ITHUOTHE nĩ tũĩ atĩ andũ nĩ marwaraga, magakũra, o na magakua. Nginya ciana nĩ ikuaga. Hihi nĩ wagĩrĩirũo gwĩtigĩra gĩkuũ kana andũ arĩa makuĩte?— Hihi nĩ ũĩ mũndũ akua athiaga kũ?—

Gũtirĩ mũndũ ũmũthĩ ũrĩ wakua na agĩcoka muoyo nĩguo atwĩre kũrĩa andũ mathiaga makua. No hĩndĩ ĩrĩa Jesu, Mũrutani Ũrĩa Mũnene, aarĩ gũkũ thĩ, nĩ kwarĩ mũndũ ta ũcio. No twĩrute ũrĩa gũthiaga rĩrĩa andũ makua tũngĩthoma ũhoro wake. Mũndũ ũcio aarĩ mũrata wa Jesu, na aatũũraga gataũni-inĩ kaarĩ hakuhĩ na Jerusalemu, geetagwo Bethania. Eetagwo Lazaro, na mwarĩ wa nyina ũmwe eetagwo Maritha na ũcio ũngĩ Mariamu. Reke tuone ũrĩa Bibilia yugaga ũhoro wake.

Mũthenya ũmwe Lazaro nĩ aarwarire mũno. No hĩndĩ ĩyo, Jesu aarĩ kũraihu. Nĩ ũndũ ũcio Maritha na Mariamu magĩtũma mũndũ athiĩ ere Jesu atĩ Lazaro nĩ mũrwaru. Meekire ũguo tondũ nĩ maamenyaga atĩ Jesu no oke na amũhonie. O na gũtuĩka Jesu ndaarĩ ndagĩtarĩ, nĩ aahetwo hinya nĩ Ngai, na kwoguo nĩ angĩahotire kũhonia mĩrimũ ya mĩthemba yothe.—Mathayo 15:30, 31.

O na kũrĩ ũguo, Jesu atanathiĩ kuo, Lazaro nĩ aakuire. Jesu akĩra arutwo ake atĩ Lazaro arĩ toro, na atĩ nĩ egũthiĩ kũmũũkĩria. No arutwo matianyitire ũrĩa eendaga kuuga. Kwoguo Jesu akĩmeera atĩrĩ: “Lazaro nĩ akuĩte.” Nĩ ũndũ ũrĩkũ tũreruta wĩgiĩ gĩkuũ?— Tũreruta atĩ gĩkuũ nĩ ta toro mũnene. Mũndũ akua nĩ ta akoragwo arĩ toro mũnene ũtarĩ na kĩroto.

 Thutha-inĩ Jesu nĩ aathiire mũciĩ kwa Maritha na Mariamu. Andũ aingĩ arĩa maarĩ arata a famĩlĩ ĩyo maarĩ kuo. Mookĩte kũũmĩrĩria Maritha na Mariamu nĩ ũndũ wa gĩkuũ kĩa Lazaro. Rĩrĩa Maritha aaiguire atĩ Jesu nĩ gũka aroka, agĩthiĩ kũmũtũnga. Thutha wa kahinda kanini, Mariamu o nake agĩthiĩ kũrĩ Jesu. Aathiire akĩĩgũithia magũrũ-inĩ ma Jesu akĩrĩraga, arĩ na kĩeha kĩingĩ mũno. O na andũ angĩ nĩ marũmĩrĩire Mariamu makĩrĩraga.

Mũrutani Ũrĩa Mũnene akĩũria kũrĩa maaigĩte Lazaro. Nao andũ acio makĩmũtwara harĩa Lazaro aaigĩtwo ngurunga-inĩ. Rĩrĩa Jesu onire andũ othe makĩrĩra, nake akĩambĩrĩria kũrĩra. Nĩ aamenyaga ruo rũrĩa mũndũ aiguaga rĩrĩa akuĩrũo nĩ mũndũ endete.

Na tondũ ngurunga ĩyo yahingĩtwo na ihiga, Jesu akĩmeera atĩrĩ: “Eheriai ihiga.” Hihi meekire atĩa?— Maritha ndoonaga ũrĩ ũndũ mwega kũrĩeheria. Oigire ũũ: “Mwathani, no mũhaka akorũo nĩ aranunga rĩu, tondũ aninĩte thikũ inya.”

No Jesu akĩmwĩra atĩrĩ: “Githĩ ndikwĩrire atĩ wetĩkia nĩ ũkuona riri wa Ngai?” Jesu eendaga kuuga atĩ Maritha nĩ angĩeyoneire ũndũ ũngĩagoocithirie Ngai. Hihi Jesu eendaga gwĩka atĩa? Ihiga rĩeherio, Jesu akĩhoya Jehova na mũgambo mũnene. Agĩcoka akiuga ũũ anĩrĩire: “Lazaro, uma!” Hihi wee nĩ ũkuona ta angĩahotire kuuma?—

Hihi wee no ũhote gũũkĩria mũndũ ũkomete?— Ĩĩ no ũhote kũmũũkĩrie ũngĩmwĩta wanĩrĩire. No hihi no ũhote gũũkĩria mũndũ ũkuĩte?— Aca, ndũngĩhota. O na ũngĩmwĩta wanĩrĩire biũ, ndangĩkũigua. Gũtirĩ mũndũ thĩinĩ wa thĩ ũngĩhota gũũkĩria mũndũ mũkuũ.

No Jesu no ahote, tondũ nĩ aheetwo hinya wa mwanya nĩ Ngai. Kwoguo rĩrĩa Jesu eetire Lazaro, nĩ gwekĩkire ũndũ wa magegania. O na gũtuĩka Lazaro aaikarĩte thikũ inya ngurunga-inĩ ĩyo arĩ mũkuũ, oimire arĩ muoyo! Akĩhota kũhuhia, gũthiĩ, o na kwaria! Jesu nĩ aariũkirie Lazaro.—Johana 11:1-44.

 Ta wĩcirie ũndũ ũyũ: Lazaro aakua aathiire kũ? Hihi nĩ harĩ kĩndũ kĩoimire mwĩrĩ-inĩ wake gĩgĩthiĩ gũikara kũndũ kũngĩ? Hihi roho wa Lazaro wathiire igũrũ? Hihi thikũ icio inya aarĩ igũrũ hamwe na Ngai na araika?—

Gũtirĩ kũndũ Lazaro aathiire. Ririkana atĩ Jesu oigire atĩ Lazaro nĩ gũkoma aakomete. Gũthiaga atĩa rĩrĩa mũndũ arĩ toro? Mũndũ akomete toro mũnene, ndamenyaga kĩrĩa kĩrathiĩ na mbere, kana tiguo?— Na rĩrĩa okĩra, ndangĩmenya egũkomete ihinda rĩigana atĩa nginya rĩrĩa arĩrora thaa.

Ũguo noguo andũ arĩa makuĩte mahaana. Gũtirĩ ũndũ o na ũmwe moĩ. Gũtirĩ ũndũ maiguaga. Na gũtirĩ ũndũ o na ũmwe mangĩka. Ũguo nĩguo Lazaro ahaanaga rĩrĩa aakuĩte. Gĩkuũ kĩhaana ta toro mũnene tondũ mũndũ ũkomete biũ ndamenyaga kĩrĩa kĩrathiĩ na mbere. Bibilia yugaga ũũ: “Arĩa makuĩte-rĩ, matirĩ ũndũ moĩ.”—Kohelethu 9:5, 10.

 Ningĩ ta wĩcirie atĩrĩ: Korũo Lazaro aathiĩte igũrũ thikũ icio inya-rĩ, githĩ ndangĩerire andũ ũhoro wa igũrũ?— Ningĩ korũo aarĩ igũrũ-rĩ, hihi Jesu nĩ angĩamũrutire kũndũ kwega ũguo amũcokie gũkũ thĩ?— Jesu ndangĩekire ũguo.

O na kũrĩ ũguo, andũ aingĩ moigaga atĩ mũndũ nĩ akoragwo na roho ũrĩ thĩinĩ wake, na atĩ rĩrĩa mũndũ akua roho ũcio ndũkuaga. Andũ acio moigaga atĩ roho wa Lazaro wathiĩte gũikaraga kũndũ kũngĩ. No ũguo tiguo Bibilia yugaga. Bibilia yugaga atĩ rĩrĩa mũndũ akua gũtirĩ kĩndũ gĩthiaga na mbere gũtũũra. Ngai ombire mũndũ wa mbere ‘na rũkũngũ rwa thĩ, agĩcoka akĩmũheeherera mĩhũmũ ya muoyo kũgerera marima ma iniũrũ rĩake, nake mũndũ ũcio agĩtuĩka mũndũ wĩ muoyo.’ Ningĩ Bibilia nĩ yugaga atĩ rĩrĩa Adamu eehirie, Ngai aamwĩrire ũũ: “Ũgacoka tĩri-inĩ; nĩ gũkorũo nĩkuo warutirũo; amu wee ũrĩ o rũkũngũ, ningĩ ũgacoka ũtuĩke o rũkũngũ.” Bibilia ĩcokaga ĩkoiga atĩ ciana ciothe cia Adamu nĩ ciagaire mehie na gĩkuũ kuuma kũrĩ Adamu.—Kĩambĩrĩria 2:7; 3:17-19; Aroma 5:12.

Ũndũ ũcio ũronania wega atĩ Adamu ndaarĩ kuo mbere ya kũũmbwo. Rĩrĩa aakuire, aatigire kwĩigua, na gũtirĩ ũndũ o na ũmwe aamenyaga. Gũtirĩ kĩndũ o na kĩmwe kĩoimire mwĩrĩ-inĩ wake gĩgĩthiĩ  na mbere gũtũũra. Na tondũ andũ nĩ maagaire mehia kuuma kũrĩ Adamu, Bibilia yugaga ũũ: “Roho ũrĩa wĩhagia nĩguo ũgakua.” Ũndũ ũcio ũronania atĩ rĩrĩa mũndũ akua, roho wake ndũthiaga na mbere gũtũũra.—Ezekieli 18:4.

Andũ amwe nĩ metigĩrĩte andũ arĩa akuũ. O na matiendaga gũkuhĩrĩria mbĩrĩra tondũ meciragia atĩ andũ arĩa akuũ nĩ marĩ maroho mangĩka andũ arĩa marĩ muoyo maũndũ moru. No hihi mũndũ mũkuũ no ahote gwĩka mũndũ ũrĩ muoyo ũndũ mũru?— Aca.

Andũ amwe nginya nĩ metĩkĩtie atĩ andũ arĩa akuũ nĩ metuaga ciũmbe cia roho na magoka gũceerera arĩa marĩ muoyo. Nĩ ũndũ ũcio nĩ maigagĩra andũ akuũ irio. No andũ arĩa mekaga ũguo matikoragwo metĩkĩtie maũndũ marĩa Ngai oigĩte megiĩ andũ akuũ. Tũngĩtĩkia ũrĩa Ngai oigĩte, tũtingĩtigĩra andũ arĩa akuũ. Na angĩkorũo nĩ tũkenaga nĩ ũndũ Ngai nĩ aatũheire muoyo, twagĩrĩirũo gwĩkaga maũndũ marĩa makenagia Ngai.

No wahota kwĩyũria ũũ: ‘Hihi Ngai nĩ akaariũkia ciana iria ikuĩte? Hihi nĩ endaga gũgaaciriũkia?’ Gĩcunjĩ kĩrĩa kĩrũmĩrĩire nĩ kĩarĩrĩirie ũndũ ũcio.