ŨHORO MUONGERERE
Tooria Mũtugo wa Gwĩkina
Gwĩkina nĩ mũtugo ũthũkagia mũndũ kĩĩroho, na ũgatũma akũrie mĩerekera ya kwĩyenda ĩrĩa ĩtũmaga agĩe na meciria matarĩ matheru. * Mũndũ ũmenyerete gwĩkina no akinyĩrĩrũo nĩ kuona andũ arĩa angĩ ta arĩ kĩndũ o gĩa kũhũthĩrũo tu kũniina thuti cia ngomanio. Agakinyĩrĩrũo nĩ kuona ngomanio ta arĩ o ya kweheria thuti gwa kahinda kanini, no ti gĩĩko gĩa kuonania wendo gatagatĩ-inĩ ka andũ erĩ. Gwĩkina kweheragia thuti icio o gwa kahinda kanini. Ũũma nĩ atĩ handũ ha gũtũma ciĩga cia ũciari ciikare ta ikuĩte ũndũ-inĩ wĩgiĩ “ũmaraya, na meciria mathũku, na thuti njũru [cia ngomanio],” gwĩkina nĩ kwarahũra kwarahũraga thuti icio.—Akolosai 3:5.
Mũtũmwo Paulo aandĩkire ũũ: ‘Endwa akwa, nĩtwĩtheragiei tũtiganage na ũndũ o wothe ũrĩa ũthũkagia mũndũ mwĩrĩ o na kana roho, tũkĩhingagie ũhoro witũ wa gũtuĩka atheru, o tũgĩĩtigagĩra Ngai.’ (2 Akorintho 7:1) Angĩkorũo nĩ ũrona arĩ ũndũ mũritũ gwathĩkĩra ciugo icio-rĩ, ndũgakue ngoro. Jehova ‘aikaraga ehaarĩirie kuohanĩra’ na gũteithia hingo ciothe. (Thaburi 86:5; Luka 11:9-13) Ũũma nĩ atĩ, gũkorũo ũgĩcukwo nĩ ngoro yaku, na gũkorũo ũgĩĩkĩra kĩyo gũtiga mũtugo ũcio, o na akorũo rĩmwe nĩ ũcokagĩrĩra mũtugo ũcio-rĩ, nĩ kuonania atĩ ũrĩ na mwerekera mwega. Ningĩ ririkana atĩ, “Ngai nĩ mũnene kũrĩ ngoro ciitũ, agakĩmenya maũndũ mothe.” (1 Johana 3:20) Ngai ndaroraga o mehia maitũ tu, no onaga ũrĩa mũndũ e wothe atariĩ. Tondũ wa ũmenyi ũcio-rĩ, nĩ athikagĩrĩria hĩndĩ ĩrĩa tũramũthaitha atũiguĩre tha. Kwoguo ndũkananoge gũthiĩ mbere ya Ngai kaingĩ wĩnyihĩtie na njĩra ya mahoya, o ta ũrĩa kaana gathiaga harĩ ithe hĩndĩ ĩrĩa karĩ hatĩka-inĩ. Jehova nĩ egũkũhe thamiri theru. (Thaburi 51:1-12, 17; Isaia 1:18) O na kũrĩ ũguo-rĩ, nĩ ũkũbatara kuoya makinya marĩa magĩrĩire na maringaine na mahoya maku. Kwa ngerekano-rĩ, nĩ ũkwĩrutanĩria gwĩthema kwĩrorera, gũthikĩrĩria, kana gũthoma maũndũ ma ũũra thoni o hamwe na thiritũ njũru. *
Thĩna waku wa gwĩkina ũngĩthiĩ na mbere-rĩ, nĩ wega ũwarĩrĩrie na mũciari Mũkristiano kana mũrata mũgima kĩĩroho na ũkũrũmbũyagia. *—Thimo 1:8, 9; 1 Athesalonike 5:14; Tito 2:3-5.
^ kĩb. 1 Gwĩkina nĩ gũthugua thugua kana kũhambahambata ciĩga cia ũciari nginya mũndũ agakinya gĩturĩrĩrio ta kĩa ngomanio.
^ kĩb. 2 Famĩlĩ nyingĩ ciigaga kompiuta handũ harĩa ĩngĩonwo nĩ andũ othe arĩ ta ikinya rĩa kwĩgitĩra rĩrĩa ĩrahũthĩrũo. Ningĩ angĩ nĩ magũraga tabarĩra cia gũcunga maũndũ marĩa matagĩrĩire thĩinĩ wa kompiuta. No o na kũrĩ ũguo gũtirĩ tabarĩra ya kompiuta ĩngĩĩhokwo biũ.
^ kĩb. 1 Rora maũndũ mangĩteithia mũndũ gũtooria mũtugo wa gwĩkina thĩinĩ wa ũhoro ũrĩ na kĩongo “Vijana Huuliza . . . Ninaweza Kushindaje Zoea Hili?” thĩinĩ wa Amkeni! ya Novemba 2006, na ibuku Maswali Ambayo Vijana Huuliza—Majibu Yafanyayo Kazi, Mbuku ya 1, karatathi-inĩ ka 205- 211.
