1, 2. Nĩ kĩĩ gĩgũtindĩkaga wee wende Jehova Ngai?

HIHI wee nĩwendete Ngai? Akorũo wee nĩ wĩyamũrĩire Jehova Ngai-rĩ, icokio rĩaku nĩ ĩĩ—na ũcio nĩ ũndũ mwega! Nĩ ũndũ wa ndũire ithuĩ kwenda Jehova. Twendaga Ngai tondũ wa ũrĩa we atwendete. Bibilia ĩgwetaga ũndũ ũcio ũũ: “Ithuĩ twendanaga nĩ ũndũ nĩwe waambire gũtwenda mbere.”—1 Johana 4:19.

² Jehova nĩ oyete ikinya rĩa kuonania nĩ atwendete. Nĩ atũheete thĩ thaka ĩtuĩke mũciĩ witũ. Nĩ arũmbũyagia mabataro maitũ ma kĩĩmwĩrĩ. (Mathayo 5:43-48) Ũndũ wa bata makĩria-rĩ, nĩ atũhingagĩria mabataro maitũ ma kĩĩroho. Nĩ atũheete Kiugo gĩake, Bibilia. Ningĩ-rĩ, atwĩraga tũmũhoyage tũrĩ na ma atĩ nĩ arĩtũthikagĩrĩria na nĩ arĩtũheaga roho mũtheru ũtũteithagie. (Thaburi 65:2; Luka 11:13) Igũrũ rĩa mothe-rĩ, nĩ aatũmire Mũrũ wake endete mũno atuĩke Mũkũũri nĩgetha tũhonokio kuuma mehia-inĩ na gĩkuũ. Nĩ wendo mũnene atĩa Jehova atuonetie!—Johana 3:16; Aroma 5:8.

3. (a) Twagĩrĩirũo gwĩka atĩa nĩguo tũtũũre wendo-inĩ wa Ngai? (b) Nĩ kĩũria kĩrĩkũ kĩa bata twagĩrĩirũo nĩ kwĩyũria, na macokio monekaga ha?

³ Jehova endaga tũgunĩke nĩ wendo wake tene na tene.  No nĩ ithuĩ tũgũthuura kana nĩ tũkũgunĩka kana aca. Kiugo kĩa Ngai gĩtwĩraga ũũ: “Mwĩigeei thĩnĩ wa wendo wa Ngai . . . [nĩguo] amũhe muoyo wa tene na tene.” (Judasi 21, The Holy Bible in Gĩkũyũ Language, 2007) Kiugo “mwĩigeei” kĩronania atĩ nĩgetha tũtũũre twendetwo nĩ Ngai-rĩ, ciĩko nĩ irabatarania. Tũrabatara kuonania na njĩra ironeka atĩ nĩ tũkenagĩra wendo wake. Kwoguo kĩũria kĩa bata tũngĩĩyũria nĩ rĩrĩ, ‘Niĩ ingĩonania atĩa wendo wakwa harĩ Ngai?’ Macokio marĩ thĩinĩ wa ciugo cia mũtũmwo Johana iria itongoretio nĩ roho: “Amu kwenda Ngai nĩ atĩrĩ, nĩ tũmenyagĩrĩre maathani make; namo maathani make matirĩ thĩna.” (1 Johana 5:3) Twagĩrĩirũo gũthuthuria na kinyi  ũrĩa ciugo icio ciugĩte, tondũ nĩ tũrenda kuonia Ngai witũ ũrĩa tũmwendete.

4, 5. Taarĩria ũrĩa wendo harĩ Jehova waambĩrĩirie gũkũra thĩinĩ wa ngoro yaku.

⁴ “Kwenda Ngai”—mũtũmwo Johana eendaga kuuga atĩa akĩandĩka ciugo icio? Aaragia ũhoro wa wendo mũnene ũrĩa o mũndũ akoragwo naguo kwerekera Ngai. Hihi no ũririkane rĩrĩa wendo harĩ Jehova waambĩrĩirie gũkũra thĩinĩ wa ngoro yaku?

⁵ Ta ririkana rĩrĩa werutire ma ĩkoniĩ Jehova na muoroto wake na ũkĩambĩrĩria kũgĩa na wĩtĩkio. Ũkĩmenya atĩ o na gũtuĩka waciarĩtwo ũrĩ mwĩhia na ndwarĩ na ũkuruhanu na Ngai o na hanini-rĩ, Jehova kũgerera Kristo nĩ aahingũrire njĩra nĩgetha ũkoona ũkinyanĩru ũrĩa Adamu aateire na ũgĩe na muoyo wa tene na tene. (Mathayo 20:28; Aroma 5:12, 18) Ũkĩambĩrĩria kũmenya bata wa igongona rĩrĩa Jehova aaheanire hĩndĩ ĩrĩa aatũmire Mũrũ wake ũrĩa endete mũno akue ithenya rĩaku. Ngoro yaku ĩkĩhutio, na ũkĩambĩrĩria kwenda Ngai ũcio wonanirie wendo mũnene ũguo harĩ we.—1 Johana 4:9, 10.

6. Wendo wa ma wonanagio atĩa, na kwenda Ngai gwatũmire wĩke atĩa?

⁶ No rĩrĩ, ũguo waiguire warĩ o kĩambĩrĩria tu kĩa wendo wa ma kwerekera Jehova. Wendo to ũndũ mũndũ aiguaga na kũu ngoro-inĩ. Wendo wa ma kwerekera Ngai to kuuga na kanua tu atĩ, “Niĩ nĩ nyendete Jehova.” O ta wĩtĩkio-rĩ, wendo wa ma wonanagio na ciĩko iria ciumanaga naguo. (Jakubu 2:26) Tuonanagia wendo witũ na njĩra ya gwĩka maũndũ marĩa makenagia mũndũ ũcio twendete. Kwoguo-rĩ, rĩrĩa wambĩrĩirie kwenda Jehova thĩinĩ wa ngoro yaku, nĩ wakũririe wendi wa gũtũũra na njĩra ĩgũkenia Ithe waku wa igũrũ. Hihi wee wĩ Mũira mũbatithie? Akorũo nĩguo-rĩ, wendo  ũcio mũnene na kwĩrutĩra nĩguo watũmire woe ikinya rĩrĩa rĩa bata mũno ũtũũro-inĩ waku. Nĩ weyamũrĩire Jehova nĩguo wĩke wendi wake, na ũkĩonania wĩyamũrĩri waku na njĩra ya kũbatithio. (Aroma 14:7, 8) Kũhingia kĩĩranĩro kĩu giitũ harĩ Jehova nĩ hamwe na gwĩka ũrĩa mũtũmwo Johana acokete akoiga.

7. Maathani mamwe ma Ngai nĩ marĩkũ na ũngĩonania atĩa nĩ ũramamenyerera?

⁷ Johana nĩ ataarĩirie ũrĩa kwenda Ngai kuugĩte: “Tũmenyagĩrĩre maathani make.” Maathani ma Ngai nĩ marĩkũ? Jehova nĩ atũheete maathani maingĩ thĩinĩ wa Kiugo gĩake, Bibilia. Kwa ngerekano-rĩ, nĩ agirĩtie mĩtugo ta ũrĩĩu, ũtharia, kũhoya mĩhianano, kũiya, na kũheenania. (1 Akorintho 5:11; 6:18; 10:14; Aefeso 4:28; Akolosai 3:9) Kũmenyerera maathani ma Ngai nĩ hamwe na kũrũmĩrĩra watho wa Bibilia wĩgiĩ mĩtugo mĩega.

8, 9. Tũngĩmenya atĩa kĩrĩa gĩkenagia Jehova o na maũndũ-inĩ marĩa matahutĩtio ĩmwe kwa ĩmwe nĩ watho wa Bibilia? Heana ngerekano.

⁸ No nĩgetha tũkenie Jehova-rĩ, tũtirabatara o gwathĩkĩra maathani marĩa tu agwetete. Jehova ndatũhinyagĩrĩria na mawatho ma gũtwĩra ũrĩa tũgwĩka maũndũ-inĩ mothe ma ũtũũro wa o mũthenya. Kwoguo-rĩ, o mũthenya nĩ tũcemanagia na maũndũ maingĩ marĩa Bibilia ĩtagwetete watho mũna kũmerekera. Hĩndĩ ta ĩyo-rĩ, tũngĩmenya atĩa ũndũ ũrĩa ũgũkenia Jehova? Bibilia nĩ yonanagia wega meciria ma Ngai. Tweruta Bibilia-rĩ, nĩ tũmenyaga kĩrĩa Jehova endete na kĩrĩa amenete. (Thaburi 97:10; Thimo 6:16-19) Nĩ tũmenyaga mĩerekera na ciĩko iria endete. O ũrĩa tũreruta ũrĩa Jehova ahaana na ngumo ciake-rĩ, noguo tũkũhota kũreka meciria make matongorie matua maitũ na ciĩko ciitũ. Nĩũndũ ũcio-rĩ,  o na harĩa hatarĩ na watho mũna wa Bibilia, kaingĩ no tũmenye “ũrĩa [Jehova] endaga gwĩkwo.”—Aefeso 5:17.

⁹ Kwa ngerekano-rĩ, gũtirĩ handũ Bibilia ĩtwĩraga ĩmwe kwa ĩmwe atĩ tutikerorere thenema kana tabarĩra cia TV irĩ na maũndũ moru ma ũhinya kana ma waganu. No rĩrĩ, hihi nĩ tũrabatara watho mũna wa gũtwĩra tũtikerorere maũndũ ta macio? Nĩtũũĩ ũrĩa Jehova onaga maũndũ macio. Kiugo gĩake gĩtwĩraga wega atĩ, ngoro ya Jehova nĩ ĩthũire “ũrĩa mwendi ũtoi.” (Thaburi 11:5) Ningĩ nĩ kiugĩte atĩ: “Ahũri-maraya o na atharania nĩ Ngai ũkamatuĩra ituĩro.” (Ahibirania 13:4) Tũngĩĩciria ũhoro wa ciugo icio cia Ngai-rĩ, no tũmenye wega wendi wa Jehova nĩ ũrĩkũ. Kwoguo tũthuuraga kwaga gũkenio nĩ kwĩrorera maũndũ maronania mĩtugo ĩrĩa Ngai athũire. Nĩtũũĩ atĩ Jehova nĩ akenaga rĩrĩa twethema mĩtugo mĩũru ĩrĩa thĩ ĩno ĩgeragia kuonania atĩ no ikeno itarĩ njũru tu. *

10, 11. Tũthuuraga gwathĩkĩra Jehova nĩkĩ, na twagĩrĩirũo kũmũhe wathĩki wa mũthemba ũrĩkũ?

¹⁰ Gĩtũmi kĩnene gĩa gwathĩkĩra maathani ma Ngai nĩ kĩrĩkũ? Nĩkĩ gĩtũmaga twende gũtũũra o mũthenya kũringana na ũrĩa tũũĩ atĩ nĩguo mwĩcirĩrie wa Ngai? To getha tu tũtikaherithio kana atĩ twĩtheme moimĩrĩro marĩa monagwo nĩ arĩa maregaga gwĩka wendi wa Ngai. (Agalatia 6:7) Ithenya rĩa ũguo-rĩ, tuonaga gwathĩkĩra Jehova arĩ mweke mwega wa kuonania wendo witũ harĩ we. O ta ũrĩa kaana kendaga gũkenia ithe-rĩ, noguo o na ithuĩ twendega gũkenia Jehova. (Thaburi 5:12) Nĩwe Ithe witũ, na nĩ tũmwendete. Gũtirĩ ũndũ ũtũrehagĩra gĩkeno kĩnene kana kũiganĩra gũkĩra kũmenya atĩ tũratũũra na njĩra ‘tũrĩtugagwo nĩ Jehova.’—Thimo 12:2.

 ¹¹ Kwoguo gwathĩka gwitũ ti gwa kũringĩrĩrio, o na to maũndũ-inĩ mamwe tu, kana tũgekĩra mĩhaka. * Tũtithuuraga nĩ maathani marĩkũ tũkũrũmĩrĩra na nĩ marĩkũ tũtekũrũmĩrĩra, kana gwathĩka o rĩrĩa tu hatarĩ na ũritũ mũnene. Ithenya rĩa ũguo-rĩ, ‘tũmwathĩkagĩra na ngoro.’ (Aroma 6:17) Tũiguaga o ta mwandĩki wa Thaburi ũrĩa woigire ũũ: “Ngũtũũra ndĩĩkenagĩra nĩ ũndũ wa maathani maku, arĩ mo ngĩendete.” (Thaburi 119:47) Ĩĩ, nĩ twendete gwathĩkĩra Jehova. Nĩ tũmenyaga atĩ nĩ agĩrĩirũo—na nĩ endaga—tũmwathĩkĩre na ngoro yothe na tũtekũmwĩkĩrĩra mĩhaka. (Gũcokerithia Maathani 12:32) Twendaga Jehova oige igũrũ riitũ ũrĩa Kiugo gĩake kiugaga igũrũ rĩgiĩ Nuhu. Igũrũ rĩgiĩ mũthuri ũcio mwĩhokeku na woonanirie atĩ nĩendete Ngai kwa ihinda rĩa mĩaka mĩingĩ-rĩ, Bibilia yugaga ũũ: “Ũguo noguo Nuhu ekire; maũndũ marĩa mothe aathirũo nĩ Ngai eke, noguo ekire.”—Kĩambĩrĩria 6:22.

12. Nĩ rĩ wathĩki witũ ũtũmaga ngoro ya Jehova ĩkene?

¹² Jehova aiguaga atĩa rĩrĩa twathĩka twĩyendeire? Kiugo gĩake kiugaga atĩ tweka ũguo nĩ ‘tũkenagia ngoro yake.’ (Thimo 27:11) Hihi wathĩki witũ kũna nĩ ũkenagia ngoro ya Mwathani Mũnene wa thĩ na igũrũ? Ĩĩ, nĩ ũmũkenagia—na arĩ na itũmi njega cia gũtũma akene! Jehova aatũmbire tũrĩ na wĩyathi. Ũguo nĩ kuuga atĩ tũrĩ na wĩyathi wa gũthuura; no tũthuure gwathĩkĩra Ngai, kana tũthuure kũmũremera. (Gũcokerithia Maathani 30:15, 16, 19, 20) Rĩrĩa twathuura twĩyendeire gwathĩkĩra Jehova, na rĩrĩa tweka ũguo nĩũndũ wa kwenda Ngai kuuma ngoro-rĩ, nĩ tũtũmaga Ithe witũ wa igũrũ akene  mũno. (Thimo 11:20) Ningĩ gwĩka ũguo nĩ gũthuura njĩra ĩrĩa njega mũno ya ũtũũro.

13, 14. Nĩkĩ kĩngĩtũma kwĩrũo atĩ maathani ma Ngai “ti maritũ,” na ũndũ ũcio ũngĩgerekanio na kĩĩ?

¹³ Mũtũmwo Johana atwĩraga ũndũ wa gũtũũmĩrĩria mũno igũrũ rĩgiĩ mawatho ma Jehova: “Maathani make matirĩ thĩna.” Kiugo gĩa Kĩgiriki kĩrĩa gĩtaũrĩtwo “thĩna” thĩinĩ wa 1 Johana 5:3 kiugĩte “ũritũ.” * Ũtaũri ũngĩ wa Bibilia uugaga ũũ mũhari-inĩ ũcio: “Maathani make ti maritũ.” (The Holy Bible in Gĩkũyũ Language, 2007) Maathani ma Jehova nĩ ma kĩhooto na ti ma kũhinyĩrĩria andũ. Mawatho make ti maritũ mũno ũndũ andũ matarĩ akinyanĩru matangĩhota kũmaathĩkĩra.

¹⁴ No tũheane ngerekano ĩno. Mũrata waku akwĩhoe ũmũteithie gũthama. Arĩ na mĩrigo mĩingĩ ĩrabatara gũthamio. Ĩmwe nĩ mĩhũthũ na no ĩkuuo nĩ mũndũ ũmwe, no ĩngĩ nĩ mĩritũ na no ĩkuuanĩirũo nĩ andũ erĩ. Mũrata waku agathuura mĩrigo ĩrĩa arenda wee ũkuue. Hihi no akwĩre woe mĩrigo ĩrĩa aramenya nĩ mĩritũ mũno ũtangĩhota kuoya? Aca. Ndangĩenda uunĩke mũgongo kana ũtihio ũkĩgeria kũmĩkuua wĩ wiki. Na njĩra o ta ĩyo-rĩ, Ngai witũ ũrĩ wendo na tha nyingĩ ndatwĩraga twathĩkĩre maathani aramenya nĩ maritũ mũno kũhingia. (Gũcokerithia Maathani 30:11-14) Ndarĩ hĩndĩ angĩtwĩra tũkuue mũrigo mũritũ ta ũcio. Jehova nĩ oĩ maũndũ marĩa tũngĩhota na marĩa tũtangĩhota, tondũ “we nĩoĩ ũũmbe ũrĩa twombirũo; nĩaririkanaga atĩ ithuĩ tũrĩ o rũkũngũ.”—Thaburi 103:14.

15. Nĩkĩ kĩngĩtũma tũkorũo na ma atĩ maathani mothe ma Jehova nĩ ma gũtũguna?

 ¹⁵ Hatarĩ nganja maathani ma Jehova ti maritũ o na hanini; nĩ ma gũtũguna. (Isaia 48:17) Nĩ ũndũ ũcio-rĩ, Musa nĩ eerire Aisiraeli a tene ũũ: “Nake Jehova agĩtwatha atĩ tũrũmagĩrĩre irĩra icio ciothe cia watho, na twĩtigagĩre Jehova Ngai witũ, nĩ getha tuonage wega hĩndĩ ciothe, nĩguo atũmenyagĩrĩre tũtũũre muoyo, o ta ũrĩa gũtariĩ ũmũthĩ.” (Gũcokerithia Maathani 6:24) O na ithuĩ no tũkorũo na ma atĩ Jehova atũheete mawatho make nĩgetha tũgunĩke tene na tene. Hihi na ma Jehova no atwĩre twĩke ũndũ ũgũtũthũkia? Jehova nĩ Ngai ũrĩ ũũgĩ mũingĩ mũno. (Aroma 11:33) Kwoguo nĩ oĩ kĩrĩa kĩega biũ na ithuĩ. Jehova ningĩ nĩwe kĩonereria kĩrĩa kĩega mũno kĩa wendo. (1 Johana 4:8) Maũndũ marĩa mothe ekaga na akoiga matongoragio nĩ wendo, ngumo yake ĩrĩa nene mũno. Nĩguo mũthingi wa maathani mothe marĩa aheaga ndungata ciake.

16. Nĩkĩ kĩngĩtũma tũhote gũtũũra tũrĩ aathĩki o na akorũo nĩ tũrahatĩkwo nĩ thĩ ĩno njũru na mĩerekera ya kwaga gũkinyanĩra?

¹⁶ Ũguo ti kuuga atĩ gwathĩkĩra Ngai nĩ kaũndũ kahũthũ. No mũhaka tũhũrane na mĩerekera ya thĩ ĩno njũru, ĩrĩa ‘ĩtũire ĩnyitĩtwo nĩ ũcio mũũru.’ (1 Johana 5:19) Ningĩ no mũhaka tũhũrane na kwaga gũkinyanĩra gwitũ, kũrĩa gũtũmaga kaingĩ tuune mawatho ma Ngai. (Aroma 7:21-25) No wendo witũ harĩ Ngai no ũtoorie. Jehova nĩ arathimaga arĩa mendaga kuonania wendo wao harĩ we na njĩra ya kũmwathĩkĩra. Nĩ aheaga “arĩa mamũiguaga” roho wake mũtheru. (Atũmwo 5:32) Roho ũcio ũtũmaga tũgĩe na maciaro mega mũno—ngumo njega iria ingĩtũteithia gũtũũra tũmwathĩkagĩra.—Agalatia 5:22, 23.

17, 18. (a) Tũgũthuthuria ũndũ ũrĩkũ thĩinĩ wa ibuku rĩrĩ, na twagĩrĩirũo kũririkana atĩa tũgĩka ũguo? (b) Gĩcunjĩ gĩkĩ kĩrũmĩrĩire gĩkwarĩrĩria ũndũ ũrĩkũ?

 ¹⁷ Thĩinĩ wa ibuku rĩrĩ-rĩ, tũgũthuthuria mawatho ma Jehova na mĩtugo ĩrĩa ĩmũkenagia na maũndũ mangĩ marĩa monanagia wendi wake. Tũgĩthuthuria-rĩ, nĩ tũkũbatara kũririkana maũndũ maigana ũna. Nĩtũririkane atĩ Jehova ndatwĩraga tũrũmĩrĩre mawatho make kĩa hinya; endaga tũmwathĩkĩre na kwĩyendera kũrĩa kuumaga ngoro thĩinĩ. Tũtikariganĩrũo atĩ Jehova aratwĩra tũtũũre na njĩra ĩgũtũrehera irathimo nyingĩ mũno rĩu na ĩtũtongorie muoyo-inĩ wa tene na tene mahinda mokĩte. Ningĩ tuone wathĩki witũ wa ngoro yothe kũna ũrĩ mweke wa bata wa kuonia Jehova atĩ nĩ tũmwendete mũno.

¹⁸ Nĩgetha tũhote kũmenya wega na ũũru-rĩ, Jehova na njĩra ya wendo nĩ atũheete thamiri. No rĩrĩ, nĩguo thamiri ĩhote gũtũtongoria wega-rĩ, nĩ ĩrabatara kũmenyerio, o ta ũrĩa gĩcunjĩ gĩkĩ kĩrũmĩrĩire gĩkwarĩrĩria.