Nĩ tũtuuragwo mũno rĩrĩa mũndũ twĩtainwo kana mũrata witũ eherio thĩinĩ wa kĩũngano nĩ ũndũ wa kwaga kwĩrira mehia. Ũrĩa twathĩkagĩra ũtongoria wa Bibilia ũndũ-inĩ ũcio no wonanie ũrĩa wendo witũ harĩ Ngai ũigana o hamwe na harĩa wĩhokeku witũ harĩ mũbango wake ũkinyĩte. * Ta wĩcirie ũhoro wa ciũria imwe ciĩgiĩ ũndũ ũcio.

Twagĩrĩirũo kuona mũndũ mweherie thĩinĩ wa kĩũngano atĩa? Bibilia yugaga ũũ: “Mũndũ o na ũrĩkũ wĩtagwo mũrũ wa Ithe witũ-rĩ, angĩkorũo nĩ mũhũri-maraya, kana arĩ wa riitho iraya, kana e mũhoi-mĩhianano, kana e mũrumani, kana mũndũ ũrĩagwo nĩ njohi, kana mũhahanyi-rĩ, mũtigage gũthiĩ thiritũ na ũcio; ĩĩ-ni, o na mũtigage kũrĩanĩra na mũndũ ta ũcio.” (1 Akorintho 5:11) Ha ũhoro wĩgiĩ mũndũ o wothe ũregaga “gũikara ũrutani-inĩ wa Kristo,” tũthomaga ũũ: “Mũtikamũgwate ũgeni, o na mũtikamũgeithie; amu ũrĩa wamũgeithia nĩ kũgwatanĩra maagwatanĩra nake mawĩko macio make moru.” (2 Johana 9-11) Tũtinyitanagĩra na mũndũ mweherie thĩinĩ wa kĩũngano maũndũ-inĩ ma kĩĩroho kana mangĩ o mothe. Mnara wa Mlinzi wa Janũarĩ 1, 1982, karatathi-inĩ ka 17, uugĩte ũũ: “O kũũria tu mũndũ ‘Wĩ mwega?’ (Ũhoro waku?) no gũkorũo arĩ ikinya rĩa mbere rĩrĩa rĩngĩtũma andũ maambĩrĩrie kwaranĩria o na nginya matume ndũgũ. Hihi no twende kuoya ikinya rĩu rĩa mbere harĩ mũndũ mweherie thĩinĩ wa kĩũngano?”

Hihi nĩ harĩ bata gwĩthema biũ mũndũ mweherie thĩinĩ wa kĩũngano? Ĩĩ, nĩ ũndũ wa itũmi cigana ũna. Kĩa mbere, nĩ kuonania wĩhokeku harĩ Ngai na Kiugo gĩake. Tũtiathĩkagĩra Jehova o rĩrĩa arĩ ũhũthũ gwĩka ũguo tu, no nĩ nginya rĩrĩa arĩ ũritũ gwĩka ũguo. Wendo witũ harĩ Ngai ũtũmaga twathĩkĩre mawatho make mothe, tũkĩmenyaga atĩ nĩ Ngai wa kĩhooto na nĩ atwendete na atĩ mawatho make nĩ matũmaga tũgunĩke.  (Isaia 48:17; 1 Johana 5:3) Gĩa kerĩ, kwĩyeherania na mwĩhia ũtarenda kwĩrira nĩ gũtũgitagira kĩĩroho na gũkagitĩra mĩtugo iitũ, o hamwe na kĩũngano gĩothe na gũgatũũria rĩĩtwa rĩa Jehova rĩrĩ itheru. (1 Akorintho 5:6, 7) Gĩa gatatũ, kũrũmia gwitũ mawatho ma Bibilia o na no kũgune mũndũ ũcio weheretio thĩinĩ wa kĩũngano. Na njĩra ya kũnyita mbaru itua rĩa Kamĩtĩ ya cira-rĩ, no tũhutie ngoro ya mũndũ wĩhĩtie ũrĩa nginya hĩndĩ ĩyo wagĩte kũgarũrũka thutha wa gũteithio nĩ athuri a kĩũngano. Kũũrũo nĩ arata endete no kũmũteithie ‘ecokere,’ one ũritũ wa mehia make, na oe makinya ma gũcokerera Jehova.—Luka 15:17.

Ĩ angĩkorũo mũndũ twĩtainwo nĩ eherio thĩinĩ wa kĩũngano? Hĩndĩ ta ĩyo-rĩ, ũkuruhanu mũnene wa famĩlĩ no ũrehe igerio inene rĩa wĩhokeku. Twagĩrĩirũo kuona mũndũ twĩtainwo nake weheretio thĩinĩ wa kĩũngano atĩa? Tũtingĩgweta thĩinĩ wa ibuku rĩrĩ maũndũ mothe marĩa makonainiĩ na ũndũ ũcio, no rekei twĩcirie ũhoro wa maũndũ merĩ ma mũthingi.

Mahinda mangĩ-rĩ, mũndũ ũcio mweherie thĩinĩ wa kĩũngano no akorũo aikaraga na aciari ake na ariũ na aarĩ a nyina. Tondũ kweherio thĩinĩ kĩũngano gũtiratũma atige gũkorũo arĩ wa famĩlĩ yao-rĩ, maũndũ ma o mũthenya thĩinĩ wa famĩlĩ no makorũo o magĩthiĩ na mbere. O na kũrĩ ũguo-rĩ, na njĩra ya mĩthiĩre yake, mũndũ ũcio nĩwe wĩthuurĩire gũthũkia ũkuruhanu wa kĩĩroho gatagatĩ-inĩ gake na Akristiano arĩa angĩ thĩinĩ wa famĩlĩ yao. Kwoguo andũ a famĩlĩ yao arĩa ehokeku matingĩthiĩ na mbere kũnyitanĩra nake maũndũ-inĩ ma kĩĩroho. Kwa ngerekano-rĩ, angĩkorũo mũndũ weheretio thĩinĩ wa kĩũngano arĩ ho rĩrĩa famĩlĩ ĩrerũta Bibilia-rĩ, agĩrĩirũo gũkira. O na kũrĩ ũguo-rĩ, angĩkorũo ũcio weheretio thĩinĩ wa kĩũngano nĩ mwana mũnini, wĩra wa kũmũruta na kũmũrũnga no wa aciari ake. Kwoguo-rĩ, aciari marĩ na wendo no magĩe na mũbango wa kwĩruta Bibilia na mwana ũcio. *—Thimo 6:20-22; 29:17.

Mũndũ ũcio mweherie thĩinĩ wa kĩũngano no akorũo ndaikaraga kwao mũciĩ. O na gũtuĩka rĩmwe no tũbatare kũrũmbũiya  maũndũ ma famĩlĩ twĩ hamwe-rĩ, tũtiagĩrĩirũo gũkoragwo hamwe kaingĩ. Akristiano ehokeku matiethaga ciĩgwatio nĩguo makorũo hamwe na andũ ao arĩa meheretio thĩinĩ wa kĩũngano arĩa mataikaraga nao mũciĩ. Ithenya rĩa ũguo-rĩ, wĩhokeku wao harĩ Jehova na ithondeka rĩake ũtũmaga marũmie mũbango wa Kĩĩmaandĩko wa kweheria mũndũ thĩinĩ wa kĩũngano. Mũthiĩre wao wa wĩhokeku wonanagia atĩ nĩ marenda mũndũ ũcio wĩhĩtie ateithĩke na ningĩ mũthiĩre ũcio no ũmũteithie agunĩke nĩ kũrũithio kũu. *—Ahibirania 12:11.