wothe wendete ũhinya” na atĩ “nĩ agaatuĩra arĩa meingĩragia thĩinĩ wa ngomanio itagĩrĩire.” (Thaburi 11:5; Ahibirania 13:4) Motaaro macio mangĩtũteithia atĩa gũtua matua mega? Twarĩkia kũmenya atĩ Jehova nĩ athũire ũndũ mũna kana awonaga ũrĩ mũũru, twagĩrĩirũo kũwĩthema.

10, 11. Twathĩkagĩra Jehova nĩkĩ?

¹⁰ Twathĩkagĩra Jehova nĩkĩ? Tũtimwathĩkagĩra nogetha tu twĩtheme kũherithio kana mathĩna marĩa mangiumana na gũtua matua moru. (Agalatia 6:7) Twathĩkagĩra Jehova tondũ nĩ tũmwendete. O ta ũrĩa ciana ciendaga gũkenia ithe, ithuĩ twendaga gũkenia Ithe witũ wa igũrũ. Gũtirĩ ũndũ ũngĩkorũo ũrĩ mwega ta kũmenya atĩ Jehova nĩ arakenio nĩ ithuĩ!—Thaburi 5:12; Thimo 12:2; rora Kohoro ga 2 Mũico-inĩ wa Ibuku.

¹¹ Tũtiathĩkagĩra Jehova o rĩrĩa arĩ ũndũ mũhũthũ gwĩka ũguo kana rĩrĩa tũtarĩ na ũndũ ũngĩ tũngĩka. Na tũtithuuraga nĩ mawatho marĩkũ kana nĩ ithimi irĩkũ ciake tũkũrũmĩrĩra na nĩ irĩkũ tũtekũrũmĩrĩra. (Gũcokerithia Maathani 12:32) Handũ ha ũguo,  tũmwathĩkagĩra biũ, o ta mwandĩki wa thaburi ũrĩa woigire ũũ: “Nĩ ngenagio nĩ maathani maku, ti itherũ, nĩ ndĩmendete.” (Thaburi 119:47; Aroma 6:17) Tũngĩenda kũhaana ta Nuhu, ũrĩa woonanirie wendo wake harĩ Jehova na njĩra ya gwĩka ũrĩa wothe Jehova aamwathire eke. Bibilia yugaga atĩ “ũguo noguo [Nuhu] eekire.” (Kĩambĩrĩria 6:22) Hihi no wende Jehova oige ũguo igũrũ rĩaku?

12. Tũngĩka atĩa nĩguo tũkenie Jehova?

¹² Hihi Jehova aiguaga atĩa rĩrĩa twamwathĩkĩra? Nĩ ‘tũkenagia ngoro’ yake. (Thimo 11:20; 27:11) Ta wĩcirie ũndũ ũcio! Tũtũmaga Mũũmbi wa igũrũ na thĩ akene rĩrĩa twamwathĩkĩra. No gũtirĩ hĩndĩ atũtindĩkagĩrĩria twĩke ũguo. Ithenya rĩa ũguo, atũheete wĩyathi wa gwĩthuurĩra. Ũguo nĩ kuuga atĩ tũrĩ na wĩyathi wa gũthuura gwĩka ũndũ ũrĩa mwega kana ũrĩa mũũru. Jehova endaga wendo witũ harĩ we ũtũtindĩke gũtua matua mega nĩgetha tũkorũo na ũtũũro mwega biũ o ũrĩa kũngĩhoteka.—Gũcokerithia Maathani 30:15, 16, 19, 20; rora Kohoro ga 3 Mũico-inĩ wa Ibuku.

13, 14. Tũmenyaga atĩa atĩ maathani ma Ngai ti maritũ mũno ũndũ tũtangĩhota kũmathĩkĩra? Heana ngerekano.

¹³ Ĩ angĩkorũo twĩciragia atĩ maathani ma Jehova nĩ maritũ mũno ũndũ tũtangĩhota kũmathĩkĩra kana atĩ nĩ megũtũtunya wĩyathi witũ? Bibilia yugaga ũũ: “Maathani make ti mũrigo.” (1 Johana 5:3) Kiugo gĩa Kĩngiriki kĩrĩa gĩtaũrĩtwo “mũrigo” kiugĩte “kĩndũ kĩritũ.” Thĩinĩ wa maandĩko mangĩ, kiugo kĩu nĩ kĩhũthĩrĩtwo gũtaarĩria mawatho matarĩ ũigananĩru kana andũ arĩa mageragia gũtuurithia andũ na  kũmaatha nĩguo mamarũmĩrĩre. (Mathayo 23:4; Atũmwo 20:29, 30) Bibilia ya Holy Bible in Gĩkũyũ yugaga ũũ: “Maathani make ti maritũ.” Maathani ma Jehova ti “maritũ,” ũguo nĩ kuuga, ti maritũ mũno ũndũ tũtangĩhota kũmathĩkĩra. We nĩ onanagia ũigananĩru harĩ maũndũ marĩa atwĩraga twĩke.

¹⁴ Kwa ngerekano-rĩ, ta hũũra mbica ũgĩteithia mũrata gũthaamĩra mũciĩ mwerũ. Nĩ abangĩte mĩrigo yake yothe. Mĩrigo ĩmwe nĩ mĩhũthũ gũkuua, no ĩngĩ nĩ mĩritũ mũno na ĩrabatara gũkuuanĩrũo nĩ andũ erĩ. Hihi mũrata waku no akwĩre ũkuue mũrigo mũritũ mũno ũrĩ wiki? Hatarĩ nganja ndangĩka ũguo! Nĩkĩ? Tondũ ndangĩenda ũtihio. O ta mũrata ũcio, gũtirĩ hĩndĩ Jehova angĩtwĩra twĩke ũndũ aramenya nĩ mũritũ mũno. (Gũcokerithia Maathani 30:11-14) Jehova nĩ ataũkagĩrũo nĩ ũrĩa tũtariĩ. Nĩ “oĩ wega ũrĩa tũmbĩtwo, akaririkana atĩ tũrĩ o rũkũngũ.”—Thaburi 103:14.

15. Nĩ kĩĩ kĩngĩtũma tũkorũo na ma atĩ maathani ma Jehova nĩ ma gũtũguna?

¹⁵ Musa eerire rũrĩrĩ rwa Isiraeli atĩ maathani ma Jehova nĩ mangĩatũmire maũndũ mao “mathiage wega hingo ciothe” na atĩ wathĩki wao nĩ ũngĩamateithirie ‘mathiĩ na mbere gũtũũra muoyo.’ (Gũcokerithia Maathani 5:28-33; 6:24) Ũguo noguo kũrĩ nginya ũmũthĩ. Ũndũ o wothe Jehova atwĩraga twĩke nĩ wagĩragia ũtũũro witũ. (Thoma Isaia 48:17.) Hingo ciothe, Ithe witũ Jehova nĩ akoragwo oĩ ũndũ ũrĩa mwega harĩ ithuĩ. (Aroma 11:33) Bibilia ĩtwĩraga ũũ: “Ngai nĩ wendo.” (1 Johana 4:8) Ũguo nĩ kuuga atĩ ũndũ o wothe Jehova oigaga kana ageka, akoragwo atindĩkĩtwo nĩ wendo.

16. Tũmenyaga atĩa atĩ no tũhote gwathĩka o na gũtuĩka tũtirĩ akinyanĩru na tũratũũra thĩinĩ wa thĩ njũru?

 ¹⁶ Gwathĩkĩra Ngai gũtikoragwo kũrĩ ũndũ mũhũthũ hingo ciothe. Tũratũũra thĩinĩ wa thĩ njũru ĩrathwo nĩ Mũcukani. Nĩ ageragia gũtũma andũ meke maũndũ moru. (1 Johana 5:19) Ningĩ no mũhaka tũrũe na mĩerekera na meciria maitũ matarĩ makinyanĩru, tondũ no matũme twage gwathĩkĩra Ngai. (Aroma 7:21-25) No wendo witũ harĩ Jehova nĩ ũtũheaga hinya wa gwĩka ũrĩa kwagĩrĩire. Nĩ onaga kĩyo gitũ gĩa kũmwathĩkĩra, na agatũteithia na njĩra ya gũtũhe hinya wake mũnene wa roho mũtheru. (1 Samueli 15:22, 23; Atũmwo 5:32) Roho mũtheru ũtũteithagia gũkũria ngumo iria itũmaga akorũo arĩ ũndũ mũhũthũ harĩ ithuĩ kũmwathĩkĩra.—Agalatia 5:22, 23.

17, 18. (a) Nĩ maũndũ marĩkũ tũkwĩruta thĩinĩ wa ibuku rĩrĩ? (b) Tũkwarĩrĩria ũndũ ũrĩkũ gĩcunjĩ-inĩ kĩrĩa kĩrũmĩrĩire?

¹⁷ Thĩinĩ wa ibuku rĩrĩ, nĩ tũkwĩruta ũrĩa tũngĩtũũra na njĩra ĩgũkenia Jehova. Nĩ tũkwĩruta ũrĩa tũngĩhũthĩra motaaro make na ithimi ciake ciĩgiĩ mĩtugo ũtũũro-inĩ witũ. Ririkana atĩ gũtirĩ hĩndĩ Jehova atũtindĩkagĩrĩria tũmwathĩkĩre. Twathuura gũkorũo tũrĩ athĩki, ũtũũro witũ nĩ ũkwagagĩra na nĩ tũgũkorũo na kĩĩrĩgĩrĩro kĩa magegania kĩa ihinda rĩũkĩte. Na ũndũ wa bata o na makĩria nĩ atĩ, wathĩki witũ nĩ ũkuonia Ngai ũrĩa tũmwendete.—Rora Kohoro ga 4 Mũico-inĩ wa Ibuku.

¹⁸ Jehova nĩ aheete o ũmwe witũ thamiri, nĩgetha ĩtũteithagie kũmenya ũndũ ũrĩa mwega na ũrĩa mũũru. Tũngĩmenyeria thamiri itũ, no ĩtũteithie “tũrũmagĩrĩre maathani make.” Nĩ ũndũ ũcio-rĩ, thamiri itũ nĩ kĩĩ, na tũngĩmĩmenyeria atĩa? Reke tuone.