HIHI nĩ wendete gũthiĩ kũndũ andũ macemanĩtie nĩguo makene marĩ hamwe?— Andũ nĩ makenagĩra gũthiĩ kũndũ ta kũu. Hihi Mũrutani Ũrĩa Mũnene no ende tũthiĩ kũndũ ta kũu?— Hĩndĩ ĩmwe Jesu marĩ na arutwo ake nĩ maathiire kũndũ kwarĩ na ũhiki. Jehova nĩ ‘Ngai mũkeni,’ kwoguo nĩ akenaga rĩrĩa twacemania na tũgakena hamwe na andũ arĩa angĩ na njĩra ĩrĩa yagĩrĩire.—1 Timotheo 1:11; Johana 2:1-11.

Thĩinĩ wa karatathi ka 29 ka ibuku rĩrĩ, nĩ tuonire atĩ Jehova nĩ aagayũkanirie Iria Itune, nĩguo Aisiraeli maringe mũrĩmo ũrĩa ũngĩ. Hihi nĩ ũraririkana ũndũ ũcio?— Thutha wa kũringa, maainire, magĩthũngũtha, na magĩcokeria Jehova ngatho. Andũ acio maakũngũĩire ũndũ ũcio marĩ hamwe. Nĩ maakenire mũno, na tũrĩ na ma atĩ o na Ngai nĩ aakenire.—Thama 15:1, 20, 21.

Thutha wa kĩndũ ta mĩaka 40, Aisiraeli nĩ maathiire gĩkũngũĩro-inĩ kĩngĩ kĩnene. No hĩndĩ ĩyo maathiire gũceerera andũ mataathathayagia Jehova. Andũ a kũu maathathayagia ngai ingĩ, na nĩ maakomanagia na andũ mataahikanĩtie nao. Hihi nĩ ũkuona ta warĩ ũndũ mwega gũthiĩ kũndũ ta kũu?— Jehova ndaakenirio nĩ Aisiraeli gũthiĩ kũu, na ũndũ ũcio nĩ watũmire amaherithie.—Ndari 25:1-9; 1 Akorintho 10:8.

 Bibilia ningĩ nĩ ĩtwĩraga ũhoro wa ikũngũĩro igĩrĩ cia mũthenya wa gũciarũo. Harĩ ikũngũĩro icio-rĩ, hihi nĩ haarĩ gĩa gũkũngũĩra mũthenya ũrĩa Mũrutani Ũrĩa Mũnene aaciarirũo?— Aca. Ikũngũĩro icio ciarĩ cia andũ mataatungatagĩra Jehova. Kĩmwe kĩarĩ gĩa gũkũngũĩra mũthenya ũrĩa Mũthamaki Herode Antipa aaciarirũo. Herode aarĩ mũthamaki wa gĩcigo kĩa Galili hĩndĩ ĩrĩa Jesu aatũũraga kũu.

Mũthamaki Herode nĩ eekire maũndũ maingĩ moru. Oire mũtumia wa mũrũ wa nyina akĩmũhikia. Mũtumia ũcio eetagwo Herodia. Johana Mũbatithania, ũrĩa warĩ ndungata ya Ngai, nĩ eerire Herode atĩ nĩ eekĩte ũũru nĩ kũhikia mũtumia ũcio. Herode ndaakenirio nĩ ũhoro ũcio. Nĩ ũndũ ũcio agĩathana Johana aikio njera.—Luka 3:19, 20.

Johana arĩ njera, mũthenya wa gũkũngũĩra gũciarũo kwa Herode nĩ wakinyire. Herode akĩhaarĩria iruga inene mũno. Na agĩta andũ aingĩ maarĩ na igweta. Makĩrĩa na makĩnyua, na magĩkena mũno. Nake mũirĩtu wa Herodia agĩũka, akĩambĩrĩria kũmainĩra ndaci. Andũ acio othe nĩ maakenirio mũno nĩwe nginya Mũthamaki Herode akiuga nĩ ekũmũhe kĩheo. Eerire mũirĩtu ũcio ũũ: “Kĩrĩa gĩothe ũkũhoya, nĩ ngũkũhe, o na angĩkorũo nĩ nuthu ya ũthamaki wakwa.”

 Hihi oigire aheo kĩĩ? Hihi oigire aheo mbeca, nguo thaka, kana nyũmba ta ya mũthamaki? Mũirĩtu ũcio ndaamenyaga kĩrĩa egwĩtia. Kwoguo agĩthiĩ kũrĩ Herodia, mami wao, akĩmũũria atĩrĩ: “Hoe kĩĩ?”

Herodia nĩ aamenete Johana Mũbatithania mũno. Kwoguo akĩra mũirĩtu wake etie kĩongo kĩa Johana. Mũirĩtu ũcio agĩcoka kũrĩ mũthamaki akĩmwĩra atĩrĩ: “Ngwenda ũhe o rĩu kĩongo kĩa Johana Mũbatithania kĩigĩrĩirũo thani-inĩ.”

Herode ndangĩendire kũũraga Johana tondũ nĩ aamenyaga atĩ Johana aarĩ mũndũ mwega. No tondũ Herode nĩ eeranĩire kĩheo, agĩĩtigĩra ũrĩa andũ acio angĩ mangĩeciririe oiga ndekũneana kĩongo kĩa Johana. Nĩ ũndũ ũcio mũthamaki agĩtũma mũndũ ũmwe athiĩ njera agatinie Johana kĩongo. Mũndũ ũcio agĩthiĩ na akĩrehe kĩongo kĩa Johana kĩigĩrĩirũo thani-inĩ, na akĩnengera mũirĩtu ũcio. Nake mũirĩtu ũcio agĩtwarĩra mami wao.—Mariko 6:17-29.

Gĩkũngũĩro kĩu kĩngĩ kĩgwetetwo nĩ Bibilia o nakĩo kĩarĩ kĩũru. Kĩarĩ kĩa mũthamaki wa Misiri. O na gĩkũngũĩro-inĩ kĩu, nĩ harĩ mũndũ mũthamaki ũcio aathanire atinio mũtwe. Thutha ũcio akiuga mwĩrĩ wake ũcuurio mũtĩ igũrũ nĩguo ũrĩo nĩ nyoni! (Kĩambĩrĩria  40:19-22) Nĩ ũkuona ta Ngai aakenirio nĩ ikũngũĩro icio cierĩ?— Hihi wee nĩ ũngĩendire gũkorũo ikũngũĩro-inĩ icio?—

Nĩ tũĩ atĩ maũndũ marĩa mothe marĩ thĩinĩ wa Bibilia maandĩkirũo harĩ na gĩtũmi. Bibilia ĩgwetete ikũngũĩro igĩrĩ tu cia mũthenya wa gũciarũo. Na ikũngũĩro-inĩ icio, nĩ gwekirũo maũndũ moru. Kwoguo-rĩ, ũngiuga nĩ kaũndũ karĩkũ Ngai aratũruta kegiĩ ikũngũĩro cia mũthenya wa gũciarũo? Hihi Ngai nĩ endaga tũkũngũĩre mũthenya wa gũciarũo?—

Ma nĩ atĩ, mahinda-inĩ maya gũtirĩ mũndũ ũtinagio kĩongo hĩndĩ ya ikũngũĩro ta icio. No ikũngũĩro cia mũthenya wa gũciarũo ciambĩrĩirio nĩ andũ mataarĩ athathaiya a Ngai ũrĩa wa ma. Ibuku rĩa The Catholic Encyclopedia, rĩkĩaria ũhoro wa ikũngũĩro cia mũthenya wa gũciarũo iria igwetetwo nĩ Bibilia, riugaga ũũ: “No andũ arĩa ehia tu . . . makũngũyagĩra mũthenya ũrĩa maaciarirũo.” Hihi wee no wende gũtuĩka tao?—

Ta reke twĩcirie ũhoro wa Mũrutani Ũrĩa Mũnene. Hihi nĩ aakũngũyagĩra mũthenya ũrĩa aaciarirũo?— Aca, hatirĩ handũ Bibilia igwetaga gĩkũngũĩro kĩa mũthenya ũrĩa Jesu aaciarirũo. Arutwo a Jesu a tene matiakũngũyagĩra mũthenya wake wa gũciarũo. Hihi nĩ ũĩ kĩrĩa gĩatũmire andũ mambĩrĩrie gũkũngũĩra gũciarũo kwa Jesu mũthenya wa Dicemba 25?—

Ibuku rĩtagwo The World Book Encyclopedia riugaga atĩ mũthenya ũcio wathuurirũo tondũ “nĩrĩo Aroma maakoragwo na gĩkũngũĩro kĩa ngai yetagwo Saturn kĩrĩa maakũngũyagĩra gũciarũo kwa riũa.” Kwoguo andũ makĩambĩrĩria gũkũngũyagĩra gũciarũo kwa Jesu mũthenya ũrĩa athathaiya a ngai cia maheeni maakoragwo na gĩkũngũĩro kĩao!

Nĩ ũĩ kĩrĩa kĩngĩtũma tuuge Jesu ndaciarirũo mweri-inĩ wa Dicemba?— Nĩ tondũ Bibilia yugaga atĩ hĩndĩ ĩrĩa Jesu aaciarirũo, arĩithi maaikarĩte nja ũtukũ makĩrĩithia. (Luka 2:8-12) Na gũtirĩ hĩndĩ  mangĩakorirũo maikarĩte nja Dicemba tondũ mweri-inĩ ũcio, bũrũri ũcio ũkoragwo na mbura na heho nyingĩ mũno.

Andũ aingĩ nĩ moĩ atĩ Jesu ndaaciarirũo mũthenya ũcio makũngũyagĩra Krismasi. O na nĩ moĩ atĩ mũthenya ũcio athathaiya a ngai cia maheeni nĩ maakoragwo na gĩkũngũĩro gĩtaakenagia Ngai. O na kũrĩ ũguo, andũ aingĩ no makũngũyagĩra Krismasi. Makenagio nĩ gĩkũngũĩro kĩu handũ ha gwĩciria ũrĩa Ngai akĩonaga. No githĩ tũtiagĩrĩirũo gũkenia Jehova?—

Kwoguo twagĩrĩirũo gũthiĩ ikũngũĩro-inĩ o iria tu ikenagia Jehova. No tũbange mahinda ma gũkenanĩra hamwe hĩndĩ ĩrĩa yothe tũngĩenda. Tũtiagĩrĩirũo gweterera mũthenya ta wa thigũkũ. Mahinda ta macio, no tũrĩe irio iria itũkenagia o na tũthaake tũrĩ hamwe. Hihi no wende ũndũ ta ũcio?— No mũbange na aciari aku kũgĩa na mahinda ta macio. Na githĩ ũcio ti ũndũ mwega?— No mũtanabanga, mwagĩrĩirũo kwamba kũrora kana ũndũ ũrĩa mũrenda gwĩka nĩ ũrakenia Ngai.