1-3. (a) Andũ aingĩ monaga wĩra wao atĩa? (b) Bibilia ĩgaathagĩrĩria woni ũrĩkũ wĩgiĩ wĩra, na tũgwĩciria ũhoro wa ciũria irĩkũ gĩcunjĩ-inĩ gĩkĩ?

ŨMŨTHĨ andũ aingĩ matikenagĩra wĩra. Kũruta wĩra ũtaramakenia mathaa maingĩ nĩ gũtũmaga mathũũre gũthiĩ wĩra o mũthenya. Andũ ta acio-rĩ, mangĩteithio atĩa magĩe na mwerekera ũrĩa wagĩrĩire wĩgiĩ wĩra wao, o na angĩkorũo matikũũkenera?

² Bibilia nĩ ĩgaathagĩrĩria gũkorũo na woni ũrĩa wagĩrĩire ũkoniĩ wĩra mũritũ. Yugaga atĩ, wĩra na moimĩrĩro maguo nĩ kĩheo. Suleimani aandĩkire ũũ: “Kĩheo kĩa Ngai nĩ gĩkĩ, atĩ o mũndũ arĩage na anyuage, na onage wega mĩĩtungumanĩrie-inĩ yake yothe.” (Kohelethu 3:13) Jehova, ũrĩa ũtwendete na wendaga gũtũhe kĩrĩa gĩtwagĩrĩire-rĩ, endaga tũkenere wĩra witũ o na maciaro maguo. Nĩgetha tũikarage twendetwo nĩwe-rĩ, tũrabatara gũtũũra kũringana na watho wake o hamwe na mawoni make megiĩ wĩra.—Kohelethu 2:24; 5:18.

³ Thĩinĩ wa Gĩcũnjĩ gĩkĩ nĩ tũgwĩciria ũhoro wa ciũria inya: Tũngĩkenera wĩra witũ atĩa? Nĩ mawĩra marĩkũ matangĩrutwo nĩ Akristiano a ma? Tũngĩigananĩria wĩra witũ wa kĩĩmwĩrĩ na maũndũ ma kĩĩroho atĩa? Na nĩ wĩra ũrĩkũ wa bata makĩria ũrĩa tũngĩruta? Rekei twambe tũthuthurie kĩonereria kĩa aruti wĩra arĩa erĩ me kĩyo mũno—Jehova Ngai na Jesu Kristo.

4, 5. Bibilia yonanagia atĩa atĩ Jehova nĩ mũruti wĩra ũkoragwo na moimĩrĩro mega?

⁴ Jehova nĩwe Mũruti Wĩra Ũrĩa Mũnene. Kĩambĩrĩria 1:1 yugaga ũũ: “O kĩambĩrĩria-rĩ, Ngai aatũmire kũgĩe matu-inĩ na gũkũ thĩ.” Ngai aarĩkia ũũmbi wake wa gũkũ thĩ-rĩ, oigire atĩ kĩndũ o gĩothe kĩrĩa ombĩte kĩarĩ “kĩega mũno.” (Kĩambĩrĩria 1:31) Nĩ aakenirio biũ nĩ wĩra wake wothe wa gũkũ thĩ. Jehova, Ngai ũrĩa ‘wĩkenagĩra’ hatirĩ nganja nĩ aakenirio nĩ gũkorũo arĩ mũruti wĩra wĩna moimĩrĩro mega.—Gũcokerithia Maathani 30:9.

⁵ Ngai witũ wĩ kĩyo atũũraga arutaga wĩra. Ihinda iraya thutha wa kũrĩĩka kwa ũũmbi wa thĩ o hamwe na indo ciothe iria irĩ kuo, Jesu oigire ũũ: “Awa nginya rĩu atũire o arutaga wĩra.” (Johana 5:17) Ithe akoretwo akĩruta wĩra ũrĩkũ? Arĩ gĩikaro gĩake kĩa igũrũ-rĩ, nĩ akoretwo na kĩyo gĩa gũtongoria na kũrũmbũiya andũ. Nĩ arutĩte “kĩũmbe kĩerũ,” Akristiano aamũre na roho arĩa thutha-inĩ magaathana na Jesu igũrũ. (2 Akorintho 5:17, The Holy Bible in Gĩkũyũ Language, 2007) Akoretwo akĩruta wĩra nĩguo ahingie itanya rĩake harĩ andũ—atĩ arĩa mamwendete makoona muoyo wa tene na tene thĩinĩ wa thĩ njerũ. (Aroma 6:23) No mũhaka Jehova akorũo nĩ akenagio nĩ moimĩrĩro ma wĩra ũcio. Andũ milioni nyingĩ nĩ metĩkĩrĩte ndũmĩrĩri ya Ũthamaki, makagucĩrĩrio nĩ Ngai na mageka ũgarũrũku ũtũũro-inĩ wao nĩguo maikarage mendetwo nĩwe.—Johana 6:44.

6, 7. Jesu akoretwo na ngumo ĩrĩkũ ya kũruta wĩra na kĩyo kwa ihinda iraya?

⁶ Jesu nĩ akoretwo na ngumo ya kũruta wĩra na kĩyo kwa ihinda iraya. Atanoka gũkũ thĩ-rĩ, Jesu nĩ ‘aateithĩrĩirie’ Ngai kũũmba indo ‘iria irĩ igũrũ, o na iria irĩ thĩ.’ (Thimo 8:22-31, The Holy Bible in Gĩkũyũ Language, 2007; Akolosai 1:15-17) O na rĩrĩa aarĩ gũkũ thĩ, Jesu nĩ aathire na mbere  kũruta wĩra na kĩyo. Arĩ mũnyinyi, nĩ eerutire wĩra wa gwaka, oĩkaine ta “mũtharamara.” * (Mariko 6:3) Wĩra ũcio nĩ ũkoragwo wĩ mũritũ na nĩ ũbataraga ũũgĩ wa mĩthemba mĩingĩ, na makĩria hĩndĩ ĩyo gũtaarĩ na ithĩi cia mbaũ, nduka cia kwendia mbaũ o na indo irahũthĩra thitima. Ta hũũra mbica Jesu agĩthiĩ gwetha mbaũ—hihi agĩtema mĩtĩ na akĩmĩkuua nginya o harĩa aarutagĩra wĩra! Ningĩ ta hũũra mbica agĩaka nyũmba—akĩhaarĩria na kũhũũrĩra mbaũ cia kũgita, agĩthondeka mĩrango o na kana indo imwe cia nyũmba! Hatarĩ nganja-rĩ, Jesu nĩ eeyoneire we mwene gĩkeno kĩrĩa kiumanaga na wĩra mũritũ ũrutĩtwo wega.

⁷ Jesu aarĩ mũruti wĩra wĩ kĩyo ũtungata-inĩ wake. Ihinda rĩa mĩaka ĩtatũ na nuthu-rĩ, nĩ eerutanĩirie biũ wĩra-inĩ ũcio wa bata makĩria. Tondũ nĩ eendaga kũhunjĩria andũ aingĩ o ũrĩa kũngĩahotekire-rĩ, ndaateaga mahinda, okĩraga tene na akaruta wĩra o nginya ũtukũ. (Luka 21:37, 38; Johana 3:2) Aathiaga “akĩhunguraga matũũra o na mĩciĩ, akahunjagia Ũhoro-ũrĩa-Mwega wa ũthamaki wa Ngai.” (Luka 8:1) Jesu nĩ aathire kilomita nyingĩ magũrũ agereire barabara cia tĩri, nĩgetha ahunjie ndũmĩrĩri ya ũhoro ũrĩa mwega kũrĩ andũ.

8, 9. Jesu aakeneire wĩra wake mũritũ atĩa?

⁸ Hihi Jesu nĩ aakeneire wĩra wake mũritũ ũtungata-inĩ? Ĩĩ! Aahandire mbeũ cia ma ya Ũthamaki, agĩtiga mĩgũnda yerũhĩte kũgethwo. Kũruta wĩra wa Ngai gwatũmaga Jesu agĩe na hinya na aiganĩre ũũ atĩ, o na nĩ aagaga kũrĩa nĩ getha ahingie wĩra ũcio. (Johana 4:31-38) Ta wĩcirie ũhoro wa gĩkeno kĩrĩa aagĩire nakĩo mũthia-inĩ wa ũtungata wake wa gũkũ thĩ rĩrĩa eerire Ithe arĩ na ma ũũ: “Nĩngũgoocithĩtie gũkũ thĩ, tondũ nĩndĩkĩtie wĩra ũrĩa wa’heire ndute.”—Johana 17:4.

 ⁹ Nĩ ma, Jehova na Jesu nĩo kĩonereria kĩrĩa kĩega makĩria kĩa arĩa makenagĩra wĩra wao mũritũ. Wendo witũ harĩ Jehova ũtũmaga twende “kwĩgerekania na Ngai.” (Aefeso 5:1) Wendo witũ harĩ Jesu ũtũmaga tũkinyage “o makinya-inĩ make.” (1 Petero 2:21) Kwoguo-rĩ, rekei rĩu tũthuthurie ũrĩa tũngĩkenera wĩra witũ mũritũ.

10, 11. Nĩ kĩĩ kĩngĩtũteithia gũkũria mwerekera ũrĩa wagĩrĩire wĩgiĩ wĩra witũ?

¹⁰ Akristiano a ma nĩ marutaga wĩra wa kĩĩmwĩrĩ. Nĩ twendaga gũkenera wĩra witũ o na kũiganĩra nĩ ũndũ waguo, no ũndũ ũcio no ũkorũo ũrĩ mũritũ angĩkorũo tũraruta wĩra ũtaratũkenia. O na kũrĩ ũguo-rĩ, tũngĩkenera wĩra witũ mũritũ atĩa?

¹¹ Na njĩra ya gũkũria mwerekera ũrĩa wagĩrĩire. Ti hingo ciothe tũngĩhota kũgarũrĩra ũrĩa maũndũ maitũ matariĩ, no no tũhote kũgarũrĩra mwerekera witũ. Gũikaraga tũgĩĩthugundaga mawoni ma Ngai, no gũtũteithie tũkũrie mwerekera ũrĩa wagĩrĩire wĩgiĩ wĩra. Kwa ngerekano-rĩ, angĩkorũo wee wĩ mũtwe wa famĩlĩ, ririkana atĩ wĩra waku, o na angĩkorũo ndũgũkenagia, nĩ ũkũhotithagia kũhingia mabataro ma famĩlĩ yaku. Kũrũmbũiya famĩlĩ yaku nĩ ũndũ wa bata mũno maitho-inĩ ma Ngai. Kiugo gĩake kiugaga atĩ mũndũ ũrĩa ũtateithagia famĩlĩ yake “nĩ mũũru gũkĩra mũndũ ũtarĩ etĩkia.” (1 Timotheo 5:8) Kũmenya atĩ wĩra waku nĩ ũgũteithagia kũhingia maũndũ marĩa wĩhokeirũo nĩ Ngai-rĩ, no gũgũteithie ũgĩe na gĩkeno na ũiganĩre, maũndũ marĩa andũ arĩa mũrutaga wĩra nao mangĩkorũo matarĩ namo.

12. Tũngĩgunĩka na njĩra irĩkũ nĩ ũndũ wa gũkorũo na kĩyo na tũrĩ ehokeku wĩra-inĩ witũ?

¹² Na njĩra ya gũkorũo na kĩyo na wĩhokeku. Gũkorũo na kĩyo na kwĩmenyeria kũruta wĩra wega no kũrehe irathimo.  Aruti wĩra me kĩyo na marutaga wĩra wega nĩ mendetwo nĩ arĩa mamandĩkĩte. (Thimo 12:24; 22:29) Tũrĩ Akristiano a ma-rĩ, ningĩ no mũhaka tũkorũo tũrĩ ehokeku wĩra-inĩ witũ—tũtikaiyage mbeca, indo wĩra-inĩ, kana mathaa ma ũrĩa ũtwandĩkĩte. (Aefeso 4:28) O ta ũrĩa tuonire Gĩcunjĩ-inĩ gĩa 14, wĩhokeku nĩ ũrĩ ũguni. Mũruti wĩra ũĩkaine nĩ mwĩhokeku no ehokerũo maũndũ maingĩ. Na kana ũrĩa ũtwandĩkĩte nĩ onaga kĩonereria giitũ kĩega tũrĩ aruti wĩra me kĩyo kana aca-rĩ, no tũgĩe na gĩkeno kĩrĩa kĩumanaga na gũkorũo na “thamiri ĩtarĩ ũcuke,” na kũmenya atĩ nĩ tũrakenia Ngai ũrĩa twendete.—Ahibirania 13:18; Akolosai 3:22-24.

13. Kĩonereria giitũ kĩega tũrĩ wĩra-inĩ kĩngĩkorũo na moimĩrĩro marĩkũ?

 ¹³ Na njĩra ya kũmenya atĩ mĩthiĩre iitũ no ĩgoocithie Ngai. Twatũũria mĩthiĩre mĩega ya Gĩkristiano tũrĩ kũrĩa tũrutagĩra wĩra-rĩ, andũ arĩa angĩ nĩ marĩonaga. Moimĩrĩro megũkorũo me marĩkũ? Nĩ tũrĩtĩithagia “ũrutani ũrĩa wa Ngai Mũhonokia witũ.” (Tito 2:9, 10) Nĩ ma, mĩthiĩre iitũ mĩega no itũme andũ angĩ mone wega wa ũthathaiya witũ, na magucĩrĩrio. Ta wĩcirie ũrĩa ũngĩigua ngoro mũndũ mũrutaga wĩra nake angĩtĩkĩra ma ya Bibilia nĩ ũndũ wa kĩonereria gĩaku kĩega ũrĩ wĩra-inĩ! O na makĩria-rĩ, ta wĩcirie ũũ: Nĩ ũndũ ũngĩ ũrĩkũ ũngĩkorũo ũrĩ mwega makĩria gũkĩra kũmenya atĩ mĩthiĩre yaku mĩega nĩ ĩgoocithagia Jehova na ĩgatũma ngoro yake ĩkene?—Thimo 27:11; 1 Petero 2:12.

14-16. Rĩrĩa tũgũthuura wĩra-rĩ, nĩ ciũria irĩkũ cia bata twagĩrĩire gwĩciria ũhoro wa cio?

¹⁴ Bibilia ndĩgwetete mawĩra marĩa magĩrĩire na matagĩrĩire ma kĩĩmwĩrĩ. Ũguo ti kuuga atĩ no twĩtĩkĩre wĩra o wothe o na angĩkorũo ũkoniĩ maũndũ marĩkũ. Maandĩko no matũteithie gũthuura wĩra mwega, ũrĩa ũringaine na watho na ũngĩkenia Ngai, na twĩtheme mawĩra marĩa mangĩmũrakaria. (Thimo 2:6) Rĩrĩa tũgũthuura wĩra-rĩ, harĩ ciũria igĩrĩ cia bata twagĩrĩirũo nĩ gwĩciria ũhoro wacio.

¹⁵ Hihi kũruta wĩra ũcio no gũtũme ngorũo ngĩka ũndũ mũkaananie thĩinĩ wa Bibilia? Kiugo kĩa Ngai nĩ gĩkaananĩtie kũiya, kũheenania na gũthondeka mĩhianano. (Thama 20:4; Atũmwo 15:29; Aefeso 4:28; Kũguũrĩrio 21:8) Ithuĩ no tũrege wĩra o wothe ũrĩa ũngĩtũma twĩke maũndũ ta macio. Wendo witũ harĩ Jehova ndũngĩtwĩtĩkĩria tũrute wĩra ũngĩtũma twĩke maũndũ mararegana na watho wa Ngai.—1 Johana 5:3.

¹⁶ Hihi kũruta wĩra ũcio no gũtũme tũkorũo tũkĩnyitanĩra  kana tũkĩgaathĩrĩria mũtugo mũũru? Ta wĩcirie ũhoro wa ngerekano ĩno? Wĩra wa karani guo mwene ti mũũru. No o na kũrĩ ũguo-rĩ, ĩ Mũkristiano angĩheo wĩra ta ũcio thĩinĩ wa thibitarĩ ya kũruta nda? Nĩ ma, wĩra wake ndũkũbatara akorũo agĩteithĩrĩria kũruta nda na njĩra ya ĩmwe kwa ĩmwe. No o na kũrĩ ũguo-rĩ, githĩ wĩra ũcio wake ndũngĩkorũo ũgĩteithĩrĩria thĩbitari ĩyo, ĩrĩa wĩra wayo nĩ gũteithĩrĩria kũruta nda— mũtugo mũkaananie nĩ Kiugo kĩa  Ngai. (Thama 21:22-24) Tũrĩ andũ mendete Jehova-rĩ, tũtingĩenda gũkuruhanio na mĩtugo ĩtarĩ mĩtĩkĩrie nĩ Maandĩko.

17. (a) Nĩ maũndũ marĩkũ tũngĩĩciria ũhoro wa mo rĩrĩa tũgũtua matua megiĩ wĩra? (Rora ithandũkũ rĩrĩa rĩrĩ karatathi-inĩ ka 177.) (b) Thamiri iitũ ingĩtũteithia atĩa gũtua matua marĩa makenagia Ngai?

¹⁷ Ciũria nyingĩ ikoniĩ wĩra no icokio na njĩra ya gũthuthuria wega macokio ma ciũria icio igĩrĩ cia bata ikũũrĩtio thĩinĩ wa kĩbungo gĩa 15 na 16. Ningĩ-rĩ, nĩ harĩ maũndũ mangĩ twagĩrĩirũo nĩ gwĩciria ũhoro wamo mũno rĩrĩa tũgũtua itua rĩgiĩ wĩra. * Tũtingĩĩrĩgĩrĩra ngombo ĩrĩa ĩĩhokekete na njũgĩ ĩheane mawatho mekũhutia maũndũ mothe megiĩ wĩra. Maũndũ-inĩ ta macio tũrabatara kũhũthĩra  ũũgĩ. O ta ũrĩa twerutire thĩinĩ wa Gĩcunjĩ gĩa 2, nĩ tũrabatara kũruta na kũmenyeria thamiri iitũ na njĩra ya kwĩruta ũrĩa tũngĩhũthĩra Kiugo kĩa Ngai mũtũũrĩre-inĩ witũ wa o mũthenya. Tũrĩ na ũhoti wa “gũkũũrana wega na ũũru” ũmenyeretio na njĩra ya ‘kũũhũthĩra,’ thamiri iitũ no ĩtũteithie gũtua matua marĩkenagia Ngai na ĩtũhotithagie gũikaraga twendetwo nĩwe.—Ahibirania 5:14.

18. Nĩkĩ atarĩ ũndũ mũhũthũ gũtũũria ũigananĩru wa kĩĩroho?

¹⁸ Gũtua matua marĩa marĩtũteithagia hingo ciothe gũikaraga twĩtĩkĩrĩkĩte nĩ Jehova matukũ-inĩ maya “ma kũrigĩrĩria” na ma “ũgwati” ti ũndũ mũhũthũ. (2 Timotheo 3:1) Kũgĩa na wĩra na kũũtũria no akorũo arĩ ũndũ mũritũ. Tũrĩ Akristiano a ma-rĩ, nĩ tũmenyaga bata wa kũruta wĩra na kĩyo nĩ getha tũhingagĩrie famĩlĩ ciitũ mabataro ma cio. No tũngĩaga kwĩmenyerera-rĩ, ũgucania ũrĩa ũkoragwo wĩra-inĩ kana mwĩcirĩrie mũũru wa kwenda ũtonga wa thĩ ĩno no itũme tũremwo nĩ kũhingia maũndũ maitũ ma kĩĩroho. (1 Timotheo 6:9, 10) Rekei twĩcirie ũrĩa tũngĩtũũria ũigananĩru, na tũhotage gũthuura maũndũ “marĩa maagĩrĩire kũrĩ marĩa mangĩ.”—Afilipi 1:10.

19. Twagĩrĩirũo nĩ kwĩhoka Jehova na ngoro yothe nĩkĩ, na gwĩka ũguo gũtũteithagia gwĩthema ũndũ ũrĩkũ?

¹⁹ Wĩhokage Jehova na ngoro yaku yothe. (Thimo 3:5, 6) Na githĩ tũtiagĩrĩire kũmwĩhoka tondũ nĩ atũrũmbũyagia mũno? (1 Petero 5:7) Nĩ oĩ mabataro maitũ o na gũkĩra ũrĩa ithuĩ tũmoĩ na hingo ciothe nĩ atũrũmbũyagia. (Thaburi 37:25) Kwoguo nĩ wega twathĩke rĩrĩa Kiugo gĩake gĩatũririkania ũũ: “Mĩikarĩre-inĩ yanyu-rĩ, ikaragai mũtegũkorokera mbia; na mũiganagwo nĩ indo iria mwĩ nacio: amu Ngai we mwene nĩoigĩte atĩrĩ, Ndirĩ hĩndĩ ngagũtigĩrĩra, kana ndigane nawe o na atĩa.” (Ahibirania 13:5) Ndungata nyingĩ cia  mahinda mothe no irute ũira atĩ, Ngai nĩ ahingagĩria andũ mabataro mao ma ũtũũro. Angĩkorũo nĩ twĩtĩkĩtie kũna atĩ Jehova nĩ egũtũrũmbũiya-rĩ, tũtigũtangĩka mũno igũrũ rĩgiĩ gũcarĩria famĩlĩ ciitũ mabataro mao. (Mathayo 6:25-32) Tũtikũreka wĩra witũ ũtũme tũtiganĩrie maũndũ ma kĩĩroho, ta kũhunjia na gũthiĩ mĩcemanio.—Mathayo 24:14; Ahibirania 10:24, 25.

20. Gũikara tũrĩ na riitho irũngĩrĩru nĩ kuuga atĩa, na ũngĩtũũria muonere ta ũcio atĩa?

 ²⁰ Ikaraga ũrĩ na riitho irũngĩrĩru. (Mathayo 6:22, 23) Gũkorũo na riitho irũngĩrĩru nĩ kuuga atĩ, tũige mũtũũrĩre witũ ũtarĩ na maũndũ maingĩ. Riitho irũngĩrĩru rĩa Mũkristiano rĩikaraga rĩcũthĩrĩirie muoroto o ũmwe—gwĩkaga wendi wa Ngai. Angĩkorũo riitho riitũ nĩ irũngĩrĩru wega-rĩ, tũtigũtahwo nĩ gũteng’erania na mawĩra ma mbeca nyingĩ na mũtũũrĩre wa igũrũ. Ningĩ-rĩ, tũtirĩteng’eranagia na indo iria cioima, iria endia mendaga tuone ta arĩ o mũhaka tũkorũo nacio nĩgetha tũkene. Hihi ũngĩtũũria riitho irũngĩrĩru na njĩra ĩrĩkũ? Wĩtheme mathiirĩ matarĩ ma o mũhaka. Ndũkagĩe na indo nyingĩ iria irĩkuaga mahinda maku maingĩ. Athĩkĩra watho wa Bibilia wa kũiganũo nĩ “irio na nguo.” (1 Timotheo 6:8) Geria kũhũthia mũtũũrĩre waku o ta ũrĩa kwahoteka.

21. Tũrabatara kũmenya maũndũ marĩa tũkũiga mbere nĩkĩ, na nĩ ũndũ ũrĩkũ twagĩrĩirũo kũiga mbere ũtũũro-inĩ witũ?

²¹ Iga maũndũ ma kĩĩroho mbere na ũmarũmie. Tondũ tũtingĩhota kũhingia maũndũ mothe ũtũũro-inĩ witũ-rĩ, tũrabatara kũmenya nĩ maũndũ marĩkũ tũkũiga mbere. Tũngĩaga gwĩka ũguo-rĩ, maũndũ matarĩ ma bata mũno no moe kahinda gaitũ gothe, na twage kũhingia maũndũ marĩa ma bata. Nĩ ũndũ ũrĩkũ wagĩrĩirũo gũkorũo ũrĩ wa bata makĩria mũtũũrĩre-inĩ witũ? Andũ aingĩ thĩinĩ wa thĩ ĩno mekagĩrĩra mũno kũgĩa na gĩthomo kĩa igũrũ nĩgetha makaagĩa na wĩra mwega. No rĩrĩ, Jesu eerire arũmĩrĩri ake ũũ: “Ambai mũcarie ũthamaki wa Ngai.” (Mathayo 6:33) Tũrĩ Akristiano a ma-rĩ, tũigaga Ũthamaki wa Ngai mbere ũtũũro-inĩ witũ. Mũtũũrĩre witũ—maũndũ marĩa tũthuuraga, mĩoroto ĩrĩa tũkoragwo nayo, na maũndũ marĩa tũthingataga—wagĩrĩirũo kuonania atĩ Ũthamaki wa Ngai nĩ wa bata harĩ ithuĩ gũkĩra maũndũ mangĩ o mothe ma kĩĩmwĩrĩ.

22, 23. (a) Nĩ wĩra ũrĩkũ wa bata makĩria harĩ Akristiano a ma, na tũngĩonania atĩa atĩ wĩra ũcio nĩ wa bata harĩ ithuĩ? (Rora ithandũkũ rĩrĩ na kĩongo “ Itua Rĩakwa Nĩ Rĩandeheire Gĩkeno na Kũiganĩra Ũtũũro-inĩ.”) (b) Ũgũtua itua rĩrĩkũ rĩgiĩ wĩra wa kĩĩmwĩrĩ?

²² Nĩ ũndũ wa kũmenya atĩ tũratũũra mũthia-inĩ wa matukũ maya ma kũrigĩrĩria-rĩ, tũikaraga tũrĩ na kĩyo harĩ wĩra ũrĩa wa bata makĩria harĩ Akristiano a ma—kũhunjia na gũtua andũ arutwo. (Mathayo 24:14; 28:19, 20) O ta Jesu, ũrĩa arĩ we kĩonereria giitũ, tũkwenda gũkoragwo na kĩyo wĩra-inĩ ũcio wa kũhonokia mĩoyo. Tũngĩonania atĩa atĩ wĩra ũcio nĩ wa bata mũno harĩ ithũĩ? Andũ aingĩ a Ngai nĩ merutagĩra wĩra-inĩ wa kũhunjia na ngoro yao yothe marĩ ahunjia a kĩũngano. Amwe nĩ mabangĩte maũndũ mao nĩ getha matungate marĩ mapainia kana amishonarĩ. Nĩ ũndũ wa kũmenya bata wa mĩoroto ya kĩĩroho-rĩ, aciari aingĩ nĩ mekĩrĩte ciana ciao ngoro cigĩe na itanya rĩa kũingĩra wĩra-inĩ wa ũtungata wa hĩndĩ-ciothe. Hihi ahunjia a Ũthamaki me kĩyo nĩ makenagĩra wĩra wao mũritũ thĩinĩ wa ũtungata? Ĩĩ nĩ makenagĩra! Gũtungatĩra Jehova na ngoro yothe nĩyo njĩra ĩrĩa na ma ĩngĩtũma tũgĩe na mũtũũrĩre wĩ gĩkeno, tũiganĩre na tũgĩe na irathimo nyingĩ.—Thimo 10:22.

²³ Aingĩ aitũ tũrutaga wĩra wa kĩĩmwĩrĩ mathaa maingĩ nĩ getha tũhingĩrie famĩlĩ ciitũ mabataro macio. Ririkana atĩ Jehova endaga tũkenere wĩra witũ mũritũ. Tũngĩreka mwerekera witũ o hamwe na ciĩko ciitũ iringane na mawoni na mawatho ma Jehova-rĩ, no tũkenere wĩra witũ. No rĩrĩ, rekei tũtue itua rĩa kwaga gwĩtĩkĩria wĩra wa kĩĩmwĩrĩ ũingĩrĩre wĩra witũ ũrĩa wa bata makĩria—wa kũhunjia ũhoro ũrĩa mwega wa Ũthamaki wa Ngai. Na njĩra ya gũtua wĩra ũcio arĩ guo wa bata makĩria ũtũũro-inĩ witũ-rĩ, tuonanagia wendo witũ harĩ Jehova na kwoguo tũgaikaraga twendetwo nĩwe.